Altuxa blogs

Zarrando webs pola oficialidá

Dangerous Piper — Wed, 07 May 2008 22:59:50 +0000

Con motivu del día les lletres asturianes, Altuxa.com va zarrar la so web pa pedir la oficialidá del asturianu na reforma del estatutu. Y sería bien prestosu poder esparder esta iniciativa a otros sitios. Y pa ello ficimos distintos códigos pa poder usalos en cualesquier web.

El métodu más cenciellu, que val pa los que nun tienen accesu a los ficheros de la so web, pero que si pueden editar plantíes, ye poner esti códigu entre les etiquetes y (facelo depués de les 12 de la nueche del xueves):

La web redirixira a esta páxina y nel enllaz d’abaxu dará accesu al sitiu pa quien quiera visitalu.

Pa los que tienen accesu al so servidor, disponen d’un script en PHP (incluí instruciones pa configuralo).

Los que usen WordPress tienen un plugin en dos versiones automáticu (si el to servidor ta configuráu cola hora d’Asturies) y manual (pa poder zarrar/abrir el blogue activando/desactivando’l plugin).

Y pa finar, una versión en JavaScript pa los que nun puedan usar PHP, pa más información visitái el wiki.

Cualesquier dulda, suxerencia y/o aportación será bien recibida ;-D

La semeya de la Pita de la Xunta ta fecha por Vity.

Altuxa yá tien wiki

Dangerous Piper — Sat, 12 Apr 2008 01:38:03 +0000

Tamos acabantes d’asoleyar Altuxa wiki, como el nome “orixinal” diz ye un wiki onde recoyer pequeños proyeutos n’asturianu tocantes al software llibre o la cultura llibre. Tamién ye onde diremos lliberando los pequeños desarrollos que faigamos pa desendolcu d’Altuxa.com. Amás pretende ser tamién un repositoriu d’imáxenes pa otros proyeutos wiki.

El guaḥe ta acabante de nacer, pero pocu a pocu esperemos que vaya medrando y, lo más importante, que seya d’utilidá.

Share-This n’Altuxa blogs

Dangerous Piper — Tue, 18 Mar 2008 18:20:59 +0000

Tamos acabantes d’instalar Share-This un plugin tornáu al asturianu por El Chicharru (tamién conocíu como El replicante), tenemoslo activáu en GyG pa probalu, si teneis problemes dexar comentariu.

Ta pa Ponga, Ubuntu de Ponga a Colunga

Dangerous Piper — Thu, 31 Jan 2008 11:36:03 +0000

Ta pa Ponga ye un blogue fechu en comuña por dellos usuarios d’Ubuntu col enfotu de poder ayudase y aprender coles sos propies esperiencies y pa dar a conocer esti “Linux fechu pa humanos”.

Altuxa blogs, abre pa blogs nuevos

Dangerous Piper — Fri, 25 Jan 2008 11:19:08 +0000

Tamos acabantes d’abrir el rexistru d’usuarios y blogs nuevos p’Altuxa blogs.

Esta historia entamó va un añu y unos meses, cuando entamamos a trastiar un pocu con WordPressµ, que nun ye más que la versión multi usuariu del famosísimu WordPress. La idea yera ver si somos quien a facer una comunidá tipo blogger o wordpress.com n’asturianu, y como escusa nació González y González.

La idea nun ye la d’ufiertar un serviciu de blogues gratuitos al usu. Pa eso hai yá servicios como’l de Nireblog. Pel momentu, el alta nel serviciu ye ‘manual’, esto ye: va ser un alministrador quien apruebe l’apertura del blogue acordies col interés del proyeutu candidatu. L’oxetivu, básicamente, ye dar soporte n’asturianu, con tola calidá que seya posible, a blogues temáticos que puean tar xestionaos por ún o dellos autores.

Depués de munches pruebes, y dellos cambeos importantes (llegamos a tar casi que un mes ensin actividá) podemos dicir que tamos nuna fase bastante estable del proyeutu, que podíemos dicir que sal d’una fase alpha pa entrar en beta (esto pa los mui geeks) anque presta más vhs como dicen los de chuza.

Enfin, que Altuxa blogs ye una comunidá pa blogs escritos n’asturianu, tol sistema funciona n’asturianu (dalgún mensaxe puede qu’entá salga n’inglés), ye de baldre y nun tien publicidá.

Ente les sos caracterítiques, inclúi soporte pa ḥ y Ḷḷ nel editor de testos. Esto ye pa los que nun pueden instalar el tecláu asturianu nel so sistema (Windows y Mac OSX). Son simplemente unos botones que permiten enxertar estes grafíes ensin tener que andar copia-pega.

El sistema permite esportar tol conteníu pa llevalu a otru blogue y tamién permite importar dende plataformes como Blogger, Blogware, LiveJournal, Movable Type, TypePad, otros WordPress y de feeds RSS.

Tien soporte pa incrustar video y audio, ye personalizble con estremaes plantíes y te puedes construir fácilmente la to barra llateral gracies a pequeños “widgets”. Tamién pueden utilizase plugins qu’añaden funcionalidá al blogue.

Anguaño tenemos mui poques plantíes y plugins (fuimos instalando según facía falta), de forma que quien quiera un diseñu que nun tea n’Altuxa.com tendrá qu’avisanos pa instalalo, hai munches plantíes pa WordPress.

Pel momentu ufrimos 10Mb d’espaciu (pa semeyes y ficheros).

Nesti blogue diremos dando anuncia de les novedaes y proyeutos nuevos que puean surdir de les idees nes que yá tamos trabayando dende Altuxa.com, qu’esperamos que sean unos cuantos y que sean d’utilidá.