新春快乐 – Feliz añu nuevu

24 de Xineru de 2012

Yá tamos nel añu 4710, y anque los chinos nun son a alcanzar a los asturianos nesta competición amistosa que gasten los equipos de traductores d’Ubuntu (val qu’ellos tienen de facer la versión tradicional y la simplificada… pero tienen unos pocos más de falantes… ;P) dende Ta pa Ponga felicitamos l’añu nuevu chinu a los asturianos de La China a los chinos d’Asturies y a tolos chinos y asturianos en xeneral (pa celebrar siempre dispuestos) con esta versión web d’Ubuntu del nuevu equipu de desendolcadores web d’Ubuntu.com cola que podemos entever como ven esi sistema tan políglota los vecinos que saluden con 您好 (pronuciáu algo así como “ni ḥao”).

Lo que NUN deberíes facer na to páxina web

14 d'Ochobre de 2009

Debemos mirar siempre a la nuestra web como visitantes. Yo odio que tando nuna web salte ensín yo provocalo una canción o ventanu emerxente, esto mesmo odíalo muncha xente, y considerase como un pésimu desendolcu/diseñu web ;) Al igual qu’esto hai munches más cosines, que nun cuesta muncho meyorales, y que permitirán tener tamién una web/blogue de calidá en conteníu y tamién en calidá en diseñu/desendolcu:

  • Nun camudes enxamás el tamañu de la ventana del restolador. Ye mui molesto. Tampoco cargues una páxina que llance otra a traviés d’un ventanu emerxente.
  • Lo principal ye’l conteníu,procura que la to web té llena de conteníu de calidá y qu’esti conteníu nun té dientro d’ imáxenes.
  • Nun uses testos animaos o imáxenes gif repetitives.
  • Si cites otru blogue o web, enllaza a la noticia orixinal.
  • Asegurate que ves  correutamente colos principales restoladores: Firefox, Chrome, IE, Opera, Safari, etc… (Nun cuntes a Internet Explorer 6 como restolador, ye la mayor morralla enxamás criada, que-y den).
  • Si la web caltien música o videos, nun deben aniciase automáticamente, nin que requieran que l’usuariu tenga na especial instalao, escaez Windows Media Player, Quick Time, etc…
  • Si’l rei d’una web ye’l conteníu, la restolación ye la princesina del llar. Pon precuru pa que los menús ten en testu (y non n’imaxe) y que se pueda llegar a cualisquier parte de la web a traviés d’estos menús.
  • Controla’l tiempu que tarda la web en cargase, a los usuarios nun-yos gusta esperar, polo tanto fae webs llixeres.
  • El flash ye un formatu zarráu, camienta muncho enantes d’embeber un videu de Youtube, el decodificador de flash d’Adobe provoca que restoladores en GNU/Linux pueden colingase cuando tienes varios videos nuna mesma web. Si la to web ta desendolcada en flash, seleiciona la carpeta onde té aloxada, calca’l botón Supr y entama una nueva. (El flash ye un cancer pa la web). Además Google indexaráte peor.
  • La web tien de ser pequeña, naide va lleete 50 post siguíos. Pon na portada X post, y que l’usuariu restole p’alantre y p’atrás.
  • Compreba que cada web valide colos estándares web en XHTML y CSS. Ganarás 2 coses: Lleeráse bien en tolos restoladores y Google indexaráte meyor.
  • Cuida los colores del testu/fondu, nun deben mancar la vista ;)
  • Si tienes un mal gustu en diseñu (como yo), usa plantilles llibres.
  • Cria conteníu orixinal, fusilar otros blogues nun aporta na al de to.
  • Debuxando a carboncillo deprendí que’l blancu ye más blancu si tien más negro alrodiu. Moralexa: Usa les imáxenes xustes y ten amenorgaes en tamañu, pa ocupar menos y cargar más rápido.

Dalgunes idegues dende: Josiah Cole, otres de la nuestra esperiencia.

Instalar JAVA pa la web

28 de Mayu de 2009

Abre una terminal: Menú Aplicaciones / Accesorios / Terminal
Y escribe esto:
sudo apt-get install sun-java6-fonts sun-java6-jre sun-java6-plugin
Pedirate la clave, y ta! Si nun furrula, preba a reaniciar.

Otra forma de facer lo mesmo de manera gráfica ye dira a “Sistema / Alministración / Xestor paquetes Synaptic”, guetar los paquetes:
sun-java6-fonts
sun-java6-jre
sun-java6-plugin

Ya instalalos ;)

MediaWiki 1.14 saldrá esti fin de selmana

21 de Febreru de 2009

Anque nun ye una noticia mui Ubuntera cuido que ye importante…

MediaWiki, el software col que trabaya Uiquipedia y el Wiki de Softastur, asoleyará esti fin de selmana la versión 1.14 segun cuenten na llista de corréu del equipu de localización.

Esta versión cuntará cola traducción completa n’asturianu.

MediaWiki ye una aplicación web mui eficaz pal trabayu n’andecha de dellos usuarios. La so fiabilidá ta más que contrastada gracies al usu intensivu que faen d’esti software los miles de voluntarios que trabayen na Uiquipedia.

El desendolcu ta cordináu y sofitáu pola propia fundación WikiMedia.

Web del Ministeriu d’Economía y Facienda refúgate si uses l’asturianu

2 de Xineru de 2009

Enterome por Atlantic Práu que la web oficial del Ministeriu d’Economía y Facienda español tranca l’accesu si’l restolador ta n’asturianu.

Investigando un poco, si camudamos la identificación que da’l restolador na so configuración na URL about:config a otra como como zh-TW (Chinu tradicional) o it-IT (Italianu) ¡furrula! entrando na web n’inglés.

Una vez entraos, arriba ponnos toles llingües oficiales d’España, onde podemos ver que debe tener una base de datos, na que si entra con FR entrará en francés, si entra con un ES esperará un identificador de les llingües oficiales n’España, y si non pondrá la web n’inglés por defeutu.

El problema ta en que parez que cuando tien un identificador de país ES, espera sólo un es, gl, ca o eu (español, gallegu, catalán, euskera respeutivamente).
Nel nuestru casu ye un ast, y en llugar de direicionar al inglés por nun reconocela, da un fallu:

dexándonos ensín poder entrar a la web, con un poco acertáu mensaxe de “Culture name ‘ast’ is not supported”, reiterando lo que toos sabemos… que’l gobiernín nun nos soporta xD

Ya ḥode que nun se pueda usar en dalgunes webs públiques restoladores que nun seyan IE, pero que nos den pol culo por usar una llingua non oficial nun restolador… ¡manda güevos!


Zarrar
Mandar Corréu Electrónicu