Nun pienses nun fartón

Veríeis que nel Les Noticies d’esti vienres, col envís de la celebración del Día de la Santina, el periódicu aconceyó a cabezaleros del Bloque, UNA y Pas pa falar d’asturianismu, de les sos perspectives. Al tiempu, nun editorial faen un analís de la situación política asturianista que, en cierta manera, apunta lo que ye un evidente problema pal desenvolvimientu d’una opción política que tien que facer por amosase como dalgo creíble y atractivu. Nesti puntu, alcordéme d’esti puntu d’embaxu, que pa quien nun lo sepa ye’l llingüista George Lakoff. Esti puntu ye dalgo asina como la madre del corderu de la propaganda d’Obama, y tien a ZP como ún de los sos fans más fans.

450px-lakoff_george.jpg

El casu ye qu’el llibrín d’esti home, ‘Nun pienses nun elefante’, preséntase como una especie de manual de propaganda pa torpes que dexó ablucáu a Zapatero, hasta el puntu de fichar a Lakoff pal ‘think tank’ qu’asesoró la campaña última del PSOE. Esi llibrín destripa lo que ye la estratexa de propaganda conservadora n’Estaos Xuníos y apurre idees de per ónde debe dir la progresista pa ganar les elleiciones. Nun entra en pureces ideolóxiques y argumentales. Va al tueru de la cosa, a ganar les elleiciones. Espón les regles del xuegu.

Básicamente, la idea ye que la xente nun vota tanto idees como valores. La xente vota la opción cola que s’identifica, nun vota programes. El llibrín cuenta cómo la identificación parte de la estrutura social más básica, la familia (básicamente estrema la ‘familia del padre estictu/conservador’ y la ‘familia de padres protectores/progresistes’), y cómo el llinguaxe xenera ‘marcos’ nel cerebru de cada votante que tienen un efeutu concretu na percepción del mensaxe (Nun pienses nun elefante… l’elefante, símbolu republicano, ya ta na to cabeza). Asina, cuenta cómo los conservadores americanos vienen desendolcando una estratexa pa difundir los sos valores, espardilos como los únicos válidos, al tiempu qu’afiten una tupida rede d’influencia que configura una sólida clase dirixente conservadora. Y too ello, dende los años sesenta. (Asina ganó Bush… pese a too).

El PSOE vio les similitúes cola situación española de secute. Fundación Faes, nueves universidaes privaes, apoyu a los escritores, ensayistes, intelecutales más o menos afines… contribúin a texer esa nueva clase dirixente, mientres s’apela a valores ampliamente espardíos y asumíos pola población pa facilitar que s’identifique col PP (Apoyo a las víctimas, sí a la vida, defensa del idioma español, de la familia…).

Pues a lo que voi. N’Astuies tamién se puede ver esi modelu, solo qu’agora ya desenvueltu pol PSOE-PP. Ehí ta l’apueste pola llibertá pa usar la llingua, ensin imposiciones; la solidaridá (y non el chupar del bote) ente rexones cola financiación… la tupida clase dirixente asturiana, identificada col ‘progresismu’ FSA…

Énte eso, ¿qué facer?

Lakoff propón nel so llibru dellos puntos básicos. Y el fundamental ye observar cómo los progresistes norteamericanos anecien no que-yos separta: ecoloxistes, lliberales, espiritualistes, antiautoritarios… Y eso torga esa rede d’afinidá y la identificación del votante (se fai munchu enfotu nel programa de caún, que se presenta como reacción a los conservadores, y menos nos valores). Por eso ye primordial la busca d’un mínimu que toos asuman y que-yos une, un mínimu que nun ye más qu’el fundamentu pol que faen política, non el mou en que s’articula esa política.

A partir d’ehí, la importancia del llinguaxe ye la clave: qué se diz, y cómo se diz. Lakoff vien a dicir que cada políticu y CADA PERIODISTA, tien que ser mui consciente de qué efeutu, que ‘marcu’ xenera cada cosa que diz o escribe. D’ehí, la importancia na campaña d’Obama d’una retafila pallabres que xeneren marcos mui concretos: ‘Unity’, ‘Hope’, ‘Change’, ‘Yes we can’, ‘Partner’… Siempre positivo. Nunca negativo. Y siempre buscando un efeutu d’empatía, d’equí cabemos toos, somos una gran familia na que los neños y los padres dialoguen y constrúin un futuru optimista. ¿Ye’l pensamientu d’Alicia? Non. Ye l’apelación a otros valores y eludir la trampa conservadora (l’ataque-yos llexitima, fai del so modelu la máxima).

El llibru acaba con un esbozu de cómo se tien qu’actuar p’amosase como una opción de gobiernu sólida, que mire pol país, non que seya una reacción a otra cosa. Asina, por exemplu, diz: ‘Evita los alderiques al altu la lleva. El discursu civilizáu ye la nuestra forma de discursu moral. Obtienes victoria cuando l’alderique se convierte nun alderique civilizáu. Ellos ganen cuando consiguen que grites’.

El casu ye qu’el llibrín ye esclarecedor. Hai quien yá lu critica como la biblia de ‘la nueva fe del eufemismu’, pero la verdá ye que, cuido, da munches pistes especialmente pa un asturianismu que nun sabe (a veces pienso que nun quier) salir de la espiral del silenciu.

N’España ta editáu por Editorial Complutense, y val unos seis euros.

3 comentarios en “Nun pienses nun fartón”

  1. lo del lakoff suename a sofismu de tola vida ,,, la forma sobre la sustancia , la sustitucion del discursu racional pola palabreria … nun solo ye poco etico,,, si non que solo favorez a los que pueden repetir los sloganes en tolos rincones el tolos momentos ,,, los amos de los medios ,,, tolo que l’asturianismu desgraciadamente nun ye y nun tien.

  2. Éticu nun ye… ye la gloria del discursu vacíu… pero son les regles del xuegu, y esplica en bona midida el funcionamientu de quienes ganen les eleiciones. Y nun ye sólo cosa de tener o nun tener medios… ye tamién cómo te presentes a los medios y cómo mides el mensaxe que tresmites y les posibles consecuencies del filtru que fai el propiu mediu. L’asturianismu nun va ganar elleiciones en munchu tiempu… pero sí puede empezar a esistir.

  3. l’asturianismu ye mucno mas que elecciones y la politica “pura y dura” nun sentiu estrictu ( y vamos se que lo sabes ) … precisamente l’asturianismu social ( non politicu ) si existe y nel tema medios ta munchu mas finu de lo que taba fai pocos anhos ,,,

Responder

La direición de corréu electrónicu nun va espublizase. Ríquense los campos marcaos con *