Instalar Firefox 3.6 n’Ubuntu

21 de Setiembre de 2010

N’Ubuntu yá vien Firefox n’asturianu preinstaláu y lo meyor ye que sigas con el, pero si quies instalar la cabera versión de Firefox n’Ubuntu ye fácil, pero tien un pequeñu trucu 😛

  1. Baxa Firefox dende equí.
  2. Descomprime la carpeta onde quieras.
  3. Crea un enllaz nel panel al ficheru firefox de la carpeta descomprimida: Botón drechu del mur sobre’l panel y Amestar al panel. Arrastres un Llanzador d’aplicación personalizáu y seleiciones el ficheru firefox de la carpeta descomprimida.

¿Fácil non? Vamos velo por pasos, lo primero descomprimimos Firefox y tendremos esto (nel mio casu voi facelo nel escritoriu pa que se vea claro:

Y agora’l videu de cómo crear l’accesu direutu nel panel:

Ver el vídeu en Youtube

¡42!

16 de Setiembre de 2010

Ver el vídeu en Youtube


Como casi naide sabe, 101010 en binariu ye 42 🙂

¡Multiplícase por 7 l’usu d’Ubuntu n’asturianu nun añu!

24 d'Agostu de 2010

¡Esto nun para! 😀 Ye un preste pergrande pa nós ver como espoxiga y espoxiga l’usu d’Ubuntu n’asturianu 😀

Les estadístiques d’usuarios nos da unes 302 persones qu’usen Ubuntu CADA DÍA n’asturianu 😀 Esta cifra españó multiplicando por 7 la cifra de fai sólo 1 añu!!

Ye mui importante facer incapié en qu’eses persones son les qu’usen Ubuntu cada día, ye dicir, non quienes lo tienen sólo instalao y nun lu usen. Son quienes cada día usen l’ordenador con Ubuntu n’asturianu 😀

Dende equí, a toa esa xente sólo podemos dici-yos  una cosa: ¡¡¡GRACIES!!!

PD: El númberu que ves na imaxe ye de la estadística. El cálculu faise como esplicamos nel artículu de fae 1 añu.

Ubuntu-ast, la nueva Comunidá Oficial d’Ubuntu

19 d'Agostu de 2010

Ayeri (18-agostu-2010) votóse l’aprobación n’Ubuntu ¡¡con tolos votos favoratibles!! La Comunidá Asturiana, ye la tercer comunidá aprobada del Estáu (tres castellanos y catalanes).

Nun ye cosa que se faiga d’un día pa otru. Cuando tamos a piques de cumplir 5 años del nacimientu del equipu de Traducción d’Ubuntu n’ast, lléganos esti regalín. Hai que dicir, que la comunidá d’Ubuntu-ast , tien el cometíu principal d’averar Ubuntu a la xente n’Asturies; pero nun ye esclusivamente p’asturfalantes sinón tamién pa los castellanufalantes d’Asturies.

Sicasí, dende Ubuntu-ast, convídase a toos a participar. La llingua nun ye una escusa. Esto ye Ubuntu y sois toos bienveníos.

Banshee Media Player pa Ubuntu

10 d'Agostu de 2010

Güei toca falar de Banshee.

Banshee, ye un reproductor de soníu y vídeu que vas poder instalar nel to Ubuntu ensin dengún problema. Tamién ta disponible pa Mac OS. Almite toa triba d’estensiones d’audio y puedes reproducir tamién videos *.avi. Pue reproducir ya importar CD’s d’audio, y ye quien a unviar les canciones que se reproducen pa compartir gustos musicales en Last.fm, ansí como la posibilidá d’escuchar la radio d’esti serviciu, y otres emisores, como les que s’ufren dende SHOUTCAST.

Lo primero ye instalalu 😀 , como siempre, dende Aplicaciones–>Centru de Software d’Ubuntu. Fecho eso, abrimos el programa, y calcamos en Multimedia–>Abrir conteníu multimedia. Dicímos-y au tenemos les nueses canciones y/o videos, et voilà, esti ye l’aspeutu qu’amuesa banshee:

El programa amuésanos los grupos de música nuna ventana coles carátules de los discos. D’esti mou, si queremos escuchar un discu en concretu, fáisenos abondo gráfico ya intuitivo la escoyeta. Na semeya, podéis ver que tengo activada la estensión o plugin pa last.fm que va suxiriéndome otros artistes, y los álbumes destacaos del grupu que tamos reproduciendo.

Tamién s’integra na bandexa del sistema:

Podemos ver los nuesos vídeos, y el plugin de Youtube, va faciéndonos otres suxerencies, que podemos reproducir en Banshee o nel Restolador Web qu’usemos

Tamién podemos usar el plugin de Wikipedia, el de les lletres de les canciones, y munchos más…

Tarás entrugándote: ¿Cómo amestar los plugins? Pues eso hai que facelo dende Synaptic. Abrís synaptic, ya instaláis esti complementu: banshee-community-extensions

…y dempués, nes preferencies de Banshee, na tercer llingüeta, alcontráisles:

…nun les probé toes, pero la estensión LiveRadio, inclúi toles emisores qu’ufre SHOUTCAST. O seya: Música ininterrumpío tol día!!!!! 😉

Recomiéndovos que lu probéis. Banshee ye llixeru y nun va dexavos indiferentes. Por dalgo Banshee ye’l reproductor qu’usa MeeGo 😉

Ah! escaecíaseme…..  ta tornáu al asturianu dende la versión 1.5. Ubuntu ufre dende los sos repositorios la versión 1.6.1, asina que nun hai problemes. Pero los complementos que fai la comunidá, tán toos n’inglés, asina que podéis echar un gabitu a ello cuando queráis.

Personalizando’l portátil: Ubuntu + n’ast

28 de Xunetu de 2010

Xugando un poco puede conseguise con mui poques perres coses como esta:

Ubuntu: Imprenta esti ficheru dende Inkscape en papel adhesivu blancu, recorta y pega nel portátil 🙂

N’ast: Pegadiella de la Xunta pola Defensa de la Llingua.

Dell nun quier vendeme Ubuntu ¡Vuelta al monopoliu!

27 de Xunetu de 2010

Dell desmarcóse de la industria ufriendo unos cuantos ordenadores y portátiles con Ubuntu preinstaláu fai unos 2 años. Dende fai 1 añu o asina vendíalos n’España tamién. Pero ensin más desplicaciones (tampoco tien que dales) dexó d’ufrir esos ordenadores.

Fasta equí too normal, nun tengo quexa. El problema ye que me quedó ensin poder mercar un ordenador con Ubuntu preinstaláu. Tampoco sería problema si ufrieren Dell y demás fabricantes (¿ensambladores?) ordenadores con otru sistema operativu llibre o ensin sistema operativu, pero tampoco ye’l casu…

Bono… tampoco ensin quexa fasta equí, son llibres de vender lo que quieran… Pero el problema ye qu’esi ordenador llevará (y van cobrame) un Windows preinstaláu, y al prendelu debería poder refugar esa llicencia de Windows, darréu que nun voi usar (nin quiero) esi sistema operativu.

Pongo equí la mio charra con un axente de ventes de Dell España güei mesmo:

____________________________________________

marquinos: Pregunta inicial/Comentarios: Quiero comprar portátil con Ubuntu
Usted está ahora conectado con un agente. Gracias por usar Dell Chat. Conectado con operador_dell
Operador_Dell: Buenos días! Bienvenido al departamento de ventas para particulares.
Operador_Dell: Lo siento pero no tenemos ordenadores con UBUNTU
marquinos: Buenos días. Pero en su web tienen la publicidad: www.dell.es/ubuntu
marquinos: que me dirige a unos cuantos ordenadores
marquinos: pero no puedo seleccionar el sistema operativo en la compra, sólo Windows
Operador_Dell: Correcto porque en estos momentos no esta disponible
marquinos: ¿Es permanente? ¿O puedo reservar uno ya?
Operador_Dell: No le puedo asegurar nada pero por el momento no esta disponible
marquinos: De acuerdo, ¿Qué alternativas tengo a comprar un ordenador sin sistema operativo? (U otro sistema operativo que no sea Ubuntu/Windows).
Operador_Dell: Tampoco es posible el sistema operativo viene incluído en nuestros ordenadores
marquinos: Vaya, eso es un poco monopolio ¿no? :P
marquinos: Está bien también, pero si les compro un ordenador al encenderlo tengo que aceptar la licencia de Windows, cosa que no deseo hacer porque no quiero tener Windows, y por lo tanto no quiero pagar su licencia para no usarla.
marquinos: Digame el proceso para rechazar esa licencia, por favor.
Operador_Dell: No es posible rechazar la licencia
Operador_Dell: es una licencia OEM
marquinos: Eso no lo entiendo. No pueden obligarme a aceptar una licencia que no quiero
Operador_Dell: y no es una licencia en paquete
marquinos: ¿Es legal eso?
Operador_Dell: Lo siento pero es así
Operador_Dell: sí,es legal
marquinos: Vale, muchas gracias por su información
Operador_Dell: gracias a usted

____________________________________________

¿Flipante eh? Vaya monopoliu :(

Ye ablucante que la Xunión Europea se preocupe de poder escoyer el restolador web en Windows (perbona cosa), pero nun se preocupe un res de que seyamos llibres d’escoyer el nuestro sistema operativu.

Tamién ye ablucante qu’abondes persones quieran daqué y una empresa-yos refugue’l vendelo. Más en tiempos de crisis ¿non? WTF!

¿Qué podemos facer? ¡Entrar a l’aición! Idegues nos comentarios ;) Ehí van unes que tengo:

  • Pedir a Dell (y otros fabricantes) por email ordenadores con Ubuntu. ¿Sabeis los emails? Dell nun los espubliza.
  • Pedir a Dell por chat que tengan ordenadores con Ubuntu. Calca equí pa chatear con un comercial de ventes.
  • Mercar ordenadores (a Dell y otros fabricantes) y devolvelos porque nun podemos refugar la llicencia.

Be free my friend ;)

Ubuntu y la discapacidá

14 de Xunetu de 2010

Va un tiempu qu’Ubuntu (y otres distribuciones de Linux) vienen faciendo un esfuerzu p’averar el sistema operativu a les persones con discapacidaes. El nuesu sistema operativu cuenta con delles aplicaciones d’asistencia como Orca (testu a voz; nun ta disponible n’asturianu), aides a la escritura (tecles lentes, configuración especial del mur o Dasher) o delles posibilidaes d’aumentu del escritoriu.

Sicasí, esto nun ye bastante. Esiste un equipu, l’Ubuntu Accesibility Team que ta dedicáu a diseñar la meyor manera en que los usuarios discapacitaos pueden usar Ubuntu. Y p’algamar el so oxetivu, piden la collaboración pa crear lo que llamen (nel mundu del diseñu) «Personas», esto ye delles persones imaxinaries col mayor grau de detalle y que representen a la mayor cantidá posible de persones reales.

Si yes una persona con discapacidá y quies collaborar, l’Ubuntu Accesibility Team ta faciendo una encuesta (anónima si se quier) na páxina http://access.libertus.co.uk/ tocante a les necesidaes especiales pal usu d’ordenadores.

La encuesta ta n’inglés; si tienes problemes cola llingua, en Softastur podemos encarganos de tornala a l’asturianu o al castellanu y llueu unviala al Equipu d’Accesibilidá.

Munches gracies por adelantáu 🙂

Instalar Jdownloader n’Ubuntu 10.04

11 de Xunetu de 2010

Taba mirando si había manera d’instalar JDownloader n’Ubuntu, y resulta que sí, qu’esistía nos repositorios:

https://edge.launchpad.net/~jd-team/+archive/jdownloader 😀

Poro, yera tan cenciello como abrir una terminal, y escribir estes 2 llinies:

sudo add-apt-repository ppa:jd-team/jdownloader

sudo apt-get update && sudo apt-get install jdownloader

Pero resulta que la xente de Canonical faite les coses cencielles, asina que si nun yes de los que te presta andar cola terminal, vete a Aplicaciones–>Centru de Software d’Ubuntu, y llisto, a esfrutar d’esti xestor de descargues. 😉

Ubuntu ye…

20 de Mayu de 2010