Dixebra
Dixebra fúndase’l 6 de xineru de 1987 n’Avilés y dende aquella vien trabayando polo mesmo: llograr afitar un verdaderu rock asturianu, dende l’entamu los sos componentes tienen como oxetivu facer una música comprometida con Asturies, asina lo amuesen nes lletres de los sos cantares y nes actitúes personales. Nos sos testos reflexen la variada y complexa realidá de la sociedá asturiana, inspirándose en fechos de la historia recién asturiana, poro, nun ye estrañu que nellos heba referencies constantes a la vida política, cultural o llaboral d’Asturies, pero al empar ensin escaecer el compromisu internacionalista y solidariu. Otra de les principales señes d’identidá de Dixebra ye l’emplegu esclusivu de la llingua asturiana, siendo esti ún de los fautores que-y da más carauter; cuntando amás como collaboradores nes lletres con renomaos escritores de la lliteratura asturiana como Boni Pérez, Pablo A. Marín Estrada y sobremanera Xandru Fernández. Nel so últimu discu incorpórase un nuevu lletrista: Quique Faes. La tercer premisa que define a esta banda ye la incorporación na so instrumentación de la gaita y la inclusión de melodíes tradicionales na so música, too ello endolcáu nun rock potente con múltiples influyencies: ska, punk, folk, reggae, rap… L’estilu de Dixebra pue definise como un soníu fuerte, con un ampliu mestizaxe musical, influyenciáu pola música tradicional y con testos comprometíos en llingua asturiana.
Nestos años Dixebra dio bayura de conciertos per toa Asturies y fuera (Galicia, Euskadi, Cantabria, Castiella, Aragón, Cataluña, Bretaña…). Rescampla que nel añu 1997 actuaron como representantes asturianos nel afamáu Festival Intercélticu de Lorient en Bretaña, onde collecharon perbones crítiques por parte de los medios especializaos, siendo la primer vegada qu’un grupu de rock asturianu participaba en tan importante alcuentru musical celta. Amás esi mesmu añu cellebraron los sos 10 años de vida con un espectáculu nel que la tradición y la modernidá dábense la mano. Cuntaron cola participaci6n de la Banda de Gaites Tabladar, diversos collaboradores musicales, la compañía d’animación teatral Tres Ruedas, el coleutivu de creación videográfica Bebés Furiosos y los personaxes tradicionales del conceyu Siero Los Sidros. Esti espectáculu tuvo una repercusión importante nel mundu musical asturianu.
Los más de los aficionaos y críticos coinciden en que Dixebra ye un grupu de direutu, nesi contautu col públicu ye onde meyor se desenvuelven. Les sos actuaciones carauterícense pola participación espontánea de toos, buscando la mayor comunicación posible ente músicos y espeutadores
Tocante a les grabaciones, aparte d’apaecer en vanes, casetes y discos compartíos, el so primer LP llegó en 1990 y llevaba’l títulu de “Grie-ska” (FonoAstur); darréu d’ello vinieron “¿Asturies o trabayes?” (L’Aguañaz 1993), “Apuntate a la llista” (L’Aguañaz 1995), “Dieron en duru” (L’Aguañaz 1997) “Glaya un país” (L’Aguanaz 2000) y “Sube la marea” (L’Aguañaz 2002). Nel añu 2004 editen un recopilatoriu con versiones y remezcles d’una esbilla del so repertoriu, “Cróniques d’un pueblu”, acompañáu d’un llibru que resume los sos 17 años de vida. Llueu diba venir otru trabayu discográficu, “Ensin novedá” (L’Aguañaz 2005), onde siguieron evolucionando musicalmente, aportando nuevos matices a la so particular propuesta, llogrando con él mui bones crítiques. Nel 2006, pol so venti aniversariu, ficieron un conciertu na so ciudá natal, Avilés, onde axuntaron a unes 3.000 persones y grabaron un discu en direutu N’acción (L’Aguañaz). L’añu siguiente, a finales del 2007, asoleyóse un discu homenaxe onde ventiún grupos estremaos del panorama musical asturianu facíen versiones de cantares del grupu, ¡Salú ya Dixebra! Perversiones (L’Aguañaz). Esti ye l’últimu discu veceyáu a Dixebra hasta agora.
