Ubuntu Open Week

3 de Mayu de 2010
Ubuntu Open Week

Ubuntu Open Week

Durante toa esta selmana van tener llugar una serie de charres en llinia tocante a dellos aspeutos d’Ubuntu (desendolcu, Ubuntu One, trabayu colos upstream, bugs,…)

Les charres van tener llugar nes canales #ubuntu-classroom y #ubuntu-classroom-chat de irc.freenode.net; sicasí, pa los que tengan instaláu Ubuntu, encamiento usar el programa Lernid, que permite ver al conferenciante nun cuadru y la charra de la clase n’otru:
sudo apt-get install lernid

Pa saber más, na wiki d’Ubuntu

Per otru lláu, tamién va haber (con otru horariu y programa) una Ubuntu Open Week en castellanu pa quienes nun s’afayen col inglés. Equí ta la información d’ello.

¡Ven a conocer el nuevu Ubuntu 10.04 a Ribeseya!

30 d'Abril de 2010

L’Academia de la Llingua migra a Ubuntu

9 d'Abril de 2010

Ana Cano, en nome de l’ALLA y David Planella en nome d’Ubuntu, acaben de dar anuncia de que l’Academia de la Llingua Asturiana migrará tolos sos ordenadores a Ubuntu n’asturianu, el sistema operativu llibre y de baldre, que ya puede esfrutase n’asturianu 😀

¡Una perbona noticia! ¡Puxa l’ALLA y puxa Ubuntu! 😉

Fonte: Asturnews.

Autoinstala OpenOffice n’Ubuntu

18 de Febreru de 2010

El siguiente ficheru facilitarate tola instalación d’OpenOffice n’Ubuntu. Automáticamente descárgate los ficheros necesarios ya instálatelos nel to PC 😀

Pasos a siguir:

  • Descarga l’autoinstalador calcando equí , y apégalu nel Escritoriu.
  • Agora abre una terminal (menú Aplicaciones/Accesorios/Terminal)
  • Escribi lo siguiente (respetando les mayúscules):

cd Escritoriu

  • y agora escribes:

sudo bash ooo2ast.sh

  • (pediráte la to contraseña, y empezará a executase’l programa)

Dempués d’un bon cachu (175 Mb de descarga + instalación) yá tendrás Openoffice instaláu. Espera a que t’avise’l programa. 😀

P’abrir OpenOffice, vete al menú Aplicaciones/Oficina y si t’aparez n’inglés, afita l’asturianu yendo al menú Tools/Options/Language Settings 😉

Si tienes tovía problemes o cualesquier dulda, escríbenos.

Encamentámoste a usar esti ficheru d’autoinstalación n’Ubuntu 9.10. Pa la siguiente versión d’Ubuntu yá vendrá preinstaláu n’asturianu 😉

PD: ¡Milenta gracies a Miguel Jañez pol script! 😉

Ubuntu 9.10 LiveCD n’asturianu

8 de Febreru de 2010

Gracies al proyectu de desendolcu y traducción de Softastur:

¡¡Por fin tenemos un LiveCD d’Ubuntu n’asturianu!! :D

  • Problema qu’había: Ya disponemos nos CD oficiales del instalador n’asturianu, pero si arranques dende’l CD pa ver cómo ye Ubuntu, aparez too n’inglés ¿Por qué? Pues porque sólo s’incluyen les llingües más usaes por motivu d’espaciu nel CD (Si metieran les 240 llingües d’Ubuntu nun-yos cabríen otres aplicaciones).
  • Igua: Al tar l’instalador incluyíu dende la cabera versión, abondes utilidaes como UCK o reconstructor permiten criar la to imaxe de CD personalizada col arranque y entornu na llingua que quieras (de les disponibles nel instalador).
  • Ventaxa de criar un LiveCD o LiveUSB: Puedes copialu nun CD/DVD, y puedes dir a cualesquier ordenador, arrancalu col CD/DVD metíu na unidá de CD y ya tienes Ubuntu n’asturianu, ensin instalar na, y ensín camudar na nel ordenador nel que lo prebes, ¡al sacar el CD/DVD l’ordenador siguirá esautamente igual que taba!. Valte pa enseñar Ubuntu y pa prebar si nun ordenador tiraría bien con él. Tamién puedes copialu nun llápiz USB o discu duru USB. La ventaxa d’esti métodu ye qué Ubuntu arrancará mui mui rápido (casi tanto como’l discu duru), abrirás y remanarás aplicaciones nel intre y los cambeos que faigas como personalizalu, instalar programes, criar documentos ¡caltendránse nel USB! Igual que nel casu anterior, nel ordenador nun se faerá nengún cambéu ;)
  • Cómo instalalu:
    • En CD/DVD: Baxa la imaxe .iso y grabala en formatu “imaxe” a un CD/DVD col Nero o un grabador llibre como Infrarecorder. Solo te queda arrancar un ordenador col CD/DVD metíu.
    • N‘USB: Baxa la imaxe .iso, ya instalala nun llápiz USB o discu duru USB: Dende Ubuntu ye perfácil, vete al menú Sistema/Alministración/Criar USB d’arranque. Dende Windows tamién puedes con uSbuntu. Solo te queda arrancar un ordenador col USB metíu.
  • Usu: Aunque la imaxe permite la instalación nel discu duru, ¡¡¡ENCAMENTAMOSTE A QUE NUN INSTALES UBUNTU CON ESTA IMAXE!!! El so únicu destín ye prebar/usar Ubuntu n’asturianu en LiveCD. ¿Por qué dicimoste esto? Porque pa garantizar la estabilidá d’Ubuntu sólo un CD fechu por Ubuntu tien esa estabilidá. Nun deriváu non oficial nun ta garantizada esa estabilidá ;) Si quies instalar Ubuntu nel discu duru baxa de baldre un CD fechu por Ubuntu.

Cualesquier dulda o problema que tengas, avisanos nos comentarios.

Usar Empathy n’Ubuntu con Google Apps y restu d’Apps capaes

8 de Xineru de 2010

Si tienes un dominiu propiu puedes usar Gmail con esi dominiu, ye dicir, tienes un dominiu softastur.org, y siguiendo estos pasos, tendríes una cuenta de Gmail, pero en llugar de nomatu@gmail.com sería nomatu@softastur.org 😀

¿Lo bono? Tola potencia de Gmail. ¿Lo malo? Tienes Gmail, Gtalk, Calendariu, Documentos y Sites; pero nun tienes nin Google Reader, ni Google Analytics, ni tol restu d’aplicaciones d’una cuenta de Google, ni puedes coneutar por defeutu a clientes como Empathy o Pidgin. ¡Vamos pone-y igua! 😉

  • Configurar Empathy pa usar Google Apps col to dominiu: Simplemente amestamos/editamos la cuenta como vemos na imaxe, y ya podremos disfrutar de la nuestra cuenta Gtalk col nuestru dominiu nesi cliente llibre 😀

  • Amestar restu d’aplicaciones de Google: El trucu ye criar otra cuenta de Google poniendo nel primer campu’l nuestru email de nomatu@softastur.org. Con esto engañamosnos a nos mesmos y tendremos toles aplicaciones d’una cuenta normal de Google. ¿Por qué digo que nos engañamos? Porque pal corréu electrónicu, pa Gtalk, pal calendariu y pa los documentos usaremos la cuenta nomatu@softastur.org del nuestru dominiu, pero al calcar nun enllaz de Google Reader, de Google Wave, de Google Analytics, etc, al nun habelo na cuenta de nomatu@softastur.org, entrará automáticamente na nueva cuenta, engañando a la vista 😉

Finó’l cursu online d’Inicación a Ubuntu

30 d'Avientu de 2009

¡Ya finó’l cursu d’Iniciación a Ubuntu!

Acabamos de facer hestoria 😀 siendo’l primer cursu online n’asturianu, y demostrando’l potencial de Dokeos como plataforma de deprendimientu a distancia.

La verdá que foi un placer cuntar con tolos que vos apuntasteis, y esperemos que dientro poco volvamos a poder alcontranos n’otru cursu asemeyáu 😀

Tamién queremos animar a cualisquier organización que-y apetezca, a facer un cursu online n’asturianu de cualesquier xera, pa lo que por supuesto cuntará col nuestru sofitu  😉

Hebo una encuesta anónima pa quien quiso rellenala, onde cabe destacar estes rempuestes:

1. Al 88% de los alumnos/es presto-y muncho’l cursu.
2. Lo que más prestó foi:

  • Cenciellu y rápidu
  • La posibilidá de facelo desde casa sobretodo, muy cómodo. Y me gustó como está estructurado, muy fácil de seguir
  • Prestóme muncho la innovación de facer un cursu online n’asturianu, amás d’Ubuntu, que ye un S.O. col que puedes trabayar n’asturianu.
  • La plataforma paezme mui afayadiza pa trabayar con ella, y l’asturianu que gasta ye bien guapu. Paecióme mui bona idega’l meter videos qu’axudaran a entender los conteníos del cursu.
  • La iniciativa de facelu. Ha de valorase l’enfotu de la xente que sigue emplegando’l so tiempu na nuestra llingua. Felicidaes.
  • Bueno, pues todos los datos que deprendí, deprendo o deprenderé y lo fácil y a manu que ta too.
  • 3. Qué meyorar:

  • Más díes pa poder siguilo..
  • Para mi ta perfeuto
  • Esti cursu nun creyo que tenga muncha meyora que face-y. Lo qu’echo de menos ye facer más cursos d’esti tipu, n’asturianu. Prestaríame abondo facer dalgún otru, por exemplu, de llingua asturiana, ó d’Historia d’asturies, ó dalgo paecíu. Munches gracies pol cursu, ya a siguir así!!!
  • El cursu yera mui cenciellu, y polo tanto nun se podia facer muncho más, tengo ganas de dalgun cursu de más nivel pa poder aprovechar meyor la plataforma.
  • Home, si fora más completu… anque veo qu’atopastis un camín abondo granible y prestaríame qu’entamareis otros cursos.
  • Non sé mui bien en qué podreis meyorar el cursu, pero de toles maneres, taré al tantu d’ello…
  • Non sé mui bien en qué podreis meyorar el cursu, pero de toles maneres, taré al tantu d’ello…anque ya os comenté lo que teneis que tener en cuenta cuando se ufierta o se intenta facer la venta de cualisquier productu…(seya el que seya).

    Software malintencionáu anubríu nun curiapantalles pa baxar dende GNOME Look

    10 d'Avientu de 2009

    Como cuenten nesti filu de los foros d’Ubuntu, va dellos díes qu’apaeció en Gnome Look un supuestu curiapantalles pal escritoriu Gnome. El programa apaecía como un paquete .deb, que ye’l que usa l’instalador en sistemes Debian y deriváos (como Ubuntu), pa instalar nel sistema con permisu de superusuariu… y darréu instalábense dellos scripts que nun teníen que ver con un curiapantalles.

    Hai que lo dicir milenta vegáes: el software que vien nos repositorios oficiales d’Ubuntu da pa facer el 99% de les coses que-y pueden pruyir a cualquier usuariu. Enantes d’instalar un paquete .deb qu’atopes per ayuri hai que tar bien seguru de que:

    • De verdá lo necesites
    • Nun esiste nos repositorios oficiales
    • El sitiu onde lu descargues ye de fiar
    • El paquete mesmu ye de fiar (esto ye, cuánta xente lu tien instaláu; que problemes dió…)
    • Si pide permisos de superusuariu, doblar los cuidaos
    • Cuando lu tengas instaláu, comprueba si pasen “coses rares” nel funcionamientu normal del ordenador.

    Nesti casu, sicasí, l’efeutu nun fué seriu: el paquete yá se quitó del sitiu y desaniciar los scripts ye cosa de siguir les instrucciones del filu de los foros. Pero ye un avisu de que tenemos de tar sollertes coles coses que metemos nel ordenador y siguir los conseyos de seguridá básicos.

    Un llibru recursivu

    4 de Payares de 2009

    La comunidá del software llibre tién el vezu antiguu de pone-y nomes recursivos al software desendolcáu. Asina, GNU quier dicir GNU not Unix; pero hai munchos más exemplos d’esta triba de nomes humorísticos, como PHP, LAME o Wine.

    Nel casu del llibru The Art of Community, de Jono Bacon, la recursividá va un pasu más lloñe.

    Jono Bacon

    Jono Bacon

    L’autor, que ye l’encargáu de la Comunidá d’Ubuntu, esbilla nel llibru les claves pa construyir una bona comunidá, el distintu tratamientu que se-yos tién que dar a les distintes tribes de comunidáes, les claves pa facer una comunidá fuerte, les ferramientes afayadices pa que la información circule… o les maneres d’enfrentase a los problemes cuando estos apaecen.

    Otru puntu perinteresante ye la manera d’evitar el queme de les persones cabezaleres d’una comunidá: deteutar les primeres señales y cómo actuar cuando apaecen.

    Sicasí, lo más interesante del llibru ye que quier ser recursivu: ta escritu por una persona encargada d’una comunidá y estudia les comunidáes… pero ta fechu col envís de que la comunidá siga realimentando el llibru que, como diz el mesmu Jono, nun ye una obra finada. Pa ello The Art of Community véndese como un llibru cualquiera (en Amazon, por exemplu, de verdá paga la pena tener una copia pa consulta), pero O’Reilly tuvo d’acuerdu en qu’el llibru tuviera una llicencia Creative Commons que permite descargalu de baldre y contribuyir a meyoralu, por exemplu na web de la comunidá del llibru.

    Pola parte mala, de momentu ta namái que n’Inglés. Pero cualquiera sabe, tornar 300 y pico páxines ye un momentín si se fai en comunidá 😉 Y ye una erbía igual d’afayadiza pa construyir una comunidá de sofitu a un sistema operativu como pa lliberar de pilancos una comunidá de sofitu a una llingua.

    Güevu pintu mui asturianu…

    31 d'Ochobre de 2009

    Gufw, ye la ferramienta pa xestionar el tornafueos d’Ubuntu… pero sorpresa… si pones como regla la pallabra “asturianu” ¿qué ye lo que sal…?

    Ver el vídeu en Youtube

    ye lo que tien que’l desendolcador principal de Gufw seya asturianu…