Si vos pasa que nun anovamientu de software, Firefox vos apaez n’inglés y non n’asturianu, pue ser por delles razones (un fallu, un locale instaláu.. etc) pero nun tenéis qu’andar esperando a que Ubuntu vos unvie otra vegada los paquetes de llingua. Pa instalar el paquete de llingua, Mozilla permítenos instalar el ficheru manualmente. Namái hai que saber l’enllaz:

https://ftp.mozilla.org/pub/mozilla.org/firefox/releases/

LO PRIMERO Miráis la versión de Firefox que tenéis instalada. (En Help–>About Firefox) Nel mio casu, la 23.0 , y entráis na carpeta:

Otra vegada podemos esfrutar del güevu pintu de los programadores del equipu de Firefox, “El Llibru de Mozilla“. Pa ver esti güevu pintu, namás tienes qu’escribir na barra de navegación del Firefox lo siguiente:

about:mozilla

Si nun tienes la cabera versión, verás el párrafu 11:9 , nel que se fai referencia al resurdimientu de La bestia (Firefox) y a estancamientu de Mammon (Microsoft Internet Explorer).

Pero si yes culu inquietu y yá tienes la cabera versión de Firefox 😀 , verás el nuevu párrafu de la profecía, el 15:1

Como siempre, hai que lleer estes pallabres en clave “profética”, y el párrafu anterior significa lo siguiente:Cuando diz “Los ximielgos de Mammon” (Mammon ye Microsoft) y con “ximielgos” refierse a Apple y Google, que colos sos sistemes operativos móviles, respeutivamente iOS y Android, teníen el duopoliu del mercáu de los S.O. móviles y lluchaben ente ellos por estender la “escuridá”. La “nueva escuridá” refierse al calter zarráu de les sos app stores tradicionales. La bestia entamó a movese “xagazmente” refierse al nuevu ciclu de llanzamientos rápidos de Firefox. La frase “foi más allá, y multiplicóse” refierse a que “Firefox diversificóse”, yá que Firefox fízose presente nos teléfonos móviles como Restolador web (Firefox p’Android) y tamién col so propiu sistema operativu, Firefox OS (Gaia). El versu númberu 15:1 refierse a la conxelación del códigu de Firefox OS 1.0 (Xineru 15, 2013).

Entá nun uses Firefox na to llingua? Da’l pasu. Firefox ye l’únicu qu’apostó y apuesta siempre pola to privacidá. Y ta na to llingua. 😉

Yá s’espublizó la versión 19 de Firefox. Ente les nueves meyores qu’incorpora, como la velocidá d’arranque, funciones pa desendolcadores de CSS en HTML5 y dellos bugs iguaos, la principal ye’l nuevu llector integráu de PDF’s.

Namás necesitamos facer clic nel enllaz d’un pdf, y Firefox va abrínoslu dientro la nuestra ventana. Tenemos por supuestu les opciones de zoom, axuste de páxina, descarga del documentu pdf, y posibilidá de amosalu nuna barra llateral en forma de “miniatures” o “d’esquema“. Tamién pue visualizase a pantalla completa y inclúi la posibilidá de guardalu nos nuestros marcadores.

Imaxina que tienes el Firefox configuráu colos tos marcadores favoritos, les contraseñes guardaes, les preferencies de vista de llingüetes, privacidá, les canales RSS….

Y el Thunderbird configuráu colos tos filtros anti SPAM, les cuentes de corréu, los contautos, los rexistros de chat, les plantíes, los borradores, les regles d’entrada y distribución por carpetes…. los EMAILS!! (tanto unviaos como recibíos), les etiquetes, .. etc.

Y agora imaxina, que tienes que trabayar n’otru equipu, y entamar dende cero a configurar tolos filtros, correos, marcadores… un coñazu vaya! y amás casi nunca queda como nel equipu orixinal.

Nesti post vas deprender cómo tener la mesma configuración en Firefox y Thunderbird en cualquier equipu:

Simplemente vete a la  carpeta personal del to equipu. Calca Ctrl+h pa ver los ficheros y carpetes ocultes (son les que lleven un puntu delantre)

Pues copia eses carpetes (.mozilla y .thunderbird) y apégales na carpeta personal del nuevu equipu . Y pista. Tendrás Firefox y Thunderbird cola mesma configuración. 😀

NOTA: Date cuenta que tas apegando carpetes ocultes: Pa ver si les apegasti bien o non, tendrás que calcar Ctrl+h, sinón, nun vas veles 😉

Qué habrás armao… 😀 😀

Pa los que sois culu inquietu y teáis tol día caciplando coles coses, y probando versiones nueves, betes, etc, etc… ye posible que con tol baruyu de versiones despistéis a los programes de lo que tienen que facer. Y una d’estes coses ye que vos pase (como a mín) que’l Thunderbird nun vos abra los enllaces nel navegador cuando pincháis nellos.

SOLUCIÓN 1:

Lo más normal, ye que nun tengas bien configurao l’aplicación predeterminanda pa cada tipu d’aición. Dende’l dash, escribi “Preferencies del sistema” o “Axustes del sistema” (dependiendo de la versión d’Ubuntu qu’uses, va ser una o otra). Na ventana que s’abre, vete a abaxo y seleiciona “Detalles”.

….o cenciellamente, nel ‘Dash’ o Tableru, escribes Detalles 😉

Vas a la Seición: “Aplicaciones predeterminaes”, y defines que p’abrir webs, seya Firefox. Tien que quedar como esto:

SOLUCIÓN 2:

En Thunderbird, vais a Ayuda–>Reaniciar colos complementos desactivaos. Na ventana que vos apaez, nun marcáis dengún caxellu y pista. Si funciona, ye que teníeis un complementu (que vete tu a saber porqué) taba dándovos fallu. Namás vos queda nesi casu, dir probando ún a ún (activando y desactivando) hasta dar con él. Ye lo qu’hai.

SOLUCIÓN 3:

Cuál ye la ruta al “executable” del Firefox que uses? Ye lo primero qu’hai que saber. Abri un terminal, y escribi:

whereis firefox

Lo normal ye que te diga:

firefox: /usr/bin/firefox /etc/firefox /usr/lib/firefox

Eso quier dicir que tienes el Firefox onde tien que tar, en /usr/bin/firefox  (que ye la ruta que nos importa). Pero yo por exemplu, nun lu tengo ehí, porque soi un cacipleru, y la versión que uso ye siempre la Nightly, y téngolu en /home/el_mio_usuariu/firefox/firefox  Seya una ruta o la otra, tendremos que facer esto:

1. Vete a la to carpeta personal. Calca Ctrl+h pa ver les carpetes ocultes. Verás una que tien un puntu delantre y que se llama .thunderbird Entra nella
2. Entra na carpeta que se llama XXXXX.default y abri’l ficheru denomáu prefs.js con un editor de testu.
3. Abaxo del too del ficheru, amiesta estes dos llinies:

user_pref("network.protocol-handler.app.http", "/usr/bin/firefox");
user_pref("network.protocol-handler.app.https", "/usr/bin/firefox");

NOTA: Si la ruta onde tienes el firefox nun ye /usr/bin/firefox , pues sustitúyesla pola tuya, lóxicamente. Nel mio casu, yo punxe: /home/el_mio_usuariu/firefox/firefox.

Guarda los cambeos y pista.

Gracies a Mozilla tenemos güei el restolador Firefox y el xestor de corréu Thunderbird, esti videu fai un resume de la hestoria del proyeutu Mozilla…

VER VIDEU

Dende que Mozilla anunció cambiar el ciclu de llanzamientos de Firefox, ésti nun fai más que medrar y medrar en calidá, y nueves esperiencies. Güei mesmo, Mozilla asoleyó Firefox 7 con munches nueves meyores y un meyor rendimientu, sobre tou, pa GNU/Linux.

Ente les meyores d’esta nueva versión, podemos alcontrar

• Sofitu meyoráu pa MathML

• Meyor optimización na xestión de la memoria RAM, ente un 20 y un 50%. Si uses Ubuntu 11.10 (beta) yá pues notar la meyora.
  
• Meyores en Firefox Sync, aumentando la velocidá de sincronización.
  
• Bloquéu de complementos non deseaos.

Pa instalalu n’Ubuntu, amiesta’l repositoriu PPA y anova:

sudo add-apt-repository ppa:mozillateam/firefox-stable
sudo apt-get update
sudo apt-get upgrade

O dende la páxina oficial: http://www.mozilla.org/ast/firefox/

Mientres tantu, y peles nueches, sele que sele, en Softastur yá tán trabayando na versión 9  😉

..qu’esfrutéis.

Mozilla espubliza güei la versión 5 de Firefox, el restolador web más usáu n’Europa y emblema del software llibre nel mundu.

Les meyores que destaquen na nueva versión son:

• Ferramienta “Do Not Track”, cola qu’evitar el siguimientu d’usuarios por parte d’anunciantes (Permite refugar la publicidá personalizada)
• Sofitu p’animaciones CSS.
• Ameyorada la integración pa Linux.
• Posibilidá de camudar ente les distintes versiones disponibles nos canales de desendolcu de Firefox dentro del propiu restolador.
• Meyores nel rendimientu del motor JavaScript y nel sofitu HTML 5, XHR, MathML y SMIL.

Yá puede baxase de baldre pa tolos sistemes operativos y llingües
dende la direición oficial: http://www.mozilla.com/ast/firefox/

Esti ye’l tecláu pa Llingua Asturiana n’Android (en fase beta)

Al camín qu’entá-yos queda por andar a les nueses lletres más queríes, la ḥ y la ḷḷ (lletra y dígrafu respectivamente), ya-y queda un pocoñín menos p’acabase. Pero aínda ye abegoso pa un usuariu, poder usar estes lletres dende un tecláu. Podría resumilo diciendo que, si la llingua asturiana tuviere’l mesmu respaldu que’l restu de les llingües esto nun pasaba. Y toi falando dende’l nivel institucional… nel que llevamos 30 años perdíos. La cosa ta cambiando, y agora, adulces, el mundu (teunolóxicu) decátase de que nun requexu del mundu hai una llingua qu’esiste, que tien “presencia” na rede, y que necesita ferramientes como’l restu de les llingües (cuesta imaxinar al Català ensin la so “ç“). Asturies ye un ‘rara avis‘ nesti casu, de les nueses lletres, nin mú. ¿Crees que’l gobiernu asturianu, al que-y tas pagando, esmolezse por esti fechu?

Asina que los asturfalantes vense nuna cruciada escontra gobiernos y teunoloxía: El mundu nun sabe qu’esistimos, y el gobiernu quier que’l mundu siga ensin saber qu’esistimos. Esto traduzse en que teunolóxicamente ye difícil facese oyir ente tantes llingües “qu’esisten”, cuando la nuestra “nun esiste” y el gobiernu namás da subvenciones pa facer “La Oreja Verde”. Y nun digamos lo difícil que ye pegase sólo a nivel “d’Asociación pro-llingua” escontra multinacionales del Software.

EL PROBLEMA DE LA VISIBILIDÁ
Si cuando escribo Ḥ ḥ Ḷ y ḷ ves bien les nueses lletres, eso ye bona noticia y quier dicir que les coses tán cambiando pa bien. Si pol contrariu, ves cuadraos o cares riéndose, (toi falando de PC’s, non de Smartphones) sabrás de lo que toi falando. El navegador llibre Firefox, amuesa correutamente les nueses lletres. Nel casu de los Smartphones, queda camín por recorrer, y en munchos casos el resultáu depende d’una multinacional, non sólo del navegador, pero al tiempu.

EL PROBLEMA DE LA ESCRITURA
Ta mui bien que (yá) puedas ver correutamente la ḷḷ y la ḥ , pero… ¿cómo faes pa escribiles? ¿Copy+paste? La llingua asturiana usa un alfabetu con signos diacríticos QUE TIENEN que poder escribise con facilidá dende un tecláu. Copy+paste ó ‘U+1E25’ – ‘U+1E37’ nun son soluciones. Esti ye’l siguiente pasu: un tecláu adautáu a les carauterístiques del usuariu asturfalante. Hai cientos de teclaos distintos: pal Chinu, pal Bosniu, pal Feroés…  etc

Ubuntu foi el primer sistema operativu qu’incluyó les nueses lletres nun tecláu. 😀 Una vuelta más, demuéstrase que’l Software llibre ta pa sirvir a la xente y non a los intereses económicos de les empreses qu’aten a la xente.

Y nel casu de los Smartphones, yá veis nel videu del entamu que paez que la cosa muévese. A ver si pasu ente pasu, facemos ente toos normal lo que tien que ser normal.

Saludos a toos, (menos a los políticos cazurriles, que son el cáncer d’esti pueblu)

Los usuarios de Linux, tenémoslo (teníamoslo) bien fácil pa descargar un videu dende Youtube. Mentantu se reproduz el videu en Youtube, vamos a la carpeta /tmp y ehí alcontramos el ficheru con nome Flash_vwxyz, y namás tenemos que copialu a la nuesa carpeta de videos.

Pero si anovestis los paquetes estos díes, y tamién anovestis la versión de Flash, vais alcontravos con qu’esti métodu yá nun vos funciona… (cagonros, colo bien que me venía a mi…). Pero tampoco ye pa tanto, preséntovos Video DownloadHelper.

Video DownloadHelper ye una aplicación pa Firefox pa descargar estos videos. Primero vamos a la páxina:

https://addons.mozilla.org/es-ES/firefox/addon/video-downloadhelper/

y calcamos en “Añadir a Firefox” (nun taba de más que daquién traduxera al asturianu la páxina de descargues: costóme bien de tiempu saber que se referíen a “Amestar” a Firefox…). Dempués d’unos segundos, apaecerávos una ventana que vos diz que “nun ye seguro instalar complementos nos que nun se confía”. Podemos confiar na páxina y nel complementu, asina que dámos-y a “Instalar agora“.

Reaniciamos Firefox.

Agora, cada vez que vayamos a Youtube, veremos daqué apaecío a esto:

Na esquina superior esquierda, vemos l’iconu del DownloadHelper. Calcamos sobre él, y escoyemos “Download”. Lo demás, imaxináisvoslo 😉