González y González

Paez que dalgo se mueve col tema de la regasificadora y la retafila de centrales de ciclu combináu que nos van llantar per toa Asturies. Hai firmes y hai plataformes coles que movese. Entá nun hai muncha organización, y puede que seya tarde, pero dalgo habrá que facer pa evitar esa concepción d’Asturies como ciudá de vacaciones-parque temáticu nel que la mayor industria seya la d’apurrir pa Madrid, Lisboa, Valladolid y Oporto xenerando perres que se queden neses ciudaes, xenerando equí VENTE puestos de trabayu por central de ciclu combináu y una descomanada estroza paixasística y ambiental. Nun mos paga la pena.Más información: Regasificadora NON!!, Térmica de la Pereda NON!!, Térmica en Nubleo NON!!; Coordinadora Ecoloxista: Analís del ‘problema’ enerxéticu n’Asturies.

Compártelo

Tien yá unos meses, pero como nun tengo tiempu nin pa mexar nun lo vi, gracies a San Youtube…

Compártelo

Al platu vendrás, arbeyu…

Compártelo

La hipocresía que tamos padeciendo cola mal nomada piratería acaba reflexando quién ye el verdaderu pirata. Y ye que cola llei na manu el simple fechu d’usar la mula pa baxar música o películes ye completamente llegal, ye un de los supuestos del famosu “derechu de copia privada”, ya que nun hai ánimu de llucru (naide saca perres por compartir los ficheros), derechu creáu pelos 80 (cuando les cintes de casete) pa dar soporte llegal a una situación normalizada na sociedá d’entos y vixente anguañu cola diferencia de que ye entá más fácil compartir música gracies a internet y les tecnoloxíes p2p. Un derechu fechu pa respetar el “derechu d’accesu a la cultura” recoyíu na carta de los Derechos Humanos.

Entos como ye que denuncien a los negros que van vendiendo discos de Bisbal pela cai, pos porque eso si ye illegal ya que hai un ánimu de llucru, como nel casu de la discográfica EMI que punxo a la venta en delles webs de la so propieda ficheros cola música de King Crimson depués de romper el contratu y ensin que hubiere consentimientu previu.

Ta claro que tanto les discográfiques como les entidaes de xestión, sindicatos verticales qu’aconceyen autores y editores o lo que ye lo mismu trabayadores y patronal, van tomalu como un pequeñu error ensin importancia.

Y ye que un ya empieza a tar fartucu de les mentires manipuladores de la industria del entrenimientu (a la que quieren nomar de la cultura) y del seguidismu que-y faen los políticos… ¡Too pola pasta!

Compártelo

Cuido que munchos sentiríes yá falar del casu del rapazu catalán Eric Bertrán y’l so exèrcit del Fènix: el nenu de Blanes fan de Harry Potter (d’ehí lo d’exércitu del Fénix) qu’a los catorce años viera cómo l’Audiencia Nacional lu ordenaba detener como presuntu terrorista informáticu.

Nun sé si’l so casu ye más l’amuesa de la “represión” del Estáu español al catalanismu, o de que vivimos nuna paranoia risible cola tema del terrorismu. Dame igual, lo ciertu ye qu’el mundu tien que lo saber, como dixera’l mesmu Noam Chomsky al conocer l’asuntu.

De toles maneres… ¿ye la condición d’infantil catalanista d’esti rapacín determinante nesti casu? ¿hubieren unviao axentes antiterroristes a la casa d’un nenu de catorce años de Blimea polos sos amenazantes e-mails al Carrefour, a Leche Pascual o al Día pa qu’etiquetaren los sos productos n’asturianu? Pamidea que non.

Énte la paranoia, val más la risión. En Cataluña, de fechu, piensen que val más glayalo al altu la lleva, y facer de lo que nun foi más qu’una bobería d’un guah.e, tou un símbolu. D’ehí que yá lleve tiempu nes llibreríes un volume desplicando tola esperiencia del rapacín, y que tea acabante d’estrenase una obra satírica sobro l’espantible ‘exèrcit del Fènix’, esi que taba dispuestu a unviar cientos de correos a la páxina web del Dia.  ¿Verémosla nel circuitu de la Caxa d’Aforros?

Compártelo

Con too esto de la llei de memoria histórica… ¿tendrá’l diariu líder que camudar de nome? ¿Sedrá por ello que ta montando’l xou que ta montando pol prósimu desaniciu de los monumentos y símbolos de Pachu? ¿Qué significa la espresión ‘mesmu perru con distintu collar’?

Compártelo

Col lema “Na Reforma l’Estatutu, L’Asturianu Llingua Oficial” la Xunta pola defensa de la llingua asturiana convoca una concentración delantre la Xunta Xeneral na cai Fruela d’Uviéu pa mañana vienres 5 a les 11:30. Gracies a Vity pol avisu, porfin voi poder tar elli, el vienres toi de descansu.

Ver mapa

Compártelo

Ayer salió la noticia de que’l Gobiernu rusu quier tener GNU/Linux en toles máquines de les escueles del país pal añu 2009. Falen de que van usar la distribución rusa AltLinux y que entamrán a facer pruebes nel oblast de Tomsk, nel krai de Perm y na república de Tataristán en 2008.

Va tiempu que dexé d’allegrame por estes coses, y ye que d’un tiempu p’acá toi fartu de sentir grandes campañes gubernamentales pal usu adaptación y promoción del software llibre que al final acaben en papel moyáu y en contratos “muchimillonarios” cola empresina de Bill Gate$. Vamos que da la sensación de que faen estos anuncios pa llamar l’atención de Micro$oft y conseguir un descuentín (o un maletín).

Yo entá puedo entender (anque cuesta) que un usuariu perezosu por nun cambiar siga pagando la llicencia d’usu del Window$, pero cuando falamos de empreses y organismos públicos, que cuenten con personal pa facer mantenimientu de los equipos, el fechu d’usar aplicaciones privatives ye una amuesa de la so incompetencia xestora.

Y nun falo por falar, iniciatives como la de la Xunta d’Estremadura amuesen que’l apueste pol software llibre trae munchos más beneficios, y nun solo económicos, que’l privativu.

Compártelo

El post-franquismu (que non los nostálxicos del xeneralísimu) ya tien quien lo represente n’Asturies. Ta acabante de presentase l’agrupación asturiana de Ciudadanos, formación qu’en Catalunya algamó tres poltrones nel Parlament por mor de la campaña que-yos fizo El Mundo y La Razón, y qu’acabó por fundir al PP de Piqué.

Lo de post-franquismu nun ye porque sí. Ye lo que son, o polo menos ye lo qu’evidencien les sos declaraciones primeres n’Asturies. Nun son el post-franquismu nel sén de “cantri, reliyon” d’aquella dómina nacionalcatólica. Son el post-franquismu del economato, les barriaes de ‘productores’ (que non obreros) y del ‘nun te meter en política’.

Se presentaron en porrica (ver cartelu d’enriba) y nun se-ys pue negar la sinceridá. Son un partíu ensin ideoloxía (n’Asturies ya hai delles candidatures ‘independientes’ con esi mesmu apueste), que se presenten como estremaos d’una clas política fartona y corrupta (que bien sabemos equí que la hai).

Pero mira tú, que la so sinceridá nun me conquista. La so presentación foi tamién el momentu nel que anuncien que nun van defender la oficialidá porque nun ven “demanda social” pa ello (dizlo El Comercio), y bien ye que lo espresen d’esa manera, porque evidencia que nada se pue esperar d’ellos. ¿Acaso si hubiere demanda social pala independencia d’Asturies diben defendela? ¿Defenderán la continuidá de la FSA nel Gobiernu asturianu, a la vista de qu’hai demanda social pa ello?

Probe arranque el de esta formación que confiesa trenta afiliaos n’Asturies, y nel que se define como un partíu qu’ellabora programes a guelpe de sondeos d’opinión (¿qué sondeos?). Sicasí, de xuru qu’arrampuñarán dellos votos de quienes nunca nun voten y d’esi PP zarzuelero qu’apigaza n’Asturies.

Compártelo

Llega Asturies d’Or. Ún de los coleutivos asturianos del lladrillu, la Confederación Asturiana de la Construcción, diz na prensa que quier un ‘pautu’ (¿con quién?) pa alquitranar la costa y facer ’segundes residencies’ por tolo que ye’l litoral asturianu.

Siendo esti un coleutivu tan esmolecíu pol bien d’Asturies, nun hai por qué pensar mal. De xuru que nun-yos mueve l’animu de ganar perres a manplén, sinon llevantar el país, como yá lo tienen fecho en Cantabria.

Sedría pa tomalo a chanza si nun fuera esti un tema serio. Ta muncho en xuegu y nun ye plan d’andar con bromes. Esta xente, a la vista de la recesión, quier pautos. Y ello tien pelugru. Y muncho. Dir a Cantabria, que ye l’exemplu pa esta xente, da pena y dolor. Duelmu pola vida dir a Castro Urdiales, enantes una de les villes mas guapes de tol Cantábricu. Qué dicir de Suances, o de toes ese güeries que había ente Santander y Torlavega.

Entá, n’Asturies, tamos a tiempu de que l’exemplu de Llanes, Lluancu o Caravia nun s’esparda. Muros ta tocáu de muerte, l’oriente nun digo, y per A Veiga, Castropol o Tapia yá s’esfroten les manes pensando no que ta por aportar pela autopista. Miéu. Munchu miéu.

Compártelo