L’elefante Blancu: L’enigma del 23-F al descubiertu
Una muyer reinterpreta les conversaciones del 23F gracies a les papeletes de les elecciones.
La selmana pasada una llectora d’esti periódicu púnxose en contactu con esta redacción pa facenos llegar les conclusiones d’un descubrimientu al que llegare de casualidá. Purines de Manzaneda, una bella y singular dama entreguina, aportó apurada al bañu depués d’una xornada dura d’andar d’espicha n’espicha. Cola publicidá na mano, aportó al bañu y, en quedando ensin papel, abrió los sobres de les papeletes electorales pa sanease. Foi entós, al tocar, cuando el roce la retrotraxo na memoria a los díes de La Chalana, de la que diba a desfogar tres d’una sebe y llevaba un rollu de papel de L’Elefante.
-Arrespiguéme entera –diznos cola voz entrecortao y tomao de la emoción.- Siempre me pregunté qué fuere de la fábrica de papel y pensé que nun pasara los filtros europeos de calidá y adherencia.
Dende la redacción punxímonos manos al llebor. Buscóse nun Chigre Tienda de Santaya un exemplar del preciáu rollu y, cola lluz apagao, cortemos les mesmes tires y, a lo que tocare, fuimos dando ún y otru, pa hixenizanos. Ciertamente, nun había diferencia ente ún y otru. Punxímonos en contactu cola fermosa señora de L’Entregu pa corroborar el so descubrimientu y foi entós cuando nos descubrió la clave del 23F. En realidá, el golpe d’estáu foi por cuenta de la reconversión, cola democracia, del papel de L’elefante nuna fábrica de papeletes electorales. Eso ye lo que dicen tol día en clave los conspiradores refiriéndose al “elefante blancu” que ye’l color de les papeles presidenciales d’aquella temporada.
Los golpistes taben pendientes nes sos conversaciones de lo que pasare col elefante blancu. El problema de los investigadores residía en pensar que yera una persona, y non una fábrica.
“Teníen mieu de que, si entamábemos cambiando’l papel que nos ficiere tan recios y que valía pa llimpiar tamién la chapa la cocina, esti país acabare por amanfloritar dafechu, como asina ocurrió.”, coméntanos esta muyer sapientísima que ta tomando notes pa redactar un estudiu revisionista sobre el 23F.
