un software fechu pol pueblu, pal pueblu

3 de Mayu de 2011

¿Qué ye’l software llibre? La definición técnica ye software que puedes usar, estudiar, meyorar y distribuyir ensin torgues. Si’l software cumple estes llibertaes, ye software llibre.

Pero vamos velo con un exemplu, imaxina que tenemos delantre dos botelles de sidra

La botella de manzorga pertenez a la empresa y tien tolos drechos sobre ella. Sólo pues prebala na so cadena de chigres, al preciu que-yos pete, nun pues compartila colos collacios y nun te dicen de qué ta fecha: sabe a sidra, pero naide sabe qué ingredientes lleva y la empresa prohíbe face-y un analís.

La botella de la drecha pertenez a ún de los munchos llagares qu’hai na redolada. Por supuestu, ta fecho con mazana y si quies dícente con qué variedá de mazana ta fecho, nun lleva coses rares y eso pues comprobalo tu mesmu porque pues analizala cuantes vegaes quieras. Ye más, la receta qu’usa esi llagar ye la receta meyorada a lo llargo de los años col conocimientu de toos. Puedes compartila con tolos collacios que quieras y onde quieras.

¿Con qué botella quedes? Obviamente cola de la drecha, porque sales beneficiáu tu, la comunidá de llagareros y los consumidores de sidra.

Podríemos dicir que ye una sidra del pueblu, pal pueblu. Estrapolando: un software fechu pol pueblu, pal pueblu.

Fundando la Fundación

22 de Febreru de 2011

De xuro que yá conocéis LibreOffice, la suite d’ofimática derivada d’OpenOffice.org.

Dende’l mesmu entamu, la xente que s’encargó de llevar alantre esta xera tenía l’envís de que’l gobiernu d’esta aplicación tuviere nes manes de los propios usuarios y pa ello se creó The Document Foundation, una fundación ensin porgüeyu que s’encarga de facilitar la evolución de LibreOffice.

Dende setiembre la Xunta Direutiva de la Fundación tuvieron valorando les opciones de constitución llegal de la Fundación y decidieron acoyer The Document Foundation a les lleis alemanes de fundaciones.

Pa facelo ye necesario tener un fondu de 50.000€, polo que la Xunta Direutiva de TDF fai un llamáu a que los usuarios sofiten la creación de la Fundación col so donativu. Na páxina de la campaña espliquen meyor cómo y por qué collaborar, incluyendo un enllaz pa facelo vía PayPal. Si prefieres facelo nel to bancu, estos son los datos de la cuenta:

Titular: OpenOffice.org Deutschland e.V.
Asuntu: The Document Foundation
Númberu de cuenta: 3497390
Códigu de bancu: 66690000
Bancu: Volksbank Pforzheim
IBAN: DE12666900000003497390
BIC: VBPFDE66

El llímite pa collaborar ye’l 21 de marzu y de momentu yá lleven recoyíos 34.000€; si se recibieren más de 50.000€ el sobrante ta previsto destinalo a los gastos de funcionamientu corriente de The Document Foundation.

Si uses LibreOffice, echa un gabitu pa sofitalu; sinón, ¡prebalu!… ¡Va prestate!

Ibarra y el Software llibre

19 de Mayu de 2010

La comunidá Estremeña, yá fai tiempu que fizo un apueste pol Software llibre. Esto, arriendes de la llibertá que se-yos ufre a los usuarios, ta reportándo-yos bonos beneficios económicos. Dicho n’otres pallabres, dende l’Alministración cumplen cola llei de los estándares abiertos (cosa que nun fai el Principáu) y amás aforren perres. A mí nun me presten un res los políticos, y muncho menos la colla gandayas y vendíos que tenemos d’Asturies. Pero cuando Ibarra diz: “no concibo que a un político se le ofrezca una estructura barata y otra cara y elija la segunda opción“, queda perclaro qu’esisten intereses. Si Ibarra nun lo concibe, yo tampoco.

Festival FLISoL n’Uviéu

19 d'Abril de 2010

Esti sábadu 24 d’Abril del 2010 celebrase’l Festival Llatinoamericanu d’Instalación de Software Llibre.

FLISoL ye l’eventu de difusión de Software Llibre más grande en Llatinoamérica. Faise cada añu dende’l 2005 y dende’l 2008 faise’l 4ᵁ sábadu d’abril de cada añu. El so principal oxetivu ye sofitar l’usu del software llibre, dando a conocer al públicu la so filosofía, alcances, avances y desendolcu.

Esti añu faese en cientos de ciudaes, y salta’l Charcu, incluyendo per primer vegada Uviéu, nel llocal de Partycipa (Cai Paraísu, nᵁ 5) de 16:30 a 21 h, onde se faerá un taller d’instalación de la distro Venenux y una charra sobre’l software llibre 🙂

Más información equí.

Repasando conceutos: Software llibre

1 de Setiembre de 2009

¿Qué ye’l Software Llibre?

El Software Llibre da la llibertá al usuariu pa executar, copiar, distribuyir, estudiar, camudar y meyorar el software. Un programa ye Software Llibre si los usuarios tienen toes estes llibertaes. Por esta razón, los conteníos d’un programa puedes compartilos con cualisquier persona, facer el númberu de copies que quieras, xubilo a  Internet o  incluso vendelu.

¿Qué ventaxes tien el Software Llibre pa mí?

Gran parte de les aplicaciones son de baldre, lo qu’amenorga los costes pal usuariu a la hora d’usar el so ordenador.

La collaboración de cada vegada más desendolcadores en tol mundiu al movimientu del Software Llibre, fae que’l software caltenga munchos menos fallos y espoxigue de manera más rápida que’l software propietariu.

L’usu de software privativu ensin llicencia ye illegal. Cada vegada que remanes con software que nun adquiriste llegalmente tás incurriendo nun delitu que nun puestu de trabayu puede xenerate un grave problema.

Windows nun me cuesta perres ¿ye tamién Software Llibre?

Microsoft Windows nun ye Software Llibre. Si enantes d’instalalu nun pagaste la so licencia tas incurriendo nun delitu de piratería. Existen sistemes operativos de Software Llibre que cumplen la mesma función que Windows y que nun cuesten perres. Nós recomendamos que prebes Ubuntu, que ye GNU/Linux.

¿Qué ye GNU/Linux?

GNU/Linux ye’l sistema operativu llibre por escelencia. Cumple les mesmes funciones que’l conocíu Windows: xestor de ventanes, menús estenderexables, aceleración 3D, preseos plug and play, etc.

Pal usuariu final, GNU/Linux llega en forma de distribuciones (por exemplu Ubuntu o Debian) que caltienen, amás del propiu sistema operativu, una gran cantidá d’aplicaciones como pueden ser un restolador web, un visor de semeyes, un editor de documentos, un reproductor de vídeos, etc.

Tamién puedes tener dambos sistemes operativos instalaos nel to ordenador mientres t’acostumbres a les nueves carauterístiques d’Ubuntu  🙂

Vía: http://windowslibre.osl.ull.es/static/info

El 65% de los colexos de Galicia usen software llibre

29 d'Avientu de 2008

Namás y na menos que’l 65% de los colexos de Galicia usen software llibre, gran avance, ya que fae 2 años yera’l 20%.

La Xunta de Galicia quier que la implantación siga alantre, too un exemplu a siguir pola nuestra Xunta. ¡A ver si s’anima Areces! (Parezme que va ser que non… ¿habrá qu’acompañar con un pingüín a la Pita? xD)

Un pasín más hacia la llibertá nes escueles gallegues.

Tú puedes echar un gabitu al software llibre

25 d'Avientu de 2008

Sí 😀 Nun fae falta que seyas programador. Hai munches formes de collaborar col software llibre.

Una de les meyores carauterístiques del software llibre, ye que nun faes el trabayu altruista pa una empresa, faeslu pa la comunidá y pa ti mesmu 😉

  • Aceutar l’envíu anónimu de datos de los programes usaos, asina se sabrá una media de cuanta xente lu usa. Pa ello activa en “/Sistema/Alministración/Fontes de software” na cabera llingüeta l’unvíu d’información anónima.
  • Unviando encuestes como esta de Firefox p’aidar a meyorar el programa.
  • Participando nos foros o llistes de corréu, respondiendo les entrugues de la xente qu’entama con GNU/Linux.
  • Reportar los bugs qu’atopes a los desarrolladores pa que puedan igüalos, algamando un software muncho meyor.
  • Dar idegues de meyora a los desarrolladores d’un programa.
  • Mercar nes tiendes (camisetes, llaveros, maletines…) que tienen los desarrolladores na so web pa sofitar el proyeutu economicamente. Remembra qu’en xeneral esi programa ufréntelu de baldre.
  • Dalgunes webs de proyeutos acepten pequeñes donaciones pa sofitase económicamente.
  • Collaborando con blogs de software llibre, tanto escribiendo artículos como comentarios.
  • Tornando’l sistema a la to llingua.
  • Recomendar l’usu a conocidos/es, collacios/es, familiares…
  • Instalándolu a conocidos/es, collacios/es, familiares…
  • Coordinate con xente pa dalguna xera. El trabayu n’andecha ye muncho meyor.
  • Collaborando con un proyeutu de delles maneres (Por exemplu, en Softastur puedes echar un gabitu tornando los programes, escribiendo una carta n’inglés puntual o echándonos un gabitu a tornar una web que nun llegamos a entender, falando de nos, encargate de xubir les tornes de Launchpad al proyeutu orixinal, atopando fallos de torna y avisándonos, collaborando nel diseñu gráficu…). Pa ello, unvíes un corréu electrónicu a un proyeutu nel que quieras aidar, entrugando según les tos cualidaes como puedes aidar.
  • Atendiendo a les llamaes de collaboración puntual, como la de Mark Shuttleworth pidiendo screenshots del to escritoriu.
  • Collaborando o asistiendo a les Install Parties que se faigan cerca de ti.
  • Si sabes programar, collaborar faciendolo 😉

Y remembra, ¡cualisquier pequeña aida, ye perimportante! Y sobre too, ¡diviertete n’esti mundu infinitu! 😀