Festival FLISoL n’Uviéu

19 d'Abril de 2010

Esti sábadu 24 d’Abril del 2010 celebrase’l Festival Llatinoamericanu d’Instalación de Software Llibre.

FLISoL ye l’eventu de difusión de Software Llibre más grande en Llatinoamérica. Faise cada añu dende’l 2005 y dende’l 2008 faise’l 4ᵁ sábadu d’abril de cada añu. El so principal oxetivu ye sofitar l’usu del software llibre, dando a conocer al públicu la so filosofía, alcances, avances y desendolcu.

Esti añu faese en cientos de ciudaes, y salta’l Charcu, incluyendo per primer vegada Uviéu, nel llocal de Partycipa (Cai Paraísu, nᵁ 5) de 16:30 a 21 h, onde se faerá un taller d’instalación de la distro Venenux y una charra sobre’l software llibre 🙂

Más información equí.

UNA y los portátiles de primaria

27 d'Ochobre de 2009

UNA fizo declaraciones sofitando l’usu d’Ubuntu pa los portátiles de primaria, tema ya faláu abondo equí:
http://blogs.altuxa.com/tapaponga/pa-echase-a-tremar.html
http://blogs.altuxa.com/tapaponga/la-escuela-20-de-zp-tien-trampa.html
http://blogs.altuxa.com/tapaponga/portatiles-pa-los-nenos-en-primaria-con-windows-linux.html

Ta perbien que los partidos políticos lo pidan publicamente 😀

¡Otru gallifante pa UNA! ¿De xuro que naide más quier ún? ;)

Vergoña: Adiós a Ubuntu nos Telecentros n’Asturies

2 d'Ochobre de 2009

Voi cuntavos una hestoria de les que te dexen murniu 🙁

Tengo un conocíu nun telecentru d’Asturies. Polo visto, fae 3 años equipáronlos con ordenadores d’ estes característiques:

  • CPU Pentium IV a 3Ghz.
  • 80 Gb Discu duru.
  • Monitor TFT 17″
  • 512 Mb RAM, ampliables a 4 Gb.
  • Arranque dual con Windows XP y Ubuntu.

Cualisquier linuxeru sabe qu’esi equipu con un GNU/Linux ¡vuela! Encima pa la xera principal d’esos ordenadores: Restolar na rede.

Agora, en tiempu de crisis, el CAST (Consorciu Asturianu de Servicios Teunolóxicos, dependiente del Gobiernu del Principáu d’Asturies) tuvo la brillante idega de camudar tolos ordenadores de tolos telecentros d’Asturies,  428 ordenadores [Nota de Prensa, ¡toma .doc gubernamental!], por 400.000€ [BOE] de los contribuyentes (¿Nun valía aumentar la RAM a 1Gb por 15€ cada ordenador si ye que quieren Windows Server?).
Bono, deciden facer el cambéu, y ¡tachán! ¿Adivinais? Sí: Un sirvidor y los X ordenadores de cada telecentru con Windows, Office 2007 y antivirus (ensin arranque dual). Podeis velo nel Pliegu de Cláusules Alministratives del perfil del contratante del Principáu d’Asturies.

Si lleemos la Llei R.D11/2007 Principios Xenerales diz:
“i) Principio de neutralidad tecnológica y de adaptabilidad al progreso de las técnicas y sistemas de comunicaciones electrónicas garantizando la independencia en la elección de las alternativas tecnológicas por los ciudadanos y por las Administraciones Públicas, así como la libertad de desarrollar e implantar los avances tecnológicos en un ámbito de libre mercado. A estos efectos las Administraciones Públicas utilizarán estándares abiertos así como, en su caso y de forma complementaria, estándares que sean de uso generalizado por los ciudadanos.”
¿¿Cómo ye entós que nun Pliegu de Prescripciones Téuniques apaez el nome de varies empreses??
A todo esto, añadir tamién esto: la nota de prensa anuncia que ya ta adjudicado el contrato que, según el BOE no se adjudicaría hasta 28 días después ¿!? (Editáu a 3 d’ochobre 2009 – 11:45h. Parez que provisionalmente axudicóse’l 26 de Xunu, siendo llegal qu’apareza como axudicáu na nota de prensa, aunque ciertamente ta permal redautada).

400.000€ Tiraos a la basura. Los ordenadores qu’hai valen de sobra pa restolar per Internet 🙁

Entá ye peor, hai telecentros que yá tienen montada la rede con Ubuntu, yendo too a les mil maravíes, y ¿agora qué? Esauto, desanicialo too, y ¡toma software privativu! Nun tando permitío instalar otru sistema operativu.

Esti casu ye cafiante por estos motivos:

  • Tirar un ordenador perfeutamente válidu pa la xera que tien que facer.
  • ¿Qué ye eso que tanto nos venden de reciclar y reusar??? ¡Que s’apliquen el cuentu!
  • Gastar perres del contribuyente n’ordenadores nuevos teniendo unos “vieyos” (3 años!!) que valen perfeutamente pa lo mesmo, y da-y perres públiques a Microsoft poles llicencies de Windows, Office y a Mcafee pol antivirus.
  • La dependencia teunolóxica que creen con software privativu, muncho más agravante siendo l’alministración pública, que debería dar exemplu.
  • El precuru y profesionalidá invertida en configurar una rede n’Ubuntu, pa tirar a la basura nel intre.
  • Realmente’l presupuestu asignáu pal CAST ye una burrada (3,4 millones), y los telecentros parte cimera na presencia d’Internet nos pueblos, reciben cuatro perres (400.000€).
  • ¿Por qué aparez nel Pliegu de Prescripciones Téuniques nomes d’empreses?
  • De xuru qu’hai más motivos, ponlos tú mesmu nos comentarios.

Otru blogue que trata del tema ta equí:
http://acurti.es/ufa
http://acurti.es/vfa
http://acurti.es/wfa

Pa tremar colo que faerán colos portátiles pa primaria :S

Edición, 5 d’ochobre ’09: Amesto dende otru blogue, adelantándose perbien a la rempuesta que puedan danos: http://acurti.es/Dfa
Edición 13 d’ochobre ’09: ¡Bien por UNA! http://ff.im/9IUOp http://ff.im/9Gygo http://ff.im/9Gygs 😀

La Escuela 2.0 de ZP tien trampa

14 de Mayu de 2009

Moscas en la sopa esplica perfectamente dende tolos puntos de vista la trampa de ZP col regalu de miniportátiles a tolos neños de primaria. Ineludible llectura.

Portátiles pa los neños en primaria… Con Windows? Linux?

13 de Mayu de 2009

La noticia salió fae 1 mes, y hubo grandes ecos n’Internet escontra a que’l gobiernu regale a los escolinos ordenadores con Windows, pola dependencia a software privativu que se creará nesos escolinos y el coste de les llicencies de Windows, Office, antivirus… y quierse dende les plataformes pol software llibre qu’esos portátiles lleven GNU/Linux.

Finalmente, el gobiernu del estáu dexará que cada comunidá autonoma escueya que sistema operativu quier n’esos ordenadores.

Ehí xurden 2 entrugues:

  1. ¿Pagaranse les llicencies de Windows (de xuro que vien preinstalao nos ordenadores) pa lluéu instalar gnu/linux? ¿Micro$oft siempre ganará?
  2. ¿Qué pasará n’Asturies??? Softastur tien a punto de finar la torna al asturianu d’Edubuntu, sistema operativu basáu n’Ubuntu, enfocáu a profesores y escolinos. Col que dar clases en cualisquier llingua pa cualisquier materia.

Imaxina por un momentu, prender l’ordenador y dar clas d’inglés con Edubuntu n’inglés, zarrar sesión y camudar la llingua al asturianu pa dar asturianu, zarrar sesión y camudar la llingua al francés y dar la clas en francés, zarrar sesión y camudar la llingua al castellanu pa dar lliteratura española…

Les posibilidaes de GNU/Linux son infinites, de baldre (too val cero perres), llibres (llibres d’usalo, copialo, modificalo y distribuyilo), robustes (el sistema perestable SIEMPRE), segures (ensin virus y con un fuerte sistema d’usuarios)…

¡El Gobiernu Asturianu tien d’escoyer bien! ¡El futuru de los escolinos asturianos nun puede tar gobernáu por software privativu!

Stallman ya se pronunció al respecto (xenial, como siempre):

Ye vender el futuru del país a Microsoft.