Trucos Firefox 4 (2) – Menú compactu

2 d'Abril de 2011

Si quies algamar un restolador más compactu y qu’ocupe menos, puedes activar el prestosu menú compactu, pa ello calca col botón drechu nun sitiu vacíu de la barra de Firefox, y desactiva la opción de Barra de menús.


Agora yá verás daqué como esto :)

Trucos Firefox 4 (1) – Llingüetes aplicación

24 de Marzu de 2011

Entamamos una batería de trucos con Firefox 4 ;) Y entamamos con una de les meyores novedaes: les llingüetes aplicación.

Son llingüetes que siempre se caltendrán abiertes, ufriendo accesu mui rápidu a les nuestres web más usaes.

Pa convertir una llingueta n’aplicación, simplemente calques col botón drechu sobre ella y seleiciones Fixar llingueta.

Y yá nos saldrá na barra de llingüetes a manzorga en Firefox:

Podemos amestar cuantes queramos:

Trucos pa Eslema: Toles webs n’asturianu

21 de Febreru de 2010

Eslema ye ún de los proyeutos más prestosos n’asturianu, puede tornar testu, webs, ficheros, col motor llibre Apertium :D Vamos xugar un poco con Eslema y Firefox, y amosate 2 perbonos trucos pal to restolar diariu ;)

Trucu 1 > Marcador de torna nel intre:

Criamos un marcador na barra de Ferramientes de Firefox.

  • Nome: Tornar
  • Direición:  Esta llinia (ensin el 1 que ta al entamu).

Agora en cada páxina en castellanu que temos, calcamos nel marcador “Tornar” y tendremos nel intre esa páxina tornada al asturianu.

Please enable Javascript and Flash to view this Blip.tv video.

Trucu 2 > Toles páxines nueves n’asturianu por defeutu:

  • Instalamos esti complementu de Firefox.
  • Abrimos el menú de Firefox: Ferramientes / Complementos. Seleicionamos URL Suffix y calcamos nel so botón Options. Esto amuesa una ventana na que configuramos Alt+Enter como esto:

Preffix: Esto (ensin el 1 del entamu).
Suffix: &output=es-ast

Agora, si en Firefox introducimos una direición web (ensin http://www.), por exemplu, google.es y calcamos Alt+Enter, direutamente aparez n’asturianu ;)

Usar OpenTrand pa los 2 trucos anteriores

OpenTrad tien 2 ventaxes sobre Eslema:

  • Nun amuesa’l banner.
  • Dalgunes webs vense mal con Eslema y bien con Opentrand.

Pa usar Opentrand usái esta direición pal trucu 1; y esti prefixu pal trucu 2 (ensin sufixu nel complementu URLSuffix).

De xuru qu’esti tema da muncho más xuegu :) Si tienes más idegues ponles nos comentarios.

Edición 14 marzu 2010: Avisanos Kevin nos comentarios d’una web onde tan los scripts pa los marcadores de Firefox de toles llingües :) Visitalo equí. ¡Gracies Kevin!

¡Perdí el mio portátil!

28 de Xunetu de 2009

No, nun ye de verdá. Pero el día menos pensáu podemos alcontranos diciendo eso…

Pa estos casos, lléganos dende Chile el programa Prey, que funciona como un serviciu nel entamu, anubríu de los usuarios. Lo que fai ye restolar na rede la esistencia de una páxina que’l dueñu del portátil cria en casu que-y desapaeza l’ordenador. Si la páxina esiste unvía un corréu que contién los datos de la conexón que ta usándose, la llista de programes n’execución, una semeya del escritoriu y, si l’ordenador tién activada la webcam, una semeya de la persona que ta… hmmm… tentando devolver l’ordenador. Si el dueñu nun conseña una páxina web na instalación, Prey executaráse cada ciertu tiempu.

Hai versiones pa Linux, Windows y Mac y ta embaxo la llicencia GPLv3+cerveza (o sea, si alcuentres l’ordenador, invites a una cerveza. Nun se si valdríen unos culinos de sidra)

¿En qué día entama la selmana?

4 de Payares de 2008

Mira tú que tarrezco los llunes,.. pero entá más tarrezco los domingos, porque al día siguiente ye llunes. Pues esto ye lo que nos toca ver nel calendariu que trai Gnome. La selmana entama en Domingu, a lo anglosaxón. Por suerte, esto pue camudase y pues poner nel to calendariu que la selmana entame el Llunes (como tien que ser. Y eso que na República Independiente de mio casa, la selmana nun entama hasta’l martes, pero esa ye otra hestoria…)

Pues bono, p’afitar que la nuesa selmana entame en LLUNES, fadremos lo siguiente:

Editamos el nuesu ficheru en locale (que ye au vien lo bonos que somos, y cómo denomamos a los díes de la selmana, cómo nos presta ver la hora, la data… etc). Pa ello abrimos la terminal y escribimos

sudo gedit /usr/share/i18n/locales/ast_ES

y na pantalla que se nos abre, miramos onde venga END LC_TIME.

El testu esautu que pondremos ye’l siguiente first_weekday 2 , y pondrémoslu xusto na llinia enantes de la llinia de END LC_TIME, talo y como s’adica na imaxe:

Fecho esto, Guardarmos y zarramos.

Agora vamos a aplicar los cambeos. Anovamos los “locale”. Na terminal escribimos:

sudo locale-gen

Y pa finar, rexeneramos los paneles de Gnome. Escribimos:

killall gnome-panel

Y llisto. Nel calendariu, la selmana entamará de llunes.

…que descanséis bien el domingu.


Zarrar
Mandar Corréu Electrónicu