Asturian Weird Foundation

La repuesta ye ‘dafechu non’ (digo yo), pero rescampla que lo primero que fizo Beneditu XVI al aportar a los Estaos Xuníos fuere pidir perdón polos casos de cures pederastes. (Cuenten qu’hai al rodiu de diez mil víctimes d’abusos sexuales a manos de cures católicos nesi país, y que foi Ratzinger, enantes de mutar en Beneditu, ún de los cabezaleros vaticanos que más torgues punxo a la investigación del asuntu).

El casu ye que, restolando pela Internet pedófila, atopéme con que NAMBLA existe. Yo pensaba que yera un inventu de los de South Park, que na versión española camudaben el sentíu de les sigles orixinales de l’asociación na que quería ingresar Eric Cartman como ‘Niños, Aman a Maricas, Bonita Libertad Americana’; cuando en realidá ye ‘North American Man/Boy Love Association’, y esiste. Ye un sindicatu pedófilu de verdá.

Según viera perhí, esta hestoria del NAMBLA naz venceyáu al esporpolle del movimientu gay de San Francisco nos 70, y clamaben pola llegalización de les relaciones sexuales con menores consentíes. Diben d’abanderaos de la llibertá sexual, como si la igualdá nun fuera condición necesario pala llibertá. El casu ye qu’al movimientu de lliberación gay acabó separtándose d’esta xente, que llegó formar parte, pente una década, d’una Internacional Gay.

Pero NAMBLA ye’l casu más conocío de sindicatu pedófilu, pero non l’únicu. Hailos per tol Internet y per tol mundu, y apurren ’servicios’ como campamentos de branu pa guaḥes, boletines informativos, y mapes del mundu nos que s’informa de les edaes mínimes pa caltener relaciones sexuales consentíes con menores nos estremaos países. Va un tiempu, incluso hubo un partíu pedófilu n’Holanda que, a la fin, nun llegó a presentase a les elleiciones.

Ya sé que ye vieyu, pero me presta pola vida esti videu. Nun sé si-yos lo venderíen en Super8 a los primerizos col SerPadres d’entós, pero ye que tien un nunsequé esta madre sensata y comprensiva… “Perdón por habeme entrometío na to privacidá…” pártome.

Via Yetube (me paez) enterámonos de la esistencia de turrebruno y sus videos fake. Miguel Bose canta por Vicente Díaz, Alejandro Sanz por La Pastorina… ye como lo del Will Smith enfiléu, y fai risa.

Brian Peppers, pal que nun lo conoza, ye esti paisanu qu’apaez a manzorga. Dende la so apaición n’internet acullá pel 2005, tien inspirao abondes creaciones que faen más o menos gracia, que lu convirtieron nun fenómenu viral de primer orde, y tamién ún de los más políticamente incorreutos por mor de que na mayoría los casos trátase de facer chancies d’un home enfermu.

Conocíu como l’home más feu del mundu, cuerren perhí abondes esplicaciones a la so deformidá, y versiones estremaes de cómo apaeció la so semeya (agora esborrada) nel rexistru públicu de molestadores sexuales del so estáu de nación (Ohio). Dende entós p’acá, Peppers tien protagonizao dellos YTMND, dende esti que ye’l primeru, hasta otros más curraos con gifs animaos y la so propia banda sonora.

Sicasí, la fiebre Brian Peppers vien amenorgándose y surden los llamaos al respetu a esti home que, sigún cuenten nesti YTMND (La verdá so Brian Peppers), nun merez tantu escarniu.

El tuning ye maraviosu. ‘Asturies ye tuning’, diz una peña de tuneros pravianos (me paez). Y lo cierto ye que mola ver cómo caún fai del so coche una estensión de sí mesmu. Básicamente, el coche tuneáu ye’l reflexu del propietariu. Hailos a los que-yos presta mirar más pal interior, y gasten más perres en centralites y manguitos, en potenciar el motor… Otros son más elegantes, y opten por pequeños retoques estéticos y mecánicos que fain de la so máquina dalgo más averáu al esclusivu megapepino que yos hubiere prestao diseñar. Otros, prefieren que la peña quede ablucada al so pasu, y entós convierten el so utilitariu de gasolina nun albuertu dignu de les pistes d’Autosport Suárez.

Estos últimos son los más prestosos… son los que van darréu pal Feuvert o la seición d’automóvil del Eroski en cuantes qu’aparquen nel Parque Principado. Enllenen el coche de pegatines cromaes y queden hipnotizaos con cualisquier trebeyu que lleve la palabra NEON en dalgún llau.

Hai un clásicu na rede que rinde homenaxe a esti tipu de tuning al que los aficionaos llamen truñing.  Una visita a Cutre Tuning son unes cuantes rises garantizaes.

Pero lo que ya ye una vuelta de tuerca son negocios como los d’esti paisa d’Arizona que vende, a 100 dólares, un artefautu patentáu qu’asemeya a la llave de los artículos de cuerda, ya fueren xuguetes o  relós despertadores.

Dalgún que otro aventáu pue tar agora percorriendo carreteres con esti dispositivu, la WindUpKey, que se mueve pa simular que’l to coche ye de coña. Esto ye, lo que se llama, I+D+i. Con croquis d’instalación y too. Una pasada.

Non, nun voi falar equí de milicos asesinos arxentinos sinon de la Triple A mexicana: posiblemente, la lliga de wrestling más friqui que te pueas echar a la cara.

Si el Conseyu Mundial de la Llucha (CMLL) ye la primer división de la llucha llibre circense en México (d’au saliera Rey Misterio, el de la WWE, y na que combate nuestru Asturiano), la Triple A ye dalgo asina como la serie B d’esti tipu de shows. Con tres grandes eventos al añu, tienen en nómina un garrapiellu de lluchadores y edecanes (azafates) de los más ablucante.

Na semeya d’enriba podeis contemplar la forma física de Brazo de Plata. Pero lo más espectacular son los lluchadores ‘exóticos’, que ye la manera que tien la triple AAA de llamar a los sos luchadores travestis. Equí vos dexo dos exemplos: May Flower y Cassandro,anque hai dalgún más perhí, como Pimpinela Escarlata, de la que nun atopé semeyes. Más información, na páxina de la Triple A.