Escontra l’espoliu colonial: por una tarifa llétrica asturiana.

Espublizáu'l 10 d'Avientu de 2015 por Llar -> 867 km na categoría Analís políticu

N’Asturies nun queda naide. Dícenlo les últimes encuestes del Institutu Nacional d’Estadística (INE, 2015) pero les que resistimos (de momentu) perequí sabémoslo porque se ve nes estaciones de tren y d’ALSA. Tamién peles cais, pelos chigres, nos conciertos y nes manifestaciones.

% emigraos sobre censu eleutoral (INE, 2015)Si hai dalgo que xunta a los pueblos del noroeste de la península, amás de rasgos culturales, históricos y llingüísticos propios, ye la emigración forciao de la población. Ye un fenómenu endémicu; sicasí, les cifres d’emigración fuera (y dientro) del estáu son llacerioses. Galiza, Asturies y Llión tienen ente’l 10 y el 27% del so censu eleutoral residiendo fuera del estáu español. Esto, ensin incluyir a les persones que viven fuera del estáu y nun lo declaren oficialmente y les que, de la mesma manera, son emigrantes dientro del estáu español y siguen computando como gallegues, asturianos y llioneses.

¿El resultáu? Un censu eleutoral nel nuesu país astur que rolda les 110.000 persones censaes acuyá de les llendes del país y fuera, tamién, del estáu español: un 11% sobre’l censu total. Una vergoña absoluta.

Pero, amás de producir mano d’obra formao qu’emigra a Madrid y Londres –como comentábemos nesti artículu d’esti mesmu blogue- nun ye lo único no que coincidimos los pueblos del noroeste de la Península Ibérica; nun ye lo único que carauteriza a los seutores productivos de la nuesa redolada. Tamién somos la pila llétrica del estáu, a cambiu de nada. Bono, sí: a cambiu de contaminación, esfarrape medioambiental y espoliu de los recursos naturales y la fuerza de trabayu del pueblu asturianu.

Pero ¿qué dicen los datos?

Nun dexen llugar a duldes: Asturies y Galiza son los principales noyos onde l’estáu español xenera lletricidá. Ensin embargo nun consumimos, nin de lloñe, lo que producimos. Pela contra, son Madrid, especialmente, y Barcelona los principales sumideros de lletricidá, una enerxía que ye llevao a les grandes capitales del estáu al traviés de llínies de Mui Alta Tensión. Los siguientes gráficos de xeneración llétrica y demanda del añu 2008 de Red Eléctrica Española indiquen bien gráficamente la situación na que nos atopamos.

Xeneración lletricidáDemanda y consumuProducción-demanda

Pero nun ye too: los datos del SADEI (Sociedá Asturiana d’Estudios Económicos ya Industriales) aporten muncha más información. Por exemplu, el gráficu producción llétrica-consumu d’embaxo, con una serie de 15 años (2000-2015) amuesa la variación de la producción añal de lletricidá nel nuesu país, al tiempu que vemos qu’en cásique tolos años esta foi muncho mayor que la demanda/consumu d’Asturies. Son especialmente sangrinos años como’l 2001-02, onde producimos más de 3,5 vegaes la enerxía demandao. Y esti mesmu añu, en plena crisis enerxética que caltién el consumu a pesar de lo precario de la economía del pueblu asturianu y la desllocalización d’empreses, Asturies produció 2.8 vegaes la enerxía que consumió.Producción-Consumu históricu

Entós…¿cómo se produz la enerxía n’Asturies?

Llamamos “mix enerxéticu” a los estremaos medios de producción llétrica d’un país, anque ye verdá que la lletricidá nun ye tola enerxía qu’usamos: por exemplu, los coches, los autobuses, aviones y tantes otres máquines furrulen con petróleu qu’Asturies nun produz y nun tamos contabilizándolos.

El casu ye qu’Asturies cuenta con estremaes formes de producir lletricidá. El principal ye al traviés de grupos termollétricos, onde quemamos dalgo de carbón asturiano, escombreres y carbón importao de países onde nun se tán garantizando derechos llaborales, nin seguridá nin xusticia. Por poner un casu, podríemos falar del carbón de Colombia y de la especulación de Goldman-Sachs nel puertu asturianu d’El Musel.  No tocante a la enerxía térmico, ye la base del mix enerxéticu n’Asturies. Antaño furrulaba a costa del consumu de combustible nacional (ello ye, asturiano). De fecho hai hasta térmiques nel nuesu país qu’usen como combustible les propies escombreres del sieglu pasáu. Esta producción xenera contaminantes d’estremaos tipos que tamién ye posible amenorgar y capturar, anque xenera problemátiques el so almacenaxe posterior. Tamién hai que dicir qu’Asturies tien dalguna de les centrales térmiques más contaminantes d’Europa, como la d’Aboño.

Tornando a otres formes de producción, tenemos los saltos d’agua, que tenemos en cásique tolos ríos importantes del país con gran capacidá xeneradora. Supunxeron grandes estroces ambientales y hubo que lluchar va poco escontra otros banzaos qu’intenten ya intentarán siguir construyendo. Tamién tán los parques eólicos, la gran obsesión del PSOE-arecismu xunto colos ciclos combinaos que -gracies a tolos santos- nun vimos culminaos (¡hasta 10 proponíen!) por muncho que nos quede n’herencia la vergoña de la regasificadora de Xixón. Estos parques nun permiten caltener -per se- la tensión de la rede llétrica, pero sí permiten amenorgar el puxu de los grupos termollétricos baxando’l nivel d’actividá, y poro, d’emisiones, cuando tán funcionando.

Contaminación AsturiesDesgraciadamente, fueron usaos poles grandes empreses non como manera de contaminar menos, sinón d’afayase a les doctrines de la Unión Europea, qu’esixíen la producción d’un tantu por cientu n’enerxía renovable. ¿Abrir eólicos y trancar térmiques? Nun suena tan mal, ¿non?. Llaceriosamente, en cuenta de trancar plantes contaminantes la estratexa de les empreses foi sobreproducir en verde l’equivalente necesariu pa siguir calteniendo’l mesmu porcentaxe d’enerxía xenerao contaminante. ¿Chocante, non?

Sobra dicir que, tres de la privatización de la enerxía público, les empreses enerxétiques operantes nel estáu español y n’Asturies nun apararon de ganar y ganar a espuertes mentanto la capacidá del pueblu asturianu pa pagar les tarifes llétriques yera cada vegada menor, pasando frío y una crisis y probeza enerxética que ximielga les cases de les nueses ciudaes, villes y pueblos. Y xenera tamién contaminación: ¿ves esi puntín naranxa nel mapa de la drecha? Sí, saludái. Somos nós. Polución penriba’l llímite de la Unión Européa. L’únicu puntu del estáu español. ¡Puxa Asturies!

Producción de lletricidá y necesidaes sociales del pueblu asturianu

Énte esti panorama cabe entrugase delles cuestiones.

  • ¿Cómo ye posible que’l pueblu asturianu, que vive nun país que llega a producir tanta lletricidá, pase frío y nun seya quién a xenerar emplegu de calidá col plus que da tener enerxía abondo?
  • ¿Cómo ye posible que paguemos una de les tarifes más altes de la UE los asturianos y asturianes, cuando somos un país productor (y esportador) d’enerxía llétrica?
  • ¿Cómo ye posible qu’en 2013, con esti panorama de bonanza productiva, se cortare la lluz a 50.000 families asturianes que nun podíen pagar estos precios?
  • ¿Daquién imaxinaría qu’en Venezuela, o en Texas, o n’Arabia, el petróleu fuere tan caru como n’Asturies? ¿Por qué la lluz n’Asturies se paga como si se truxere de lloñe cuando se xenera al pie de los nuesos pueblos?
  • ¿Cómo ye posible qu’heba empreses privaes y públiques que xustifiquen los sos planes de pieslles “porque la enerxía ta caro” cuando sal a espuertes d’Asturies?
  • ¿Cómo ye que tenemos qu’aguantar les consecuencies de la (sobre)producción -contaminación, enfermedaes respiratories, llínies de Mui Alta Tensión-, tarifes llétriques abusives y lucru pa empreses privaes mentanto vivimos arrodiaos de megavatios saliendo en direición Madrid?

Toes estes entrugues llévennos a custionanos munches coses:

  • La enerxía debiere tar al serviciu de los intereses de los pueblos, non de los oligopolios, nin de les empreses, nin del porgüeyu priváu, nin de los intereses de clas d’unes naciones sobre los recursos d’otres. Por embargu, l’estáu español considera qu’Asturies, como Galiza, ha ser la pila enerxética del estáu porque-y convién a la so oligarquía, al marxe de les necesidaes sociales y productives del pueblu asturianu, claramente sobrepasaes pol modelu impuestu como “de progresu y de futuru”.
  • Cuando pagamos la tarifa de la lluz, abonamos un 45% de costes de producción y un 55% de los denomaos “peaxes”. Estos peaxes que se nos imponen a les asturianes y asturianos, como si truxéremos la lluz de la Patagonia y non de Lada, de La Ribera, de Grandas de Salime, de La Perea o de Soutu la Barca son vergoñosos dafechu y humíldennos como pueblu; un pueblu que careció expropiaciones forzoses de tierres y pueblos enteros pa facer saltos d’agua, que respira sulfuros, óxidos de nitróxenu y partícules sólides, que ve estrozaos los montes con parques eólicos y llínies d’alta tensión…y que lleva tolo malo ensin nenguna contraprestación, obligándolu a emigrar al desllocalizase la producción industrial pola poca “competitividá llaboral y enerxética”.
  • El nuesu pueblu, amás, vió cómo se desfacía un seutor productivu como’l de la minería que podría asegurar la soberanía llétrica d’anguaño en transición a un modelu de soberanía enerxéticu plenu, más llimpiu, con decrecimientu -p’asegurar la sobrevivencia del planeta- y que permitiere la vuelta de la siderurxa y metalurxa y otros seutores de producción, investigación y manufacturación, esgonciaos pol timu de la reconversión del SOMA-FIA-UGT-FSA-PSOE que nos conderga al paru, el malvivir y la emigración forciao.
  • Paez evidente que, nel procesu imprescindible de recuperar el control social dafechu sobre’l seutor enerxéticu en manes de la UE y Madrid, la existencia d’una tarifa llétrica asturiana pue ser una manera de dir dando pasinos haza la recuperación de les condiciones de vida de les asturianes y asturianos, asegurando que nenguna casa del nuesu país quede nesa probeza enerxética que ye especialmente dura nestos meses del iviernu. Amás, esa tarifa llétrica asturiana vendría a tar xustificada pola delda histórica que pa con Asturies se tien dende l’estáu como paraísu productor de la lletricidá que se consume más alló de les nueses llendes. Yá hai xente esixéndola, por cierto, en Galiza. Y resulta normal y de sentíu común.
  • Per último, y non menos importante, nun ta de más recordar que cuando la oligarquía d’una metrópoli arrampuña la materia prima y/o la fuercia productiva d’otru llugar alloñáu pa sacá-y provechu mentanto nun se xenera riqueza n’aquel sitiu, condergando a la población d’esi llugar a la emigración, a la probeza y a ver cómo se-y espolien les sos materies primes y la fuerza de trabayu, tamos dando vueltes al conceutu de co-lo-nia-lis-mu.

Dicen, y repiten de memoria, una y otra vegada les muyeres y homes de los pueblos indíxenes d’América que la tierra, como l’agua, l’aire o la lluz del sol son dones de la Madre Tierra y, poro, nun puen ser oxetu de comerciu. Nin se puen mercar nin se puen vender.

AboñoN’Asturies llevamos demasiáu tiempu regalándo-yos a los poderosos les nuestres vides y los nuestros recursos, pero cásique naide lo denuncia. Unes vides y unos recursos que salen per cables d’aceru y aluminiu y n’autocares d’ALSA de camín, too ello y con suerte, pa Madrid.

  1. sumiciu diz:

    Póngote equí lo que punxe nel otru llau:

    Yo voi dar un pasu más y entrugar ¿por qué non un Plan Enerxéticu (integral) p’Asturies? Los planes enerxéticos o intentos d’ello que se faen a nivel estatal amás de condenar a Asturies al papel que descriten paez que traten los problemes derivaos de la producción enérxetico de forma aislada y paezme absurdo nun tratar el problema en conxuntu. De fecho, nun veo otra forma de facelo con unes garantíes mínimes y con unes vistes mínimes a la sostenibilidá.

    Pero un llau y pa entamar, planes de reducción del consumu. Sí, equí vamos a chocar dafechu con delles empreses del sector, pero hai que ser conscientes que l’actual capacidá de xeneración nun se puede mantener nel tiempu. Y paezme qu’esti tema hai de tratalu más en clave enerxético qu’económico: va a abaratar costes obviamente, pero esto tien que ser una consecuencia.

    Pa siguir, la producción enerxética asturiana debería cubrir les necesidaes enerxétiques d’Asturies; lo contrario nun ye de nenguna forma sostenible nin medioambiental nin económicamente. Sedría precioso vivir de xenerar escedente enerxéticu pero ello implicaría inorar les sos consecuencies. Como bien se dexó claro nel artículu, sirvir de xenerador de terceros nun beneficia en nada al país (na so acepción más amplia de territoriu, pola contaminación, y xente, pol trabayu)

    La siguiente cuestión obvia ye reducir la dependencia enerxético y ye altamente cuestionable que beneficiu puede tener quemar carbón importao n’Asturies reduciendo’l país a una mera caldera en rellación colo comentao primero. El carbón namás tien interés como complementu y reserva estratéxico; ye un combustible llimitáu y contaminante, pero tamién necesariu. Tampoco se puede zarrar los güeyos y pretender que se puede prescindir del carbón tan allegremente, tien muncho pesu nel mix enerxéticu y ensin ello ye imposible xenerar la enerxía que se demanda, tovía cuntando con una reducción de la demanda. En llograr un compromisu ente la necesidá y los perxuicios ambientales paezme que ta la clave del asuntu. Creo qu’hai la suficiente capacidá pa nun tener qu’importar carbón pa usalo como complementu nesi mix y dame que’aumentaría la producción del mesmu si tenemos en cuenta l’actual polo qu’agora dalgunes empreses igual dexen de tar tan enfadaes colo que toi diciendo (anque van enfadase yá del too cuando falemos de que los sectores clave de la economía nun puedan tar en manes privaes…).

    Pero como dixi, nun podemos enfotanos nel carbón, ye un recursu que tenemos y que’hai d’usar intelixentemente como reserva estratéxico y complementu: la base tien de tar nes renovables. Y en buscar una combinación de renovables que seya igualmente sostenible (la construcción de banzaos o aeroxeneradores tamién tien repercusiones nel mediu) y realista (n’Asturies podemos enfotanos lo xusto nel sol, anque nos pese). Pa ello hai de saber cuanto, cómo y n’onde fai falta y nun sé si daquién se dignó a facer esos estudios.

    A la vista, paez que nos cuesta tantu pensar en global como actuar en llocal.