Ximiélgame

Dende llueu, esti nun ye’l mensaxe que mos hubiera prestao escribir al quintu día de funcionamientu de Ximielgame.net, pero cuidamos que ye lo meyor.

Suponemos que los más perspicaces blogosferos asturianos vos decataríeis de la llamentable coincidencia de que dos proyeutos idénticos, casique coles mesmes funcionalidaes, asoleyáronse al empar el pasáu martes. Nós, cuidamos que nun ye lo meyor pa que un sitiu d’esti tipu tenga un bon nivel d’usu que convivan o compitan dos sitios pensaos pa una comunidá tan ruinuca como la nuestra.

A la hora d’entamar Ximiélgame nun mos movíen intereses económicos nin de ego, sinon el presto de desenvolver una ferramienta que, al nuesu entender, ye perguapa p’afitar les rellaciones ente los blogueros d’Asturies.

Per embargu, les coses nun salieron bien. El día (meyor dicho, la nueche, del llunes) na que tábemos faciendo los últimos axustes a Ximiélgame, probando enllaces y demás, mos enteramos de que otra xente tuvo la mesma idea (orixinales, cierto ye, nun somos). Al traviés d’un corréu, desplicaben qu’habíen atopáu el dominiu y mos ofrecíen ‘axuntar esfuercios’ pa desendolcar el proyeutu de forma conxunta. Al tiempu, nos informaben de que teníen rexistráu la direición esbilla.net, direición que, lóxicamente, visitamos. Per embargu, nun había un res, y al poco vimos qu’acababen d’instalar Pligg (la ferramienta cola que furrula tamién Ximiélgame) y al poco qu’entamaben la traducción del sistema del inglés al asturianu.

Nesi puntu, lo reconocemos, pecamos de ‘malpensaos’. Nun-y dimos credibilidá a la invitación a ‘axuntar esfuercios’ y entendimos que aquel enfotu en asoleyar un sitiu mínimamente operativu (se pue facer en poques hores) convertía l’ofrecimientu inicial en papel moyáu. Asina qu’adelantamos unes hores l’apertura de Ximiélgame.

Sicasí, al día siguiente punxímonos en contautu cola xente d’Esbilla pa tratar d’esclariar l’asuntu, cola idea de que comprenderíen qu’aquella situación nun tenía xacíu, que yera lóxico que nun aparáramos un proyeutu nel que llevábemos cerca de dos meses trabayando, y que de toles maneres bien podíen axuntase a nós cola alministración de Ximiélgame, al tiempu que nós collaboraríemos con ellos nel desendolcu d’otros proyeutos.

Pero nun pudo ser. La nuesa ‘premura’ nel asoleyamientu de Ximiélgame foi interpretada como una forma de desconfianza qu’existió (polo ya espuesto enriba), y que llamentamos fondamente.

Asina, y énte la perspectiva d’atopanos con dos proyeutos iguales, o mui asemeyaos, compitiendo nuna comunidá tan pequeña como la nuesa, pensamos que lo meyor ye dexar sitiu, asumir nuestru error, y pedir disculpes fonderes a la trentena d’usuarios que se rexistraron estos díes. Tamién queremos agradecer, y muncho, los mensaxes recibidos tres de l’apertura de Ximiélgame, y a toa esa xente que corrió a poner el so enllaz nel so blogue o na so web, y mui especialmente a Nireblog. A toos, vos encamentamos a facer lo propio con Esbilla.net, pa que haiga un sitiu de promoción de noticies n’asturianu que tenga un bon nivel d’usu, que sirva pa cohesionar a la comunidá, y que seya ún de los puntos de referencia del internet n’ast.

Ximiélgame.net siguirá funcionando entá unos díes. Depués, se procederá al so pieslle, qu’incluirá l’esborráu de tolos datos qu’apurrieron los usuarios nestos díes de funcionamientu, tales como nomatos, claves, direiciones IP y, por supuestu, señes de corréu electrónicu. Vémonos.

Esti artículu espublizose 'l 14 de Setiembre de 2007 a les 16:25 y ta guardáu en Ximiélgame.
Puedes tar al corriente de los comentarios d'esti artículu gracies al feed RSS 2.0. Los comentarios y los trackbacks tan zarraos.