Asturian Weird Foundation

Aconceyáu na sala de xuntes de la facultá de filoloxía de la Unversidá d’Uviéu, el xuráu del premiu Asturian Weird de les Lletres 2008 alcuerda por unanimidá concede-ylu al divulgador don César Vidal, pol so gran llabor en restolar lletres, hasta’l puntu de poder firmar 55 llibros dende 2005 (ún cada venti díes).

Magar de les crítiques pola duldosa veracidá y rigor de los sos escritos, con esti premiu se quier reconocer su capacidá p’apaecer en toles estayes de la Fnac, a escepción de les gastronómiques (al tiempu) y l’estante dedicáu a ediciones asturianes.

Gracies al so llabor, tantu dirixendo un programa diariu d’humor na cadena Cope, otru de música country na cadena 100 y un espaciu na tele de Federico Jiménez Losantos (Libertad Digital), una bultable audiencia se sienta, increyiblemente, culta ya informada.

Énte la imposibilidá de saber quién ye l’auténticu Cesar Vidal, ponemos les dos semeyes.

Compártelo

Aconceyáu nos baños del Alsa, el xuráu del Premiu Asturian Weird de Ciencies Sociales 2008 aprebó güei concede-y el galardo al Museum os Menstruation and Women’s Health, en llínia dende va 14 años, pol so llabor nel espardimientu de too tipu d’información alrodiu d’una cuestión que marca la vida de media humanidá.

(Nota seria: Magar qu’esti premiu ye de coña, lo cierto ye qu’esti sitiu sí que merecería reconocimientu. Contién munchísima información sobre dalgo tan importante como la regla. Dende publicidá de va décades, a datos sobre salú y constumes perinteresantes. Ye un sitiu bien recomendable).

Compártelo

Aconceyáu nel párking del parque principáu, el xuráu del Premiu Asturian Weird d’Humanidaes 2008 decidió por unanimidá concede-y el galardón a ‘Goatse.cx‘ po la so impagable y pionera contribución a enantar les perspectives d’Internet como vía de conocimientu del bizarrismu popular.

La so apaición a finales de la década de 1990 abrió perspectives nueves de lo que ye una nueva cultura de mases y globalizada, apurriendo un mensaxe edonista al mundu que tresciende llingües y cultures pa sentar les bases del conteníu viral d’anguañu.

Compártelo

Aconceyáu nun kebab, el xuráu del premiu Asturian Weird de Ciencia y Teunoloxía 2008, acuerda concede-y el galardón al doctor Jorn Ege Siana.

Con esta distinción, el xuráu de la Asturian Weird Foundation quier reconocer el descomanáu llabor del doctor Ege Siana nel desendolcu d’una técnica afayadiza p’apurrir un tamañu correutu del miembru viril de homes de toles races y cultures. El doctor Ege Siana (aka doctor Pene) punxo tola so esperiencia y conocimientu p’apurrir una solución a un problema social de primer índole, facilitando col so JES Extender, asoleyáu en 1996, una ferramienta fácil d’usar que fai innecesario el trauma de la intervención quirúrxica a los miles d’homes de tol mundu que nagüen por masuñase el pene ensin sentir vergoña.

El JES extender ye anguañu un sistema popular, imitáu en tol mundu,  pero que fai felices a miles de pacientes que cada día enanten un poco más la so pirulina gracies a los fierros estratéxicamente ocultos embaxu’l calzonciellu.

Compártelo

Aconceyáu nun cámping, el xuráu del premiu Asturian Weird de Cooperción 2008 da anuncia de la so decisión de conceder el galardón, a títulu póstumu, al padre Marcial Maciel, sacerdote y supuesto pedófilu, pol so inconmensurable llabor na creación d’una elite pija y fundamentalista católica a la que s’asocien gobernantes, grandes empresarios y conspiradores de medio mundu al traviés de la simpar organización Lexonarios de Cristu.

Na semeya, el padre Maciel arrodiáu de rapazonos.

Compártelo

Aconceyáu nun club d’alterne, el Xuráu del Premiu Asturian Weird de les Artes 2008, integráu por D. Amino Meladás, D. Serafín Finado, Dº Marianita Metemelá, D. Augusto Fritz-Cat Johnson, presidíu por Su Excelencia Ilustrísima D. Capitán Alimerca; acordó otorgar el Premiu Asturian Weird de les Artes 2008 al señor Techno Viking, pola so contribución al enantamientu de la danza contemporánea como fenómenu viral de mases. N’andecha coles primeres figures del friquismu universal, les coreografíes creaes pol maestru Viking beben de la tradición de la danza nerd que tuviere un referente claro na obra de Carlton Banks a entamos de la pasada década, tresformada agora nun fenómenu viral d’enorme potencialidá artística pa la dignidá del ser humanu.

Compártelo