Mechanig, ferramienta de mantenimientu

21 d'Ochobre de 2011

Cuando yes un usuariu nuevu d’Ubuntu (de cualesquier sistema GNU/Linux, en xeneral) hai dos coses que dan una migaya de medrana: frañar “daqué” ensin ser a igualo, y meter comandos nún terminal.

P’ayudar mientres pierdes esi mieu, el collaciu Georgi Karavasilev vien de sacar la versión 0.2.4-1 del so programa Mechanig que, darréu, va tar disponible n’asturianu.

Pantalla principal de Mechanig

Mechanig ye lo que se llama un «frontend» (esto ye, un envoltoriu) pa los comandos de mantenimientu del sistema que d’otra manera tendríes qu’escribir nún terminal. Si te gusta lo que ves y quies probalo, tienes qu’instalalo dende un «ppa» o archivu personal del autor, porque entá nun ta disponible nos repositorios oficiales d’Ubuntu. Pa ello vas tener qu’abrir un terminal ;) y escribir estos comandos (teclea la to contraseña si la pide):
sudo add-apt-repository ppa:kokoto-java/usu-extras
sudo apt-get update
sudo apt-get install mechanig

Pero ¿qué ye lo que fai Mechanig? Ente otres coses val pa:

  • Anovar les llistes de paquetes instalables
  • Anovar los programes instalaos
  • Quitar de les llistes los paquetes que yá nun son instalables
  • Desaniciar de la caché los paquetes *.deb descargaos con apt
  • Optimizar l’usu de la memoria…

Y, como curiosidá, el nome d’esta versión de Mechanig ye Agnetha, que ye una referencia a… una persona que sal nesti videu

Fundando la Fundación

22 de Febreru de 2011

De xuro que yá conocéis LibreOffice, la suite d’ofimática derivada d’OpenOffice.org.

Logo de LibreOffice

Dende’l mesmu entamu, la xente que s’encargó de llevar alantre esta xera tenía l’envís de que’l gobiernu d’esta aplicación tuviere nes manes de los propios usuarios y pa ello se creó The Document Foundation, una fundación ensin porgüeyu que s’encarga de facilitar la evolución de LibreOffice.

Dende setiembre la Xunta Direutiva de la Fundación tuvieron valorando les opciones de constitución llegal de la Fundación y decidieron acoyer The Document Foundation a les lleis alemanes de fundaciones.

Pa facelo ye necesario tener un fondu de 50.000€, polo que la Xunta Direutiva de TDF fai un llamáu a que los usuarios sofiten la creación de la Fundación col so donativu. Na páxina de la campaña espliquen meyor cómo y por qué collaborar, incluyendo un enllaz pa facelo vía PayPal. Si prefieres facelo nel to bancu, estos son los datos de la cuenta:

Titular: OpenOffice.org Deutschland e.V.
Asuntu: The Document Foundation
Númberu de cuenta: 3497390
Códigu de bancu: 66690000
Bancu: Volksbank Pforzheim
IBAN: DE12666900000003497390
BIC: VBPFDE66

El llímite pa collaborar ye’l 21 de marzu y de momentu yá lleven recoyíos 34.000€; si se recibieren más de 50.000€ el sobrante ta previsto destinalo a los gastos de funcionamientu corriente de The Document Foundation.

Si uses LibreOffice, echa un gabitu pa sofitalu; sinón, ¡prebalu!… ¡Va prestate!

Ocalitos, ocalitos…

24 d'Ochobre de 2009

Por si los koalas y la llingua nun basten pa qu’Ubuntu 9.10 seya un Asturalia-Linux, la versión de sirvidor que ta a piques de salir va venir con Eucalyptus.

Eucalyptus

Eucalyptus

Ello ye un desarrollu abiertu de la computación na ñube, pero que al ser modular podrá nel futuru adautase a otres arquitectures (Google, Microsoft…)

Polo que cuenten nesta páxina, instalar una ñube propia ye más fácil de lo que podría pensase. Pa una organización o empresa que necesite “tar nes ñubes” ye una alternativa afayadiza a los servicios de pagu.

Y yá que tamos, qué prestoso diba ser si de la universidá d’Asturalia salieren proyeutos como esti, fechu na Universidá de California de Santa Bárbara

Novedaes n’Ubuntu 9.04 – Netbook Remix

13 de Mayu de 2009

Fasta agora tuvimos 2 versiones d’Ubuntu pa baxar: La Desktop (pa ordenadores de sobremesa y portátiles) y la Server (pa sirvidores).

Ubuntu 9.04 ufiertanos la versión Netbook Remix, adaptada a los minilaptops.

Tendrá un nuevu entornu d’escritoriu adaptáu a les pantalles pequeñes, y enfocáu al hardware más común d’estos pequeños portátiles :D

Puedes baxar esta versión oficial dende equí.

Ubuntu One – Ubuntu na nube

12 de Mayu de 2009

Ubuntu anunciabanos na so cabera versión 9.04 el conceutu “na nube“, pero nun ví na furrulando con Ubuntu rellacionao con ello.

Acabo enterame del nuevu serviciu oficial d’Ubuntu: Ubuntu One. Novedá n’esta nueva versión ;)

Un serviciu p’almacenar, syncronizar y compartir, trabayando remotamente vía web los nuestros ficheros ente varios Ubuntu.

El serviciu ta tovía en fase Beta, y hai que pidir una invitación na propia web, yo ya pedí la mia, ya vos cuntaré meyor que tal va cuando me llegue. Regalente 2 GB, y si quies 10 GB de tráficu mensual, cuesta 10$ mensuales.

El cliente UbuntuOne ye GPL3 y parez furrular al estilu de DropBox.


Zarrar
Mandar Corréu Electrónicu