Arte asturianu

24 de Xunu de 2009

Jono Bacon remémbranos nel so blogue que’l 16 de xunetu fina’l plazu pa participar na Amuesa de Cultura Llibre d’Ubuntu

Imaxe ganadora na amuesa de Jaunty

Imaxe ganadora na amuesa de Jaunty

La cosa consiste en facer una esbilla d’arte llibre nes categoríes de semeyes/imaxes, soníu y vidiu que va incluyise nel siguiente llanzamientu d’Ubuntu (9.10 o Karmic Koala). Almítense obres embaxo llicencies Creative Commons Attribution-ShareAlike, Attribution o, cuando’l remitente ye’l mesmu autor, obres con llicencia cero

La manera de participar ye xubir la obra a un agospiamientu d’Internet afayadizu y poner l’enllaz nel apartáu correspondiente de la wiki del concursu. Na mesma wiki pueden vese los ganadores d’anteriores llanzamientos. ¿Daquién s’anima a amosar l’arte asturianu del s. XXI?

Academia != Creative Commons

8 de Mayu de 2009

Acabo aportar de la manifestación y l’actu del Día de les Lletres n’Uviéu.

Quiero comentar 2 coses 😛

  1. Impactóme’l fechu de qu’Ana Cano nomara al “Colectivu Softastur” ente tanta xente y nun actu tan importante 😀 (pola collaboración de Softastur pa dar sofitu na torna de tecnoloxía a empreses). ¡Gracies!
  2. Dió anuncies de que l’Academia diba collaborar con Google pa xubir tolos llibros a Google Books. Nesto’l Teatru Campoamor españó n’aplausos, yo incluyíu, pero ḥodiome abondo la siguiente frase… L’Academia diba xubir toles obres, tando disponibles pa tol mundiu’l (sólo’l) 20% del llibru, y la posibilidá de mercalu dende Google.
    Yo nun toi d’alcuerdu n’esto. Parezme que tol trabayu de l’Academia debiere tar baxo una llicencia Creative Commons, la llicencia d’usu que ta espardiendo la cultura como enxamás pasó. Y quien quiera mercalu, que lu merque, pero da-y la posibilidá de a quien nun pueda mercalu pueda tenelu. Tamién nesi casu nun fae falta recurrir a Google, con un sirvidor cualisquier ya tienes la oportunidá d’ufiertar los llibros 😉

    Nun sé si esti blogue lu lleerá dalguién de l’Academia, pero encamiénto-yos a que atalanten que realmente tamos nún tiempu nel que xorrez (por muncho que-y ḥoda a la $GAE) abondo la cultura por Internet, y l’asturianu nun puede quedar fuera.

Y dicho esto… ¡¡¡YA, YA, YA, OFICIALIDÁ!!!