El 30 d’abril na FNAC…

17 d'Abril de 2011

Presentación y Taller d’instalación d’Ubuntu 11.04 – 30 Abril en FNAC

9 d'Abril de 2011

A finales d’abril del 2011 apaecerá la nueva versión d’Ubuntu, 11.04, Natty Narwhal

El sábadu 30 d’abril, AsturLiNUX, MouseTrap (Alumnos EII), Ubuntu-ast y Softastur van facer una presentación na FNAC sobre Ubuntu.

Dende les 11:00 de la mañana, y a cada hora, van amosase les novedaes más importantes de la distribución y solventarán les tos duldes. Simultáneamente van facer un taller d’instalación d’Ubuntu 11.04, que consiste n’instalar Ubuntu nel to ordenador y enseñate a remanalu, too ello de baldre. Si yá tienes Ubuntu pues anovalu nel momentu.

Taller d'instalación Ubuntu 11.04

El programa previstu ye esti:

  • Presentación: Cada hora enseñaráse qué ye Ubuntu y les novedaes más importantes de la nueva versión 11.04.
  • Instalación (De 11:00 a 14:00 y 16:00 a 20:30): Instalación d’Ubuntu nel to ordenador y deprendimientu básicu, too ello totalmente de baldre. Si quies llevar el to ordenador pa instalar Ubuntu ye mui importante que sigas estos pasos.
  • Party (De 14:00 a 16:00): Si ta un día soleyeru diremos a dalgún parque cercanu a xintar. Nós ponemos la bebida y tú traes dalgo pa picar y compartimos la comida ente toos.

Si quies saber los motivos de por qué usar Ubuntu, calca equí.

Ilusión

5 de Febreru de 2011

Ilusión ye lo que vivimos ayer nel taller d’instalación, yá que dos rapazos (que conocimos na install d’Uviéu), movieron pola so propia cuenta a too L’Infiestu con unes ganes encomiables nún de los meyores talleres d’intalación que ficimos. El taller d’instalación foi la primer actividá del cursu que va facese durante tol mes de Febreru en L’Infiestu. Nel cursu daránse clases d’Ubuntu básicu y traducción. Si quies asistir, entá tas a tiempu pa la primer clase del día 11.

Dende equí quitámonos el sombreru ente l’ablucante trabayu fechu por Dani y Rodrigo y sólo podemos dicivos: ¡Gracies!

Ayer vimos ilusión na mocedá, y con ello vimos lo más importante: Futuru pa la nuesa llingua y pal software llibre 😀

¡Ven a conocer el nuevu Ubuntu 10.04 a Ribeseya!

30 d'Abril de 2010

¡Yo voi a Ribeseya!

23 d'Abril de 2010

Taller d’instalación en Ribeseya

17 d'Abril de 2010

Si quies instalar, anovar y/o conoces Ubuntu 10.04 Lucid Lynx ¡vémonos en Ribeseya! 😉

Taller d’instalación d’Ubuntu n’Uviéu

7 d'Ochobre de 2009

Entamamos otru taller d’instalación de la nueva versión d’Ubuntu col sofitu de la Xunta pola Defensa de la Llingua Asturiana, n’Uviéu [ver mapa] 🙂

Tanto si quies instalar, como anovar el to Ubuntu, trai l’ordenador, y facemóstelo de baldre.

Remembra qu’Ubuntu cumple esto y muncho más:

  • N’asturianu (Integraes ḷḷ y ḥ).
  • Ye “Linux”.
  • Ensin virus.
  • Robustu, seguru, estable, rápidu y mui cenciellu.
  • Los efeutos d’escritoriu más ablucantes.
  • Con Office, editor de semeyes, xuegos, multimedia…
  • Programes llibres, de baldre y cenciellos.
  • Puedes caltener el to sistema operativu.

Ver el vídeu en Youtube

Puedes saber más sobre Linux equí. Y remembra mirar esto si vas venir.

Y si nun puedes venir, n’otros países en tol mundiu tienen munchísimos talleres pa festexar l’asoleyamientu de la versión 9.10 [Ver llista].

Semeyes de les xornaes de Turón

26 de Setiembre de 2009

El xueves 24 ficimos una pequeña charra d’anización a Ubuntu y el mundu del Software Llibre, aclarando conceptos básicos.

Marcando territoriu…

Gracies a Xandru, dirixendo dende abaxu, conocimos la diferencia ente derechu y torcíu…

Cuando quedo claru’l conceutu de derecho… entamamos a trabayar…

Incidencies nos entamos d’Ubuntu dempués de la Install de Xixón

22 de Mayu de 2009

Dempués de la instalación d’Ubuntu na Install Party de Xixón, hai detalles qu’estrañen, s’esperen, o que simplemente fallen. Vamos ponevos les incidencies que nos fuimos atopando col usu d’Ubuntu polos/es que vinieron a la Install Party 😉

  • Ubuntu NON tien virus 😉 Los virus non existen por varios motivos. Puedes saber más n’esti artículu de Tapaponga.
  • La webcam: Tema peliagudu. Pigdin y emesene nun tienen sofitu pa webcam y si la xente nun tien una bona camara lo más seguro que den problemes los drivers… La xente quier usar la webcam nel messenger. Podeís instalar dende la llista d’Amestar/Quitar los programes empathy o aMSN que parecen dar sofitu a la webcam. Nun los probé porque nun tengo webcam ni me llama, si lo probais, unvianos el resultáu por favor 😀 Tamién si quereis xugar capturando cola webcam vos prestará abondo’l programa Cheese.
  • Too Ubuntu preinstaláu ta n’asturianu menos la OpenOffice, ya ta tornada, pero tamos trabayando pa qu’importen eses tornes, mientres tanto podríes poner la OpenOffice en castellanu, pa ello llee esti post de Tapaponga.
  • Nel netbook Amilo 3520Ui nun furrulen les tecles de control del brillu. Problema de drivers que parez tener la solución tocando un ficheru de configuración. Lo nuevo del portátil y el so hardware nun del too reconocíu por Ubuntu provoquen esti comportamientu.
  • Webs que van llentes o se colinga un poco Firefox: Cierto, Adobe nun acaba de facer un codec tan bonu de flash pa Ubuntu como pa Windows, colo que webs recargaes de videos flash colinguense un cachu. Habrá qu’esperar bien de tiempu a qu’Adobe meyore’l codec pa GNU/Linux.
  • Xuegos que van llentos: Dalgunes tarxetes gráfiques tienen codecs privativos, y son emulaos, colo que programes como xuegos que la esprimen nun tienen el rendimientu deseáu. Tamién puede ser que la tarxeta nun de más de si.
  • Al calcar el boton borrar, non retrocede a la páxina anterior Firefox. Cierto, esto queda como incidencia pa Softastur. Trabayaremos n’ello 😉
  • Los escritorios son formes d’organizar ventanes. Puedes pasar ventanes d’un a otru, y dexar dalgunes nos 2 escritorios, pa tener un manexu organizáu (por exemplu, tener toles aplicaciones d’internet nel escritoriu 1, y el restu n’otru).
  • Wine: Ye un emulador de programes de Windows. Instálase dende Amestar/Quitar y con el puedes executar aplicaciones de Windows. Equí podeís saber qu’aplicaciones son compatibles con Wine. P’abrir una aplicación con Wine, baxes el ficheru .exe y calcando botón drechu del mur sobro él, seleiciones “Wine emulador”.
  • Ver videos: Nun vos instalamos los drivers, intentamos dexar Ubuntu tal cual. Los drivers pa oyir MP3 o ver videos AVI son privativos, ya intentamos averavos a la llibertá del software 😉 Nun ye mayor problema, cuando intenteis abrir un archivu Ubuntu entrugaravos si quereis instalar los drivers, marcais tolos que vos aparezcan y ¡ta! Teneis una guía percenciella pa instalar los codecs equí.
  • Amestar/Quitar y Xestor de paquetes Synaptic: Tool software que necesites tan n’esos 2 xestores. Guetes por exemplu “messenger” y atoparás tolos messengers que tienes pa usar 😉 Nun necesites baxar nengún programa de la web.
  • Los formatos .doc, .xls, .pps… (osease, word, excel, powerpoint…) son privativos, eso quier dicir que nun se sabe como se componen. Nun podemos cola OpenOffice tener una compatibilidá al 100% cola Micro$oft Office. Por contra, si trabayamos cola OpenOffice tendremos siempre perfeutos documentos abiertos cola OpenOffice 😉 Se llibre, escaez la Microsoft Office. Conseyu: Pa documentos ente sistemes operativos usa PDF, dende OpenOffice puedes esportarlo perfácil 😉
  • Si notes que Firefox nun va bien, de xuro que’l router nun-y asigna los datos automáticamente. Camuda esta configuración: Editar / Preferencies -> Apartáu Avanzáu / Llingüeta Rede -> Conexón: Botón “Configuración” => Seleiciona “Autodetectar configuración del proxy pa esta rede” y Calca Aceutar. Debiere dir meyor.
  • Igual tampoco’l router tien sofitu pa IPV6, abre Firefox, introduz como direición “about:config”, y camuda el Valor de “network.dns.disableIPV6” a True calcando dos vegaes sobre “False” de la columna Valor.

Diremos ampliando esta llista según nos vayais reportando incidencies.

Visto esto parez qu’Ubuntu ye too problemes 😛 Pero tamién la xente ta contento, equí dalgunos comentarios de la mesma xente que reportó lo d’enrriba:

  • “el resto funciona muy bien”
  • “sigo enviciáu con esti viciu perguapu del Ubuntin”
  • “Por lo demas estoy comodo, no me presenta mayores problemas”
  • “Toi supercontenta, préstame abondo y voi garrándo-y el tran tran pocu a pocu” … “Ye sencillu d’usar, perintuitivu, guapu de aspeutu parez que merqué un ordenata d’última xeneración, simplifícame la vida, ta too organizadino, nun faen falta tres ferramientes estremaes pa facer coses parecíes, alucinante la capacidá que tien de facese compatible con tolo que tenía antes, ye rápidu y limpiu”

Un saludu a toos/es y gracies pol feedback 😉

Crónica Install Party Xixón

16 de Mayu de 2009

Acabo llegar de la install party de Xixón, y voi comentavos que tal 🙂

Vino xente bastante (igual pa ser Xixón podría haber venío abondo más, pero’l tiempu nun acompañó cola lluvia tol día), y esta vegada tol mundiu coló con Ubuntu instaláu n’asturianu o castellanu, según escoyeron 🙂

Presta pola vida que la xente te diga que marcha “percontenta” 😉 Y danos más puxu si cabe pa seguir tornando y sofitando’l software llibre n’Asturies.

Ta claro que la xente demanda l’asturianu nos ordenadores, y notase un movimientu de quérelu en toles estayes de la vida normal y diaria 😀

¡Munches gracies a los que vinisteis y espero que teis percontentos col vuestru Ubuntu! 😀 Si teneis cualisquier dulda o problema, podeis escribir un comentariu n’esti artículu 😉 ¡Un saludu!

PD: Cuando tengamos les semeyes, subímosles

Actualizáción:

  • Déxovos les semeyes 😉 Calca n’elles pa veles más grandes.
  • Puede lleese la noticia en La VozLNE.