Por una esquierda soberanista alternativa nel discursu y nel proceder

Espublizáu'l 3 de Xineru de 2011 por Llar -> 867 km na categoría Analís políticu

Sigo col rixu de siempre les noticies que van apaeciendo nos medios dixitales no que cinca al procesu eleutoral del conxuntu d’organizaciones que podríemos asitiar na esquierda soberanista. El capítulu postreru ye’l comunicáu asoleyáu pol Bloque por Asturies y Unidá Nacionalista Asturiana nel selmanariu Les Noticies.

Creo qu’hemos d’analizar esta anuncia como una manera de ganar tiempu per parte de dambes organizaciones que lleven mui retrasáu’l procesu de cara a presentar una alternativa amañosa pa les eleiciones d’esti añu nel que yá tamos. Si facemos apreciu d’anteriores comunicaos, yá va pa un mes que la sociedá asturiana, o a lo menos los que tamos un poco más averaos a esti espectru políticu, debiéremos conocer qué vamos a topar nel mes de mayu. Y paez que va pa llargo y, nun sé, si pa tolo bien que munchos/es esperábemos.

Dexando un poco de llau les posibles causes que tean aseleciendo’l desendolcu de los acontecimientos -diben ser suposiciones más o menos acertaes y de difícil desplicación- y que’l procesu de converxencia nun va ser -paez ser-, y yá me cafia, realmente unitariu, sí que me prestaba analizar un puquiñín qué tipu de furrulamientu/comunicación se da ente organizaciones y persones de la esquierda soberanista (siempre falando de partíos, organizaciones, independientes, etc).

La non existencia d’espacios comunes físicos y estables de trabayu en comuña: el pogu de militantes y organizaciones

Cenciellamente, nun hai: nun tenemos sitios dalos onde coincidir la xente de la esquierda soberanista. Nun falo d’ociu nin de los pogos del próximu conciertu de Dixebra. Por ciertu, bien guapa ye la metáfora del pogu pa falar de la interaición ente persones y organizaciones de la esquierda soberanista. L’asuntu ye esti:

Toos y toes (militantes, independientes, concenciaos/es, averaos/es, permeables…) vamos a los conciertos de Dixebra polo que representen: compromisu políticu + tresmisión d’un mensaxe social y nacional bien curiosu + folixa con mocedá que comparte unos mínimos ideolóxicos. Toos y toes ximielgamos el cadril -d’aquella manera- al mesmu son y glayando lo mesmo, baillamos abrazaos/es a los/es nuesos/es collacios/es.

De sópitu chocamos col d’al llau: conocémonos d’otros conciertos, sabemos que vamos coincidir nel siguiente, cruzamos miraes, sabemos que sabe les lletres y que tamién les comparte.  Si nel choque soltare un puquiñín el coldu devolvémos-y l’emburrión enfadaos y multiplicáu x5 en puxu pa quitalu d’en mediu. Y poco más.

D’esta miente, a la fin, nin siquiera-yos ponemos voz a esos y eses que davezu salen tres de les pancartes d’Andecha Astur, Darréu, Unidá Nacionalista Asturiana, Fai!, Sofitu…Nin siquiera sabemos más que de lloñe d’au son y a qué se dediquen. Nun nos axuntamos pa desendolcar nengún tipu d’actividá política, nin personal, nin pa charrar nin pa contraponer opiniones. Vivimos en burbuxes de xabón efímeres que cuando s’averen españen. Confiamos en que, embaxo de la so militancia, escuéndese’l mal encarnáu y facemos estensibles los errores que pudieren tener les sos organizaciones al tratu personal.

Más interaición política con xente menos averao ideolóxicamente

La mio esperiencia personal dizme qu’en dellos años de militancia nuna o n’otra organización política fino coincidiendo más con xente d’organizaciones como’l PCPE/CMC, PCA/JCA o IZAN que con xente d’organizaciones de la esquierda soberanista. Nin nel ámbetu universitariu, nin nel antibelicista, nin nel antirracista, nin nel feminista, nin nel ecoloxista, nin del propiu de mocedá…

Cuando falo de coincidir, por supuesto, hai que lo dicir: refiérome a BREGAR, vivir a la griesca pa que les actividaes salgan n’asturianu, pa qu’Asturies seya’l marcu estratéxicu d’actuación,  pa dexar albintestate incoherencies nos sos discursos supuestamente izquierdistes que munches vegaes chocaben no nacional etc.

Nun soi a imaxinar un escenariu más murniu qu’esti, onde trabayar con xente que pon más torgues ideolóxiques se fai, increyiblemente, más cenciello que facelo coles organizaciones más próximes. Asina, tenemos que nes “cites” añales más importantes la esquierda soberanista como movimientu queda descordinada dafechu. 1u de mayu: FALLU, 25 de mayu: FALLU, Día les Lletres: FALLU, 8 setiembre: FALLU, ochobre: FALLU, 8 de marzu: FALLU, 28 de xunu: FALLU, Mani Antitaurina: FALLU…y caro, día de les eleiciones…EPIC FAIL.

¿Cómo ye posible que nun seyamos a reblagar penriba d’estes fricciones? ¿Ye sectarismu? ¿Por qué ye esta desconfianza ente organizaciones ya ideoloxíes enforma asemeyaes en condiciones tan precaries?

La necesidá de construcción d’espacios físicos y de debate propios y horizontales nel soberanismu d’esquierda

Una de les torgues más grandes que topamos cuando falamos de la esquierda soberanista ye la imposibilidá de caltener debates de calter internu. Evidentemente, con organizaciones de puxu tan llimitáu y nes que prima más l’aición-posturéu que’l propiu debate y l’asoleyamientu d’enfoques propios, la cosa nun pinta nada fácil. Sicasí, ¿cuálu ye’l motivu de nun tener nengún muérganu oficiosu de debate horizontal ente organizaciones y persones? ¿por qué nun existe nengún foru -por favor, nun falo del ciberespaciu- nel que discutir sobro la bandera asturiana, sobre si 8 de setiembre o 25 de mayu, al rodiu de la territorialidá nacional etc?.

Nun falo d’una tertulia -que tampoco taría mal y yá hai esperiencies nesti sen-, sinón d’una mínima coordinación ente organizaciones tan próximes p’aldericar y dir faciendo un paxu de finxos ideolóxicos básicos y aceptaos colos que trabayar de secute, por nun falar de locales, chigres, centros sociales etc. onde atopar información y material propiu como yá comentábemos nesta otra actualización.

Esto llévanos direutamente a analizar el tipu de participación que se da na propia esquierda en reconstrucción nacional, que garra de los partíos mayoritarios les peores zunes como’l dirixismu, el verticalismu y el despreciu, en munches ocasiones, del/de la militante de base y dexa pa prau el debate, la rexeneración d’idées y praxis polítiques énte la inmediatez de les eleiciones o de la próxima manifestación na qu’hai que “marcar paquete” (sic). Otra manera, nun creo que la reproducción d’estes actitúes correspuendan a que nestes organizaciones heba falta de democracia intencionada per se, sinón más bien a un déficit d’atención, formación y organización interna que nun convida a la militancia a participar activamente, a considerar les organizaciones como daqué propio y a querer ver el so pensamientu espeyáu nelles.

Por un soberanismu d’esquierda participativu y pola recuperación de les ferramientes democrátiques populares: el Conceyu Abiertu frente a la militancia pinza-despinza.

Nun ye ético, nin moralmente aceptable, nin muncho menos práutico que queramos aspirar a rexenerar democráticamente Asturies si nós mesmos nun furrulamos participativa y democráticamente. Eso ye una realidá como un castillete de mina.

Hai que replantegáse claramente qué tipu d’organizaciones queremos y cuáles hemos refugar, lo mesmo que falamos de “tresnar esti réxime pa convertilu nuna Asturies rexenerada”.

Hai que sacar tarxeta encarnada a les actitúes que desmovilicen y que xeneren militantes pasivos pinza-pancarta-qu’entama-la-mani / despinza-que-recoyemos-y-colamos pa tener la capacidá de que non sólo afiliaos/es, sinon tolos/es simpatizantes, seyan a reproducir de manera clara y convencida un mesmu discursu social, ambiental, identitariu, d’igualdá…fuxendo d’actitúes doctrinaries pero tamién de la desideoloxización de los individuos.

Y yá ta bien d’amagüestos previos que valen pa qu’unos pocos pauten y decidan demientres otros poquitinos más queden a la espectativa de qué va ser del so destín militante y ónde van tener que ponese de moñecu pa garrar bandera y/o pancarta na próxima ocasión, xenerando un desfase ente militantes y perdiendo maletes nel viaxe.

Y yá valió, tamién, de plantegamientos del tipu “esto vamos falalo enantes los mayores y dempués yá-yos lo presentamos a los nenos del partíu y, quiciabis a 24 hores del gran actu o de les eleiciones, a los movimientos sociales y/o independientes pa que, a les carreres, firmen manifiestos d’autoflaxelación”.

Faigamos un llamáu a Conceyu Abiertu. Que naide s’engañe, ye posible si naide fai por colgar del pescuezu la medayina de la “iniciativa”, anque esto nun quita pa qu’estos seyan formales, organizaos o operativos, onde tolos/es que quieran puean espresase. Faigámoslo entamando estos espacios d’alderique, por ciertu, con bien d’años per delantre, non a tou trapu 15 díes enantes de meter les llistes, y empobinémoslo más qu’al ermu electoral, al trabayu de concenciación previu y militante del día a día.

¿Cómo -si nun lo facemos asina, en casa-, vamos falar de caxigalines d’ultramegamínimos/valenos de conceutos como “presupuestos participativos”, “democracia participativa”, “ilusión”, “anovamientu”, “rexeneración” o “nuevo”?

Construyir la democracia entama per nós mesmos. Tamos a tiempu d’iguar munchísimes coses trabayando n’andecha, hasta pa estes eleiciones si se quier. Pasín ente pasu, con bona lletra y ensin precipitase, conociéndonos toos de verdá -non de lo que me cuntaron que-y dixeron l’otru día-…

Asturianes/os xuntes/os, organizaes/os, allegres, con ganes de da-y otra traza al nuesu requexu del planeta…y p’alantre!

  1. Andarica diz:

    Bono corríxime, creo que nel artículu plantegues, grosso modo, cuatro ideés. La primer ye la retrasada coalición asturianista y d’esquierda , la segunda ye la evidente falta d’espacios comunes nel asurianismu, la tercer, la carura d’interaición y alderique tanto interna como “periférica” ente les orgs asturianistes y otres orgs alternatives pa esgarabotiar les contradicciondes de dambos discursos y , la cuarta, la falta d’estructures “democrátiques”, el pasillismu, nes propies orgs y partíos que promulguen la democracia participativa. ¿Acuéi?
    Voi centrame nes dos primeres más que nada.
    Nel primer tema nun creo que pague la pena parase muncho, paez claro que nun va ser posible facer una org conxunta pero sí una coalición qu’a la mínima coxuntura se pueda dir a tomar vientu. Valledor va quedar solín por tuntu y por papón.
    Dempués, la falta d’espacios del soberanismu d’esquierda… ¿Pero qué tipu d’espaciu, ún como l’ERA? El problema nun creo que seya la falta d’espacios sinón les propies orgs que formen parte del soberanismu d’esquierda. Dices mui bien; (…) garra de los partíos mayoritarios les peores zunes como’l dirixismu, el verticalismu y el despreciu, en munches ocasiones, del/de la militante de base y dexa pa prau el debate, la rexeneración d’idées (…) Vamos analizar estes orgs:
    – Bloque por Asturies, que fasta va poco vivía nuna ñube d’ignorancia, inocencia y galbana más propio d’un anunciu de compreses (viendo l’exemplu dende la incapacidá de salir a la cai a, por casu, facer una pegada de cartelos o la insensatez que cometieron con Micosoft y Bill Gates en Bilbo, etc…) pero paradóxicamente dende la so coherente salida d’IX, dada la so escasa militancia ta convirtiéndose en polu d’atraición de della xente desencantao (della inclusive proviniente d’UNA) por mor a la precariedá y flexibilidá organizativa y al determinismu de la nueva militancia nésti escenariu p’aplicar esto mesmo que defendes.
    – UNA, qu’herieda toa esa dinámica de pasillismu y falta d’alderique y de respetu haza la militancia de base d’IAS que perconocerás meyor que yo. Escomunal cagada la de l’actu taurín con Xovellanos incluyíu, pero con solo Xovellanos…
    – Fai!, qu’inda cuntando con alderique internu, militancia horizontal, polivalencia, etc… nun percanció quitase la imaxe d’heriede de MIAS nin consiguió (pesie los sos bonos y activos entamos) caltener nin enantar la militancia, nin de quitase la imaxe de org de mocedá, arriendes de nun permitir la doblu militancia que pudiere posibilitar l’espurrimientu d’esi xeitu de trabayu haza otres orgs en tanto que previnía la utilización partidista d’esta org en beneficiu ayenu.
    – AA-Darréu, remanaes por un infiltráu nel asturianismu que fae depender económicamente entrambes orgs a cuenta de dirixiles sigún el so criteriu, cuasi siempres pa fender el movimientu nos momentos oportunos pa tentar facese, en devanéu, cola hexemonía y llideralgu del asturianismu. D’alderique internu y respetu a la militancia nin falemos.
    ¿Cualu ye’l principal problema del asturianismu? Elli mesmu, l’esnobismu y la falta d’interaición ente la xente de la cai o de la caleya qu’imposibilita treslladar el so discursu al restu de la sociedá asturiana porque paez que-y tenemos miéu. ¿La solución? Anovase o morrer dicen, en fin, llevamos tola vida morriendo, igual tamos esperando a que venga Cascos a salvanos…

  2. Iván Ribeseya diz:

    Mira Andarica, con xente como tu nun vamos a ninguna parte y voi desplicatelo sele y ensin entrar al trapu y dicite lo que m’apetez nesti momentu, pero que vo callar pa intentar predicar col exemplu, aunque ta costandome conteneme. Paezme perfectu que digas nel aspectu personal y nel chigre a los collacios lo que te paeza del paisano del que fales, pero hai que ser cortu mires pa venir a asoleyar en plan visionariu los males del nacionalismu y desplicar porque nun axuntamos, falar de xuntanza de fuercies y respetu y a la vegada insultando a tola xente que formamos parte d’AA y Darréu, que por ciertu, ya-y prestaríen al restu d’orgs de mocedá y \mayores\ que conozo tener la independencia que caltienen ente si AA y Darréu. Dígote que tas insultándonos, camiento qu’entá nin sabrás per onde van los tiros, porque tas poniendonos a tolos que tamos ehí más que de marionetes, de subnormales que nun somos a pescanciar aquello que tu ves nidiu y que ye na menos que \tamos trabayando pa un tío, infiltráu, que ye’l que remana además a les dos organizaciones\. Casi nada. Por ciertu, prestaríame saber quien coyones yes pa ver que tipu d’autoridá tienes pa falar asina d’una organización y d’una militancia cola que nun ties nada que ver.

    Salú a la xente normal

  3. […] on La xuntura estratéxica de la esquierda soberanista, enriba la mesa.Iván Ribeseya on Por una esquierda soberanista alternativa nel discursu y nel procederAndarica on Por una esquierda soberanista alternativa nel discursu y nel procederPor una esquierda […]