Ubuntu pa cristianos, musulmanes, budistes, xudíos… y satánicos

Bono, anguaño facer una distro d’Ubuntu ye tán cenciello que puedes facelo en media tarde. Namás se necesita tener unos fondos de pantalla guapos, escoyer unos iconos, una presentación, y hala! yá tienes la to propia distribución pa pasar a los tos collacios. Tantu ye asina, que hai “distros” pa toos. Descubro con gran sospresa una “distro” pa musulmanes. ( www.ubuntume.com ) La pantalla de login ye mui chula, la verdá:

Esta “distro” contién aplicaciones que t’indiquen el tiempu d’oración, una ferramienta d’estudiu del Corán, y una ferramienta de peñera de conteníos web, (que supongo que serán de carauter ofensivu pa la relixón musulmana.)

Pongo “distro”, entecominao, por dicir dalgo…….. porque pa mí, la discusión vien a la hora de decidir qué ye una distribución. La verdá ye que camudar colores y fondos d’escritoriu nun ye dalgo que mereza l’apelativu de “distribución”… Pa eso hai que dar sofitu téunicu, crear les tos propies aplicaciones, innovar, crear, remanar los drivers con repositorios propios, y non sólo maquillar un Ubuntu. Pero bono, la llibertá qu’ufre Ubuntu ye tala, que permítilo too, y el gustu ta na variedá 😉

Equí tenemos la “distro” versión Cristiana: ( http://ubuntuce.com/ )

… Feísima a más nun poder. Nun sé, pero a mí paezme que ganaba más con un fondu de Pelayo allanciándo-yos pedraes a los soldaos de Munuza, o con Templarios pel Desiertu, o con un fondu de pantalla d’una de les batalles escontra Al-Nāsir Salāh ad-Dīn Yūsuf ibn Ayyūb (tamién conocíu como Saladín… ). Pero bono, ellos sabrán.

Ensin dubies, visto lo visto, la que más me presta ye la “distro” SATÁNICA.. ñec, ñec, ñec, .. “Andái de día, que la nueche ye mía“:

… como reza nel so slogan, ye “Linux pa los malditos”.

Cáenme bien éstos. Tuvieron problemes con Canonical un tiempu por culpa del usu y merchandising que facíen col nome Ubuntu dende la so web, pero Jono Bacon, dixo que res de res, que sin problemes, que tiraren p’alantre. Nun m’estraña, tienen meyor gustu que’l restu, y cúrrense los dibuxos de la so “distro”, más que los demás:

¿eh? qué vos paez? Esta xente de xuru que trabayó faciendo los escenarios de MORDOR en “El Señor de los Aniellos” 😀

Definitivamente, voi probala. Esta ye la so Páxina oficial

…y paezme que voi facer una distro pa los qu’entá resistimos al españolismu. Esos sí que tienen güevos. 😉

Pel momentu Séi bonos.

NOTES:

* Esiste tamién una versión pa budistes, que tien ciertu desendolcu / agospiada en Launchpad. Enllaz: https://launchpad.net/buduntu Podéis vela funcionando, equí (merez la pena)

* Paez ser que pela rede circula tamién la “noticia” de que hai una distro pa xudíos. Yo nun sé si ye verdá, porque nun la probé (nun tengo tiempu nin ganes pa descargala) y porque paez que hai otra páxina que desdiz a la primera. La qu’afirma qu’esiste la versión pa xudíos, ye ésta http://www.jewbuntu.com/

Pero hai otra páxina que diz que ye too una engañifa, y que ye un  “what if”, que traduciríemos como: ¿y qué si…? La páxina en custión ye esta . Hala! probáisla si queréis y escribíslo nos comentarios.

* Hai otra “distro” con carauter Cristianu. Ye Ichthux http://www.ichthux.com/ pero nun se la diferencia cola otra… Bono, sí: Usa KDE  😀

7 comentarios al rodiu de “Ubuntu pa cristianos, musulmanes, budistes, xudíos… y satánicos”

  1. marquinos diz:

    Pa ser xustos taría bien que pusieres los enllaces pa baxar de cada versión 😉

    Y pa quien quiera xugar a ser Dios de la so cultura xD que prebe xugando con remastersys 😉 Ye perfácil 😛

    Un saludu.

  2. astur diz:

    Ehí vos pongo los enllaces.

    Voi facer una distro p’agnósticos. Col Big Bang de fondu de pantalla, y una ferramienta d’estudiu de les teoríes de Darwin. 😀

  3. Dangerous Piper diz:

    😯 yo flipo… pero lo de los inocentes yá pasó…

  4. Xuacu diz:

    Yo pídome la distro pa ateos, anticlericales y capacures. XD

    En serio, una bona distro sedría Ubuntusports, Ubuntu for olympic beings 🙂 Hai una bayura d’aplicaciones que podríen usase pa clubs, entrenadores, deportistes… y que son desconocies.

  5. astur diz:

    Tuvi camentando lo del apelativu de “distros”. La verdá ye que dicir que son distros, ye DICIR MUNCHO, y munches d’elles nun lleguen a l’altura.

    Como nun se lo merecen, voi llamales d’otru mou a partir d’agora. Son “versiones maqueaes” , “make-ups”, o “meikaps” 😀

    Y voi facer un meikap de viki el vikingo.

  6. Dangerous Piper diz:

    tuneu? PA CUANDO UBUNTU PORN!!!! XDD

  7. Dangerous Piper diz:

    aptitude install pornview
    No ye coña… hai software específicu pa ver porno…