¡Hola Mundu!

Espublizáu'l 20 d'Ochobre de 2010 por llar867 na categoría Les mios caxigalines

Semeya 1Calco les mios primeres tecles nesti requexu dende un ordenador vieyu.Tendrá al rodiu de 10 años, la pantalla ye más alta que nes d’anguaño -panorámiques- y la batería nun emburria’l ventilador más d’unos 34 minutos ensin cebalu.

Esti equipu nun ye nuevu, anque albidro que toi más averáu a triplicá-y la edá qu’a doblá-yla. O ehí ehí andamos. Nun nos pidáis muncho.

El probe tampoco ye que tea munchu “pedigrí“, hasta hai unos díes yera cásique tan dueñu de Bill Gates como míu, anque agora, yá llibre, ye quién a escribir con gayola’l topónimu d’un prau del mio güelu -“El Cuguḷḷón“-. Prestaríame cuntá-y a él tol simbolismu que tien esta caxigalina pa un idioma como’l nuesu pero de xuru que diba quedar de fatu. Y con razón.

Gatúño-y les pegatines que tien embaxo’l tecláu col pocu procuru que se tien pa lo que yá nun ye nuevo pero inda tampoco venerable. Paradóxicamente, la de güindous, ye la que más resistencia opón, pero fina desapegada como toles demás.

Nun sé a qué me va llevar esti requexu. Sé que voi facer d’elli, si nun queda albortáu pel camín, un diariu de la mio estancia y los mios camientos nesta tierra tan alloñada cultural y xeográficamente del mio país. Coses que me choquen -d’equí y d’allá- y que me presten (esperemos qu’estes seyan les más) van ser temátiques avezaes.

Y, a la fin, ser quién a depositar un granín más de sable nesa cuenca sedimentaria endorreica que ye la mio llingua.

Un saludu al planeta dende 866.9 km ≈ 867 km del mio Llar.

  1. Costóte arrancar ;P yá sabes onde toi pa cualesquier duda o problema… que anque tarde contesto…

  2. buen entamu… habrá que tar sollertes

  3. Vity diz:

    Hola! Afáyate na bloguesfera.

  4. llar867 diz:

    Munches gracies a toos!! A ver si pasu ente pasu voi anovando’l sitiu!!

    Un abrazu dende equíalantrones!

  5. Fonsu diz:

    Mira qu’entamar agora que tas tan llonxe! P’alantre col blogue 😀

  6. Moiso diz:

    Bienveníu al mundu blogueru 🙂

    Y además faislo con sofware llibre y n’asturianu. A ver si lo instalo yo tamién proto 🙂

  7. llar867 diz:

    Gracies, Moiso. Del to Llar paezme que taré a 867.1 km. Digamos que 200 metros más p’alló del míu. A ver si los faes p’acá pa venos un día, yá sabes que tas convidáu!