Instalar Spotify n’Ubuntu

Anque hai una versión pa GNU/Linux en prebes d’esti albuertu de reproductor musical, namás que val pa versiones de pago… pero si quies usar una cuenta gratuita puedes facelo con wine

Lo primero ye dir a “Aplicaciones/Centru de software d’Ubuntu” y nel caxellu de busca ponemos “Wine”… y calcamos n’instalar na primer opción que nos apaez

Agora vamos a “Aplicaciones/Wine/Configure wine”, la primer vez tardará un puquiñín, en cuantes abra vamos a “Audio” y calcamos en “Test Sound”, si sentís el soníu ye que yá ta configuráu calcáis “Apply” y llisto, si da un mensaxe d’error configuramos:

  1. Marcamos la caxella “ALSA Driver” (esti “ALSA” nun tien que ver colos Cosmen)
  2. Dientru de “DirectSound” marcamos “Hardware Acceleration” como “Emulation”
  3. Dientru de “DirectSound” marcamos “Default Sample Rate” col valor “44.100”
  4. Dientru de “DirectSound” marcamos “Default Bits Per Sample” col valor “16”

Quedaría finalmente como na imaxe que vien darréu (“Apply” depués de facer cambeos):

Agora vamos la páxina de descarga de Spotify pa Winbug$, y calcamos nel botón grande que diz “Download”… esperamos a que baxe… cuando acabe calcamos col botón derechu del mur y vamos a “Propiedaes”, na llingüeta “permisos” marcamos “Permitir executar esti ficheru como un programa”. Zarramos y calcamos dos veces nel iconu pa executalu.

Abrirá entós el típicu instalador de Winbug$, yo nun los entiendo mui bien, pero calcando “Install” fui a ello (esos sí soltóme mierda nel escritoriu que depués desanicié ensin problemes), de secute abrirá la pantalla de login, onde pondremos el nome d’usuariu y la clave que tengamos en Spotify. Llanzamos una busca cola pallabra “Camela” y comprobamos que suena…

Bono, yá ta… pero non… pa dexalu como tien que tar vamos dicir a Firefox que los enllaces de Camela que nos pasen los collacios pol Tuenti, tien d’abrilos con Spotify… pa eso facemos un script… yo lo metí na mio carpeta d’usuariu, facemos un ficheru ermu y nomámoslu .enllaces_spotify (el puntín de delantre anubre’l ficheru). “Ctrl+H” p’amosar el ficheru y abrímoslu pa editalu y ponemos esto:

#!/bin/sh
exec wine “C:\Program Files\Spotify\spotify.exe” /uri “$@”

Finalmente dámos-y permisos d’execución (como ficimos enantes col instalador de Spotify).

Agora vamos a Firefox, y na barra de direición ponemos “about:config” y calcamos enter, va salinos una pantalla diciendo que podemos armala, mentimos calcando nel botón que diz “Tendré curiáu, ¡prométolo!” calcamos col botón derechu dientru la ventana y esbillamos “Nuevu/Boolean” llueu pídenos un nome y pondremos “network.protocol-handler.external.spotify” y como valor “True”. Agora repetimos el procesu dos veces más, pero colos nomes “network.protocol-handler.expose.spotify” y “network.protocol-handler.warn-external.spotify” y como valor pa estos marcamos “False”.

Reanicies Firefox, y abrimos un enllaz de Spotify como esti http://open.spotify.com/track/593R3tGbG88aXwhCiCz7Up al calcar nel botón de reproducir, saldrános un ventanu entrugándonos qué aplicación queremos usar… esbillamos el script que ficimos enantes y marcamos “Remebrar la mio eleición pa los enllaces spotify” si nun queremos que nos entrugue más pola aplicación…

y con esto tenemos Spotify n’Ubuntu… pero sigo recomendando GNUMP3d

Los comentarios tan zarraos