Llega Asturies d’Or
29 08 2007
Llega Asturies d’Or. Ún de los coleutivos asturianos del lladrillu, la Confederación Asturiana de la Construcción, diz na prensa que quier un ‘pautu’ (¿con quién?) pa alquitranar la costa y facer ’segundes residencies’ por tolo que ye’l litoral asturianu.
Siendo esti un coleutivu tan esmolecíu pol bien d’Asturies, nun hai por qué pensar mal. De xuru que nun-yos mueve l’animu de ganar perres a manplén, sinon llevantar el país, como yá lo tienen fecho en Cantabria.
Sedría pa tomalo a chanza si nun fuera esti un tema serio. Ta muncho en xuegu y nun ye plan d’andar con bromes. Esta xente, a la vista de la recesión, quier pautos. Y ello tien pelugru. Y muncho. Dir a Cantabria, que ye l’exemplu pa esta xente, da pena y dolor. Duelmu pola vida dir a Castro Urdiales, enantes una de les villes mas guapes de tol Cantábricu. Qué dicir de Suances, o de toes ese güeries que había ente Santander y Torlavega.
Entá, n’Asturies, tamos a tiempu de que l’exemplu de Llanes, Lluancu o Caravia nun s’esparda. Muros ta tocáu de muerte, l’oriente nun digo, y per A Veiga, Castropol o Tapia yá s’esfroten les manes pensando no que ta por aportar pela autopista. Miéu. Munchu miéu.
Cantabria si que mete miéu. Yo paso muncho nel bus pa dir a Bilbao y ye una llacedia, nun hai un solu metru de costa ensin cementu. Alcuerdome de ver una entrevista al Revilla na tv y tener la cara de dicir que la costa cántabra taba protexía de la especulación.
Castro Urdiales ye´l Benidor de los vascos, contóme un collaciu q vive ellí que pel branu hai vegaes que queden ensin agua nes cases porque nos caberos años la construición medró tanto que nun ta preparao´l sistema d´agües públiques (construyir y construyir ensin camentar nes consecuencies). A ver Asturies, paez que va per mui mal camín. Greenpeace sacó yá dellos informes con crítiques al modelu que se ta siguiendo (cuantos campos de golf tan faciéndose y hai proectaos??) y el Principáu dixo que nun yeren verdá, como tolo qu´escapa de la verdá única de la FSA.
Un saludu.