Archivu d'autor

Faciendo camín

2 de Payares de 2011

Hai unos díes yá esplicábamos que la llingua asturiana ta ente les primeres d’Ubuntu pol númberu de mensaxes traducíos.

Güei quería escribir de la sensación d’entrar nesta páxina y alcontrame colo que se ve na imaxe:
L'asturianu, una llingua más
L’asturianu, una llingua más del mundu; una llingua viva ente llingües vives. Hai coses que nun hai perres que les paguen.

Sicasí entá queda muncha xera por facer. Si quies y te sobren dellos minutos al día, echa un gabitu coles traducciones en Translatewiki. Allí se traducen, por exemplu, Mediawiki (el software que mueve la Uiquipedia) o la interfaz d’OpenStreetMap. El formatu de les traducciones ye enforma cenciellu; pero si tienes duldes pues entruganos pola manera de facelo.

Y si alcuentres dalgún fallu coles traducciones (que los hai abondo), yá sabes a quién echar la culpa y, entá meyor, ónde se corrixen.

Mechanig, ferramienta de mantenimientu

21 d'Ochobre de 2011

Cuando yes un usuariu nuevu d’Ubuntu (de cualesquier sistema GNU/Linux, en xeneral) hai dos coses que dan una migaya de medrana: frañar “daqué” ensin ser a igualo, y meter comandos nún terminal.

P’ayudar mientres pierdes esi mieu, el collaciu Georgi Karavasilev vien de sacar la versión 0.2.4-1 del so programa Mechanig que, darréu, va tar disponible n’asturianu.

Pantalla principal de Mechanig

Mechanig ye lo que se llama un «frontend» (esto ye, un envoltoriu) pa los comandos de mantenimientu del sistema que d’otra manera tendríes qu’escribir nún terminal. Si te gusta lo que ves y quies probalo, tienes qu’instalalo dende un «ppa» o archivu personal del autor, porque entá nun ta disponible nos repositorios oficiales d’Ubuntu. Pa ello vas tener qu’abrir un terminal ;) y escribir estos comandos (teclea la to contraseña si la pide):
sudo add-apt-repository ppa:kokoto-java/usu-extras
sudo apt-get update
sudo apt-get install mechanig

Pero ¿qué ye lo que fai Mechanig? Ente otres coses val pa:

  • Anovar les llistes de paquetes instalables
  • Anovar los programes instalaos
  • Quitar de les llistes los paquetes que yá nun son instalables
  • Desaniciar de la caché los paquetes *.deb descargaos con apt
  • Optimizar l’usu de la memoria…

Y, como curiosidá, el nome d’esta versión de Mechanig ye Agnetha, que ye una referencia a… una persona que sal nesti videu

Memoria de pexe

7 d'Agostu de 2011

Hai estudios matemáticos pela rede que demuestren que pa qu’una contraseña seya segura tien de tener polo menos 12 caráuteres y contener lletres mayúscules, minúscules, númberos y símbolos.

Sicasí, ¿cómo alcordase d’una contraseña asina los que nun podemos alcordanos siquiera del númberu del móvil? Apuntala nun val, ye la primer cosa que miren los malos ;)

Pues pa nós el sitiu passwordcard.org ufre una solución a mediu camín ente una contraseña feble o una contraseña apuntada nún papel o nel móvil. Ello ye una tarxeta na que namái tenemos que nos acordar d’un símbolu, un color, la llonxitú de la clave y el sentíu nel que s’escueye la clave.

¿Qué vos paez l’inventu? ¿Ye seguru o ye fácil de descifrar?

Avisu: nun uses la tarxeta de la imaxe porque yá la conocemos tolos llectores de Tapaponga. Si t’interesa descarga una tarxeta personal dende’l propiu sitiu.

Asoleyáu LibreOffice 3.4.2

1 d'Agostu de 2011

The Document Foundation vien de dar anuncia del llanzamientu de la versión 3.4.2 de LibreOffice.

Logo de LibreOffice

Esta versión se considera que ye estable pal usu por particulares y empreses; sicasí s’encamienta que empreses con un gran volume de documentos cunten con sofitu téunicu profesional pa facer la migración, o qu’esperen pola versión 3.4.3 qu’apaecerá a fines d’agostu. L’enllaz a la páxina de descarga ye esti.

Per otru llau, se recuerda que’l plazu pa presentar ponencies pa la Conferencia de París, que tendrá llugar ente’l 12 y el 15 d’ochobre termina’l 8 d’agostu. Si vos peta dir a la Conferencia, el plazu p’apuntase terminará a finales de setiembre.

Ablucante… ¡munches gracies!

25 de Febreru de 2011

Va una selmana que The Document Foundation llanzó la campaña pa recoyer 50.000€ que sirviríen como fondu permanente de la Fundación. Güei ¡yá ta cubiertu l’oxetivu!

Logo de LibreOffice

Munches gracies a tolos que contribuyereis p’algamar l’oxetivu; si entá nun vos dio tiempu, podéis collaborar pa llegar al siguiente finxu de la Fundación: 100.000€ que sirvirán pa publicidá, participación en conferencies o disponer d’una cadarma de hardware propia (güei les páxines de TDF tan corriendo n’ordenadores emprestaos por brOffice…)

Tamién hai bones noticies tocante a LibreOffice. El día 23 apaeció una nueva versión de LibreOffice, la 3.3.1 que pue descargase nesta páxina. Con esta versión apaecen delles novedaes, ente elles una meyor integración colos temes del escritoriu (incluyendo iconos en color). Los usuarios d’Ubuntu entá tendremos d’esperar dellos díes pa qu’apaeza nos repositorios.


Zarrar
Mandar Corréu Electrónicu