20 de payares: apuntes dende y pa la esquierda soberanista asturiana

Espublizáu'l 8 de Payares de 2011 por Llar -> 867 km na categoría Analís políticu

Dempués d’una bona tirada de meses ensin anovar esti blogue -pero non por ello ensin dexar d’aldericar con muncha xente en persona y, sobremanera, al traviés de redes socialesmicroblogging– vamos echar una güeyada, dende una óptica d’esquierda soberanista, al panorama que se presenta n’Asturies y redolada ideolóxica y xeográfica énte les eleiciones estatales del 20 de payares.

Esta ye la so “democracia”

Nos últimos años, y especialmente dende que nel añu 2008 españare –tamién– nos países del primer mundu una crisis económica que llevaba décades afogando a los más probes del planeta, venimos viendo cómo cada vegada hai más sectores de la población que se decaten de los déficits democráticos que carecemos viviendo nuna dictadura del capital, na que les instituciones pretendidamente democrátiques non sólo nun lo son sinon que siguen  cada vegada más -y cada vegada más evidentemente- secuestraes polos mercaos, grandes empreses tresnacionales y la banca internacional. Asina, los estaos y los sos gobiernos turnistes, vienen garantizando’l caltenimientu del statu quo que beneficia a unos pocos, al poder económicu, al traviés de la puesta en práutica de métodos d’escluxón participativa del pueblu no cincante a la toma de decisiones, de lo cual son exemplu perfeutu unes eleiciones como les del 20 de payares, nes que yá ta too vendío y empaquetao.

Nesti estáu nel qu’inda naide refrendó la monarquía, nel que les eleiciones pasen por ser un llaváu de cara de la parademocracia regalada y nel que la participación redúzse a introducir una papeleta nuna caxa tresparente cada X años, tampoco podemos enfotanos. Unes eleiciones nes qu’unos xueguen coles cartes marcaes (prensa, publicidá, medios, inyeiciones económiques de grupos empresariales, usu partidista de les alministraciones…) déxennos nes manes del bipartidismu más cruel y sangrín, que nun dulda en facer piñu si siente amenazáu’l so chiringu. Concretamente, esta vegada nun podemos dexar de llau que nestes eleiciones y per primer vegada, fízose obligatoria la presentación d’avales (un 0.1% de los censaos/es) pa poder tener derechu a participar nunos comicios, lo que supón un retrocesu democráticu evidente pa les opciones non mayoritaries que foi una torga pa la participación de delles opciones polítiques que quedaron arrequexaes, lo que supón un avisu mui seriu nesta dómina na que nos tocó vivir y lluchar: “a los que molesten, pilancos”.

8 escaños ¿asturianos?

Respírase nel aire políticu asturianu un golor a revenío que tien nomes y apellíos. Les llistes de los partíos con representación na Xunta Xeneral arrecienden a vieyo. Nomes como Antonio Trevín, Vicente Álvarez Areces, Isidro Rozada, Cherines, Carcedo, Morán, Ovidio Sánchez o’l mesmu Gaspar Llamazares, toos ellos nos cartelos eleutorales xunto a la bisarma d’Álvarez Cascos, espeyen mui bien qué ye Asturies pa ellos: poco más qu’un caladeru de votos ensin qu’heba siquiera una mínima voluntá de representar los intereses d’esti país de manera autónoma o non dependiente de lo que-yos dicten nes sos sedes dende la capital del reinu. Esos nomes, que podríen tar guapamente nel hall of fame (lléase n’inglés o n’asturianu)  de los responsables políticos de la situación na que ta Asturies dende l’entamu del postfranquismu, son l’apueste de los partíos mayoritarios n’Asturies. Los mesmos perros col mesmu collar, que si cuadra, voten escontra los sos propios intereses n’Asturies porque lo manda l’aparatu.

Nesti sen, nes eleiciones de la vergoñosa efemérides, vamos topanos cola mareona neolliberal de la gavilueta de la que’l mayor responsable ye’l PSOE y les sos polítiques neocón. Nel estáu español, nun momentu tan complicáu pa la sobrevivencia física de munches persones, vamos pasar de tener un gobiernu de la derecha neolliberal gobernáu por Rodríguez Zapatero a un gobiernu de la extrema derecha más católica y fascista sofitáu por millones de votos de la clas trabayadora, desemplegada y precaria. Van ser tiempos de retayos, de privatizaciones pero tamién de movilizaciones y de llamaos a reorganizar les files de la esquierda real n’Asturies. Al tiempu, los medios de comunicación afines al PSOE tornarán a facer d’altavoz pa les movilizaciones que facíen por acallar demientres el gobiernu de ZP y esta coxuntura, xunto cola propia dinámica del movimientu 15M, van retrotraenos a una dómina asemeyada a la de la segunda llexislatura del Aznaratu na que va ser perinteresante participar y facer por ganar llexitimidá ente la población.

La esquierda soberanista/nacionalista/asturianista: incapaz de coordinase

Per otru llau, si’l contestu llegal que nos apurre la llegalidá constitucional monárquica española yá yera llaceriosu, nesta ocasión, na mio opinión, dánse desgraciadamente dellos condicionantes que faen fondamente previsibles y desmotivantes pal conxuntu del asturianismu políticu y cultural estes eleiciones, al tar precisamente la esquierda nacionalista/soberanista/asturianista probablemente nel momentu de mayor crisis d’idées, proyeutos y militancia activo que se viere dende’l so aniciu embrionariu de los setenta p’acó.

D’una banda, acoyíemos con interés una serie d’artículos asoleyaos en setiembre en dos medios dixitales asturianistes de Mariu Arbesú (Andecha Astur, candidatu por Conceyu Abiertu)Rafa Palacios (Bloque por Asturies, candidatu de Bloque-UNA Compromisu por Asturies),  onde s’afalaba a la constitución d’una mesa de negociación y a la unidá, respeutivamente, pa facer frente común nestes eleiciones del 20P. Dambes intenciones quedaron pa prau y, primero, UNA y dempués el Bloque por Asturies anunciaben que nun se diben presentar. Conceyu Abiertu, la plataforma impulsada dende los seutores más averaos a Andecha Astur pa trabayar a nivel de conceyos -a pesar de presentase a la Xunta Xeneral- tampoco lo diba facer. Un PAS que quedó práuticamente fundíu tres del últimu revés eleutoral, nin siquiera facía l’amagu y, de dalguna manera, dellos vimos nesta situación un momentu perafayadizu pa que se ficiere un altu na dinámica de les organizaciones d’esti ámbetu, que dende 2003 siguen la llei de poner el carru delantre los gües. Una pausa pa reflexonar, ver ónde tamos y qué queremos, con quién cuntamos y qué plazos y espeutatives vamos xenerar. Un bon momentu pa entamar una reconstrucción de la esquierda nacional con pegoyos fuertes, como se taba faciendo n’otros países cercanos xeográficamente pero que, tamién ye verdá, tán a años lluz de la nuesa dinámica inda embrionaria.

Asina, los que naguábemos por que per una vegada se garrare una de les dos opciones bones (o presentáse toos xuntos o, toos xuntos, nun se presentar y entamar a trabayar mesmamente na propia campaña eleutoral nesa unidá d’aición tan cacarexada en toles families d’esti movimimientu) víemos como s’abría pa la segunda d’elles, de xuru la más fácil acordies cola situación d’incomunicación y desarticulación de la esquierda soberanista, una rayadina de sol qu’a más d’ún ilusionó delles hores.

Ensin embargo, díes dempués Andecha Astur, nun movimientu que por mor de la situación llegal na que s’atopaba la siegla munchos nun esperábemos, fai anuncia de que se presenta a les eleiciones y asina lo desplica’l propiu Mariu Arbesú n’otru artículu na prensa dixital n’asturianu con Arturu Xosé Bermeyu como candidatu al Congresu. Dexando claro enantes de nada’l derechu innegable (por nun falar “d’obligación”) de cualisquier partíu a acudir a unes eleiciones y tamién, por qué nun dicilo, deseá-y lo meyor a la candidatura, paecía evidente qu’esi escenariu imaxináu nel qu’entamar a trabayar en comuña esmucíase per momentos. Como reaición, apaecía un artículu de Roberto Holgado (anguaño na UNA) espresándose en nome d’un grupu de militantes que taben n’Andecha Astur demientres les negociaciones con IAS que finaron col proyeutu d’Unidá y UNA falando d’esi mesmu conflictu poles siegles y, de dalguna manera, apagando fueos con gasolina.

Una vegada más, una de les mancadures más traumátiques que venía careciendo la esquierda nacionalista/soberanista/ asturianista non sólo nun cicatrizaba sinon que la pantasma del desalcuentru paez que puede finar por cortar les poques pontes que quedaben perende y dientro d’un movimientu tan precariu. Andecha Astur, a la fin, va tar presente nestes eleiciones nes que, na mio opinión, nun tocaba tanto’l gatuñar esos votos patriotes y concenciaos que van llega-yos dende Asturies y mui especialmente dende los que tamos lloñe d’Asturies, sinon facer por iguar con tola xenerosidá del mundu los nuesos problemes internos pa presentanos con muncha más seriedá énte la sociedá asturiana nun futuru próximu.

D’equí p’alantre: reconocer el problema, apautar unos calces pa igualu y trabayar pola unidá popular

Como dicíemos enantes, estes eleiciones van dexar un panorama desolador pal nuestru país, pal conxuntu de los trabayadores, cola mayoría absoluta del PP tres d’una xestión llaceriosa del PSOE en materia económica y social, resultante d’entregar a les grandes corporaciones empresariales les instituciones como si esten fueren poca cosa más que xuguetes nes manes del capitalismu.

D’otra banda, ye chocante’l cómo una parte del asturianismu cultural, pequeña pero representativa, pudo cayer nel xuegu macabru d’Álvarez Cascos y el so “Más Asturias, mejor España” (qu’en Madrid ye “Más Foro, mejor España” pa frenar “a los nacionalismos y reforzar a España” y que tuvo a piques de ser de la mano de la mesmísima María San Gil). Quiciabes tengamos que pensar nes propies dinámiques de fracasu tres deceición d’esto que llamamos esquierda nacionalista/soberanista/asturianista y nesi enclín psicolóxicu -cuasi psiquiátricu- que desplique la necesidá de xubir al carru d’un proyeutu que diba garrar poder, cayendo otra vuelta na nuesa dependencia endémica d’un énte superior nel que ser el “lobby asturianista qu’influya dende dientro” en cuenta de construyir les nueses propies estructures polítiques autónomes.

Nesta situación tan prieta, cada vegada se fai más urxente l’ufrir un espaciu d’alcuentru unitariu pa la esquierda soberanista asturiana. Un espaciu que nun ponga más rixu que’l necesariu pal propiu alcuentru, alderique, contraposición de postures y conocencia de toles opiniones y persones. Un llugar nel que se pueda dar la voz al/la militante y al/la simpatizante ensin más consignes que’l topar puntos d’alcuentru ente les estremaes espresiones pa ver qué posibilidaes y qué torgues hai pa desendolcar un trabayu políticu conxuntu. Un sitiu, a la fin, pa debatir y afitar unos pegoyos ideolóxicos comunes, un marcu nacional afayadizu y unos símbolos básicos apautaos que nos faigan paecer como dalgo organizao al tiempu que plural nun plazu mediu énte la sociedá asturiana. Dalgo que nun se fai dende hai décades y que valdría pa saber a qué tamos xugando. El problema, como cásique siempre, ye’l topar quién o quiénes tengan llexitimidá y credibilidá interna dientro de la esquierda soberanista pa plantegar un espaciu como esti ensin que sía otru esperimentu fracasáu enantes de nacer.

Nun quiero tampoco dexar de llau la importancia que tien pa les lluches nacionales nel contestu estatal la fin de la violencia d’ETA.  Per una parte, y anque yá toparán otres escuses, paez qu’habría finar el tiempu de la criminalización a toos y caún de los movimientos y persones que reclamen un marcu pa que los pueblos s’espresen en llibertá. Esa criminalización carecida dende la década de los 70 pa engochar a cualquier coleutivu social, llingüísticu, políticu que custionare la soberanía española queda ensin argumentos p’aneciar neses postures. Pasín ente pasu presta ver tamién cómo n’otros sitios el bon facer y el diálogu ente mesmos actores del movimientu pudo xenerar esta situación de fuercia na qu’agora s’atopen. Ehí hai muncho de lo que deprender.

Pa finar, paezme que ye’l momentu de que la xente más mozo y que vien con puxu garre posiciones y responsabilidá, y xunto colos seutores más implicaos y maduros d’esti movimientu qu’entá tienen muncho qu’aportar, faigan por da-y otra traza a Asturies. Ensin priesa pero con ambición y pasu ente pasu. Si lo facemos bien, si emplegamos una pedagoxía política afayadiza, si espardemos la idea texendo redes dende abaxo con coherencia, de xuru que vamos consiguir la implicación de muncha más xente y, pali que pali, afitanos como una referencia alternativa n’Asturies. ¡Falta fai!

  1. identitariu diz:

    Coincido dafechu col comentariu caberu que te punxeron en Kaos. Arriendes d´eso, hai munchu quintacolumnista, don Iyán, munchu…
    Temes que nun tocais:
    -Asturies ye nación dende don Pelayo, y vós namás que faláis del 34 p´acó.
    -Asturies tuvo un papel clave pa qu´Europa nun s´enllenara de mezquites de magar 722.
    – El modelu vascu de soberanismu ye puxarra pal país astur.
    – La izquierda en xeneral ta en contra de la esistencia d´un ethnos asturianu.
    -Hai un señor (o media docena) que son les quintes columnes de la FSA-IU
    -Sois namás que la esquierda de la gaita y el bable. Antes roxos qu´asturianos. El nacionalismu davos mieu.

  2. llar867 diz:

    1) Eso ye falso. Nesti movimientu fálase y falose siempre del 34, del 1808, de Gonzalo Peláez y del Reinu Asturianu, lo que nun quita pa que nun se cometan errores históricos como caltener que los pobladores de la tierra asturiana del neolíticu puedan ser catalogaos como “asturianos de nacionalidá” trayéndolos direutamente nuna máquina del tiempu ensin colador. La hestoria y, sobremanera, el padremuñu cultural, social y políticu, del país asturianu siempre foi defendíu poles organizaciones d’esti llau, anque munches vegaes faciendo interpretaciones un poco interesaes o desvirtuaes, precisamente col 34. Paez talamente que’l mesmu problema fuere’l reivindicar que n’Asturies hubiere comunistes o anarquistes o socialistes, más que’l dexar de reivindicar -non tanto a los propios monarques- como al énte políticu del Reinu Asturianu.

    2) L’afirmación de les mezquites ye tendenciosa. Sigún la mesma podríemos dicir qu’Asturies ye responsable de qu’esistiere la Santísima Inquisición de Torquemada. Desixo la mesma mala baba pa toles relixones que básicamente consisten no mesmo. Por cierto, la qu’afogó a los asturianos y asturianes col poder ya influencia feudal y facista nun foi precisamente l’islam, lo que nun quita pa que tea defendiéndola nin muncho menos.

    3) Nel artículu nun se pidi seguidismu del modelu vascu de soberanismu. Lo que se diz ye qu’igual habría que deprender d’unes organizaciones -a escala- qu’hai unos meses taben echándose mierda enriba unes d’otres y anguaño superaron esos pilancos. Nun ye un modelu a siguir por milenta custiones históriques y sociolóxiques.

    4) Nun se puede xulgar a tou un movimientu porque heba -supuestamente- esos quintacolumnistes dientro. Quintacolumna haila en tolos movimientos con una mínima capacidá. Toi por duldar de que nel nuesu casu siquiera faiga falta. Yá nos valemos nós pa destruyir.

    5) “Sois namás la esquierda de la gaita y el bable. Antes roxos qu’asturianos. El nacionalismu davos mieu”. Nun voi pidir perdón por ser d’izquierda y nun comulgar (nunca meyor dicho) col modelu ranciu de FAC. Les cartes tán enriba la mesa y vese qué defende cada persona y qué trayeutories se siguen en cada casu. De Casería y Socialismu editáu por Glayíu a El Comentario, muérganu del viceconseyeru de Cascos. De la xuntanza de la esquierda nacionalista al descréitu de toles opciones qu’anque con munchos errores son coherentes. De les propuestes pa un movimientu autónomu a la estratexa d’entrismu y posibilismu na que coincidíemos en criticar cuando se daba p’haza dientro d’IU.