Personalizar Grub

5 de Febreru de 2010

Enantes d’entamar, diré qu’esti tutorial ye percenciellu de realizar, pero críticu. Al menor fallu, puedes cargate’l grub, y el sistema operativu nun arrancará.

Nún principiu, dicir que’l to grub tien que ser la versión 1.97. Si la to versión ye esa, entós yá tienes GRUB2 😀 (ye daqué mosqueante, pero ye asina)

Si l’aspeutu del to grub ye como’l de la semeya d’arriba, entós podemos siguir.

Información previa básica: Hasta agora, editando’l ficheru grub.cfg con esti comandu:

gksu gedit /boot/grub/grub.cfg

podíemos facer coses como camudar el color del testu y el fondu:

y l’aspeutu qu’obteníemos podía ser ésti:

Pero agora trátase de personalizar un pocoñín más el grub, ñec, ñec, ñec… nesti tuto, vamos a poner un fondu de pantalla chulu. Pa ello, vamos garrar la imaxe que más nos preste, y convertila nuna imaxe 640×480 y formatu .tga . Esto fáise cenciellamente col GIMP. Yo voi facelo con 2 imáxenes: la que veis equí abaxo, llamaréla softastur.tga

y el resultáu final del nuesu GRUB va a ser ésti:

La otra imaxe que usé, llámase oficialida.tga, y el so resultáu, ésti:

Bien! Vamos al turrón!!  Dende la terminal escribimos:

sudo apt-get install grub2-splashimages

El programa grub2-splashimages va a ponenos na carpeta /usr/share/images/grub unes cuantes imáxenes ente les que podemos escoyer un fondu pal nuesu Grub. Nós vamos copiar les imáxenes que ficimos ( softastur.tga y oficialida.tga ) tamién ehí, pa teneles xunto a toles otres, porque somos xente curioso. MUY IMPORTANTE: tamién vamos copiales en /usr/share/images/desktop-base (alcordáivos de facelo con permisos de root, sinón nun va a dexavos) [1]

Si yá ficimos eso, editamos el ficheru 05_debian_theme:

sudo gedit /etc/grub.d/05_debian_theme

Ehí podemos aplicar lo que yá sabemos sobro camudar los colores. Pero lo que más nos interesa ye camudar el fondu del grub, asina que vamos a la llinia que diz:

for i in {/boot/grub,/usr/share/images/desktop-base}/xxxxxxxxxx.{png,tga} ; do

Trocaremos les xxxxxxxxxx pol NOME del nuesu fondu. Namái el nome. Nun pongáis la estensión .tga. Por exemplu, quedaría d’esta miente:

for i in {/boot/grub,/usr/share/images/desktop-base}/softastur.{png,tga} ; do

Zarramos l’editor guardando los cambeos, y agora abrimos una terminal y escribimos:

sudo update-grub2

Reaniciamos el sistema, y yá tendría que salinos el nuesu grub personalizáu.

Esfrutái 😉

[1] Tolos post que pongo, tán previamente probaos por mí. A diferencia d’otros blogs, que namás se dediquen a copiar+apegar testu ya imáxenes, yo pruebo les coses, y faigo les mios propies captures. Y ye por eso que nun vos pongo la fonte d’aú saco les coses: Primero siempres m’informo, pero por más que miré, tolos posts omiten el fechu de que hai que poner les imáxenes en /usr/share/images/desktop-base . Eso ye porque namás se llimitaron a copiase unos d’otros. Echando un güeyu a la cabera semeya, vese bien a les clares, que’l camín onde busca’l nuesu fondu ye ehí. Y por eso si lo facéis asina va a funcionavos. Los comentarios d’otros blogs tán llenos de xente que dicen: “A mí nun me funciona”… y el responsable del blog, (como nun lo probó él mesmu..), llimítase a dicí-yos que ficieron mal la imaxe 640×480 en tga. Por supuestu, nun tengo la verdá absoluta, namás vos digo cómo me funciona a mí. Lo que nun quier dicir qu’esistan otros métodos.


Novedaes en Karmic Koala

22 d'Agostu de 2009

Esti ye l’aspeutu qu’amuesa agora la pantalla de login, en Karmic Koala. Magar que se decidió facer un sistema d’arranque en un tiempu mínimu, parece que van a desendolcar un módulu d’arranque minimalista denomáu Xsplash que faiga una animación suave a la entrada del sistema. Por supuestu, ésti ye un tema de los muchos que se pueden escoyer pal GDM, nun quier dicir que vaya ser l’oficial…. pero perehí van los tiros.

Per otru llau, Karmic vien col GRUB2, que tien un aspeutu asemeyáu a esto:

Pero ésti aspeutu ye daqué sosu, y por ello pueden facese coses como éstes

Pel momentu, esto ye lo qu’hai. A ver qué más nueves funcionalidaes nos trai Koala… 😀

P.D. Pa los curiosos, tenéis dalgunos nuevos temes equí , y cómo editar los tos propios GRUBS, equí

Reinstalar Grub nel discu duru

3 d'Abril de 2009

Si necesites resinstalar l’arranque Grub a manu (aunque recomiendote Super Grub Disk), con Ubuntu arrancáu (bien dende otra partición o dende’l LiveCD), abres una terminal y escribes:

sudo grub
find /boot/grub/stage1
root (hdX,Y)
setup (hdX)
quit

El testu hdX y la Y ye lo correspondiente a lo que devuelve’l comandu find 😉
Al arrancar de nuevo ya tendrás l’arranque 😀

Vía: Guía d’Ubuntu.