Archivu d'autor

Asoleyáu Firefox 5

21 de Xunu de 2011

Mozilla espubliza güei la versión 5 de Firefox, el restolador web más usáu n’Europa y emblema del software llibre nel mundu.

Les meyores que destaquen na nueva versión son:

  • Ferramienta “Do Not Track”, cola qu’evitar el siguimientu d’usuarios por parte d’anunciantes (Permite refugar la publicidá personalizada)
  • Sofitu p’animaciones CSS.
  • Ameyorada la integración pa Linux.
  • Posibilidá de camudar ente les distintes versiones disponibles nos canales de desendolcu de Firefox dentro del propiu restolador.
  • Meyores nel rendimientu del motor JavaScript y nel sofitu HTML 5, XHR, MathML y SMIL.

Yá puede baxase de baldre pa tolos sistemes operativos y llingües
dende la direición oficial: http://www.mozilla.com/ast/firefox/

Fx 5

26 de Mayu de 2011

 

¡Sí! Mui pronto… ;)

Llanzador pa Unity de Softastur

12 de Mayu de 2011

Ufrimos un llanzador pa Unity d’enllaces útiles y frecuentes de Softastur :D

Simplemente instala esti ficheru.

Tres instalalu con doble click, calca nel botón d’Ubuntu y gueta “softastur”, verás l’iconu de Softastur, arrástralu sobre’l llanzador de manzorga.

Agora yá tenemos un llanzador, calcamos col botón drechu del mur sobre’l de Firefox y seleicionamos en Caltener nel llanzador, ya que’l de Softastur valdrá como llanzador pa la web ;)

Agora si calcamos col botón izquierdu del mur abriremos Firefox, si calcamos col botón drechu del mur tendremos los enllaces más frecuentes de Softastur :)

Esti programa ta llicenciáu embaxu GPL3 y ta basáu nel trabayu de Pablo Capeluto d’Ubuntu Uruguai.

un software fechu pol pueblu, pal pueblu

3 de Mayu de 2011

¿Qué ye’l software llibre? La definición técnica ye software que puedes usar, estudiar, meyorar y distribuyir ensin torgues. Si’l software cumple estes llibertaes, ye software llibre.

Pero vamos velo con un exemplu, imaxina que tenemos delantre dos botelles de sidra

La botella de manzorga pertenez a la empresa y tien tolos drechos sobre ella. Sólo pues prebala na so cadena de chigres, al preciu que-yos pete, nun pues compartila colos collacios y nun te dicen de qué ta fecha: sabe a sidra, pero naide sabe qué ingredientes lleva y la empresa prohíbe face-y un analís.

La botella de la drecha pertenez a ún de los munchos llagares qu’hai na redolada. Por supuestu, ta fecho con mazana y si quies dícente con qué variedá de mazana ta fecho, nun lleva coses rares y eso pues comprobalo tu mesmu porque pues analizala cuantes vegaes quieras. Ye más, la receta qu’usa esi llagar ye la receta meyorada a lo llargo de los años col conocimientu de toos. Puedes compartila con tolos collacios que quieras y onde quieras.

¿Con qué botella quedes? Obviamente cola de la drecha, porque sales beneficiáu tu, la comunidá de llagareros y los consumidores de sidra.

Podríemos dicir que ye una sidra del pueblu, pal pueblu. Estrapolando: un software fechu pol pueblu, pal pueblu.

Asoleyáu Ubuntu 11.04

29 d'Abril de 2011

¡Yá disponible Ubuntu 11.04! Col nuevu entornu Unity, preséntasenos la nueva versión coles novedaes siguientes como más importantes:

  • Un instalador más simple tovía. ¿Yera posible? Parez que sí :P
  • Unity: Una nueva manera d’entender l’escritoriu. Nun uses aplicaciones pa facer la to xera, simplemente xestiona la to xera. Unity destaca por algamar un escritoriu usable ensin permitir interrupciones.
  • Centru de Software d’Ubuntu: Faise social, con puntuaciones, recomendaciones y redes sociales.
  • Firefox 4, ¿qué dicir que nun sepas? :)
  • Banshee ye’l nuevu reproductor de música, con nueves tiendes de música.
  • LibreOffice.
  • Nuevu xestor de preferencies y del sistema, accesible dende un sólo menú.
  • ¡100% N’asturianu!

Puedes descargalu direutamente dende equí, equí por torrent,  entender qué ye Unity equí y los sos atayos equí.
Y remembrate que si nun te atreves a instalar, anovar o simplemente tienes duldes, taremos p’ayudate tol sábadu día 30 d’abril en FNAC (Parque Principáu).


Zarrar
Mandar Corréu Electrónicu