Archivu de la categoría ‘libreoffice’

Instalar el correutor ortográficu en LibreOffice

19 de Setiembre de 2013

LibreOffice permite la instalación d’un Correutor Ortográficu pa la llingua Asturiana. Vamos ver cómo instalalu.

  • Abrimos LibreOffice y vamos a Ferramientes—> Alministrador d’Estensiones
  • Facemos clic en “Descargar equí más estensiones“.
  • Vamos a “Extensions” , escribimos “Asturianu” y dámos-y a “Buscar
  • Pinchamos nel resultáu que nos va a salir—> “Correutor ortográficu d’asturianu
  •  Vamos abaxo del too de la páxina y calcamos na versión del complementu (Onde diz 0.05)
  •  Na páxina que s’abre, vamos abaxo del too, y vamos ver un ficheru denomáu “asturianu.oxt“. Clic sobre’l ficheru y guardámoslu.


Y agora vamos al sitiu onde acabamos de guardar el ficheru “asturianu.oxt” (normalmente tará na carpeta “Descargues”), y executámoslu faciendo doble clic con él. Tendría d’abrise automáticamente con Libreoffice. Aceutamos la instalación,….

……lleemos la llicencia, que son 3 llinies, y volvemos a aceutar, pa completar la instalación.

Y pista. 😀

Agora vamos a activar el complementu pa que nos faiga la correición automática según vamos escribiendo, que ye lo guapo del asuntu. Pa ello, en Libreoffice, vamos a Ferramientes–> “Ortografía y Gramática” (o calcamos F7) y comprobamos que tenemos activáu’l caxellu “Comprobar gramática” , y comprobamos que la llingua seya “Asturianu”. Zarramos Libreoffice, y volvemos a abrilu.

Tendría de tar instaláu y funcionando. Eso sábese porque al empezar a escribir, cuando escribimos una pallabra incorreuta, por exemplu: ” entartayar ” el correutor márcala con una rayina. (Tendríes que saber que lo correuto ye “entartallar”, yá verás cómo la marca como bona..). Si aínda nun furrula, comprobamos que en Ferramientes—>Opciones—>Configuración de llingua—>Llingües, tengamos seleicionao l’asturianu como llingua

Saludos

Asoleyáu LibreOffice 3.4.2

1 d'Agostu de 2011

The Document Foundation vien de dar anuncia del llanzamientu de la versión 3.4.2 de LibreOffice.

Esta versión se considera que ye estable pal usu por particulares y empreses; sicasí s’encamienta que empreses con un gran volume de documentos cunten con sofitu téunicu profesional pa facer la migración, o qu’esperen pola versión 3.4.3 qu’apaecerá a fines d’agostu. L’enllaz a la páxina de descarga ye esti.

Per otru llau, se recuerda que’l plazu pa presentar ponencies pa la Conferencia de París, que tendrá llugar ente’l 12 y el 15 d’ochobre termina’l 8 d’agostu. Si vos peta dir a la Conferencia, el plazu p’apuntase terminará a finales de setiembre.

Fundando la Fundación

22 de Febreru de 2011

De xuro que yá conocéis LibreOffice, la suite d’ofimática derivada d’OpenOffice.org.

Dende’l mesmu entamu, la xente que s’encargó de llevar alantre esta xera tenía l’envís de que’l gobiernu d’esta aplicación tuviere nes manes de los propios usuarios y pa ello se creó The Document Foundation, una fundación ensin porgüeyu que s’encarga de facilitar la evolución de LibreOffice.

Dende setiembre la Xunta Direutiva de la Fundación tuvieron valorando les opciones de constitución llegal de la Fundación y decidieron acoyer The Document Foundation a les lleis alemanes de fundaciones.

Pa facelo ye necesario tener un fondu de 50.000€, polo que la Xunta Direutiva de TDF fai un llamáu a que los usuarios sofiten la creación de la Fundación col so donativu. Na páxina de la campaña espliquen meyor cómo y por qué collaborar, incluyendo un enllaz pa facelo vía PayPal. Si prefieres facelo nel to bancu, estos son los datos de la cuenta:

Titular: OpenOffice.org Deutschland e.V.
Asuntu: The Document Foundation
Númberu de cuenta: 3497390
Códigu de bancu: 66690000
Bancu: Volksbank Pforzheim
IBAN: DE12666900000003497390
BIC: VBPFDE66

El llímite pa collaborar ye’l 21 de marzu y de momentu yá lleven recoyíos 34.000€; si se recibieren más de 50.000€ el sobrante ta previsto destinalo a los gastos de funcionamientu corriente de The Document Foundation.

Si uses LibreOffice, echa un gabitu pa sofitalu; sinón, ¡prebalu!… ¡Va prestate!

Llanzamientu de Libreoffice 3.3.0 n’asturianu.

25 de Xineru de 2011

Por fin yá ta equí Libreoffice n’asturianu.

The Document Foundation acaba de llanzar la versión final d’esta suite ofimática que va sustituyir a Openoffice n’Ubuntu a partir d’abril. Nun pasa nada si nun uses Ubuntu, tamién ta disponible pal restu de les plataformes. 😀

Dende Tapaponga yá veníemos avisando de toos estos movimientos, y fai tiempu que se punxeron los enllaces a los paquetes beta pa testéu. Gracies al equipu de Softastur, (n’especial a Xuacu) por conseguir la inclusión de la nuesa llingua dende’l principiu. (Asegúrovos que nun foi nada cenciello)

La páxina de descargues ta disponible equí.

Los usuarios impacientes d’Ubuntu 10.10 pueden probar la versión final del siguiente mou:

sudo add-apt-repository ppa:libreoffice/ppa

sudo apt-get update && sudo apt-get install libreoffice

sudo apt-get install libreoffice-gnome (pa usuarios de gnome)
sudo apt-get install libreoffice-kde (pa usuarios de kde)

Como nun podía ser d’otra forma, Libreoffice yá cuenta con ventaxes sobre Openoffice.

Pa los que nun s’atrevan, namás hai qu’esperar 3 meses, hasta que salga Ubuntu 11.04 😉

Collabora con Softastur. Ponte en contautu

Instalar libreoffice n’asturianu con PPA

3 de Xineru de 2011

Nota: pa Ubuntu 10.04, 10.10. Tamién pa 11.04 pero les versiones “alpha” tovía dan problemes lóxicos: hai qu’esperar a les beta, o a la versión definitiva.

Libreoffice, ye la suite Ofimática que Canonical va incluyir por defeutu nes vinientes versiones d’Ubuntu. Si recordáis, hasta agora Ubuntu venía con OpenOffice preinstaláu, pero Oracle fízose col control d’OpenOffice, y los desendolcadores p’asegurar el calter llibre del mesmu, abandonaron el proyeutu y aniciaron un nuevu faciendo un fork d’Openoffice.

Pues bien, hasta esti momentu Libreoffice yera un poco “abegoso” d’instalar/probar, pero eso acabóse si usamos PPA. D’esta miente escaecémonos de descargar paquetes .deb, y tener que dir instalándolos ún a ún. Al amestar el repositoriu PPA, él mesmu s’encarga de tola xera d’instalación, y fai que la instalación seya cenciella pal usuariu d’Ubuntu.

Val yá de rollos… ¿Cómo se fai?

Pues más cenciello, imposible: Abrimos una terminal y primero desaniciamos (si lu tenemos) OpenOffice:

sudo apt-get purge openoffice*.*

y agora executamos ún por ún estos 4 comandos (copia y pega pa nun tener fallos)

sudo add-apt-repository ppa:libreoffice/ppa

sudo apt-get update

sudo apt-get install libreoffice

sudo apt-get install libreoffice-l10n-ast

Y pista. La versión que s’instala ye la Release Candidate 2, y magar que la siguiente va ser más estable, nun da problemes. Amás, pa mayor compatibilidá col escritoriu, si tas usando GNOME encamiéntase instalar tamién el paquete:

sudo apt-get install libreoffice-gnome

ó

sudo apt-get install libreoffice-kde

…nel casu qu’uses KDE. 😀