El llibru de Mozilla

Firefox escuende un güevu pintu perprestosu, que dieron en llamar en dalgunos llaos “La Profecía”. Como vos desplicábemos n’otru post (unos díes atrás), basta con escribir about:mozilla na barra de navegación (talo y como se ve na imaxe) y yá podemos esfrutar d’esti güevu pintu en Firefox.

NOTA: Esti güevu pintu, pel momentu, namái podéis velu nes versiones en castellanu, frances, galego… etc. La pena ye que pa velo na versión n’asturianu vais tener qu’esperar hasta la versión 3.6.6.  (Pa los talibanes que percuerren Tapaponga: Yo puedo amosavos la pantalla porque uso Namoroka, la versión beta 3.6.6 de Firefox; en Tapaponga siempres vamos un pasu per delantre del restu 😀 , nun vaya ser que dalgún me diga que ye un mockup)

Como vos desplicaba, equí tenéis una amuesa de la profecía:

Pero… ¿qué significáu tien esto? ¿Qué ye el Llibru de Mozilla? Pues, realmente nun esiste un llibru tituláu The Book of Mozilla. Sicasí, les cites incluyíes en Netscape y Mozilla dan esa impresión al revelar pasaxes asemeyaos al Llibru del Apocalipsis de la Biblia. En total esisten seis pasaxes. Nesti últimu pasaxe, la desplicación ye la siguiente:

La fras “Mammon durmióse” fai referencia a que MS Internet Explorer quedó estrincada na versión 6.0 durante 5 años. “la bestia resurdió” fai referencia a que Netscape reñació na compañía AOL (al menos fasta’l 9.0.0.5). “enantándose sobro la Tierra y los sos siguidores fexeron lexones” a que llueu de reñacer Netscape, espardióse per tol mundu y los sos siguidores y usuarios foron millones bien aína. “y proclamaron nuevos tiempos” a que nel futuru los restoladores yá nun diben tar arreyaos a Internet Explorer, sinón qu’esistiríen nueves posibilidaes. “sacrificaron colleches nel fueu, cola astucia de les rapiegues” esto fai referencia (direutamente) a Firefox darréu que’l so logu ye una rapiega de fueu, d’ehí el nome “Firefox”. “Y construyeron un mundu nuevu a la so propia imaxe como prometíen les pallabres sagraes” refierse a que la Fundación Mozilla lliberó los códigos fonte de los sos productos. “Mammon esconsoñó” refierse al llanzamientu de la versión 7 de IE, “y de sópitu, namái yera un rezagáu” refierse a qu’Explorer, de ser un innovador, pasó a copiar carauterístiques de Firefox qu’Explorer nun tenía.

El númberu del pasaxe 11:9 ,  ye’l 9 de payares de 2004 . Esi día asoleyóse Mozilla Firefox 1.0. Tendría que ver col reñacer de la bestia en cuantes al fechu de crear el primer executable estable de lo que foi la Bestia y qu’anguaño ye Firefox.

Fice un artículu bien estensu d’ello na Uiquipedia, pa que sepáis la hestoria entera. Como vos digo, ésta ye la desplicación del últimu pasaxe, pero los demás nun tienen desperdiciu 😀

4 comentarios al rodiu de “El llibru de Mozilla”

  1. marquinos diz:

    Wow!!! Nun sabía esa hestoria 😀 ¡Ablucante! Estos güevos pintos del software llibre prestenme pola vida 😛
    Diba entrugate onde lleer los otros pasaxes, pero ya veo qu’hai que dir a la uiquipedia 😛 http://ast.wikipedia.org/wiki/El_llibru_de_Mozilla
    Gracies Iñigo 😉

  2. Xuacu diz:

    Nun se si conocíeis esti: En Gnome, calcar Alt+F2 y, nel cuadru qu’apaez, escribir el comandu «free the fish» (ensin comines) 😉

  3. Xuacu diz:

    Como veo que naide nun entruga, y por si dalguién s’alcuentra con que nun sabe anubrir el pexe… Hai qu’abrir un terminal y escribir:

    killall gnome-panel

    Ye normal que desapaezan los paneles; tornen a apaecer nel intre 😀

  4. Ta pa Ponga » Archivu del blogue » La profecía… diz:

    […] más que nunca, relleendo la profecía Mammon durmióse. Y la bestia resurdió enantándose sobre la Tierra, y los sos siguidores […]