Instalar libreoffice n’asturianu con PPA

Nota: pa Ubuntu 10.04, 10.10. Tamién pa 11.04 pero les versiones “alpha” tovía dan problemes lóxicos: hai qu’esperar a les beta, o a la versión definitiva.

Libreoffice, ye la suite Ofimática que Canonical va incluyir por defeutu nes vinientes versiones d’Ubuntu. Si recordáis, hasta agora Ubuntu venía con OpenOffice preinstaláu, pero Oracle fízose col control d’OpenOffice, y los desendolcadores p’asegurar el calter llibre del mesmu, abandonaron el proyeutu y aniciaron un nuevu faciendo un fork d’Openoffice.

Pues bien, hasta esti momentu Libreoffice yera un poco “abegoso” d’instalar/probar, pero eso acabóse si usamos PPA. D’esta miente escaecémonos de descargar paquetes .deb, y tener que dir instalándolos ún a ún. Al amestar el repositoriu PPA, él mesmu s’encarga de tola xera d’instalación, y fai que la instalación seya cenciella pal usuariu d’Ubuntu.

Val yá de rollos… ¿Cómo se fai?

Pues más cenciello, imposible: Abrimos una terminal y primero desaniciamos (si lu tenemos) OpenOffice:

sudo apt-get purge openoffice*.*

y agora executamos ún por ún estos 4 comandos (copia y pega pa nun tener fallos)

sudo add-apt-repository ppa:libreoffice/ppa

sudo apt-get update

sudo apt-get install libreoffice

sudo apt-get install libreoffice-l10n-ast

Y pista. La versión que s’instala ye la Release Candidate 2, y magar que la siguiente va ser más estable, nun da problemes. Amás, pa mayor compatibilidá col escritoriu, si tas usando GNOME encamiéntase instalar tamién el paquete:

sudo apt-get install libreoffice-gnome

ó

sudo apt-get install libreoffice-kde

…nel casu qu’uses KDE. 😀

13 comentarios al rodiu de “Instalar libreoffice n’asturianu con PPA”

  1. EnsinNome diz:

    sudo apt-get install libreoffice-l10n-ast

  2. Xuacu diz:

    Gracies, EnsinNome, que dexábamos al meyor baillador ensin castañueles 😉

    Amás, y dependiendo de les necesidaes de cada usuariu, puen esbillase les estensiones que se quieran, pero delles nun tarán traducíes… entá 😉 Por casu, la estensión mozilla-libreoffice permite abrir documentos dende’l restolador Mozilla; libreoffice-wiki-publisher val p’asoleyar/editar direutamente artículos col formatu MediaWiki (pa los y les uiquipedistes)…

    Sicasí hai qu’insistir qu’entá ye una versión «release-candidate-2», lo que quier dicir que va tener fallos y/o funcionamientos estraños. Si t’alcuentres con una d’estes coses, por favor, informa d’ello n’estes páxines (pa los fallos cola traducción asturiana) o en bugzilla
    https://bugs.freedesktop.org/
    pa fallos d’otra mena.

    Un saludu

  3. astur diz:

    Cierto, edito:

    sudo apt-get install libreoffice-l10n-ast

    y tamién amiesto lo siguiente, (visto en ubuntu-geek):
    http://www.ubuntugeek.com/install-libreoffice-in-ubuntu-11-0410-1010-04-using-ppa.html

    Enantes d’instalar Libreoffice, quien tenga Openoffice tien que desinstalalu con esti comandu:

    sudo apt-get purge openoffice*.*

  4. Dangerous Piper diz:

    en 10.4 casca…

  5. astur diz:

    Acabo d’editar el post con dalgunes correiciones (sorry), colo que agora ye fácil que s’instale bien. Vuelvi facelo a ver. Yo probé con Ubuntu 10.04 y 10.10 (en Virtualbox) y dengún problema.

  6. Dangerous Piper diz:

    da un fallu al instalar y dexa ensin resolver delles dependencies y al final diz que nun ye a instalar libreoffice-core… colo que nun queda nada, intentarélu otra vuelta un día con más calma… sicasí yo quitaba la referencia a 10.4 por si acasu…

  7. Dangerous Piper diz:

    sudo apt-get purge openoffice*.* desinstala tamién aspell…

  8. astur diz:

    El aspell ye un ficheru .oxt Instálase del mesmu mou que n’Openoffice (yá lo comprobé). Yá que tengo 11.04 alpha 2, voi mirar a ver si Ubuntu yá lu instala por defeutu. En teoría, l’equipu d’aspell n’asturianu ta detrás d’estes coses, y a lo meyor yá lo consiguieron.

    Si necesites l’aspell, pídi-yoslu al equipu d’ASPELL de Softastur, pero remembra que ta en fase beta.

  9. Sr. Hessen diz:

    Hola, bonos díes: Ta bien l’anuncia, pero yo entamo a preocupame, agora que yá me voi faciendo al OpenOffice, al tema d’Ubuntu,…, ¿nos tenemos que cambiar?,…, podemos quedanos donde tamos, podemos caltener Open,…, Open n’asturianu fino,…, los documentos van ser .odt,… Un saludín.

  10. astur diz:

    Sr. Hessen: TOO sigui igual.

    Si tienes Ubuntu 9.04, 9.10, 10.04, 10.10… TOO sigui igual.

    Paez ser que cuando salga Ubuntu 11.04 n’abril, esti vendrá con Libreoffice.

    Pero nun te preocupes. OpenOffice y LibreOffice son ESAUTAMENTE IGUALES. Cenciellamente, onde diz Openoffice, dirá Libreoffice :D, y donde diz “Oracle” (que ye la compañía que desendolca OpenOffice), agora dirá “Document Foundation”. Nin siquier cambia’l menú, o los iconos de los botones, o los collores ¿Por qué?

    Porque Libreoffice nun ye más que una “escisión” (un fork) de los desendolcadores qu’enantes facíen Openoffice. Lo que pasó foi que los desendolcadores d’Openoffice, como nun taben contentos col rumbu que-y daba Oracle al proyeutu, garraron el códigu d’Openoffice (que ye llibre, y qu’ellos llibremente habíen fecho), calcáronlu tal cual taba y renomáronlu baxo’l nome de Libreoffice. ¿Qué consiguen con esto? Tener un productu ESACTAMENTE IGUAL a lo que teníen, nun tar arreyaos a les directrices d’Oracle, y asegurar el calter LLIBRE del proyeutu, que corría pelligru en manes d’Oracle.

    Amigu, faime casu. LibreOffice ye ESAUTAMENTE igual (menos el logotipu :D), polo que si tas avezáu a OpenOffice, Libreoffice ye’l mesmu productu baxo otru nome, inclusu fechu pola mesma xente, pero baxo otra organización.

    …y de toes formes, tampoco nun vas tener problemes pa instalalu, porque de xuru vendrá preinstaláu con Ubuntu. (Esperemos que seya asina…. siempres s’escaecen de nós, col nuesu códigu iso de 3 lletres “ast”…. :S Tamos al tantu d’ello, y yá tuvimos que reportar el fallu 😀 )

  11. astur diz:

    Ye más, manda les captures de pantalla que quieras de los menús o ventanes de diálogu del to Openoffice, y yo mándote les mesmes de Libreoffice a ver si yes quien a atopar les diferencies (esceutu los logos) 😀

  12. Sr. Hessen diz:

    “astur”, ta bien, val, sigo como toi, no llibre,…, bien desplicao. Un saludín.

  13. Ta pa Ponga » Archivu del blogue » Llanzamientu de Libreoffice 3.3.0 n’asturianu. diz:

    […] Tapaponga yá veníemos avisando de toos estos movimientos, y fai tiempu que se punxeron los enllaces a los paquetes beta pa testéu. Gracies al equipu de Softastur, (n’especial a Xuacu) por conseguir la inclusión de la nuesa […]