Por fín, sí: OPENOFFICE N’ASTURIANU

Edición 19 Febreru 2010: ¡Ya ta disponible pa baxar! Pa ello, vete equí.


Ye pa mí un preste davos anuncia de que por fín, esta vegada sí, la comunidá asturiana dispondrá de OpenOffice n’asturianu.

Dempués de más de 2 años de munchu trabayu, gracies al colectivu Softastur, que ye quien desendolca el proyectu, vamos poder esfrutar d’esta perpoderosa ferramienta, competidora direuta de Microsoft Office, a la que nun tien res qu’envidiar. La primer versión que verá la lluz con llingua asturiana incluyía ente les grandes llingües del mundu va ser la 3.2, y tará disponible nun curtiu espaciu de tiempu. 😀

Lo que puedo adelantavos pel momentu ye que arranca en tiempu récord. Malpenes segundu y mediu, y yá tienes la interface llista. Los menús son bien agradables y cenciellos.

Dende los menús, como siempres, accedemos a les aplicaciones que necesitemos, nesti casu, el Procesador de testos, tamién denomáu Writer

Y yá podemos ponenos a redautar testos, facer tables, inxertar gráficos, y too ello, dende la nuesa interfaz n’asturianu. Cenciellu, cómodu, intuitivu ya compatible colos formatos de testu más conocíos, .doc, .txt, .vor, .odt (formatu abiertu), .xml, y munchos más. Tamién permite esportar a .html

Pero como suite ofimática que ye, OpenOffice, tamién nos permite usar una fueya de cálculu. L’aplicación denómase Calc, y ye compatible con ficheros .xls Con Calc podréis facer operaciones contables, representar gráficos de cálculos, ya remanar tables de datos

Dientro de la suite ofimática, tamién tenemos un programa de Presentación de diapositives, denomáu Impress, un editor de gráficos vectoriales, y un programa de base de datos. Pero esos voi enseñávoslu n’otru post. Nun quiero dexar de dar les gracies a TOL EQUIPU de Softastur. Dende’l primeru al últimu. Dicir tamién, que la meta que se marcó Softastur aporta al so final; esto ye, ufrir a la comunidá asturfalante d’una ferramienta informática completa: Un Sistema Operativu, y una suite ofimática en llingua asturiana.

Nun quier dicir esto que’l trabayu de Softastur finare. Non. Esto nun fizo más qu’entamar…:D

Saludos a tolos asturfalantes. El futuru ye nuesu.

Edición 20 Xineru 2010: ¡Ya tenemos web oficial d’OpenOffice! Ehí puedes baxar l’instalador 😉 Remembra que pa Ubuntu vendrá de serie dende la versión 10.04.

10 comentarios al rodiu de “Por fín, sí: OPENOFFICE N’ASTURIANU”

  1. marquinos diz:

    😀 😀 😀 😀 😀 😀 😀 😀 😀 😀 😀 😀 😀 😀 😀 😀 😀
    ¡¡¡¡Milenta gracies a ti Iñigo pol trabayu fecho pa que té d’una vegada n’asturianu esta ablucante suite ofimatica!!!! 😀 ¡Cómo presta ver d’una vegada la OpenOffice n’asturianu!!!
    Sinceramente, güei Softastur fai hestoria, que será remembrao nel futuru. Acaba de finase’l caberu pegollu pa que la siguiente versión d’Ubuntu (la futura 9.10 que saldrá n’Abril del 2010) te COMPLETAMENTE (na 9.10 falta esta office) n’asturianu, dando a la sociedá asturiana una ferramienta ablucante pal usu diariu col ordenador.
    Ablucante trabayu de tola xente que collabora en Softastur ¡Norabona a toos!
    Y concaso con Iñigo, el futuru ye nuesu 😉 Puxa’l software llibre 😀
    😀 😀 😀 😀 😀 😀 😀 😀 😀 😀 😀 😀 😀 😀 😀 😀 😀

  2. Rieḷḷu diz:

    A-CO-YO-NAN-TE!! nun hai pallabres… Gracies!

  3. xicu diz:

    Munches gracies a tolos collacios/es de Softastur por esta gran ferramienta n’asturianu. Norabona a to@s.

    Tamos sollertes a que podamos descargala los usuarios d’Ubuntu n’asturianu.

  4. VeritasEtSeveritas diz:

    ¡Norabona y gracies! Pondrémonos a rabilar con ello pero yá!

  5. astur diz:

    Agora mesmo, podemos adelantavos que’l proyeutu yá ta empaquetáu, y que tán na fase de correxir los posibles fallos de los equipos de traducción. Pasáu esi tiempu, asoleyaráse la versión definitiva, que tará disponible dende la páxina web, y multiplataforma (o seya, linux, windows…etc)

    Quien tenga interés en dir testeándolu, que se ponga en contautu conmigo. Hai de instalalu primero (aconséyovos usar una máquina virtual, por si acasu) pa dir viendo los fallos que pueda tener. (toi falando de fallos léxicos y ortográficos)

    Si tais interesaos: astur@softastur.org

  6. metabolic diz:

    qué pueo dicir más que gracies fonderes pol trabayu!!!!!

  7. JT diz:

    Norabona a toos. Ye una xera perguapa. Como presta usar la llingüa con coses NORMALES, ya de tolos díes y nun pa usala namás que pa cuntar chistes na TPA.
    Gracies!!

  8. Pruvia diz:

    Toi nagüando por descargala

  9. Dangerous Piper diz:

    Puedes baxar la versión pa pruebes de desendolcadores dende’l ftp d’openoffice. Esta versión inda tien fallos enforma y primero tienes d’instalar la versión n’inglés americanu pa depués aplica-y les traducciones… ye un pelín complicáu… val más esperar a la versión estable que tará nos repositorios d’Ubuntu… 😉

  10. Softastur » Completóse la traducción d’OpenOffice.org diz:

    […] Pa más detalles, y captures de pantalla visitar l’artículu en Ta pa Ponga. […]