Lo que debiere ser fácil, conviertese n’anubríu nesta famosa rede social.
Hai varies coses que me molesten abondo d’esta triba de redes sociales, y nel casu que nos interesa, Facebook.

• Nun-y veo utilidá. La única, ver que-y va pasando a decenes de persones d’un vistazu… pero’l preciu a pagar pola privacidá ye demasiao grande.
• Copien los datos webs paraleres (cómo 123people.es), ensín el to consentimientu y polo tanto pierdes el control sobro los tos datos.
• La falta de privacidá, teniendo que poner datos reales pa que los tos collacios t’atopen (dexaría de tener xacíu si nun pusieremos los nuestros datos).
• El serviciu en sí tien una intromisión ablucante, rellacionandome con xente perbien, pero si nun quies que faiga eso…
• Ser amigu, fan, del grupu X, de poco val. Debería nomase “Rede asocial”, la mayoría de la xente nun la conoces en persona, y perder tiempu nesta triba de webs, nun me parez que seya tolo “social” que debería ser.
• La pérdida de tiempu personal que supón lo dicho nel puntu anterior, cada vegada hai más servicios qu’atender n’Internet, asina que prefiero centrame nos que realmente me presten y veo útiles.
• La dificultá de date de baxa del serviciu.
• ¿Qué me gusta ser raru y dir escontra corriente, cuenta? Radicalón que ye ún 😛

Bien, de xuro que m’escaezo de dalgún.

Pa date de baxa, parez que’l camín ye fácil y cenciellu: Menú Configuración de la cuenta / Desactivar la Cuenta… ¡pero non! ¡Ehí sólo desautives la to cuenta, nun la desanicies dafechu!! Si vuelves a entrar, tendrás tolo que teníes, na fué esborrao.

Si lo que quies ye que la to cuenta seya esborrada pa siempre, tienes que dir a esti enllaz perescondíu:
http://www.facebook.com/help/contact.php?show_form=delete_account
Nel plazu de 14 díes ensín que vuelvas a entrar, toles tos semeyes, páxines nes que yes fan, comentarios… serán desaniciaos 😉

Vía: xeduced.