A la fin…dos alternatives pal votu d’esquierda soberanista

Espublizáu'l 20 de Febreru de 2011 por Llar -> 867 km na categoría Analís políticu
Etiquetes: , , , , , ,

Nes últimes selmanes venimos viviendo’l desendolcu de les diferentes negociaciones y de la presentación de los estremaos proyeutos eleutorales que van participar nes autonómiques y de conceyu de mayu. Quiciabis la mayor novedá -por llamalo de dalguna manera- vien de la irrupción de la opción personalista y astur-bizarre (de la qu’habría que facer un artículu específicu, cosa que nun descarto porque da munchu xuegu) de Francisco Álvarez Cascos, qu’al ser refugáu pola plana mayor del PP asturianu va a entrar na Xunta Xeneral con partíu propiu y munches decenes de miles de votos. Esta situación va xenerar de xuru una descompensación nel equilibriu PSOE-IU-Verdes y PP, que pudiere traer un futurible gobiernu de la derecha autoproclamada frente al de les polítiques de derecha de la “esquierda plural”.

No cincante al espaciu que nos esmolez, el de la esquierda soberanista, yá tenemos les dos opciones referenciales. D’una banda tenemos la coalición Bloque-UNA (Compromisu por Asturies) con Rafa Palacios como candidatu. D’otra, tenemos a Conceyu Abiertu, una experiencia nueva na política asturiana de calter mui asemeyáu al de les CUP catalanes. Vamos afondar un puquiñín nelles.

Un camín qu’entama nel 2003…

La situación d’anguaño vien tres de la creación, apaición y entrada del BpA nun gobiernu asturianu nel que compartía asientu y responsabilidá con IX, PSOE y, mas sero, Los Verdes. Lo qu’entamaba en 2003 como “etiqueta de marketing” d’IX con unos esperanzadores resultaos tornóse rápidamente, en custión de díes, en desilusión, con una baxada de pantalones épica per parte d’IX y una supuesta élite asturianista que dexaba n’orsai a tol espaciu nacionalista o soberanista que-yos diere’l votu. Ye esta situación la que xenerará l’espoxigue d’opciones como Izquierda Asturiana que con un bon sofitu del mundu de la reivindicación llingüística y dempués d’un par d’años de crecimientu entama les negociaciones con Andecha Astur pa presentar un polu alternativu a la política d’en rodieyes d’IX y la marca blanca “Bloque por Asturies”.  Estes negociaciones finarán con ún de los mayores esperpentos de los últimos años, que separtaron más qu’axuntaron y qu’inda arrastramos, cola ruptura en dos cachos d’Andecha Astur, el resurdimientu d’una Unidá Nacionalista Asturiana qu’enxamás debiere tornar d’ente los muertos, un episodiu freak con Los Verdes-Grupo Verde y, en resumíes cuentes, con un ridículu xeneralizáu de les opciones que defendíemos tolos y toles que formábemos y formamos parte d’esta feble esquierda soberanista.

Nestos últimos meses, una carambola non prevista pon pates arriba’l panorama. Valledor, nun últimu aliendu de dignidá, dexa’l so escañu y abandona IX, dexando a Roberto Colunga como diputáu del Bloque nel Parlamentu. El nuevu diputáu (sorrayando lo de “nuevu”) fai por emplegar l’asturianu na Xunta Xeneral y da-y una cierta visibilidá al Bloque por Asturies, que s’asitia nuna posición de fuercia, inducida pol puestu en llista, dientro del nacionalismu, con un ciertu crecimientu de militancia. Dempués, el Bloque topa la so excusa p’abandonar la coalición con IX y un gobiernu lliberticida como foi’l de 2003 a l’actualidá: l’aplicación de les midíes neocón del gobiernu Zapatero n’Asturies. Paradóxicamente, ún alcuérdase de les milenta posibilidaes que’l Bloque tuviere a lo llargo de 7 años pa fuxir d’aquel gobiernu y nun pue dexar de sintir cómo-y baxa una gota de mugor manga pel cogote.

Unidá Nacionalista Asturiana, necesitada y esperanzada por poder desendolcar esi Espaciu Políticu Asturianu del que se falare nel so congresu hai exactamente un añu, entama les negociaciones con un Bloque por Asturies de vuelta y colo “guapo subío”, ye dicir, al que se lu reconoz como parte de la solución al dexar de ser parte, nesti intre, del problema.

Y, nestes, ¡que nos lleguen les eleiciones!

Bloque-UNA (Compromisu por Asturies), la opción más resultona de los últimos años na esquierda “soberanista”

Dempués d’unos 6-7 meses -sigún la prensa- de xestación llega la nación de Compromisu por Asturies, la coalición de coaliciones Bloque por Asturies – Unidá Nacionalista Asturiana. Destaca como puntu fuerte la “posesión” d’un diputáu, Roberto Colunga, dándo-y tol bombu mediáticu que, xunto con una escenificación y planificación que paecen afechisques -llogotipu aparte, eso sí- dán-yos un airín mui “resultón”.  Nuna presentación al usu de los partíos tradicionales (nun hotel, “NH”) y col siguimientu de dellos medios de comunicación, anunciaben la so candidatura con delles cares conocíes del mundu de la cultura o del asturianismu que, n’otres cites, firmaren, por exemplu, por Izquierda Asturiana, Andecha Astur o por IX-Bloque en 2003.

Sicasí, tamién hai puntos menos positivos. En primer llugar, y como yá  vinimos expresando nesti blogue, esti procesu de constitución de Compromisu por Asturies vien d’acoxar en dellos puntos. Ún d’ellos, y de los que más m’esmolez, ye’l vetu (podemos llamalo asina o “los pilancos”, o “la non reconocencia”…) al que se sometió a Andecha Astur. Tengo y tendré pa mi que’l discursu qu’anguaño Bloque-UNA van desendolcar nun va ser a seducir a una parte importante del movimientín (precisamente la más soberanista y la más izquierdista, al empar que la más “militante”). Por desgracia, creo qu’esta vegada sí yera posible un averamientu real y xenerosu con esta formación y, sobremanera, col patrimoniu ideolóxicu que representa, una oportunidá perdida qu’ha quedar reflexada equí y qu’esperemos que nun futuru se torne a dar.

Pero ¿cuáles son les razones? ¿por qué sí se puede reconocer y negociar col Bloque , formación qu’IAS y el restu de la UNA y organizaciones de la esquierda soberanista punxeren a cayer d’un burru pola so responsabilidá nel gobiernu represor col PSOE y IU, y non con Andecha, qu’anque tien les sos metedures de pata históriques, tamién podíen ser asumíes?  Tampoco creo que nun fueren quién a ponese d’alcuerdo nun programa electoral con ellos. A la fin, nun hai más que ver colos que se presentaren otres vegaes toles formaciones y comparar pa ver qu’esi nun ye un problema oxetivu. Cenciellamente, creo que les torgues impuestes a Andecha pa nun tar nesta xuntura vienen, per un llau, del Bloque por Asturies, que tarrecería tener una tercer pata nel tayuelu que-y pudiere facer la pinza con UNA na eleición de candidatu, por exemplu, o que-y cuestionare la so posición de fuercia interna d’anguaño. Al tiempu, un sector d’UNA (más o menos militante n’UNA, más o menos averáu) sigui ensin poner igua xunto cola xente que se presentó cola siegla d’Andecha les últimes eleiciones al conflictu xudicial pola marca, non reconociendo a Andecha Astur como organización.

No que cinca al candidatu, ta claro que Bloque-UNA ye una coalición que, como los partíos mayoritarios, apuesta por un electoralismu claru y rotundu (analizándolo ensin acritú y ensin prexuicios) enantes que de la creación d’un movimientu popular previu que permita unos bonos resultaos electorales. Quiciabis seya esta la única manera de presentase anguaño a les eleiciones a la Xunta Xeneral nesti plan, pero esta práutica desixe munches perres -que nun tienen-, munchos militantes -que tampoco- o unos candidatos de puxu y reconocíos polo menos pol entornu ideolóxicu al que van pidir el votu.  Nesti sen, la posibilidá de que Valledor fuere candidatu d’esta coalición dába-y un plus a Compromisu por Asturies que diba atrayer munchos votos de la esquierda (falamos d’un home del PCA) y del asturianismu. Nun m’estraña que Faustino Zapico en Les Noticies apostare por él, siempres d’alcuerdo, como dicía, a caltener una postura electoralista ya inda más resultona que la d’anguaño. Ye por ello que, cuando too paecía indicar que Valledor diba ser el candidatu, l’anuncia de que vaya ser Rafael Palacios, el llíder d’una de les dos partes de la coalición, resulta chocante. Tampoco nun resulta chocante que Zapico, qu’apostare por aquella otra opción, dimitiere como voceru y miembru de la executiva d’UNA coles implicaciones que pue tener esto na campaña eleutoral. Aprovecho pa dicir, a colación d’esta noticia, que Faustino ye pa mi, a nivel ideolóxicu y personal, una de les persones más preparaes de la esquierda soberanista asturiana, por nun dicir el “number one” y un activu que nun se debiere perder d’esta miente baxo nengún conceptu.

¿Pero nun había más candidatos? Si siguimos plantegándonos esi “resultonismu” que tanto vengo remanando pa falar d’una eleición de candidatu/a, que n’otres circunstancies ye lo de menos porque sedría cenciellamente’l voceru/a d’una expresión coleutiva y popular, de xuru qu’había opciones meyores que la de Palacios. Mesmamente, na semeya de presentación de la coalición podemos ver a un par de persones del mundu de la cultura que bien lo fadríen. Anque, tamién lo hai que dicir, respeto la voluntá coleutiva de les militancies respeutives d’IAS, UNA y BpA pa la escoyeta, nun dexo nin dexaré d’entrugame qué tendría pasao d’afitar otru candidatu, lo mesmo que de consiguir integrar a Andecha Astur nel proyeutu. Con too y con ello, anque nun soi nada optimista, ta claro qu’a curtiu plazu y pa estes eleiciones Bloque-UNA son la opción más posibilista de la esquierda soberanista. Quédanos saber si’l programa eleutoral va ser tan tibiu nel marcu social y nacional como denoten les intervenciones de los sos candidatos, más averaes a les que podría caltener el Bloque dientro d’una IU en gobiernu col PSOE qu’a les d’un partíu netamente asturianu y afitáu nos tan cacarexaos movimientos sociales o sindicales o, si pol contrariu, van tener un calter más reivindicativu y rupturista col establishment corruptu españolista n’Asturies.

Conceyu Abiertu, una experiencia nueva de participación horizontal centrada nos conceyos

Ayeri en Xixón presentábase’l proyeutu de Conceyu Abiertu, una opción nueva de la esquierda soberanista que vien a siguir el modelu de les CUP (Candidatures d’Unidá Popular) de los Països Catalans, que ta centráu en presentáse a nivel municipal namás pa dir texendo una rede con puxu nel ámbetu más próximu al pueblu, que nun precisa de grandes presupuestos y que, pola propia política de los conceyos, nun precisa d’unos alcuerdos complicaos a nivel ideolóxicu qu’imposibiliten la unidá de candidatures con partíos dientro de la esquierda y dende l’asturianismu al independentismu. Conceyu Abiertu surde dempués d’otru tipu d’intentos que, con meyor intención que remangu, apaecieron como Democracy For Asturies o SOS Asturies, plataformes ciudadanes con xente vinculao tamién a Andecha Astur que facíen ver una deriva, polo menos nuna parte significativa, de la militancia d’esti partíu.

Esti modelu de participación yá lu avanzábemos equí nel artículu anterior a esti. De fecho, falábemos concretamente de “Conceyu Abiertu” (con mayúscules y too) -tamién ye casualidá, coime- y cito:

“Faigamos un llamáu a Conceyu Abiertu. Que naide s’engañe, ye posible si naide fai por colgar del pescuezu la medayina de la “iniciativa”, anque esto nun quita pa qu’estos seyan formales, organizaos o operativos, onde tolos/es que quieran puean espresase. Faigámoslo entamando estos espacios d’alderique, por ciertu, con bien d’años per delantre, non a tou trapu 15 díes enantes de meter les llistes, y empobinémoslo más qu’al ermu electoral, al trabayu de concenciación previu y militante del día a día.”

Sicasí, a la opción de Conceyu Abiertu tamién tien delles coses que comentar y va afrontar dellos problemes dende esti mesmu intre. En primer llugar, ye dempués del vacíu que Bloque-UNA faen a Andecha Astur qu’apaez esta opción, colo que nun va a dexar de paecer, a lo menos aparentemente, la vía d’escape d’una organización que queda “compuesta y ensin mozu” a unos meses de les eleiciones. ¿Existiría, entós, un modelu como esti si Bloque y UNA-yos permitieren ser la tercer pata del tayuelu?.

En segundu llugar, ¿va a caltener el modelu CUP -inhibise nes eleiciones nacionales y trabayar esclusivamente a nivel municipal- o va a quemáse nestes eleiciones a la Xunta Xeneral? Na mio opinión, sedría mui intelixente per parte de Conceyu Abiertu’l nun se presentar más que nos conceyos onde heba capacidá y dexar estes eleiciones onde nun hai nenguna posibilidá de facer nada granible. Si son 5 conceyos namás nos que se pue que lo seyan: lo importante ye’l trabayu de cara al futuru. Al tiempu, el nun presentáse a la Xunta Xeneral sedría toa una declaración d’intenciones y d’arrogancia  pa nun dexar tierra quemao con otres organizaciones de cara al futuru.

En tercer llugar, y pa finar pel momentu, el mayor handicap col que surde Conceyu Abiertu pasa precisamente por apaecer nesti intre concretu y asemeyar competir con Bloque-UNA, lo que va ser usao na so contra per una parte d’esti mundín que va acusalos -y yá lo ta faciendo- de “boicó”. Quiciabis Conceyu Abiertu surdiría con munchu mayor puxu’l día dempués de les eleiciones, que puen ser un nuevu mazazu pa xente que ta cuntando con “incrementar la presencia nel parlamentu asturianu”.

La opción de Conceyu Abiertu, una propuesta coherente ideolóxicamente, que tien un plantegamientu a mediu y llargu plazu de calter participativu, horizontal, con autonomía pa cada conceyu dientro d’unes llínies básiques y de recursos a nivel nacional, ye la opción bona pa los que queremos otra manera de militar y de llegar a la xente nos conceyos. Nun va ser d’esta, pero cada vegada vamos averándonos más a un modelu onde’l debate, la vuelta a la cai y l’averamientu a la xente seyan les prioridaes. Y too ello ensin arrenunciar a nada.

Parada viniente: …programes eleutorales y candidatures de conceyos

Quédanos agora esperar a que Bloque-UNA y Conceyu Abiertu presenten los sos programes eleutorales y les propuestes estratéxiques, lo mesmo que saber en qué conceyos van presentáse. De xuru veremos duplicidá de candidatures, lo que ye una bona pena, que van valir pa que salga carnaza…anque esperemos que non. Tengo especial curiosidá y esmolecimientu por conocer el programa de Compromisu por Asturies. Oxalá les dinámiques internes permitan afayar un programa combativu y que vaya al raigañu de los problemes d’Asturies. Un radicalismu bien entendíu que fuxa de postures posmodernes y del esteticismu pa medrar o paecer bien na sociedá.

Oxalá’l pesimismu que tengo con estes eleiciones nun seya pa tanto y se xenere un cambiu de dinámica dientro d’esti movimientu. Un tiempu nuevu pa una Asturies nueva. Guardái les vuestres monedes. Queremos un cambiu.

  1. zowi diz:

    Ta mui bien l’analisis, pero das por fecho que fueron Bloque-UNA los que nun quisieron andecha con ellos, pero ¿fizo dalgo andecha por dir nesa coalición?. Amás que polo que tengo entendio una parte d’andecha ta cola UNA. Y otra cosa que dexes de llau ye que la marca andecha nun podía allegar a les eleiciones por cuestiones llegales.

    • llar867 diz:

      Gracies pol to tiempu, que ye llargo de lleer, Zowi.

      Pémeque ye claro qu’esta vegada sí hebo voluntá per parte d’Andecha de trabayar a comuña. Hasta onde yo sé y en parte de lo que vi, a Andecha ta pasándo-y lo del cuentu de Pedro y el Llobu…pa una vegada qu’había una posibilidá…dexáronlos aparte ensin posibilidá de sumar. Les rellaciones con AA siempre fueron complicaes, pero ye pena que nun-y dieren una oportunidá a esta xente como sí se-yos dio a otros que veníen con pecaos tan grandes o más a recostines.

      No que cinca a les custiones llegales…nun lo teo tan claro. Conozo xente que lleva defendiendo años esti posicionamientu n’Andecha y esi cuentu del xuiciu…yo yá nun creo nada.

      De toles maneres, nun ye lo más importante del analís, tal como yo lo veo.

      Un abrazu y sigui comentando cuando te preste!

  2. Marcos Caín Fernández diz:

    Nun me paez de recibu que-y deas tanta llexitimidá a BLOQUE-UNA como a CA. Esi victimismu de “nun cuntaron con nós”, nun me val. Sé positivamente, porque me lo dixeron, que CA nació pa torpedear los movimientos pola xuntanza, y van siguir faciéndolo. Nun sé cómo pues ser tan maniqueu o infantil, o dambes coses a la vez. Has saber que les sigles AA son ilegales. Has saber qu´esisten namás que pa enriedar, que nun son más de 25 persones con dellos satñelites. Has saber que nunca van a llegar a pautos con naide más namás que con ellos mesmos: DARREU-VILAREYISMU-PARTÍU CARLISTA-ESPUBLIZASTUR-“LA SIDRA”. Xente como tu quier da-yos credibilidá y contar esa historia de que “son lo más guay, combativo ya izquierdista del mundu”. ¡JJaaaa!! Son la quinta columna del PSOE pa dixebrar un xorrecimientu unitariu del soberanismu astur.
    ¡Les CUP! Jaaaaaa!!
    500 votos en mayu.
    Y depués, lo de siempre.
    Los de siempre

  3. Llar867 diz:

    Marcos,

    gracies pol to enfotu d’antemano. No tocante al to comentariu, paezme que ye bastante visceral y poco constructivu. Nesti blogue, al que nun obligo a naide a entrar, ún puede tener la so opinión como tu tamién pues tenela y expresala de manera afayadiza.

    Fales de victimismu, fales de maniqueísmu y d’infantilismu. Ye posible, quiciabis seya verdá que lo soi por facer esti analís -cuidáu con estes definiciones que puen valir pa toos-, pero lo que nun podrás ñegar, si eches una güeyada a toles entraes que llevo asoleyaes, ye que siempre caltuve’l mesmu posicionamientu no que cinca a cuntar con Andecha Astur, Unidá Nacionalista Asturiana y Bloque por Asturies pa un procesu de xuntura como esti ensin esclusiones. Lo que nun ye refugable ye que nesta ocasión a Andecha Astur nin siquiera se-yos dió la oportunidá d’entrar nesti mangaráu. Podemos aldericar sobre si esa decisión ye acertada o non -paez que tu en concreto tienes claro que nun quies saber nada con esa organización y lo que puea representar ideolóxicamente o socialmente, lo que ye respetable anque nun comparta- pero paez evidente y vox populi que nun hebo’l mesmu “chance” pa qu’Andecha Astur participare como pa que lo ficieren otres organizaciones.

    En cuantes al restu del mensaxe, qu’emplega’l recursu o’l tonu más de ridiculización que d’argumentación, tampoco hai muncho más que dicir. Creo que’l mio analís ye relativamente oxetivu -sigún lo que sal na prensa y nos comunicaos oficiales- y coherente cola mio manera d’entender esti procesu de xuntura. La mio opinión nun ye más que mía y respuendo por ella equí y na China Popular.

    Pa finar, nin comulgo coles tesis del Xaviel Vilareyo, nin muncho menos coles sos formes. Nun teo nenguna rellación nin con La Sidra nin con Espublizastur. Conozo a munchos/es militantes de Darréu y a lo poquitino que tien el Partíu Carlista, al tiempu qu’a permunchos militantes/simpatizantes del Bloque por Asturies y d’UNA en dellos años d’activismu acuyá. Paezme que l’alderique y la opinión son necesarios, al tiempu que saber encaxar con elegancia y procuru les crítiques constructives. Nun toparás nesti blogue -y si lo hai has indicámelo- requexu pa la difamación o la crítica como deporte.

    Empleguemos les ferramientes de la rede como una manera d’amañar abellugos conxuntos, non como trinchera virtual.

    Un abrazu y prestaríame que siguieres lleendo y comentando.

  4. […] recientesLlar867 on A la fin…dos alternatives pal votu d’esquierda soberanistaMarcos Caín Fernández on A la fin…dos alternatives pal votu d’esquierda […]