Güei vamos ver en Ta pa Ponga cómo amestar un Botón d’aniciu al panel y ponelu al gustu. Ye verdá que tenemos un menú igual na barra d’arriba, con tres seiciones, les famoses “Aplicaciones, Llugares, Sistema” pero ye que en Ta pa Ponga somos asina….

Esti botón qu’amestaremos, podemos ponelu tanto na barra superior como na inferior. Yo voi ponelu na d’abaxo y a manzorga. Au queremos llegar ye a esto:

Pa ello, calcamos nel panel inferior col botón drechu, seleicionamos Amestar al Panel…, y nel cuadru que se nos abre, escoyemos esta opción:

Decatáivos que ye Menu Principal, (y non Barra de Menu, que ye la de “Aplicaciones, Llugares, Sistema”)

Apareceravos ésto:

Na imaxe d’arriba yá vemos el nuevu menú. Hai que movelu a manzorga. Los elementos tan davezu “anclaos” al panel, y nun puen movese. Tenemos que desanclalos. Col botón drechu enriba de los elementos, seleicionamos “Anclar al Panel” y desmarcamos el caxellu. Púnxevos unos puntos bermeyos enriba de los elementos que hai. (El separtador ye tamién un elementu, y hai que desanclalu)

Una vegada fecho eso, movemos el nuevu botón de menú.

y anclamos otra vegada tolos elementos

Ya tenemos el nuesu botón de menú. Agora vamos a personalizalu. Podemos camuda-y l’aspeutu y poner por exemplu éstos:

Podeis poner cualesquier imaxe o logu, la vuesa cara, el escudu del vuesu equipu de ḥoquei xelu preferíu, lo que queráis, siempres que tea en formatu .png. Descargamos una imaxe de botón como les d’arriba, y metémosla nuna carpeta o direutoriu pa dempués.

Pa facelo, echaremos mano del Editor de Configuración. Vien desactiváu por defeutu.. asina que vamos a activalu: En Sistema–>Preferencies–>Menu Principal, calcáis en Ferramientes del Sistema (na ventana esquierda), y activáis el caxellu de Editor de configuración (ventana drecha) y llueu Zarrar.

Agora yá podemos alcontralu nel menú Aplicaciones—>Ferramientes del Sistema. Abrímoslu y vamos a /apps/panel/objects

Alcontraremos dellos object_0, object_1 , object_2… Fixarémonos namás nel que tenga na ventana drecha la variable object_type=menu-object. (Nel mio casu ye’l object_2, que na ventana de la drecha tien object_type=menu-object) Si por exemplu, trae: object_type=launcher-object, nun ye el que hai que camudar.

Yá vamos finando. Na ventana de la drecha vamos a les variables use_custom_icon, que conseñamos,

y la variable custom_icon au pondremos el camín au s’alcuentra el nuesu botón .png

Automáticamente yá adicamos los cambeos….

Llisto. Botón d’aniciu personalizáu. Saludos

Compártilu

Pa tolos que tengáis una cuenta en Gmail, esiste una aplicación perprestosa que vos avisará con un ventanu emerxente cada vegada que recibáis un mail, ensin tener que tar tol día abriendo, zarrando y visitando la páxina web. Esta aplicación ye’l Gmail Notify.

Vamos instalala. Dende Aplicaciones–>Amestar/Quitar…
Na llista estenderexable de Amosar: seleicionamos Toles aplicaciones disponibles y en Restolar ponemos Gmail Notifiy

Calcamos nel caxellu de marcáu, y entrugarános ¿Permitir la instalación de software calteníu pola comunidá?, llueu Habilitar, Aplicar Cambeos… pediranos la nuesa contraseña… y a la fin tendrémoslu instaláu.

Agora vamos a configuralu. Pa ello… vamos a Aplicaciones–>Internet—>Gmail notify

y abrirásenos un cuadru de diálogu au enllenaremos los siguientes campos:

Los más importantes son usename, el_vuesu_nome@gmail.com ;password , la que tengáis y Browser path (ehí pondréis firefox, talo y como s’amuesa na semeya, o el nome del restolador web que teáis usando).

Los demás campos, podéis dexalos como tán, y nel caberu podemos escoyer ente les llingües English, Spanish, Svenska, ya Italianu. Calcamos nel caxellu de marcáu “Save username and password / Guardar nome d’usuariu y contraseña” y Aceutar

Llisto. Apaecerávos enriba al delláu del calendariu l’iconu de l’aplicación, y cada vegada que vos entre un mail, avisaravos.

Calcando col botón drechu enriba del iconu, sálenvos les opciones “Revisar Agora“, por si sois impacientes o “Bandexa d’entrada“, pa dir direutamente ensin falta que nos lleguen mails A esfrutar!!

P.D. Pa facer que s’execute Gmail Notify al entamu de cada sesión, tendremos de dir a Sistema—>Preferencies—>Sesiones. Calcamos en Amestar, y nel cuadru ponemos Nome: Gmail Notify  ;  Comandu: /usr/bin/gmail-notify  ; Comentariu: lo que queráis. Guardamos y llisto.

Compártilu

Van yá perehí unos cuantos posts en Tapaponga que despliquen como configurar reproductores de música y delles de les aplicaciones que mos ufren. Una de les más guapes suel ser escuchar Emisores de Radio. Magar que tamién se desplica, voi ponevos equí una páxina web qu’enllenará les mañanes a más d’un… tamos falando de Shoutcast .

Pa ello vamos a usar el reproductor Rhythmbox, qu’arriendes de ser de la suite oficial d’Ubuntu, tenémoslu disponible n’asturianu.

Vamos a la so páxina web www.shoutcast.com y podemos da-y al restolador por xéneru de música o nome d’estación “Station / Genre”. Como a mi me va lo celta, voi conseñá-y qu’ande a la gueta d’estaciones de radio que tengan el xéneru “celtic“, talo y como s’amuesa na semeya

Yá taremos viendo les estaciones de radio. Entós vamos da-y pa que nos abra por exemplu la primera (liveIreland, Independent Irish and Celtic Music) calcamos en TUNE IN!

Agora, el restolador web que tengamos, nel mio casu Firefox, entrugaranos con qué queremos abrilo. Por defeutu, ponnos la opción de “Totem”. Esto nun ye lo que queremos. Queremos Rhythmbox, entós, calcamos na llista estenderexable de “Abrir con” y seleicionamos “otros…”

Vamos al camín de la carpeta /usr/bin y ehí escoyemos Rhythmbox

Calcamos n’Abrir. Y llueu clicamos nel caxellu de marcáu pa que’l Firefox nos faiga siempres lo mesmo.

Aceutamos, y abriráse’l nuesu reproductor. Vamos onde trai Radio, y facemos duble click na nuesa emisora (nesti casu saldránvos 4, eso ye porque tienen 4 señes IP pa coneutar). Facemos click nuna d’elles y llisto: Radio liveIreland from Dublin pa los vuesos oyíos. Ye hora de tomar una caña, meyor si ye Guinness

Una cosina: si nun oís la música (decatáivos que tarda unos segundinos n’atroxala nel buffer), seique vos falten los códecs, y tendréis qu’instalalos. Si vos pasa eso, y nun dais con ellos, entrugái dexando un comentariu. Saludos.

Compártilu

Mira tú que tarrezco los llunes,.. pero entá más tarrezco los domingos, porque al día siguiente ye llunes. Pues esto ye lo que nos toca ver nel calendariu que trai Gnome. La selmana entama en Domingu, a lo anglosaxón. Por suerte, esto pue camudase y pues poner nel to calendariu que la selmana entame el Llunes (como tien que ser. Y eso que na República Independiente de mio casa, la selmana nun entama hasta’l martes, pero esa ye otra hestoria…)

Pues bono, p’afitar que la nuesa selmana entame en LLUNES, fadremos lo siguiente:

Editamos el nuesu ficheru en locale (que ye au vien lo bonos que somos, y cómo denomamos a los díes de la selmana, cómo nos presta ver la hora, la data… etc). Pa ello abrimos la terminal y escribimos

sudo gedit /usr/share/i18n/locales/ast_ES

y na pantalla que se nos abre, miramos onde venga END LC_TIME.

El testu esautu que pondremos ye’l siguiente first_weekday 2 , y pondrémoslu xusto na llinia enantes de la llinia de END LC_TIME, talo y como s’adica na imaxe:

Fecho esto, Guardarmos y zarramos.

Agora vamos a aplicar los cambeos. Anovamos los “locale”. Na terminal escribimos:

sudo locale-gen

Y pa finar, rexeneramos los paneles de Gnome. Escribimos:

killall gnome-panel

Y llisto. Nel calendariu, la selmana entamará de llunes.

…que descanséis bien el domingu.

Compártilu

Cola llegada del quintu aniversariu de Softastur, el grupu de traductores d’Ubuntu al asturianu entama la primer “Install Party” de software n’asturianu…

Ubuntízate en Candás

Quiciabes dalgunos yá sabeis qué ye Ubuntu, o seique non.

Ubuntu ye GNU/Linux.

-”Uii, qué miéu, eso ye enforma difícil. Yo nun sé programar…”

Si pensaste n’eso enquivóqueste. GNU/Linux yera abegoso ENANTES. ¿Programar? Yo tampoco sé programar n’otros sistemes operativos, y enxamás me fexo falta. Ubuntu ye cenciellu. Y seguru. Escaézte
de virus, troyanos y demás. Arriendes ye llibre. Naide te ata, (y ta disponible en Llingua Asturiana)

Si te decides pero nun t’atreves a instalalu, pa eso tamos: p’aidate.

Trai el to portátil (o si quies cargar, el to equipu d’escritoriu) al Centru Polivalente La Baragaña de Candás el 7 de Payares a les 17:00, (reserva 10Gb-12Gb llibres pa la instalación) y nosotros amosámostelu y/o instalámostelu. Tendrán prioridá los que vayan a instalalo, darréu que namái hai 10 plazes.

Esta actividá fáise gracies a la collaboración del Centru Polivalente de Candás, Carreño. Y por supuestu, ye de baldre.

Unvía un corréu a:
ubuntizate

indicando el to nome y apellíos
corréu electrónicu
una breve descripción del to equipu
y preferencia de llingua d’instalación (castellanu/asturianu)

La instalación puede facese nuna nueva partición. Poro, nun tienes que desaniciar nin renunciar al sistema operativu que tienes agora. Puen convivir los dos (o tres) perfeutamente.

Compártilu

A vegaes, salnos una pantalla, que nun sabemos a qué programa/aplicación pertenez. Saber cual ye pue ser de muncha utilidá si lo que queremos ye iguar o editar dalgún testu de la traducción, (podemos  saber a qué plantía de Launchpad pertenez, y dir aína a la mesma pa iguala).

Cola ventana abierta, (la que tamos pescudando saber a qué aplicación pertenez), abrimos el terminal y pondremos:

xprop | grep WM_CLASS

automáticamente, el punteru del ratón conviértese nún “puntu de mira” col que facemos click na ventana deseyada. Esto amosarános l’aplicación correspondiente.

Compártilu