Asturies, llaboratoriu de prebes pal xacobinismu español

Espublizáu'l 14 de Mayu de 2012 por Llar -> 867 km na categoría Analís políticu

La existencia d’Asturies, como entidá política propia, ta güei más cercana a la so desapaición. El nuesu país, el que, como diz Faustino Zapico “entraba pela puerta grande na era contemporánea” cola declaración de soberanía de la Xunta Xeneral el 25 de mayu de 1808 ve amenazada, otra vegada, la so integridá.

L’andanada mediática, con vocación de convertise en realidá o non, per parte del ministeriu de facienda del estáu español onde s’amenaza explícitamente cola “intervención” de la economía asturiana amparándose  nel contestu políticu ye un fechu gravísimu que, de concretase, sedría merecedor de ser consideráu como un güelpe d’estáu que nun vendría más qu’a demostrar lo feble y tramposo del modelu “autonómicu” español.

Esti movimientu, inéditu na historia recién tres de la “transición democrática”, nun ye casual. Dánse toles condiciones n’Asturies y fuera del nuesu país pa que’l xacobinismu ideolóxicu (y económicu) español dea’l pasu pa la suspensión del autogobiernu de cartón-piedra que nos vienen regalando dende’l primeru de xunu de 1979 la clas política embaxadora del gobiernu español n’Uviéu.

El contestu económicu y políticu européu, onde los estaos miembru nun faen otro que plegase y aplicar con gustu los mandaos de la maquinaria del capital, abre una puerte al tardofranquismu pa entrar a degüellu y anular les instituciones polítiques propies de les naciones que conformen anguaño l’estáu español, entamando pola que ta nuna situación más precaria: Asturies.

El nuestru país axunta toles carauterístiques precises pa ser un llaboratoriu de prebes bien afayadizu nel qu’abordar esa recentralización brutal del estáu. A la composición caótica de la Xunta Xeneral, tres de dos eleiciones nacionales nes que la única opción que sal reforciada y llexitimada ye la de l’abstención y, con ella, el desprestixu de l’aición política, hai qu’amestar la non presencia de partíos nin un movimientu social non sucursalistes pa con Madrid nin pa colos retayos de los nuesos derechos. Si, amás, la llave de la “gobernabilidá” -si puen llamar gobernabilidá a lo que vienen faciendo n’Asturies trés décades- ta en manes d’un partíu que tien como oxetivu final la devolución de toles competencies a Madrid y el desaniciu de los conceyos, la fórmula queda resuelta.

El silenciu cómpliz de la FSA, el brazu más nacionalista español y acomplexáu del PSOE, pa col estáu d’escepción políticu nel que quieren dexar a Asturies ye’l mesmu que’l que los de Rubalcaba prautiquen cuando nun cuestionen nin una migayina les agresiones que cada vienres exerce’l conseyu de ministros de Rajoy. A la fin, si tuvieren gobernando diben facer poco más que lo mesmo. Y ye que, dempués de trés décades de sumisión a Madrid y al neolliberalismu asesín, ¿qué vamos esperar d’ellos a estes altures?.

Capítulu aparte merez el partíu ultra “UPyD”, que tres del “replay” de les eleiciones entraba na Xunta Xeneral, una formación que diz surdir pa romper el bipartidismu y lo qu’insiste en proponer n’Asturies ye un gobiernu de concentración PP-PSOE, llogru que Rosa Díez, en boca del so muñecu de ventrilocuista Nacho Prendes, de xuru vendería como “gesta nacional” per tol imperiu hispánicu.

Desgraciadamente, Asturies, la xente asturiano, ta indefenso énte estos ataques, por muncho que la retórica del partíu de la mano derecha -en tolos sentíos- d’Aznar s’antroxe d’asturianu, una definición que concasa perbién cola definición que Nuberu roblaba pa, precisamente, dexar claro qué nun ye ser asturianu. Tampoco ufre nenguna alternativa la coalición de los que regalen los votos al PSOE pa, yá si eso dempués, discutir -nin siquiera lleguen a negociar- mínimamente’l programa a desendolcar.

Na nuesa nación ta cociéndose’l nuevu modelu d’estáu, nel que namás onde hai movimientos que planten cara a la homoxeinización política, cultural y económica del capitalismu d’estáu español van tar en condiciones de contestar y evitar. Somos el campu de maniobres de la reorganización de la “unidad de destino en lo universal” del reinu español y lo pior ye que muncha xente n’Asturies tovía aplaudirán esta galmiada p’atrás guiao pola desilusión endémica na que la política asturiana nos dexa tres de la llegada del “autonomismu”.
Hai que facer un llamáu a la sociedá asturiana pa entamar a organizar la insubmisión dafechu a los mercaos, al FMI y al BCE, a la dictadura del eurodólar y a la ruina económica que nos siguen imponiendo dende Madrid y Bruxeles col so imperialismu económicu y cultural. Hai que facelo bien aína y afuxendo del populismu vaciu de conteníu políticu. Dar una salida asturiana a la estafa del capitalismu.

Nel nuesu cuentu de “Pedro y el llobu” l’amenaza del llobu siempre foi verdá: lo único que camuda ye qu’agora tán muncho más cerca. Los precedentes tán ehí, el modelu de rempuesta históricu del pueblu asturianu tamién. A ver si somos a ponenos d’alcuerdo pa plantar cara.

  1. Zapicando que ye xerundiu diz:

    Sí, sí, rapaz, y los tos amigos del Ho-Chi-Min y la peña futbolera tan andechizada van a llevantar al Pueblu Trabayaor Asturianu, y colos sos “siguiores” obreros del campu andaluz, aceituneros altivos, y van sacanos d´esta llaceria. Ai manín, baxa de la figar. Ye un conseyu

    • llar867 diz:

      Carlos, prestábame que, de comentar, s’afondare más nos argumentos que na repetición de clixés y típicos tópicos.

      Un saludín.

  2. Xuacu diz:

    Sicasí, nunca tuvimos tan a güevu valtar el capitalismu. Les estructures económiques son tan febles que val col vuelu d’una mariposa pa esbarrumbales… Asturies pue ser tamién un llaboratoriu de pruebes pa la lliberación de los pueblos si trabayamos con enfotu nello.

    • llar867 diz:

      Xuacu, gracies pol to comentariu. Nun creo que teamos cerca de valtar el modelu económicu, sinon que tamos nel momentu nel qu’esti ta más custionáu socialmente. Hai 4, 5, 7 años mui poca xente falaba yá de conceutos como’l “capitalismu”. Anguaño “crisis del capital”, “anticapitalismu”, etc. son palabres que remanen los medios y qu’emplegamos a diario.

      Eso ye mui bueno, porque l’estáu del “bientar” afogó bona parte d’esta retórica y les alternatives polítiques que vienen tres d’ella.

      El capitalismu, como la corona española, tán nel so pior momentu de popularidá. Otru cantar sedrá que tea la sociedá maura pa que se supere n’Asturies, nel estáu y n’Europa. Dende llueu veo otres tierres con munchu más camín andáu…y ensin munchu mayor éxitu, por nun dicir tolo contrario.

  3. ensidesa diz:

    Pero cuando dices “Asturies, la xente asturiano, ta indefenso énte estos ataques”, paeces esacaecer que la xente asturiano ye la que quier a esa FSA, a esa UPyD, a esi PP, a Foro y a IU, porque cuiden que son quienes-yos apurrirán les soluciones afayadices. Y la xente asturiano nun ye especialmente boba nin perspicaz: decide ente lo que tienen delante, ente les opciones que-yos paecen creibles y convincentes. Les fundaciones a lo FAES, los think tanks de los grandes partíos, les universidaes, los circulos empresariales, la banca… lleven muncho trabayando nuna España na qu’Asturies nun ye más qu’un ‘cerocoma’ de too. Y ‘esto ye asina’. Nun se, pero creo que nun paga la pena llamentase si nun ye pa plantear una alternativa creible y convincente cola mirada puesta más nel mediu plazu que na urxencia del momentu.

    • llar867 diz:

      Ensidesa, munches gracies por lleer el tochu, enantes de nada.

      Home, la xente asturiano tuvo nes últimes eleiciones (les que dieron el parllamentariu a UPyD esta vegada) una participación na que la opción mayoritaria foi l’abstención. Per otru llau, estes eleiciones nun fueron nin muncho menos un referendu ente “intervencionistes” y “non intervencionistes”. Por supuesto que tamos indefensos/es ente l’amenaza del ministru de Rajoy. ¿Quién lo votó eso?

      La intervención que mañana puede entamar Madrid na economía asturiana nun tien abellugu llegal dalu, ye un güelpe d’estáu a la llegalidá estatutaria y espeya lo ruina que ye la nuesa “autonomía” y lo feble de la “España de les Autonomíes”.

      Coincidiendo na necesidá de plantiar alternatives a toa esa xente descontento cola política de retayos ppsoera y col entreguismu, si hai una anulación de facto del estatutu asturianu habría que canalizar esi descontentu dende l’asturianismu. ¿Quién sinón? Lo malo ye que nos pasa lo que siempre, tar desorganizaos y mirando pa les mosques esnalar.

      Coles crítiques que-y pueo poner al modelu #Compromisu creo firmemente que ye un camín qu’ameyora lo que se vien faciendo. A ver si polo menos l’amenaza de desapaición, non yá de l’actividá política del asturianismu -qu’esa ta desaniciada-, sinon del mesmu conceutu políticu d’Asturies nos val p’alitar como movimientín.

      Un saludu.

  4. dinamitu diz:

    Ai, pero ¿qué fumáis, ho? ¿Ye que Asturies va a dinamitar Wall Street? Siguimos asina, chachos?

    • llar867 diz:

      Carlos, ensin acritú, toi convencíu de que les tos aportaciones puen ser muncho meyores que’l descréitu pol descréitu. ¿Intentámoslo?

  5. ensidesa diz:

    Paezme que, si bien naide votara una intervencion o supresion de l’autonomia asturiana, sí que se votó implícitamente a opciones que vienen impulsando esi procesu, ensin que se dea una alternativa (creible, fiable) que proponga otru camín. Pero, como dicen, los momentos de crisis son tamién d’oportunidaes: ye la oportunidá pa los petites recentralizaores, pero tamién pue selo pa una respuesta nel sen contrariu si se ye quien a superar con intelixencia la descomanada desventaya cola que se parte. Si esa alternativa naz de #compromisu, se verá. Pel momentu, ye l’entamu d’un camín que pue llevar a niundes, o pue abrise pasu ente los munchos matos y escayos que s’atoparán. (por cierto, el tochu nun lo yera tanto, y menos cuando presta lleelu 😉

    • llar867 diz:

      A mi tamién me ta prestando muncho l’alderique. 🙂

      Ye un tema pa tar hores y hores falándolo, pero abúltame que n’Asturies vótase más polo que fuimos nós (y los partíos con implantación histórica) que polo que son y polo que somos. El perfil del votante del PSOE o d’IU ye’l d’una xente mui ideoloxizao y muncho más a la esquierda qu’esos dos (y probablemente que munchos otros).

      Col PP anden ehí, ehí. Nesi “bandu” camudaron bien poco’l programa dende los 70…:-)

      Cuido que n’Asturies sigue habiendo muncho que pulir y que depurar, pero’l potencial ta ehí. Los conceyos, el güelpe d’estáu “interventor” son exemplos que puen valir mui bien pa espeyar les contradicciones del modelu parademocráticu (y autonómicu) español. Habrá que da-yos duro.

      Eso sí, hasta agora nun fuimos quién a articular un polu políticu centráu na custión nacional y los derechos individuales y coleutivos. Poro, somos los primeros que tenemos qu’entamar facer les coses d’otra manera.

      A ver…!

  6. Iván diz:

    Préstami bastante l’artículu.
    Paezmi que lo únicu que se pue facer ye que la xente que tamos concienciaos de la necesidá d’una alternativa pa esti Pueblu ye ponenos a ello, ser los protagonistes y facelo, nun solu dicilo. Hai que ponese a ello ensin escuses y espero que del congresu #Compromisu, del que vamos tener de Conceyu Abiertu y del que va tener la CSI dempués del branu salga daqué que sirva pa entamar cola rexeneración d’Asturies.

    Onde nun toi pa nada d’alcuerdu ye col emponderamientu del #Compromisu asina un pocu gratuitamente, dende’l mio puntu vista. Decidí güei mesmu que voi participar nel so congresu y voi a proponer a la xente que milita ellí, cola que camiento que tendré que trabayar nel futuru, lo que mi paeza oportunu pa que la militancia d’eses dos organizaciones podamos tar nun futuru a cortu plazu codu con codu trabayando por Asturies. Pero vamos, paezmi tal burrada dicir que ye lo meyor que se fizo n’Asturies hasta’l día de güei ye lo que llevamos hasta agora d’esi proyectu, coles dos convocatories electorales incluyíes… MAMINA. Puedo aceutar que se diga que, si se fae bien, lo que salga del congresu pue ser bonu pal país, y d’ehí palantre tolo que se diga sigún los gustos de caún, pero lo que lleven andáu con Compromisu ye una llaceria igual (o mayor, paezmi a mi) que tolo que se fizo hasta agora como BpA, AA, UNA, Unidá… Y falo tantu dende los planteamientos políticos http://bloque-una.com/programa/ hasta la participación, democracia y xenerosidá pa col país.

    Salú y animate a que sigas escribiendo porque fae muncha falta aldericar nesti país.

    • llar867 diz:

      Gracies por siguir col alderique, Iván.

      Creo que tienes tola razón, compañeru. Sicasí, ¿nun diz muncho de la situación na que tamos el que nunes condiciones como estes tengamos qu’acoyer como un avance en democracia interna l’aparición del modelu #Compromisu? Eso sí, yo que tamién pidí güei apaecer nel censu, fáigolo dende una posición crítica y constructiva. Siéntome mui representáu en tolo que dices y ye que, hasta pa tar en desalcuerdo, hai que tar.

      Quiero creyer que #Compromisu vaya ser un puntu y aparte na dinámica Bloque-UNA. Si de lo que se va tratar ye d’apuntalar el proyeutu previu vamos llevalo crudo. Esperemos que la xente que participe-y deamos otra traza.

      Eso sí, a ver si no que cinca estrictamente a la entrada del blogue sois (somos) quién a plantiar una mínima resistencia. Norabona tamién por tirar por una movilización que fai falta, convóquela quien la convoque.

      Y pa quien nun sepa de qué falamos, por si acasu, ehí va l’eventu en FB: http://t.co/3Gpw2sIy

  7. Iván diz:

    Val, entós entiendo qu’al falar de #Compromisu refiéreste namás al congresu. Ye que Compromisu ya lo son dende les eleiciones de Mayu del añu pasau y deso taba falándolo, les ganes de que se faga bien d’equí n’alantre ye una cosa pero nun escaezo cuales son los pasos que se dieren hasta esti momentu.
    En cualquier casu siguimos tando d’alcuerdu nun porcentaxe grande. A da-y forma.

    Salú!

  8. […] recientesIván en Asturies, llaboratoriu de prebes pal xacobinismu españolllar867 en Asturies, llaboratoriu de prebes pal xacobinismu españolIván en Asturies, llaboratoriu […]