Mechanig, ferramienta de mantenimientu

21 d'Ochobre de 2011

Cuando yes un usuariu nuevu d’Ubuntu (de cualesquier sistema GNU/Linux, en xeneral) hai dos coses que dan una migaya de medrana: frañar “daqué” ensin ser a igualo, y meter comandos nún terminal.

P’ayudar mientres pierdes esi mieu, el collaciu Georgi Karavasilev vien de sacar la versión 0.2.4-1 del so programa Mechanig que, darréu, va tar disponible n’asturianu.

Pantalla principal de Mechanig

Mechanig ye lo que se llama un «frontend» (esto ye, un envoltoriu) pa los comandos de mantenimientu del sistema que d’otra manera tendríes qu’escribir nún terminal. Si te gusta lo que ves y quies probalo, tienes qu’instalalo dende un «ppa» o archivu personal del autor, porque entá nun ta disponible nos repositorios oficiales d’Ubuntu. Pa ello vas tener qu’abrir un terminal 😉 y escribir estos comandos (teclea la to contraseña si la pide):
sudo add-apt-repository ppa:kokoto-java/usu-extras
sudo apt-get update
sudo apt-get install mechanig

Pero ¿qué ye lo que fai Mechanig? Ente otres coses val pa:

  • Anovar les llistes de paquetes instalables
  • Anovar los programes instalaos
  • Quitar de les llistes los paquetes que yá nun son instalables
  • Desaniciar de la caché los paquetes *.deb descargaos con apt
  • Optimizar l’usu de la memoria…

Y, como curiosidá, el nome d’esta versión de Mechanig ye Agnetha, que ye una referencia a… una persona que sal nesti videu

Asoleyáu Firefox 5

21 de Xunu de 2011

Mozilla espubliza güei la versión 5 de Firefox, el restolador web más usáu n’Europa y emblema del software llibre nel mundu.

Les meyores que destaquen na nueva versión son:

  • Ferramienta “Do Not Track”, cola qu’evitar el siguimientu d’usuarios por parte d’anunciantes (Permite refugar la publicidá personalizada)
  • Sofitu p’animaciones CSS.
  • Ameyorada la integración pa Linux.
  • Posibilidá de camudar ente les distintes versiones disponibles nos canales de desendolcu de Firefox dentro del propiu restolador.
  • Meyores nel rendimientu del motor JavaScript y nel sofitu HTML 5, XHR, MathML y SMIL.

Yá puede baxase de baldre pa tolos sistemes operativos y llingües
dende la direición oficial: http://www.mozilla.com/ast/firefox/

¡Mozilla asoleya Firefox 4.0!

22 de Marzu de 2011

Dempués de 3 años de desendolcu dende la versión 3, Mozilla espubliza la versión final de Firefox 4 😀 Anguaño, ún de los meyores restoladores web.

Podéis baxalu n’asturianu dende la direición oficial equí.

Les meyores son grandes na interface:

  • Llingüetes d’aplicación: Llingüetes siempre accesibles coles tos webs preferíes.

  • Menú compactu.

  • Llingüetes na parte cimera de la ventana.

….o baxo la barra de direiciones:

  • Xestor visual de llingüetes mediante Panorama.

  • Nuevu xestor de complementos.

  • Nueva ventana de direiciones intelixente.

y muncho más que nun se ve:

  • Velocidá d’arranque: La sensación ye d’aniciar 6 vegaes más rápido que Firefox 3.

  • Muncho más llixeru.
  • Sofitu nativu del códec WebM y WebGL 3D.
  • Sofitu del nuevu HTML5 onde esperimentarás un nuevu mundu cola web, pa exemplu, un botón.

  • Sincronización de marcadores, historial, contraseñes ente ordenadores incluída oficialmente.

Primer beta de Firefox 4 n’asturianu.

26 de Xineru de 2011

Ya ta la versión Firefox 4 final. + información equí.

La primer beta de Firefox 4 yá ta disponible en llingua asturiana. Descarga la to versión (Linux, Windows…) dende’l sitiu web de Firefox 4, y pruébala. ( Collabora reportando los fallos qu’alcuentres a Softastur, dende equí )

Llanzamientu de Libreoffice 3.3.0 n’asturianu.

25 de Xineru de 2011

Por fin yá ta equí Libreoffice n’asturianu.

The Document Foundation acaba de llanzar la versión final d’esta suite ofimática que va sustituyir a Openoffice n’Ubuntu a partir d’abril. Nun pasa nada si nun uses Ubuntu, tamién ta disponible pal restu de les plataformes. 😀

Dende Tapaponga yá veníemos avisando de toos estos movimientos, y fai tiempu que se punxeron los enllaces a los paquetes beta pa testéu. Gracies al equipu de Softastur, (n’especial a Xuacu) por conseguir la inclusión de la nuesa llingua dende’l principiu. (Asegúrovos que nun foi nada cenciello)

La páxina de descargues ta disponible equí.

Los usuarios impacientes d’Ubuntu 10.10 pueden probar la versión final del siguiente mou:

sudo add-apt-repository ppa:libreoffice/ppa

sudo apt-get update && sudo apt-get install libreoffice

sudo apt-get install libreoffice-gnome (pa usuarios de gnome)
sudo apt-get install libreoffice-kde (pa usuarios de kde)

Como nun podía ser d’otra forma, Libreoffice yá cuenta con ventaxes sobre Openoffice.

Pa los que nun s’atrevan, namás hai qu’esperar 3 meses, hasta que salga Ubuntu 11.04 😉

Collabora con Softastur. Ponte en contautu

Firefox PORTABLE n’asturianu pa Windows, versión 3.6.13

12 de Xineru de 2011

Una de les coses que más me prestaron siempre de Firefox ye la so versión portable, esa versión portable úsase por exemplu na Mochila Dixital d’Educastur.

Les ventaxes de la versión portable son munches:

  • USB: Puedes llevar Firefox nun llápiz USB calteniendo les tos preferencies (contraseñes, marcadores, botones…).
  • Ensin privilexos: Puedes executalu nun ordenador onde nun tienes permisos pa instalar programes (por exemplu nel trabayu, nel colexu…).
  • Nun camuda nada nel sistema: Si tas col ordenador de tos padres, trabayu, colexu… y nun quies/puedes instalar un programa por si s’estropea dalgo o inclusu que ya tea otru Firefox n’otra llingua, podrás usar la versión portable.
  • Nun dexa claves o perfil: Nun guarda datos de navegación, contraseñes, cookies… nel ordenador, sólo na carpeta onde ta descomprimíu 😀

Esta versión pa Windows que t’ufrimos nun ye oficial, garramos la versión portable y usamos la torna de la versión oficial. Ficímosla porque pa dalgunes persones y/o en dalgunes situaciones, la versión portable ye perútil o inclusu necesaria 😀

Pa usala ye bien fácil: baxa esti ficheru ZIP, descomprímilu onde quieras (Nun USB, escritoriu, raíz…), accedes a la carpeta FirefoxPortable y executes en Windows el ficheru FirefoxPortable.exe cuando y onde quieras 😉

Resume de too esto:

  • Formatu: Portable
  • Versión: 3.6.13
  • Llingua: Asturianu
  • Sistema operativu: Windows

PD: Ye importante que nun anoves la versión de Firefox, en casu de facelo, perderás que tea n’asturianu.

PD2: Ye la primer versión portable qu’espublizamos, si dalgo va mal, por favor, avísanos nos comentarios. ¡Gracies! En casu de dir too como debería tamién nos prestaría que nos avises 🙂 Aunque qué coño… meyor unes botellines xD

Chromium n’asturianu

9 d'Avientu de 2010

Chromium, ye’l restolador web de códigu abiertu de Google, y yá ye posible traducilu a llingua asturiana.

Esti trabayu ye posible gracies a Fabien Tassin que caltién una copia llocal de les rames del upstream de Chromiun, y diariamente actualiza les traducciones. Hasta agora, Chromium nun tenía denguna infraestructura de traducción que permitiere a la Comunidá llocalizar el software, y por ello dalgunes llingües taben incompletes.

Agora puédese:

a) completar les traducciones de Chromium

b) meyorales, y

c) amestar llingües nueves.

Si quies collaborar nes traducciones, ponte en contautu equí….  pa coordinate cola xente interesao y dividir el trabayu.

La llingua asturiana nel llugar 12 del mundu

14 d'Ochobre de 2010
Tornes d'Ubuntu 10.10

Tornes d'Ubuntu 10.10

¡Faltó poco pal 10 perfeutu!

Fueron los collacios eslovenos los qu’algamaron quedar nel décimu llugar del mundu pol númberu de tornes de los programes básicos d’Ubuntu 10.10 (fai 6 meses taben nel puestu 24)

Pola nuesa parte, namái llegamos al 12ᵁ llugar del mundu (tábemos xusto detrás de los eslovenos, nel puestu 25); a ver si pa la siguiente llegamos al 11ᵁ 😉

Les estadístiques tan equí.

L’Asturies inexistente…

7 d'Ochobre de 2010

¿Tanto-yos cuesta respetar la toponimia? -no comments-

¡Multiplícase por 7 l’usu d’Ubuntu n’asturianu nun añu!

24 d'Agostu de 2010

¡Esto nun para! 😀 Ye un preste pergrande pa nós ver como espoxiga y espoxiga l’usu d’Ubuntu n’asturianu 😀

Les estadístiques d’usuarios nos da unes 302 persones qu’usen Ubuntu CADA DÍA n’asturianu 😀 Esta cifra españó multiplicando por 7 la cifra de fai sólo 1 añu!!

Ye mui importante facer incapié en qu’eses persones son les qu’usen Ubuntu cada día, ye dicir, non quienes lo tienen sólo instalao y nun lu usen. Son quienes cada día usen l’ordenador con Ubuntu n’asturianu 😀

Dende equí, a toa esa xente sólo podemos dici-yos  una cosa: ¡¡¡GRACIES!!!

PD: El númberu que ves na imaxe ye de la estadística. El cálculu faise como esplicamos nel artículu de fae 1 añu.