Software malintencionáu anubríu nun curiapantalles pa baxar dende GNOME Look

10 d'Avientu de 2009

Como cuenten nesti filu de los foros d’Ubuntu, va dellos díes qu’apaeció en Gnome Look un supuestu curiapantalles pal escritoriu Gnome. El programa apaecía como un paquete .deb, que ye’l que usa l’instalador en sistemes Debian y deriváos (como Ubuntu), pa instalar nel sistema con permisu de superusuariu… y darréu instalábense dellos scripts que nun teníen que ver con un curiapantalles.

Hai que lo dicir milenta vegáes: el software que vien nos repositorios oficiales d’Ubuntu da pa facer el 99% de les coses que-y pueden pruyir a cualquier usuariu. Enantes d’instalar un paquete .deb qu’atopes per ayuri hai que tar bien seguru de que:

  • De verdá lo necesites
  • Nun esiste nos repositorios oficiales
  • El sitiu onde lu descargues ye de fiar
  • El paquete mesmu ye de fiar (esto ye, cuánta xente lu tien instaláu; que problemes dió…)
  • Si pide permisos de superusuariu, doblar los cuidaos
  • Cuando lu tengas instaláu, comprueba si pasen “coses rares” nel funcionamientu normal del ordenador.

Nesti casu, sicasí, l’efeutu nun fué seriu: el paquete yá se quitó del sitiu y desaniciar los scripts ye cosa de siguir les instrucciones del filu de los foros. Pero ye un avisu de que tenemos de tar sollertes coles coses que metemos nel ordenador y siguir los conseyos de seguridá básicos.

10 Pasos esenciales de seguridá

22 de Febreru de 2009

Si bien nun hai virus y el sistema ye’l mas seguru, tamién hai que tener un poco de xacíu y llevar a cabu dellos pasos pa tener un sistema y una proteición de datos a prueba de bombes 😉

Activa’l tornafuegos: Pa ello en consola
sudo ufw enable
sudo ufw default deny

Tamién si prefieres una interface gráfica, instala Gufw
sudo apt-get install gufw
Importancia: 10/10

Configura bien el to router
Activa WPA o WPA2 pal to router. Les contraseñes WEP son perfáciles de hackear.
Tamién activa una máscara MAC colo que sólo los tos ordenadores señalaos puedan entrar.
Importancia: 10/10

Usa contraseñes segures
Sí, por favor, camuda esi “1234” por otra cosa, por exemplu “4321” 😉
Importancia: 10/10

Encripta los tos datos
Dende la versión 8.10 encriptar los datos ye perfácil nuna carpeta pa tal xera.
Nes prósimes versiones, ta previsto que la encriptación seya a tol home del usuariu 🙂
Importancia: 10/10

Manten el to sistema actualizáu
Por muncha seguridá que se tenga, ye perimportante tener un sistema actualizáu colo que evitar vulnerabilidaes conocíes.
Importancia: 8/10

Usa grupos y permisos
Cada usuariu puede ser miembru d’ún o varios grupos, y los tos archivos debieren tener claro los permisos pa ti, el to grupu y pal restu.
Importancia: 7/10

Nun uses root pa too
Nun debes considerar una molestia que’l sistema pida la clave d’alministrador pa procesos críticos. Ye perimportante dixebrar los “poderes” de cada usuariu, polo tanto, nun uses sesiones root pal trabayu cotidianu, les probabilidaes de frayar el sistema son grandes si nun sabes perfeutamente lo que faes.
Importancia: 7/10

Fae backups
Ḥode bastante perder tolos datos. Discos duros espurríos, hackers, cayíes del portátil… pueden ḥodete tola información.
Importancia: 6/10

Comprueba cuentes non usaes
Munches vegaes criamos usuarios que nun volvemos a usar. Desanicialos dafechu cuando nun vayan usase ye lo meyor.
Importancia: 4/10

Fonte: Techradar.com