El tamañu sí importa.

El Principáu esixe a la firma d’El Gaiteru que ponga más pequeñu’l nome de Villaviciosa na etiqueta.

Creen que se tán aprovechando del nome internacional de la villa maliayesa.

Elen Teráu, La Villa.

gaiteru

El Principáu ta acabante comunicar a la firma d’El Gaiteru (famosa nel orbe enteru) que nun-y presta muncho eso d’andar luciendo’l nome de Villaviciosa tan grande na etiqueta de les botelles que dende entamos del
sieglu pasáu comercializa.

“De mano pensemos que yera dalgo d’eso de los del bable, polo del decretu de toponimia, qu’igual queríen que punxéremos La Villa”, comenta’l xerente nuna rueda de prensa, “hasta que vimos que venía del
Principáu, y pensemos que yera una enquivocación”. Pero, cuando se punxeron en contactu col Principáu esti ratificó-yos la so decisión.

“Nun entendemos a cuentu de qué depués d’un sieglu vienen con estes bobaes. ¿Van facer lo mesmo col Cabrales o col Gamonéu?”, reburdia’l xerente que baraxa crear unes bases pa renomar el productu. Ente les propuestes que’l departamentu de márquetin tan baraxando ye nun perder dafechu la vinculación
col territoriu. Ente les marques que figuren nun dossier: El Gai Viciosa, que nun contemplen por mieu a que se piense que sea una bebida d’ambiente; El Gai Villa, que tampoco –yos presta por si los de Tiuya lo tomen a mal.

“A nosotros danos qu’esto vien de la zuna de facer dañato memoria del sindicalista”, contempla l’encargáu d’estratexes mercantiles, “porque nun s’esplica. Y caro: eso de Villa Viciosa… Y más n’elecciones.”

Demientres la entrevista, sonó per dos vegaes el teléfonu. Una yera dende Santoña, dende onde –yos ufiertaben instalaciones y el nome pa ponelu bien en grande y la segunda dende una ciudá del País Vascu (creemos que Bilbo, anque pudiere ser guapamente San Sebastián) onde proponíen un conveniu
pa pone-y el so nome y cambiar el Gaiteru pol Aurresku.

La noticia nun asentó mui bien ente la xente de La Villa, dao que muncho d’ello trabayó na fábrica.

“El casu ye que yo tuvi ellí venti años, y como yo, muncha xente. Villaviciosa nun sedría lo que ye ensin El Gaiteru”, diz Petronilo Gómez, xubiláu.

“Esos señores”, apunta otru maliayés más engafentáu de la qu’esparabania col calláu, “meyor facíen por mirase: ¿por qué nun se quiten lo de Socialista y lo d’Asturiano de les sigles, manín? Ellos sí que tán entafarrando’l nome d’Asturies”.

Quiciabes te preste tamién...