Llegaron les eleiciones europées -unos comicios que solíen ser poco más qu’un trámite, un simulacru y un sondéu pa medir el pulsu de la población en clave de participación, interés y desafección de la xente cola política europea- y diéron-y un valtu a l’actualidá política asturiana y, sobremanera, estatal.

Les eleiciones europées más analizaes

Depués de que posaren los resultaos, y de que toles opciones y en tolos ámbetos se ficieren valoraciones y análisis, podríemos dir apuntando delles custiones que, dende discursos estatalistes, desgraciadamente poques vegaes se sienten.

En primer llugar, n’Asturies había más de 990.000 persones convocaes a les urnes, nuna población de poco más d’un millón d’habitantes, lo que rescampla la falta desoladora de xente mozo nel país. Una población avieyao, con una pirámide poblacional pates arriba que nos mata pasu ente pasu.
En segundu llugar, estes son les eleiciones con menos participación de la historia d’Asturies. Namás un 43% de la población s’averó a les urnes. Ye dicir, un 57% de les asturianes nun quixo nin mirar pa elles, asoleyando una falta d’interés total y custionando la representatividá del sistema parademocráticu. Ye curioso, nesti sen, cómo voces cuntaes tán falando d’estos datos que, nel estremu, llevaron a conceyos asturianos como Ibias, Ayande o Cangas a rexistrar una abstención escandalosa del 74,01%, 72, 73% y 72,14% respeutivamente. Nun asistimos esta vegada a una correición masiva de los datos porcentuales de los partíos sobre votu emitíu, traduciéndolos en porcentaxes de población total qu’apoyen a estes opciones y, chocantemente, esmucióse’l discursu del “nun nos representen” per arte de maxa.

En tercer llugar, sigue ganando’l Partido Popular de los retayos más brutales. N’Asturies, recupérase de la fractura con FAC y plánta-y cara a un PSOE que recibe una mocada en focicu mui importante de los sos votantes, llegando al empate téunicu col PP más feble de la historia nel nuesu país. Esi desgaste tremendu del PSOE ye tamién el d’una IU que llegaba a les eleiciones metanes d’un procesu vergoñosu de prevaricación en casa y ensin iguar los sos problemes internos que ve cómo, algamando una subida importante de votos, ye adelantada un proyeutu políticu, el de Podemos, fechu en cuatro meses nun auténticu sorpasso.

En cuartu llugar, queda demostrao que la prensa nun recibe’l nomatu de “Cuartu Poder” de casualidá. Va cuatro años vímoslo cola irrupción d’UPyD, partíu lleváu en volandes por La Nueva España a la Xunta Xeneral, xenerando noticies permanentemente, dando per sentao que diba entrar. Tampoco ye casualidá que los meyores resultaos de los últimos años nel nacionalismu asturianu d’izquierda se dieren cuando la coalición Compromisu tuvo per llei una cuota d’espaciu na prensa que yera de xusticia. La importancia d’apaecer en medios de comunicación  de mases nun tien preciu. Permite crear polos d’atracción política y de participación a toes lluces mui difíciles de crear en tan pocu tiempu.  Sigue siendo como p’analizar mui en serio la so relevancia, impautu y les razones pa que se xenerare’l maremotu Podemos. Tamién ye verdá qu’hai que saber aprovechalo, trabayalo y diseñar un programa que caltrie ente la xente. El méritu del equipu de Pablo Iglesias ye tremendu y apavoriante, nesi sen.

En quintu llugar, n’Asturies dióse la tormenta perfeuta pa que’l nuesu país fuere’l sitiu nel que Podemos algamare los meyores resultaos del estáu, con 51.000 votos. D’una banda, nun existen polos alternativos a IU específicos d’Asturies, a diferencia de lo que pasa n’Euskal Herria, Catalunya, Galiza o Aragón. Per otru llau, IU, que sube pol meru fechu d’existir y tar a la esquierda inmediata del PSOE, atópase desnortiada y debilitada colos escándalos de prevaricación y la falta de cohexón interna. Per último n’Asturies malgobierna’l PSOE, con una FSA que retaya como’l que más, que reprime y que dexa unos datos de paru, emigración y falta de derechos al más puru estilu PP, polo que nun hebo nenguna posibilidá de que los de Rubalcaba recoyeren n’Asturies nengún tipu de votu descontentu con Rajoy.

N’últimu llugar, el contestu internacional abulta complicadísimu, nuna Europa na qu’alita’l neonazismu como tamos viendo col casu más de recién en Francia. Nun ta de más comentar que n’Asturies UPyD, Ciudadanos y VOX sumen cásique 40.000 votos cásique ensin facer campaña y qu’amestándolos a los votos de FAC y PP n’Asturies la derechona llega a los 145.000 votos polos 100.000 aproximaos de Podemos, IU y otros cásique 100.000 de la FSA.

¿Y ú va la esquierda soberanista asturiana?

Nestes eleiciones hebo, como nun podía ser d’otra manera, trés postures estratéxiques distintes na redolada de la esquierda soberanista. Dende Andecha Astur participóse na coalición de Bildu y BNG qu’algamó un eurodiputáu pa Bruxeles, pero que n’Asturies quedó nuna cifra testimonial de menos de 1.400 votos que nun permiten nengún analís seriu en positivo. Per otru llau, Conceyu Abiertu optaba intelixentemente pola abstención, anque tampoco se fue quién a entamar nenguna campaña de descréitu de la UE como podía ser el casu, colo qu’estes eleiciones nun valieron pa ver nada nuevo nesi sen.

El casu de Compromisu ye más complexu. L’apueste por participar en Podemos foi un puntu y aparte na dinámica de la organización, lo que yá ye una novedá a destacar. Al marxe del éxitu históricu y ensin paliativos de Podemos nel estáu y n’Asturies ta’l ver qué pue algamar l’asturianismu d’esti procesu, ensin entrar n’otres valoraciones sobro los posicionamientos políticos, económicos o sociales de la formación de calter estatal no tocante a la Unión Europea.

En primer llugar, el partíu de Pablo Iglesias entamaba mal, torgando una correición territorial anunciada al entamu nel so procesu de primaries que, d’una banda, facía mui difícil la representación d’un país pequeñu -demográficamente falando- como ye Asturies nel conxuntu de votos nes primaries del estáu y que, quién sabe si de tenese correxío esos votos, podría tener dao con más d’un puestu pa les candidates asturianes nel “top-5” de la candidatura. Esti fechu, consideraciones al marxe del procesu de primares, resulta bastante grave poles implicaciones que tien cuando falamos de proyeutos d’obediencia nacional asturiana.

En segundu llugar, si bien ye verdá que’l trabayu de la militancia de Podemos en sitios como Uviéu, Xixón y Avilés foi perimportante y asina se ve reflexao nos resultaos, contrasta colos perbonos resultaos algamaos tamién en conceyos de la zona rural asturiana nos que nun hebo campaña tan activa de Podemos, colo qu’habría que suponer que’l votu vien determináu de manera importante al traviés de l’apaición de Pablo Iglesias na televisión estatal y les redes sociales xeneraes tres d’ello pol equipu de Podemos. Esti asuntu, xunto col protagonismu del mesmu candidatu, podría ser un bon pilancu a la hora de reasitiar un proyeutu propiu n’Asturies fechu al marxe de la figura omnipresente de Pablo Iglesias que plantegue custiones y un discursu propiu y afayáu a la realidá asturiana. ¿Qué va pasar si se plantega una llínia al marxe de lo que salga de los promotores de Madrid?, ¿cuála ye l’autonomía de los círculos de Podemos? o ¿la xente n’Asturies vota a Podemos Asturies o vota a esi mozu que diz les coses tan bien na tele? yeren entrugues que nos plantegábemos nel postreru artículu d’esti blogue y qu’inda nun paez que tean resueltos a un añu vista de que cientos de persones entren a ocupar cargos como conceyales y diputaes d’esti partíu. Tampoco ta entá decidida la posición al rodiu de la llingua asturiana, a pesar de qu’otres reivindicaciones tocantes a drechos humanos (feminismu, LGTB, antirracismu…) fueren asumíes “de mano” por Podemos. En cualquier casu, nesti sen, tampoco paez que se contemple -a pesar de que se faiga’l discutiniu pa unes coses sí y pa otres non- nengún escenariu nel que Podemos nun defenda la oficialidá de la llingua asturiana de manera arrenunciable, como, por cierto, dicta l’artículu 3 de la sacrosanta constitución española.

Tampoco s’atopa entá, por nun siguir más alló, un discursu qu’analice de mena distinta la existencia histórica d’España como proyeutu nacional. Despáchase la problemática cola defensa del derechu d’autodetermín de los pueblos -que nun ye poco, pero que supón namás un mínimu democráticu- dexando de llau un discursu qu’empodere a pueblos adormecíos como l’asturianu, apelando a sentencies del estilu “yo quiero más que Catalunya nun marche” ensin plantegar alternatives vidables al xacobinismu. Y ye que paez que’l federalismu español furrula en munchos casos como coartada pa salir del pasu cuando se ta falando del País Vascu o Catalunya, onde hai movimientos soberanistes afitaos, mientres qu’onde esi mesmu federalismu habría de crear concencia nacional, concencia de pueblu y de país -como n’Asturies- pa crear concencia con/federal quier más mimetizase y tener un silenciu cómpliz col centralismu “que da menos problemes”.

A Compromisu por Asturies quéda-y per esta vía un trabayu abegosu per delantre pa llevar el procesu a posiciones averaes a lo qu’entendemos por asturianismu, a la consideranza d’Asturies como marcu y suxetu políticu. Una vía, tamién lo hai que dicir, llexítima y que xunto a otres que vayan en paralelo tamién pue obtener resultaos granibles.

Pero hai vida más alló de les eleiciones

Anque les perspeutives no estrictamente eleutoral nun son buenes pa que trunfen propuestes específiques de la esquierda soberanista asturiana, n’otru sen sí van guañando cosines. Al calor de la okupación del CSOA La Madreña vivimos l’apaición d’un espaciu físicu de la esquierda soberanista asturiana como ye La Llegra: un espaciu compartíu poles organizaciones polítiques enantes aludíes xunto con otres como Darréu o la Xunta Estudiantil Asturiana -fechu esti históricu-, faciendo piñu y, polo variao de les actividaes y persones involucraes, paeciendo per una vegada un movimientu dinámicu, atractivu y abiertu a la sociedá de la capital del país.

Nesi llaboratoriu de la esquierda soberanista que resultó ser La Llegra dende’l so entamu non sólo queda nidio que ye posible la unidá d’aición ente les persones y les organizaciones de la esquierda nacionalista sinón qu’esta ye pernecesaria y granible. Como consecuencia d’esta esperiencia tamién s’entamaron dellos bloques soberanistes que resultaron un éxitu nel mes de mayu, cola manifestación del día de les trabayadores, el día les lletres y la de les Asamblées de Trabayadores en Llucha, y nel mes de xunu coles movilizaciones republicanes por mor de l’abdicación del Borbón dando una visión republicana asturiana alternativa énte la visión única y privativa del republicanismu de la que tanto s’adolez nel nuesu país.

Nun podemos dexar equí de facer el paralelismu col denomáu Procés de Vinaròs, tres del que la esquierda soberanista catalana, col handicap de tar nel momentu de mayor medría d’Esquerra Republicana de Catalunya allá pel añu 2002, dexaba a un llau les sos griesques internes y apostaba por un proyeutu nacional dende abaxo nel que les organizaciones de mocedá, sindicales, feministes, d’estudiantes, antirrepresives xunto coles organizaciones polítiques taben al serviciu del movimientu y non trabayando en compartimentos estancos. Nesta dinámica, el papel de los bloques soberanistes nes manifestaciones de la Diada y la existencia d’espacios físicos comunes de la EI (Casals, Ateneus…) como locales, llugares d’alcuentru y d’alderique foi determinante, igual que pudimos ver col casu de La Llegra.  El resultáu de lo algamao con esa dinámica a nivel de los PPCC ta a la vista y, conociéndolo, nun ha sorprender a naide la complexidá y efectividá de les redes d’auto-organización xeneraes tres más d’una década de confluencia.

Apostar por proyeutos nos que les eleiciones nun obsesionen nin distorsionen les dinámiques de la esquierda soberanista, avezada a volvese lloca énte la disyuntiva d’echar una papeleta nuna urna, podría ser una opción pa tener en cuenta; lo mesmo qu’afondar nel alderique internu y n’axuntar criterios qu’entamen pelo simbólico y lo estratéxico pa que se visibilice socialmente la existencia d’un espaciu políticu asturianu. Tampoco habría de dexar de llau una estratexa de comunicación y de medios afechisca.

Tamos nun momentu nel que, si lo dexamos pa prau, podemos ver, de facto, la primer discontinuidá existencial na esquierda soberanista o del nacionalismu n’Asturies tal y como lu entendíemos dende la metá de los años 70: como proyeutu autónomu qu’ha tener un sitiu propiu na política asturiana. Tamién ye cierto que per detrás vien una xeneración de xente nuevo que nun tien les zunes de los que yá vivieron toles batalles y que demanda anovar les formes, xenerosidá y apuestes decidíos. Dase’l casu de que concasa too ello con un momentu políticu y una sociedá n’efervescencia que puen recordar precisamente a la dómina de los años 70 na que se-y dió entamu a esti asturianismu que, con too y con ello, sigue siendo un movimientu bien mozu, comparáu con otros de la redolada, pero que tiénlo too entá por dicir.

Hai que ser quién a ello.

  1. […] Nuevos escenarios pa la esquierda soberanista tres de les eleiciones europées « Llar -> 86… en Eleiciones europées: una visión dende la óptica de la izquierda soberanista. […]

*