Hestoria d’un viaxe a les coraes del fútbol. Real Uviéu, 2001-2012.

Espublizáu'l 8 de Xineru de 2013 por Llar -> 867 km na categoría Les mios caxigalines

Seique’l fútbol ye ún d’esos temes tabú pa la esquierda, arrequexáu na estaya de “les aficiones personales, íntimes” o, direutamente, castigáu nel de les “incoherencies (in)confesables”. Ye difícil dicise d’esquierda y definise como futboleru apasionáu. Nun encaxa, de primeres, por milenta razones ente les que s’atopen argumentos variaos del estilu: “ye un negociu”, “aliena a la xente”, “ye neto qu’una relixón”, “ye de xente poco formao”, “nun aporta nada”.

Nun digo que nun heba parte de razón. De fechu, cola cabeza fría y un analís posáu, probablemente tengan razón abondo, anque esi tipu d’argumentu suel escaecer la vertiente sociolóxica, emotiva y cultural del fechu futbolísticu quedando nuna superficie más o menos crítica pa col modelu económicu y de xestión de les SADs d’anguaño nun sistema económicu determináu. Poro, echando una güeyada al fenómenu dende una óptica social y de clas, podríemos analizar el fenómenu social y deportivu como dalgo asemeyao a otres espresiones sociales y culturales de la redolada artística, musical o, mesmamente, del ociu personal, esi gran escaecíu siempre nos analises sesudos de la esquierda.

Xustificaciones feches y siendo’l fútbol, como dicía’l xugador y entrenador Jorge Valdano, “lo más importante dientro de les coses que nun tienen importancia”, confiésome: soi siguidor del equipu’l mio pueblu y apetezme cuntar la parte de la so hestoria que me tocó vivir hasta agora. Una hestoria que nos últimos años garró un arume míticu y na que la participación y el puxu popular tán faciendo que pueda ser posible’l tornar a la élite con unos valores mui estremaos a los que’l club tinía cuando l’abandonó hai 11 branos malditos.

Soi del Uviéu:

Nun sé cómo pasó. O sí. Pero nun soi a facer alcordanza de la primer vegada que tuve nel vieyu Carlos Tartiere porque tuve visitándolu dos domingos sí y l’otru non dende que teo usu de razón. Nun fui sociu hasta l’añu 2003, pero eso nun quier dicir que nun lu siguiere o nun fuere al campu de Buenavista al 70% de los partíos. Cenciellamente, en casa tiníen la teoría de que “si nun me facíen sociu diben ser quién a torgar l’afición”. Fallu. Nun cuntaben col proselitismu de mio güelu, especialmente,  y cola complicidá del Rei Gaspar, que tolos años dexaba un xándal, un chubasqueru o una camiseta del equipu azul.

Teo munchos recuerdos de la mio infancia rellacionaos col equipu. Medré col Real Uviéu en primera división pero foi a partir de 2003 cuando surdió esti club “nuevu” que tien un aquel especial y un presente distintu al de la mayoría de los equipos clásicos del estáu y del que vos quiero falar.

uvieu

La del míu ye la hestoria d’un equipu que naz en 1926, tarde, tres la fusión de los dos equipos de la ciudá, y qu’anque ye 2 décades más mozu que la mayoría de los demás equipos d’éxitu estatal tien entá’l puestu númberu 17 na clasificación hestórica de Primera, lo qu’indica una competitividá mui alta dende l’entamu. Con un pasáu d’oru nos años trenta, onde’l güelpe d’estáu fascista de Franco y la Guerra Civil torgaron un más que probable títulu de campeón de lliga, nos años 90 -los qu’a mi me tocaren vivir- yera un equipu consolidáu de la categoría, normal, cola so rivalidá eterna col otru equipu del país, el Sporting de Xixón, ensin muncho más. Mataxigantes un añu, revelación de la primer vuelta l’otru, a piques de baxar otros trés, hasta 2001: l’añu de la llaceria que certificó una pésima xestión deportiva y económica dende la conversión forzosa por llei a Sociedá Anónima Deportiva nel añu 1992.

Una cadena de despropósitos: un atracu arbitral per parte d’un colexáu vascu na penúltima xornada escontra’l Madrid, un derbi/contuberniu vascu na cabera con un equipu salváu y l’otru compitiendo por evitar el descensu y l’Uviéu xugando escontra un equipu clasificándose pa xugar la Champions dieron col club de la capital d’Asturies na categoría de plata, que 2 años depués perdería  deportivamente pa, de secute, perder otra más por denuncies d’impagos.

2003 “el velenu valió pa curate”: 

Y nel momentu más críticu, cuando naide da un duru por él, surde’l puxu popular, lo que depués daríemos en nomar “Espíritu del 2003”. L’afición d’esti equipu fáise mayor d’edá y garra’l protagonismu secuestráu polo conseyos d’alministración dende l’añu de conversión obligáu de “Club de Fútbol” a “Sociedá Anónima Deportiva”.

Sin título

Inoculáu’l velenu d’un alcalde déspota que quixo “refundar” l’uvieísmu a costa d’enterrar a un muertu qu’entá taba “mui vivu” la ciudá volcose en salvar la primer bola de partíu: la desapaición inmediata. Un movimientu social qu’otros yá quixéremos tamién pa “les coses importantes” consiguió que’l Real Uviéu saltare al prau estráu de xugadores que firmaron en blanco ensin saber si’l club diba aportar siquiera a avientu. Una marea de miles de persones enllenó los maltrataos y escaecíos campos de la Tercera División (la Primer Lliga Asturiana, diría yo) dexando perres y ambientación y abriéndonos los güeyos a un mundu, el del fútbol humilde, el de les coraes del deporte, que munchos/es enxamás tastiáremos. Tamién, dacuando, -hai que lo dicir- adolecimos de xenerar un estrieldru negativu propiu d’una afición fuera de llugar, enxamás avezao a tener que xugar en llamuergues y escontra equipos qu’antaño yeren poco más que “cantera” de xugadores.

Y pasó una década ensin que fuéremos quién a salir de la 2ªB, desarmaos y cautivos d’un máximu aicionista delincuente y, anguaño con orde de captura internacional. Presos, en realidá, d’un contestu llegal que condena a les aficiones a ser poco más que fruta esprimío polos aicionistes de referencia qu’usen el fútbol pa, ente otres coses, blanquear dinero prieto, llevar comisiones y facer negociu neses esferes más propies de películes ambientaes en Sicilia.

Cásique 10 años depués, torna l’Espíritu de 2003:

Ente 2003 y 2012 l’Uviéu F.C. perdió 10 años queriendo facer lo mesmo: fichar, subir. Tornar a primera coles mesmes estratexes que lu llevaren a tar, de facto, desaniciáu. El modelu de xestión deportiva y d’interaición social de los aficionaos col club yera’l mesmu: tu pagues, yo ficho, tu calles. Pero too entamó a camudar na temporada 2011/2012, coles protestes pa finar cola mayoría aicionarial del prófugu Alberto González. Tornó a furrular otra vegada la maquinaria diésel del uvieísmu, la mesma qu’albortare la creación del enxendru “Oviedo Astur CF” y  que llimpiare de ñeve a palaes el prau del Nuevu Estadiu Carlos Tartiere cuando nun había nengún emplegáu contratáu pol club. Per primer vegada na hestoria del fútbol mundial entamaba una campaña de salvación global peles redes sociales que finaría cola ampliación de capital increyible d’hai unos poques selmanes. El resultáu: unos 2 millones d’€ soscritos por pequeños aicionistes d’Asturies y mediu mundu ensin nengún tipu d’ayuda pública (menos mal) y cola entrada del magnate mexicanu Carlos Slim na sociedá, dándo-y viabilidá al club pa finar l’añu y cuadrar les cuentes con facienda y otros acreedores. Fálase de miles d’aicionistes namás en Londres, de más de 300 aiciones mercaes polos hinches de los Portland Timbers de la MLS estaounidense y de clubs de fans qu’esporpollen per más de 70 países.

La composición aicionarial de la sociedá quedaba agora, simplificando, asina: afición col 41%, Slim col 35% y Conceyu d’Uviéu col 8%, siendo esti l’equipu con mayor númberu d’aicionistes del estáu y dando la vuelta’l fenómenu per toles televisiones y periódicos del mundu.

Diérase la carambola perfeuta: un preciu mui baxu de les aiciones (10,75€ caúna), una campaña mediática impresionante gracies a una xeneración de canteranos que ta trunfando n’equipos cimeros de la Premier League, periodistes del estáu que yá quedaren prendaos del movimientu en 2003 y, peresepecialmente, la campaña del que fuere estudiante erasmus n’Uviéu Sid Lowe, amás d’axilidá per parte d’un conseyu d’alministración mui próximu a l’afición que foi quién a habilitar la compra d’aiciones per internet y, sobremanera, el bon facer d’unos aficionaos y aficionaes que, nun contestu social cruel y probablemente poco xustificable, fueron y siguen siendo testerones pa cola causa de caltener una seña d’identidá de la ciudá y d’Asturies viva.

Aquellos fueren díes de sentimientos alcontraos y contradictorios nos qu’a munchos ficieron que se nos mecieren nes coraes custiones emocionales y contradicciones personales y polítiques. Dende’l paisanu qu’entró nes oficines con un billete de 50€ y que coló d’elles ensin querer aiciones al rapacín que desfizo en milenta cachos una hucha-gochín pa mercar un par d’aiciones, pasando pol paráu empeñáu en dexar 3,50€ “tolo que tinía en bolsu” anque nun-y dieren siquiera pa una aición. Pa munchos una llocura coleutiva censurable, pa otros el reflexu d’un sentimientu mui enraigonáu na ciudá.

Tampoco ha d’escaecese qu’al calor del movimientu social -si podemos falar d’esti fenómenu asina, ensin que los verdaderos movimientos sociales se vean agraviaos– averáronse oportunistes. El Real Madrid, por exemplu, “donaba” 100.000€ pa ponelos a nome del Conceyu d’Uviéu nuna maniobra que daquién podría ver “escura” o, como poco, como llaváu de cara publicitariu pa un equipu qu’encarna la mayor parte de los males del nomáu “fútbol modernu” d’anguaño.

Una alternativa “profesional” al fútbol modernu. ¿Ye posible n’Uviéu?

Esto ye lo que la campaña de venta d’aiciones vendió y sigui vendiendo: la oposición al modelu de les SADs y tornar los equipos a les sos aficiones. La llei de Sociedaes Anónimes Deportives foi aprobada nel añu 92 y supunxo la conversión forzosa de tolos clubs de fútbol, una conversión a toes lluces, 20 años andaos, fracasada y llaceriosa. ¿Toos? ¡Non! Chocantemente caltuviéronse nel estáu xurídicu postreru y “d’aquella manera” el Real Madrid, el FC Barcelona, l’Athletic Club de Bilbao y l’Club Atlético Osasuna de Pamplona.

Esta llei convierte a los clubs de fútbol n’empreses remanaes por capitales y aicionistes y non por socios/es que dexaron un pufu-burbuya económica de dimensiones descomanaes y a les que nenguna alministración-y punxo llendes. Bono, sí: dalgún club agraviáu hébolu -como l’Uviéu cásique l’únicu na élite- mientres que munchos fueron beneficiaos con prórrogues, ayudes públiques y recalificaciones illegales o trampes que permiten amazcarar les cifres tapando les deldes del balance col valor de xugadores, les marques deportives y el restu’l patrimoniu de la sociedá. Y como’l fútbol ye la cuenta pa perder votos… naide-y mete mano.

Asina, desanicióse cualisquier niciu de democracia interna na xestión de los equipos. Créase la figura del “Conseyu d’Alministración”, que vien a ser una suerte d’akelarre de suxetos que viven del club y faen y desfaen, cobren comisiones y sangren a l’afición ensin escrúpulos nin naide que-yos tosa. Que pa eso son los de “les perres”.

Entós ¿cómo va ser l’Uviéu FC un equipu que diga “NON al fútbol modernu” si ye una SAD y, amás, tien como aicionista de referencia al home más ricu del mundu -que nun llegaría a esa posición precisamente arrenunciando a les plusvalíes que xeneren los y les trabayadores de los sos negocios-?

La rempuesta ta por contestar, pero razones pal optimismu hai, polo menos les condiciones son muncho más afayadices que nel restu de clubs históricos:

– L’afición uvieísta ye dueña del 41% del so equipu porque asina lo consiguió mercando aiciones, a cambiu d’ampliar el capital de la sociedá recuperando’l so control, de tala manera qu’axuntando’l patrimoniu en propiedá del conceyu d’Uviéu algamaría’l 49%, al tiempu que Carlos Slim controla un 35%.

– Como dicíemos, ye’l club del estáu con mayor númberu de socios nominales y nel que l’afición controla un porcentaxe más altu de les aiciones. Esta situación convierte a l’afición, si s’organiza, nel lobby más potente de la sociedá lo que la fai interllocutora obligada pa cualesquier xestión deportiva y económica.

– Existen exemplos, mesmamente nel casu del Swansea galés na Premier League nel que milita’l canteranu uvieín Miguel Pérez Cuesta “Michu”, onde se da’l casu nel que l’afición tien sindicaes nun “trust” hasta’l 20% de les aiciones, exerciendo esta una influencia mui notable no que cinca a les decisiones económiques, deportives y sociales.

– Per último, dende qu’entrare esti conseyu d’alministración -qu’habría tener calter transicional hasta la fin de la temporada- hebo yá delles decisiones qu’exemplificaron una apertura y democratización na llínia correuta. Concursos públicos pela rede pa diseñar les bufandes del equipu, sofitu incondicional nes peñes, prioridá total de la cantera y de la xente más mozo, contención nel gastu, emplegu normal de la llingua asturiana xunto con otres como l’inglés, francés, chinu, alemán…

Perspeutives y retos:

Al mio paecer, anguaño’l Real Uviéu C.F. enfréntase a dellos retos deportivos y sociales, tan importantes ún como l’otru.

uvieuu

D’una banda, tornar a la lliga profesional l’añu qu’entra. Ye un finxu imprescindible pal club l’abandonar la categoría de bronce y entamar a rexenerase deportivamente sofitándose na cantera que tan bon resultáu y bona prensa dió nos caberos años. Un modelu d’equipu onde prime la xente de casa que siente y representa muncho meyor los colores y, amás, supón un fútbol más caltenible en términos económicos.

D’otra banda, pa tolo anterior, que la so afición s’articule realmente como grupu y que sindique les sos aiciones espardíes per tol mundu. Algamar un amenorgamientu importante de los ingresos per aciu del desembolsu de los socios/es sedría interesantísimo y averaría al Uviéu al modelu alemán nel qu’hai grandes aficiones y equipos punteros que nun atraquen a mano armada a los que tienen que-y poner sal al xuegu dende les graes. Priorizar el qu’heba 100 pagando 10 y non 10 pagando 100 y dir cumpliendo escrupulosamente cola delda que tien contrayío’l club coles alministraciones públiques, facienda etc: ye dicir, cola sociedá. Y más nesti intre nel que se tán desfaciendo los servicios públicos.

Per último, afondar nel usu normal de la llingua asturiana como manera de facer, del de so, un proyeutu de futuru como primer referente asturianu, posición agora perdía, que sedría más que prestoso y tendría costu nulu.

Lo de renomalu “Uviéu FC”, quitá-y la corona real y poner el topónimu popular vamos dexalo ente les coses menos urxentes agora mesmo. ¿O qué?

Pd: Mentanto esti artículu yera rematáu’l mio equipu foi humildáu pol filial del eternu rival. Valgan estes lletres calcaes nel tecláu d’un ordenador como purgatoriu de penes pa tolos afeutaos y afeutaes. Si nun doliere nun sedría’l nuesu Oviedín.

Fonte imáxenes 1: http://es.paperblog.com/futbol-de-izquierda-1355359/ 2: http://chiribi.blogspot.com.es/ 3: http://lafutbolteca.com/tag/club-de-futbol-asturiano/ 4: Revista Interviú. 5: http://unclavoardiendo.files.wordpress.com 6: http://elpeperiodico.blogspot.com.es/2012/11/el-real-oviedo-dio-la-vuelta-al-mundo.html 7: http://sanktpauliasturies.blogspot.com.es/

  1. Sergio diz:

    Nun entiendo la alternativa al fútbol modernu que promulgaba la ampliación, si al final completose gracies a la aportación d’un capitalista (el mayor del mundo) que convirtiose de fechu nel máximu accionista. La verdadera alternativa al establishment imperante hubiera sido disolver la SAD y formar un club con les bases populares ideales, la afición como principiu y fin de to.

    Salú.

    • llar867 diz:

      Bono, eso nun ye del too cierto.

      L’ampliación necesaria pa salvar al Uviéu completose per parte de l’afición. Los 1,905.000€ superáronse, llegose a más de 2M. Lo que fizo la entrada de Slim, del qu’habrá munches coses que dicir -del so pasáu, presente y futuru y del papel que va tener nesti club-, foi “da-y viabilidá” económica al proyeutu a mediu plazu. Pelo demás, paezme mui certero’l dicir que la razón dictaba’l desfacer la sociedá y entamar dende 0, pero equí pudo y pue más el sentimientu que la razón. En 2003 lo llóxico paez que sedría’l tener aprovechao la situación pa entamar dende la mesma categoría de cero, pero como diz el cantar “el corazón de la ciudá nun quixo suicidase”.

      Paezme que ye parte de la maxa y el romanticismu de la esperiencia. Una actitú testerona que nun quixo una imitación con un nome y un escudu asemeyáu y el mesmu pantone d’azul, sinon caltener el patrimoniu históricu, pa bien y pa mal.

      ¡Munches gracies pol malgastar el tiempu en lleer esti tochu!

      Salú!

      • Pablo diz:

        Home lo de la normalización del Asturianu nun ta nidio… nun senti tovia a nengun xugador, directivu o representante del club nuna entrevista falando n’asturianu.
        Y les campañes publicitaries tampoco me doi cuenta de veles n’asturianu. Esperemos que tengan mas detalles colos asturfalantes nel futuru…
        Hala Oviedo!!!

        • llar867 diz:

          Un saludu y gracies por lleeme!

          Home, ciertu compromisu col usu normal de la llingua asturiana nel “Real Oviedo” sí se ta viendo. Cuando la campaña de venta d’aiciones el web taba tornáu al asturianu y nel últimu videu promocional pa la campaña d’abonaos na segunda vuelta tamién: https://www.youtube.com/watch?v=WsrUV7q7Vxc Son dos detallinos que contrasten con una década de nula presencia de la llingua asturiana a nivel institucional nel club, anque l’afición enxamás escaecerá que Radio Sele foi la única que salió pol Real Oviedo dende tercera división.

          Per otru llau, nun hai qu’escaecer que nel 2001 l’Uviéu tenía un compromisu cola A.LL.A. pa promocionar l’asturianu ya incluso hebo una valla publicitaria nel nuevu Tartiere de l’Academia.

          A ver, home, a ver. Nun ye urxente pero diba ser mui guapo.

  2. Fernando diz:

    Namás una cosina, hai que tar sollertes con esos empresarios “arrogantes”, pa que nun usen l’equipu nos sos amagüestos.
    Salú.

  3. […] Fernando en Hestoria d’un viaxe a les coraes del fútbol. Real Uviéu, 2001-2012. […]

  4. […] nesti artículu del mesmu blogue la cita de Jorge Valdano na que dicía que “el fútbol ye la cosa más importante ente les […]