Softastur ta presente dientro de los Cursos de Branu que l’Academia de la Llingua desendolca n’Ibias (En Santantolín).
Si quies instalar Ubuntu namás te tienes qu’averar a la Llibrería a partir de les 17 hores de llunes a vienres.
Amás, Softastur dió la selmana pasada una charra al alumnáu de los cursos sobre los Proyeutos de traducción de software n’asturianu desplicando qué ye Softastur, Ubuntu y cómo se torna software al asturianu.
¿Yes de los que crees que GNU/Linux y el software llibre ye un pasatiempu de frikis y aficionaos mui entreteníu pero que nun val pa facer coses series y d’altor?
Pues mira esti curtiu cinematográficu fechu con software llibre y distribuyíu con llicencia creative commons
Más info equí.
¿Cambiasti d’idea? 
Güei preséntovos pdftk, una ferramienta pa remanar documentos en formatu pdf. Como dicen na so web: ‘Si PDF ye’l papel electrónicu, entós pdftk ye’l quitagrapes electrónicu, la perforadora, la encuadernadora, el descodificador secretu y les gafes de rayos X’. Pues emplegalu pa (combinar documentos PDF, dixebrar les páxines d’un PDF nun documentu nuevu, descifrar un documentu, cifrar el documentu resultante como te pete, desfacer un documentu PDF en páxines sueltes, informar de les carauterístiques del PDF, descomprimir y volver a comprimir páxines, reparar un PDF corruptu.
Podéis instalalu dende Synaptic o na terminal con:
sudo apt-get install pdftk
El funcionamientu ye pentemedies de llinia de comandos, tenéis exemplos na so web o podéis ver les instrucciones tecleando na terminal:
man pdftk
(Pa salir de les instrucciones calca ‘q’)
Un exemplu útil, si tienes dos documentos que se llamen 1.pdf y 2.pdf, abre la terminal y vete a la carpeta onde tienes los ficheros, una vez ellí escribi na terminal.
pdftk 1.pdf 2.pdf cat output total.pdf
Esta orde va crear un documentu llamáu total.pdf nel mesmu directoriu que tán 1.pdf y 2.pdf y que contién dambos nesi orde.
Tien munches más opciones como poner marques d’agua a los documentos, etc. Namás tenéis qu’esploralu un poco.
Salú y software llibre.
Si vos presta restolar cola terminal y dalguna vez vos topáis con que nun podéis movevos a un directoriu porque’l so nome tien espacios, probái a usar \, esta barra llógrase normalmente calcando ALT GR + la tecla cola que s’escribe º.
Por exemplu, si queréis cambiavos a un directoriu que se llama ‘Les mios semeyes’ tenéis qu’escribir:
cd Les\ mios\ semeyes
Si te presta tener una imprentadora PDF nel sistema pues amestala en Jaunty instalando’l paquete cups-pdf dende’l Xestor de Paquetes de Synaptic o dende la terminal con
sudo apt-get install cups-pdf
Si la emplegáis los documentos van apaecer nuna carpeta llamada PDF dientro de la carpeta personal.
A pedefear
Softastur en Ximiélga.me
