Warning: Use of undefined constant sf_theme_js - assumed 'sf_theme_js' (this will throw an Error in a future version of PHP) in /homepages/45/d261249874/htdocs/blogs/wp-content/themes/masive-news/functions.php on line 36
Estoxu: “La revolución de la cultura compartida” | Ensidesa

Entamu » Cultura Llibre »Estoxu » Post:

Estoxu: “La revolución de la cultura compartida”

07/03/2012 Cultura Llibre, Estoxu Comments Off on Estoxu: “La revolución de la cultura compartida”

Reportaxe publicáu nel númberu de marzu de 2011 d’Atlántica XXI

Un par de toques cosméticos valieron pa que’l Gobiernu central algamare sofitos suficientes colos qu’aprobar la ‘llei Sinde’, en realidá una ‘Disposición Final Segunda’ que se ‘coló’ na Llei d’Economía Sostenible.
Nes selmanes previes, talamente llegó a presentase la reforma como la única alternativa pa salvar a la industria cultural de les zarpes de los consumidores de los sos productos. Conceptos como propiedá intelectual, derechos d’autor y copyright, apaecíen entemecíos cola manutención d’una masa de ‘creadores’ víctimes d’un presuntu ‘gratis total’.
La ‘llei Sinde’ escuende en realidá la modificación de tres lleis col envís de permitir la creación d’una comisión dependiente del Ministeriu de Cultura que pueda zarrar determinaes web, dalgo qu’hasta agora yera cosa de xueces, magar que les decisiones d’éstos nun coincidíen coles pretensiones condenatories de la gran industria cultural y les entidaes xestores de derechos.
Trátase de frenar les descargues n’internet “cambiando al árbitru en mitá del partíu porque nun gusten les sos decisiones”, que diría l’abogáu y ún de los representantes ‘de los internautes’ na citada batalla mediática, David Bravo.
El resultáu de la reforma presta a pocos. “El problema ye de fondu, y ta mal enfocáu” porque “parte d’un modelu de mercáu del qu’esperen siguir manteniendo los beneficios como si’l mundu nun evolucionara”, afirma Iria Rodríguez, del grupu de folk Xera. Como ella, Jorge Otero, de Stormy Mondays, considera que deberíen entamase alternatives llegales más acionaes.


Dambos son exemplos d’artistes que dende un entamu pervieron que’l vieyu esquema d’edición y distribución de la música taba escosu depués d’un sieglu d’existencia, y decidieron prebar alternatives. Dambos grupos espublicen anguaño la so obra según les condiciones d’una llicencia Creative Commons. Esta ye una fórmula llegal na que l’autor esplicita al usuariu final, ensin intermediarios, qué usu permite pa la so obra, que podrá asina ser copiada y difundida llibremente embaxo eses condiciones. Asina s’espublicen discos, llibros, películes, los conteníos de Wikipedia, de los periódicos 20 Minutos y Diagonal o parte de la producción d’Al Jazeera, por exemplu.
“Dende que descubrimos internet lo primero que pensamos fue usalo pa que la xente escuche les nuestres canciones”, diz Jorge Otero alrodiu d’unos anicios con muncho d’intuición que se remonten a 1996. “Fuimos pioneros”, recuerda. Pela so parte, Iria Rodríguez, de Xera, apunta cierto enfoque ‘filosóficu’: “Creyemos que l’accesu a la cultura tien que ser llibre y el meyor mediu de difusión ye internet”, diz.
Esa ‘llibertá’ ye la que vien preconizando dende entamos de la década de 1980 el neoyorquín Richard Stallman, informáticu, hacker, doctor honoris causa por un bon garrapiellu d’universidaes, padre del sistema operativu GNU/Linux, del movimientu del software llibre ya inventor del conceptu del copyleft.


Nes décades últimes, Stallman y el so movimientu del Software Llibre desenvolvieron too un argumentariu éticu y xurídicu nel qu’enmarcar la realidá que los medios tecnolóxicos xeneraron nesti tiempu pa la difusión ya intercambiu d’obres intelectuales. Esa ‘filosofía’ ta nel orixe de fenómenos como Wikipedia o Wikileaks, ente otres.
Stallman, nuna serie de correos electrónicos, espón a esta revista la so convicción de que l’alderique que periódicamente surde alrodiu de los derechos d’autor y la propiedá intelectual, seya la llei Sinde, seya’l canon de la SGAE, nun respuende a más interés que’l d’una industria poderosa dedicada al negociu de “facer copies”. Si dalgo permite internet y les nueves tecnoloxíes dixitales, ye que caún puea facer copies de calidá de forma barata, fácil y rápida.
Asina, y d’esto tamién tan convencíos Jorge Otero e Iria Rodríguez, nun quedaría otra qu’amoldase a esa realidá. “Vienen tiempos revueltos pa la venta de música grabada, como llegaron pa munchos otros negocios que dexaron de selo”, diz el primeru. Pero Stallman nun lo ve tan claro: “hai qu’esperar que la transición se faga, pero como n’Exipto, ¡cuánta unión y esfuerzu fai falta pa derrocar a un imperiu malignu como’l de les empreses globales!”.


El pesimismu de Stallman se basa na realidá. “Nada, nun hai país que puea sirvir d’exemplu”, llamenta alrodiu d’unos Gobiernos que respuenden más a los intereses de determinaos ‘lobbies’ que a llexislar acordies cola realidá y cola “llibertá de los ciudadanos”. “El lobby del negociu cultural ta representáu por persones mui populares que pueden dañar muncho la imaxe de los partíos si los tienen en contra”, apunta Otero.
La propuesta del estaunidense paez responder en bona midida a munches de les entrgues que se llancen al rodiu d’esti asuntu. Básicamente, Stallman propón la llibertá pa compartir, ensin ánimu de lucru, copies d’obres d’entretenimientu, artístiques, científiques, biografíes, documentales… obres nes que la importancia del autor ye básica. El sistema, “de copyright comprometíu”, obligaría durante los años previos al pasu de la obra al dominiu públicu (plazu que s’acortaría enforma), a pidir permisu pa facer modificaciones y espublizar copies con ánimu de lucru.
Esto, que diba dar el preste llegal definitivu a les descargues n’internet, podría dir acompañáu d’un sistema, non ya pa ‘recompensar’ al artista pol fechu de que se comparta la so obra, porque “nun hai razón pa ello”, sinon pa incentivalu a siguir cola so actividá. Pa esto, Stallman nun ve mal imponer un ‘canon’ o tasa pública cuya recaudación se distribuya pente los autores de la obra.
Pero na so propuesta hai una diferencia básica con respecto al modelu español: “¡Abaxo la SGAE!”, brama Stallman sobre una entidá qu’amesta empreses editores y autores, como si tuvieren los mesmos intereses. Pa él, esi ‘canon’ tendría que ser xestionáu dende lo público, d’un mou tresparente. “La pregunta ye, ¿cómo sofitar a los artistes respetando la llibertá de toos? Evidentemente la SGAE nun ye la manera”.
Too esi sistema diba obligar, de xuru, a redimensionar la gran industria cultural global, pero Stallman entiende que non sólo nun diba afectar a les pequeñes empreses, sinon qu’ameyoraría los beneficios a los propios artistes, munches veces “ataos a contratos abusivos”. Asina, Stormy Mondays recuerda que foron seleccionaos gracies a la so presencia n’internet pal festival Woodstock, y en Xera indiquen que compartir les sos grabaciones permíte-yos “tocar en cualquier parte del mundu”.
¿Se puede esperar entós una ‘revolución’ de la industria cultural? Stallman cree que “si los Gobiernos siguen llexislando al dictáu de les grandes empreses globales, ¿quién nos diz que van aparar ehí?”. Dende lluéu, pa el, la llei Sinde nun ye un bon síntoma, anque dimita Alex de la Iglesia.
Pel momentu, esti reportaxe queda espublizáu embaxo llicencia Creative Commons, By-Sa (se puede copiar y redistribuir, citando al autor y espublizándolu nes mesmes condiciones).

Comentarios:

A tener en cuenta

Tol conteníu d'esti blog, nun siendo que se indique otra cosa, públicase embaxo la llicencia Creative Commons 3.0 CC-BY-NC-SA. La tipografía del logo ye obra de Tup Wanders y tien llicencia CC-BY.