González y González

Llevo tiempu oyendo falar de ‘marketing llingüísticu’ y nun sé si esti anunciu de Carlsberg va nesi sen… pero la verdá ye que ye l’amuesa de cómo una llingua minoritaria cómo’l gaélicu irlandés val pa vender. A lo menos, asina lo piensa una de les mayores multinacionales de la cerveza.

Cierto ye que l’irlandés ye llingua oficial, pero eso nun quita pa que tea amenorgada énte la puxanza, nada menos, del inglés. Entá ye vista por muncha xente como daqué que val namás pa falar na casa, cola familia o los collacios, o nin eso. De fechu, ye más fácil sentir asturianu na cai Uría que gaélicu en O’Connell Street. Pero la percepción ye lo que cuenta… y la mayoría d’irlandeses entienden ensin problemes la broma del anunciu… un anunciu que ye pa vender, pa qu’una empresa faiga dineru.

Nun va munchu lleí cómo la creación de la primer canal de televisión dafechu en gaélicu (TG4), en 2005, foi criticada por grandes firmes de la prensa irlandesa como un gastu ablucante y innecesariu. Güei caltién unos índices d’audiencia d’ente’l 3 y el 4%  y fai por caltener viva la llingua materna de 350.000 irlandeses, pero que conocen 1,9 millones de los 4,4 millones d’habitantes de la islla.

Compártelo

Toi acabante de baxame del Jamendo esti discu de Rein, grupu italianu fundáu nos 90 que faen ‘patchanka d’autor’, que son ‘fíos de la globalización’ (dicen ellos). La verdá que ye un mecíu de folk, ska, rock perprestosu. Bien grabáu y presentáu y divertíu, “pa sentir una y otra vuelta”, como diz ún de los comentarios nel espaciu del grupu nel Jamendo. Ta asoleyáu embaxo llicencia Creative Commons depués de que’l grupu decidiera dase de baxa de la SGAE italiana.  ‘Occidente’ ye un doble discu con venti cortes, d’ente los que rescampla ‘Genova’, casi 13 minutos n’alcordanza de Carlo Giuliani, el rapazu aquel que morrió d’un disparu de los Carabinieri nes maniges anti-G8 de 2001.

Sentíilu, o baxáilu dende equí.

Compártelo

Equí, un artista y so grupu, de lo meyor. Sacantes de lo que pa mín tienen de señaldá bilbaina, cuido que son la preba de cómo la calidá nun tien ren que ver cola venta muchimillonaria de discos y la babayura de les radiofórmules. Pa los que nun los conozais, disfrutái con esti videu o buscái ‘Corazón de tango’, qu’esa igual vos suena.

Compártelo

Relixosamente, ayeri tuviemos nel actu convocáu pola Academia. Había que tar ellí, y tuvo bien amosar el compromisu de bona parte de la sociedá asturiana pa cola so llingua. Prestónos ver de cerca a la coraxuda presidenta y a toa una Academia de la que, cuidamos dende equí, tenemos que sentir argullu pol papel que quier y merez xugar. Tamién prestónos enforma la intervención última, la de Xosé Nel Riesgo, que munchos firmaríemos como propia. Pero decepcionónos una migayina l’actu en sí.

Nun sé si taréis d’alcuerdu en que foi llargu, pelma… dacuando paecía una sesión de terapia de grupu del tipo (Hola, soi Fulanín Fernandi y soi llinguólicu… ¡¡Hola fulanin!!…). Amás, nun sabemos si hebo dalguna persona esmolecida pol tratu a la prensa, pero diónos la impresión de que non. De fechu, la única anuncia ‘nueva’ que se fexo na ceremonia (la de la carta a ZP y Rajoy) nun se fizo pública hasta l’ultimu momentu, cuando nun quedaba ya naide de los medios de comunicación presente. Namás l’interés d’un redactor d’axencia (qu’esperó bien de tiempu hasta que se-y echó encima la hora de cierre) fizo que, per teléfonu, s’enterara del ‘titular’.

Pero en fin, sacantes d’eso, verdá ye que prestó tar ellí, y que hai que siguir… como dixo Riesgo, hai que facese visibles, enllenar l’alministración de trámites n’asturianu, salir del armariu y amosar que, de verdá, polo menos una parte importante de la sociedá asturiana ta pidiendo respetu y que se-y reconoza un derechu que ye suyu.

Compártelo

Tolo demás, en Glayíu.

Compártelo

A les once menos cuartu.

Convoca’l CAO. Imaxe d’Esfoyaza.

Compártelo

Pues ya ta consumao. PP y PSOE acaben d’acordar la vuelta a una Asturies na que los bables yeren una peculiaridá prestosa pa les poesíes y los cantarinos de chigre, y nada más.

Como bien diz Atlantic Prau, el PSOE y el PP acaben d’acordar la derogación de la Llei d’Usu y Promoción del 98 (si non, ¿qué pinta esi puntu de la nueva llei que s’aprobará con mayoría de dos tercios?).

Esta ye la culminación de toa una estratexa, empobinada a aniquilar cualisquier opción que nun pase per un alcuerdu entre PSOE y PP. Quien pieslla emisores de radio con llicencia, quien promueve la prohibición del usu del asturianu, quien ta avezáu a comprar voluntaes, s’atopa nun puntu nel que se ve capaz de da-y el puntu final a esti tema de los bables, l’últimu requexu mínimamente potente y organizáu de contestació cívica, de crítica. Y lo fixeron güei.

La verdá, pa esto nun paga la pena l’autonomía. Una autonomía que nun se desarrolla, que nun medra como colectivu humanu, nun ye más qu’un descomanáu comederu (nun hai más que ver de qué viven estos redactores del estatutu).

Nun val pa nada. Prefiero la Diputación, ye más sincera. L’autonomía, pa quien la quier: Euskal Herria, Catalunya y, quiciavis, Galicia y Andalucía. Les ‘naciones’ que dicía l’editorial del Grupu Zeta que namás se censuró nel boletín de la provincia La Voz de Asturias.

Compártelo

Joaquín Aréstegui diz nones, y tovía hai quien diz que ye una opinión ‘personal’ del cabezaleru del PP. ¿Daquién puede sorprendese pola rápida anuncia de que d’oficialidá ‘nones’?

Joaquín Aréstegui, pa quien nun lo sepa, ye l’home de confianza d’Ovidio Sánchez, quien-y apurre’l cachu de cerebru qu’al llavianés-y falta pa facer discursos y declaraciones amañoses, quien-y marca estratexes, quien-y diz lo guapu y llistu que ye depués d’agarrar la depresión tres de perder una elleición tres d’otra.

Aréstegui ye un home llistu, intelixente, con un nivel mui periba la media de la política asturiana. Ye un estratega diz que maquiavélicu, y sabe cuándo dexar facer a los suyos y cuándo  cortar polo sano. Pa él, el problema llingüísticu n’Asturies nun ye más qu’un peón na so estratexia, un peón del que nun sabe mui bien qué va sacar (cuida que más bien poco), polo que nun-y importa un res dexar que-y lu coman y garantizase asina otres pieces más valoratibles nel alcuerdu económicu y de poder que va roblar cola FSA.

Porque lo importante pa’l PP nel tema l’estatutu ye sacar dalgo… ¿pol bien de los asturianos? Non, pol bien del partíu y de los que faen carrera nelli. Como la FSA, tamién nagua por un bipartidismu que-yos permita afitar esi comederu. Pa manexar dalgo, faise meyor ente dos qu’ente tres.

Aréstegui se xuega munchu, política y personalmente (más o menos, nel so casu, ye lo mesmu), como p’andar con boberíes col tema la llingua. Siéntolo polos del Círculu Lliberal, que a esti pasu van quedar ensin vaselina en dos díes.

Compártelo

Va tiempu que nun ponemos música. Güei, buscando coses de chicanos atopé esta rola que está repinche. El wey disque se llama Armando Palomas, rockero chingón que demuestra qu’entá hai maneres de cantar la realidá de la cai ensin ponese a rapiar ni blandir cuernos de chivo. Nes sos roles hai jainas, ranflas, güeros, morros, vatos… ironía y tequila. Que viva México.

Por cierto, una ferramienta perguapa ye esti diccionariu de xírigues de fala hispana.

Compártelo

Güei dibemos escribir una entrada poniendo a parir a los trés tontinos qu’entraron al despachu de F. F. de C. a toca-y los coyoninos. Díbemos preguntanos qué ye lo que pretendíen, que si queríen dir de gallos, que si ye que vieron Los Soprano la nueche anterior o qué. Díbemos dexar pa prau comentar la cobertura informativa d’esta trastada de guaḥucos, que ye lo que ye, y díbemos ponenos nel llugar del propiu F. F. de C., entendiendo que la visita d’estos nenos acabara por hincha-y les gorxes.

Pero va el menda y se descuelga con unes declaraciones nel diariu El Comercio qu’acaben por descomponenos dafechu. Fala d’ataques ‘asturtzales propios del entorno etarra’, y queda tan anchu. Fála de “métodos”  propios “del terrorismo etarra”,  como “colgar en Internet la foto del enemigo”. Y ehí ya l’alucine algama máximos histéricos.

Como esti ye ún de los blogues que tien la so semeya sacada de la so propia web personal nel servidor Uniovi,  sentímonos dafechu insultaos. Personalmente, soportamos meyor que nos llamen fíos de puta per corréu a que nos venceyen a la puxarra etarra y batasuna.

Una de dos, o nun tien nin idea de lo que ye l’entornu etarra y los sos ‘métodos’, lo que ye recibir amenaces, o sí lo sabe, y aprovecha la connivencia mediática pa criminalizar un movimientu cívicu al que nun se-y pue atribuyir nin una triste barricada. Porque ye cívicu, porque pide una reforma llegal, non un cambeu de réxime.

Va poco ficimos una ‘rectificación’ de broma, pretendidamente irónica pol llamáu de dellos profesores a nun atacar a F. F. de C. Equí entendímoslo como ún inocente llamáu a nun opinar, que ye lo que quiximos facer dende un primer momentu. Pero vemos que non, que pecamos d’inocentes y que lo que se nos taba diciendo yera que cuidadín, que tolo que digáis o faigáis va ser utilizáu pa desacreditar al movimientu de reivindicación llingüística colos peores argumentos.

Y nós creyéndonos xente normal, democrático, parte de la sociedá… llibres pa opinar sobre una decisión qu’algama gran trescendencia pública y que foi promovida por un señor con nome y apellíos, non por un home al qu’haya que referise poles sos iniciales, como si d’un presuntu delincuente se tratara.

Compártelo