Categoríes
Deportes

Nel día de la muyer, caña

Foto de Liz Kasameyer. CC-BY-NC

Alcordéme güei d’esti deporte del que supiera gracies a un reportaxe en La Vanguardia. Ye un deporte mayormente femenín y feminista, magar qu’haya periodistes con traza de mamón que se queden na superficialidá de los clixés machistes.

Cuenten na wikipedia qu’el xuegu enfrenta a dos equipos que patinen nuna mesma dirección per una pista ovalada formando un bloque. En cada equipu hai una ‘jammer’ que ye la que puntúa pal so grupu si ye capaz d’atravesar el bloque. El restu de les patinadores tienen, poro, que facer a un tiempu llabores d’ataque y defensa. Ye un deporte duru, mui rápidu y espectacular. De fechu, el so orixe ta nel ‘roller derby’ de los años 40 y 50, con competiciones amañaes y coreografiaes como les del pressing catch.

Pero esi orixe circense caltendríase nel ‘roller derby’ namás na importancia que se-y da a la estética de los equipos, una estética que nun ye frivolidá sinon una seña d’identidá cargada d’ideoloxía. El rollu riot girl, el feminismu y una actitú contestataria son elementos característicos d’un deporte nel qu’entamen a vese equipos mestos o masculinos.

N’España hai ya dellos clubs en Barcelona, Madrid, Tenerife, Mallorca… munchos coinciden nesti grupu en Facebook, pero nun topé nengún n’Asturies entá (si se animara’l Patín Areces…).

Na web rollergirl.ca hai muncha información, fotos, normes, material deportivu… too sobre’l roller derby.