Un sábadu al añu n’Asturies

Espublizáu'l 25 d'Avientu de 2018 por Llar -> 867 km na categoría Les mios caxigalines
Los comentarios tan zarraos en Un sábadu al añu n’Asturies

Ye sábadu y la cai del to barriu ta enllena xente. Ves a un par de compañeros del cole, qu’hai polo menos trés millones d’años que nun víes, faciendo cola nel supermercáu con cara de nun llevar tarxetina de puntos. Un café nel chigre -con lleche del tiempu y sacarina, ¿eh, nenu?- diz A., la rapaza d’El Franco. El Sporting xuega a les 13h. y l’Uviéu a les 16h. Ordenes la to vida pa esi día en función de lo que Tebas interpreta que ye meyor pal so negociu nel que’l fútbol ye namás una sida pa sacar perres.

A les 13h. hai cuatro o cinco cafés-llibrería -que tu sepas- nos qu’hai una sesión vermú con actuación en direuto. Vas a ún. Xaime Martínez presenta un discu llibru que se llama “Ósculos d’agua nel Imperiu Asturianu” y la estancia ta bastante enllena anque’l conciertu tea contraprogramando al equipu del pueblu. Ye’l discu del añu, anque saliere n’avientu. P. ta al to llau y tira de “Resultados Fútbol” cada poco pa ver cómo va’l so equipu porque la música ta mui bien pero nes coraes fierven los colores. Son les 15h. Decáteste de qu’agora a quien-y fierven ye a ti, porque tas na ciudá enemiga y el to equipu xuega en 60 minutos. Despídeste d’unos cuantos -cinco, seyes- colos que te tendría prestao quedar charrando tola tarde porque va tiempu que nun ves y porque viven fuera, como X. “Vémonos llueu, en conciertu”, diz. Marches pensando que les xeres a desendolcar van acumulándose.

Llegues al to llar futboleru. Al partíu vinieron munchos y munches que diba tiempu que nun atopabes ellí, como N. o E. Aporten cola cara ilusionada, como si fuere’l primer partíu del añu, anque seya’l caberu. Nótase que nun tán de ver el xuegu ramplón y que nun comparten la falta d’ilusión d’una parte de l’afición que tien pa sigo mesma que la temporada, tres ganar al eternu rival, yá escosó toles allegríes pa esti cursu. Presta hasta velos y veles, pola ilusión. Bon xuegu, un puntu, merecióse más. Ye lo de menos.

Al salir hai una mani. Son tiempos raros y toca defender la convivencia, les llibertaes básiques y defendese de los discursos del odiu y les fobies. Na marcha atopes a xente cola que diba muncho que nun falabes. Non, nun ye que tean descreyíes y descreyíos de les sos convicciones militantes. “Enteréme de qu’había esto y como llegué güei…Yá quedé coles amigues a esta hora pa venir toes xuntes” ye lo que te diz O. La marcha anima: visibilízase un discursu integrador, inclusivu y diversu metanes de la voráxine consumista. Pel camín, la mani crúzase con cargos públicos, responsables de les condiciones de vida materiales de les asturianes y asturianos, que van emburriando carros enllenos de comida de beneficencia pa los comedores que les sectes cristianes ponen como manera de paliar les consecuencies de les decisiones que los propios políticos qu’emburrien esos carros xeneren. Ye una situación kafkiana, como pa una espublización d’esa cuenta que ta nes redes col nome “Humans of Late Capitalism” que sorraya les contradicciones y absurdos d’un sistema socioeconómicu inxustu pa la inmensa mayoría de la población.

Son les 19.30h y hai qu’escoyer. N’Avilés hai una gala feminista-conciertu con Silvia Quesada, Marisa Valle Roso y Tania Pereira. N’Uviéu, l’auditoriu acueye un conciertu polos drechos humanos con Xuacu Amieva, Los Berrones, Muyeres y Tejedor. En Xixón, La Tarrancha aprovecha’l tirón d’estos díes –nun va ser l’únicu grupu que lo faiga- pa festexar 15 años d’andadura. Y llégate un mensaxe de M., otru emigráu qu’acaba llegar, y que si tomáis daqué nel Esper. Decídeste, por una cuestión de cercanía política y xeneracional, por dir a Xixón, anque les stories d’Instagram dexen nidio que delles de les tos amistaes fueron tamién a los otros eventos.

Hai quedada enantes, en Canteli. La sidrería ta enllena y atopes a xente que diba meses que nun víes, como a S., a S., a E. o a I. A estes altures del día, yá hai un nunsequé emocional qu’anda pasándote pela cabeza, ensin que-y deas mayor importancia pero que pasu ente pasu va ganando espaciu nel consciente. El conciertu, una fiesta. La sala, enllena. Y al finar, a Sesta, que tamién ta d’aniversariu y que ta tremao de xente pa la sesión post-conci con compañeres y compañeros charrando, chumando y baillando.

A la hora de marchar, cansáu, pal xergón, aquel nunsequé yá va tiempu que ye un doblepedal de hardcore. Nun hai dulda. La d’esti sábadu ye l’Asturies que nos robaron. La de la mocedá fuera. La de la ilusión y les idées anovadores qu’ufre siempre la xente más mozo. La de los seutores tradicionalmente más combativos qu’habríen valtar equí munches de les polítiques que nos conderguen al exiliu, a la diáspora y al malvivir.

Y, frente a esta Asturies, la que va votar en mayu. Yá sabéis: les conexones internacionales per aire y ALSA con Madrid, Barcelona, Londres, París o Berlín, tema d’estáu nel nuesu país. Anque seya namás pa tener a l’Asturies más dinámica a lo menos una selmana en casa.

Comentarios zarraos.