Orbaya güei na patria del llatifundiu y eso ye de sorrayar. Lleo con interés les nueves que lleguen dende’l mio país. Nesti mes y picu nun dexé nin un día d’echar una güeyada pa la prensa asturianista y tamién pa los medios (ham)burgueses -lleelos ye tan malo pal organismu como la comida rápido-.

Asturina encarnadaSicasí, esta vegada les ñubes traen escenarios alternativos posibles p’Asturies. Tando como tábemos resignaos a tener otra nueche electoral cenciellamente putapénica quiero pensar que nesti 2011 puede haber un reblincu que, a lo menos, seya quién a preparar l’abordaxe con más garantíes de los nuesos oxetivos.

Nun voi escondelo: el meyor escenariu que personalmente podría suañar sedría’l d’un proyeutu común de tola esquierda soberanista en camín de facese “esquierda nacional”. Falo d’una superación de les rocées y desconfiances mútues qu’incapaciten los debates abiertos “ensin intermediarios” y d’una vuelta a les cais y movilizaciones de base, mirando más pal trabayu factible a curtiu plazu qu’otra cosa.

Pero, ¿quién ye y qué quier esa esquierda soberanista?

De primeres, resulta cenciello poder facer un averamientu y siñalar a les organizaciones, esto ye, per orde alfabéticu: partíos (Andecha Astur, Bloque por Asturies y Unidá Nacionalista Asturiana), organizaciones sociales y de mocedá (Darréu, Fai!, Sofitu y UNA Mocedá) xunto con otres que, anque nun seyan polítiques, sí tán na órbita direuta del mesmu espaciu. A un/a llector/a aniciáu/ada tampoco-y habría que desplicar que les persones que comparten grosso modo esi discursu tán mayoritariamente al marxe d’eses organizaciones.

D’otra banda, nun ye fácil facer un analís absolutu de qué intereses persiguen eses organizaciones porque na inmensa mayoría de les ocasiones les formaciones y coleutivos refuguen el debate y estos apárquense pa facer coscasal noues más importantes o, cenciellamente, porque nun hai capacidá organizativa. Por ciertu, abúltame increyible, a estes altures, qu’un movimientín que tien capacidá pa facer bones actividaes a lo llargo l’añu per separtao nun seyamos quién a tener espacios físicos propios nos qu’expresar les nueses postures. Falo de centros sociales, falo d’un sitiu onde tener panfletos, periódicos, música, propaganda de toa triba, banderes, camisetes, pegatines, onde topar a xente que comparte’l mesmu nichu ideolóxicu, onde poder facer charres, onde fomentar l’entendimientu y la confrontación d’idées, al que convidar a cualesquier persona interesada na defensa activa del país…y nel qu’ún nun tea qu’andar de puntiyes por ser soberanista/nacionalista/independentista.

Tornando al matu, como oxetivu a curtiu plazu yo conformábame con que s’estrencharen les rellaciones ellectorales, que se ficieren actos conxuntos con respetu y nos que too tea apautao. Y cuando falo d’apautao falo de que naide faiga por llevar la voz puxante pa presentáse supuestamente como’l suxetu arrogante qu’arrenuncia a too pol bien común. Non, por favor, les coses clares y cada comunicáu que s’asoleye pa falar de les actividaes comunes que seya bien peñeráu en casa, intentando que nun dinamite’l conxuntu del procesu y evitando l’enésimu espolín nos foros de webs con 30 llectores diarios que calquen muncho efe cinco.

Reblagar penriba’l pasáu

asamblea xuntaFáise abegoso pensar na llealtá ente persones d’organizaciones con griesques intestines dempués de munchos años. Ye cierto. Históricamente tolos y toles que trabayamos dacuando nesti mundín punximos con más o menos recurrencia a cayer d’una burra les decisiones d’organizaciones propies o ayenes. Pero esti enguedeyu tien igua y toi convencíu d’ello: al traviés del debate puramente políticu, que ye’l que murniamente enxamás se da, somorguiáu en coses más relevantes como’l lema d’una movilización o con victories pírriques nos xulgaos dando y quitando carnés de militancia ente compañeros/es.

Sentáse, proponer un programa políticu de mínimos y de praxis reales (y cuando falo de reales nun digo moderaes, sinón tolo contrario, de decisiones d’aplicación inmediata) de gobiernu nel que toles organizaciones y persones de la esquierda soberanista tean(amos) razonablemente representaos/es y p’alantre. Sé daveres que nun ye tan difícil, pero dalgunos tamos fartucos de votar a organizaciones que, nel casu de qu’algamaren daqué responsabilidá de serviciu al pueblu, tendríen que replantegase mui seriamente per ónde tienen qu’entamar porque, de fecho, esi debate ideolóxicu nin existe, nin ye problemáticu cuando s’aborda de la manera afayadiza.

Los de l’acera, pa la carretera

Teniendo pa nós que’l xuegu parademocráticu ta a la nuesa escontra (pocos recursos económicos, silenciamientu y manipulación mediática) y que la esquierda soberanista aspira a daqué más qu’a ocupar les vieyes poltrones del réxime PP-FSA-IU pa caltener el statu quo, ye obligación del movimientu’l tar a pie de cai, defendiendo les Ensame República Asturiananueses demandes y dexándonos ver personal y coleutivamente en tolos temes. Al fin y al cabu, dende’l nacionalismu/soberanismu/independentismu d’esquierda nun podemos escaecer que lo que s’ha aportar ye una solución a los problemes que carez Asturies. Sofitar a los movimientos sociales (y falo de sofitar, non d’instrumentalizar o querer controlar) con honestidá ye un pegollu imprescindible. Nun arrenunciar enxamás, por munchu éxitu políticu que se pudiere llegar a tener, a tar con toes y caúna de les lluches de base ye obligatorio. Nun usar les cais tanto como sitiu onde vender una marca, custión secundaria ya indireuta, sinón como fervideru d’idées y de contautu direutu cola xente que tien una concencia yá formao p’amosa-yos que les sos demandes van ser defendíes como propies dende la esquierda soberanista y, al tiempu, p’arriquecer les nueses bases ideolóxiques.

Si nun somos a convencer a la xente que yá ta movilizao…¿cómo vamos acceder a potenciales simpatizantes del soberanismu d’esquierda que tean en posiciones muncho más pasives? Si dexamos de tar cola xente de la cai…¿d’au garramos el termómetru pa pulsar la sensación que na xente ta xenerando l’actividá política de la esquierda soberanista?

Eleiciones y candidatos

Xunta XeneralPor mor de la deficiente organización interna d’esti movimientu adolecemos d’una cierta mitificación del conceutu de “candidatu” que ye dafechu irrelevante n’espacios non tan llonxanos xeográfica ya ideolóxicamente. Lo importante d’un candidatu/a, (teniendo pa nós que les eleiciones son otru -que non l’únicu nin tampoco’l más importante- frente de llucha más), ye, lo primero, que quiera selo, y que seya quién a tresmitir, nel xacíu más averáu a les ciencies físiques del términu, los determinos internos y democráticos de la militancia.

¿Que si me paez bien Valledor? Bono, ye una entruga vacia de conteníu ensin nada detrás. ¿Cómo y con quién? ¿Pa qué? Si Valledor almitiere matase a defender un programa políticu y un marcu estratéxicu non sumisu no nacional y no social al réxime corruptu español n’Asturies entós podría llegar a ser un bon activu -nun sé si candidatu-, anque diba tener entá que lo trabayar muncho de manera esterna y pa los sectores más averaos. Nun ayuda la so desafortunada entrevista nun mediu asturianista y les sos percepciones sobre si Asturies ye o non “una nación”. Eso sí, lo que nun se debe  ye puxar por un candidatu encaxáu a emburriones y qu’obligue a modelar el discursu a la so figura. Ye dicir, una persona nun puede condicionar por munchu tirón mediáticu que tea un determín democráticu internu. Sedría la perversión del proyeutu y de la voluntá de la xente que da’l callu día a día y dexa les sos perres nello. Sicasí, Valledor aparte, esisten figures mediátiques bien conocíes fuera’l ghettu con un compromisu verificable que bien podíen desendolcar esi llabor que, por sigo mesmu, tampoco ye tan determinante si lo demás se fai bien.

Primeres encuestes, los mesmos errores

Anqu¿tornarán?e dende les últimes eleiciones nacionales yá se vien falando d’ello, topámonos a menos de mediu añu pa qu’entame la campaña electoral ya inda nun hai muncho en claro. Paez que les coses ente Bloque por Asturies y Unidá Nacionalista Asturiana van p’alantre ya intúise un ciertu parón na postura d’Andecha Astur. Sicasí, teo confianza en que la militancia d’Andecha, mui anovada y que yá vivió de recién esperiencies de movilizaciones unitaries trabayando en comuña con xente de la redolada ideolóxica, seya quién a axuntase al barcu. La so presencia non sólo ye importante pola capacidá organizativa y militante, sinon inda más pol bagaxe ideolóxicu históricu que puede llevar tres de sí.

Con too y con ello, como siempre les eleiciones gárrennos col pasu cambiáu. Demientres toi escribiendo estos camientos, El Comercio yá asoleyó ún de los primeros estudios de sondéu onde’l rexonalismu de derecha sal pero la esquierda soberanista nun apaez. Nun apaez, y d’eso toi convencíu, porque nun tien nin marca nin cares visibles entá. Y quien llega tarde a la folixa nun-y queda nin el postre.

En fin, esto ye too pel momentu. Habrá que siguir mui sollertes a los nomes y persones que van saliendo y a los posicionamientos d’estes organizaciones. Eso sí, nun hai tiempu que perder si lo que se pretende ye pegar un reblagu y da-y la vuelta al país. Entamar a buscar el sofitu ente organizaciones y persones d’esti mundín ye importantísimo, ensin despreciar nin una sola blima por feble que paeza. A lo cabero, un cestu mal fechu pierde la semiente bien ceo.

Un saludu al planeta dende 866.9 km ≈ 867 km del mio Llar.

  1. Moiso diz:

    Creo qu’entá ye mui ceo pa falar d’esa supuesta coalición AA-BA-UNA+Valledor y acólitos. Pela mio parte paezme que se parte d’un error yá repetíu, empezar la casa pel teyáu. Quiciabes había que pensar en xuntures fondes enantes de presentase xuntos a unes elecciones, onde corremos siempre’l riesgu de peganos pol candidatu. Valledor, yá de mano, dixo que nun tenía ninguna intención de ser el candidatu. Quiciabes facer un proyectu políticu común fuera de les elecciones yera positivu (y más allá de facer un Día d’Asturies en comuña)

    Per otra banda, nun toi mui d’alcuerdo contigo colo de qu’hai xente comprometío conocío fuera del “guetu”. Quiero dicir, xente comprometío y conocío fuera del “guetu” haila, pero ¿quién? ¿Hevia? Nun lo veo encabezando un proyectu políticu.

    Lo que dices de sofitar los movimientos sociales, toi d’alcuerdo contigo, pero nun podemos limitanos con sofitar l’asturianismu social, un vagu y pocu concretáu feminismu, un vagu y pocu concretáu ecoloxismu (del que nun somos capaces d’artiular un discursu que seya compatible cola necesidá inminente d’industrializar les ales d’Asturies) y un sindicalismu que nun somos tampocu a concretar y del que nun somos capaces d’articular el movimientu social asturianu.

    ¿Ye que soi pesimista por sistema? Pue ser, pero de primeres nun pueo sintir ilusión ante lo que s’avecina que me suena a yá conocíu.

    Un abrazu 🙂

    • llar867 diz:

      Dende qu’escribí esti artículu toi reculando un puquiñín. Les declaraciones de Valledor falando de que’l proyeutu diba ser abiertu hasta pa los Noemís y Jesuses Iglesias, pero creo que’l momentu d’axuntar esfuerzos nesti casu ta más próximu qu’enantes. Insisto na importancia de que tea Andecha Astur anque paez que ta la cosa fría como’l xelu.

      D’afuera’l guetu tenemos munchos, hom. Ambás guapamente, por cierto. Sedría’l nuesu Labordeta, meyoráu y depuráu, con puxu social a esgaya…:D

      Yes pesimista, pero eso tamién fai falta pa compensar colos que somos optimistes…

      Gracies por lleeme!

  2. Moiso diz:

    Home, nun toi del too seguru qu’Ambás seya de “fuera del guetu”. Por otru llau, yo estimo muncho’l trabayu que fai Ambás, pero a veces “nel guetu” sobredimensionamos el so puxu social. Que ye mayor que’l de la mayoría d’asturianistes, sí, pero nun ye tan grande como avezamos a pensar…

  3. […] recientesllar867 on La mio percepción de cómo dexé AsturiesMoiso on La mio percepción de cómo dexé Asturiesllar867 on La mio percepción de cómo dexé […]

  4. […] xuntura estratéxica de la esquierda soberanista, enriba la mesa. « Llar -> 867 km on La mio percepción de cómo dexé Asturiesllar867 on La mio percepción de cómo dexé AsturiesMoiso on La mio percepción de cómo dexé […]

*