Llar -> 867 km

La existencia d’Asturies, como entidá política propia, ta güei más cercana a la so desapaición. El nuesu país, el que, como diz Faustino Zapico ”entraba pela puerta grande na era contemporánea” cola declaración de soberanía de la Xunta Xeneral el 25 de mayu de 1808 ve amenazada, otra vegada, la so integridá.

L’andanada mediática, con vocación de convertise en realidá o non, per parte del ministeriu de facienda del estáu español onde s’amenaza explícitamente cola “intervención” de la economía asturiana amparándose  nel contestu políticu ye un fechu gravísimu que, de concretase, sedría merecedor de ser consideráu como un güelpe d’estáu que nun vendría más qu’a demostrar lo feble y tramposo del modelu “autonómicu” español.

Esti movimientu, inéditu na historia recién tres de la “transición democrática”, nun ye casual. Dánse toles condiciones n’Asturies y fuera del nuesu país pa que’l xacobinismu ideolóxicu (y económicu) español dea’l pasu pa la suspensión del autogobiernu de cartón-piedra que nos vienen regalando dende’l primeru de xunu de 1979 la clas política embaxadora del gobiernu español n’Uviéu.

El contestu económicu y políticu européu, onde los estaos miembru nun faen otro que plegase y aplicar con gustu los mandaos de la maquinaria del capital, abre una puerte al tardofranquismu pa entrar a degüellu y anular les instituciones polítiques propies de les naciones que conformen anguaño l’estáu español, entamando pola que ta nuna situación más precaria: Asturies.

El nuestru país axunta toles carauterístiques precises pa ser un llaboratoriu de prebes bien afayadizu nel qu’abordar esa recentralización brutal del estáu. A la composición caótica de la Xunta Xeneral, tres de dos eleiciones nacionales nes que la única opción que sal reforciada y llexitimada ye la de l’abstención y, con ella, el desprestixu de l’aición política, hai qu’amestar la non presencia de partíos nin un movimientu social non sucursalistes pa con Madrid nin pa colos retayos de los nuesos derechos. Si, amás, la llave de la “gobernabilidá” -si puen llamar gobernabilidá a lo que vienen faciendo n’Asturies trés décades- ta en manes d’un partíu que tien como oxetivu final la devolución de toles competencies a Madrid y el desaniciu de los conceyos, la fórmula queda resuelta.

El silenciu cómpliz de la FSA, el brazu más nacionalista español y acomplexáu del PSOE, pa col estáu d’escepción políticu nel que quieren dexar a Asturies ye’l mesmu que’l que los de Rubalcaba prautiquen cuando nun cuestionen nin una migayina les agresiones que cada vienres exerce’l conseyu de ministros de Rajoy. A la fin, si tuvieren gobernando diben facer poco más que lo mesmo. Y ye que, dempués de trés décades de sumisión a Madrid y al neolliberalismu asesín, ¿qué vamos esperar d’ellos a estes altures?.

Capítulu aparte merez el partíu ultra “UPyD”, que tres del “replay” de les eleiciones entraba na Xunta Xeneral, una formación que diz surdir pa romper el bipartidismu y lo qu’insiste en proponer n’Asturies ye un gobiernu de concentración PP-PSOE, llogru que Rosa Díez, en boca del so muñecu de ventrilocuista Nacho Prendes, de xuru vendería como “gesta nacional” per tol imperiu hispánicu.

Desgraciadamente, Asturies, la xente asturiano, ta indefenso énte estos ataques, por muncho que la retórica del partíu de la mano derecha -en tolos sentíos- d’Aznar s’antroxe d’asturianu, una definición que concasa perbién cola definición que Nuberu roblaba pa, precisamente, dexar claro qué nun ye ser asturianu. Tampoco ufre nenguna alternativa la coalición de los que regalen los votos al PSOE pa, yá si eso dempués, discutir -nin siquiera lleguen a negociar- mínimamente’l programa a desendolcar.

Na nuesa nación ta cociéndose’l nuevu modelu d’estáu, nel que namás onde hai movimientos que planten cara a la homoxeinización política, cultural y económica del capitalismu d’estáu español van tar en condiciones de contestar y evitar. Somos el campu de maniobres de la reorganización de la “unidad de destino en lo universal” del reinu español y lo pior ye que muncha xente n’Asturies tovía aplaudirán esta galmiada p’atrás guiao pola desilusión endémica na que la política asturiana nos dexa tres de la llegada del “autonomismu”.
Hai que facer un llamáu a la sociedá asturiana pa entamar a organizar la insubmisión dafechu a los mercaos, al FMI y al BCE, a la dictadura del eurodólar y a la ruina económica que nos siguen imponiendo dende Madrid y Bruxeles col so imperialismu económicu y cultural. Hai que facelo bien aína y afuxendo del populismu vaciu de conteníu políticu. Dar una salida asturiana a la estafa del capitalismu.

Nel nuesu cuentu de “Pedro y el llobu” l’amenaza del llobu siempre foi verdá: lo único que camuda ye qu’agora tán muncho más cerca. Los precedentes tán ehí, el modelu de rempuesta históricu del pueblu asturianu tamién. A ver si somos a ponenos d’alcuerdo pa plantar cara.

Compártilu

Tinía que pasar enantes o dempués. Asturies, per primer vegada, enfréntase a una cita eleutoral propia compartida con Andalucía, precisamente, el país dende’l que s’escriben estes llínies. Como si fuéremos una nacionalidá “hestórica” de les que lo ponen per escrito. Nestos 6 meses dende les eleiciones últimes a la Xunta Xeneral vimos fracasar el “fenómenu Cascos” polos sos propios errores políticos y pol proceder xostrón pa xestionar eses mesmes decisiones.

Francisco Álvarez-Cascos I “el Breve” d’Asturies y Madrid

Si entendemos que les espeutatives qu’una parte importante de la xente que votó a Cascos taben puestes na anovación política nel nuesu país, na superación de los rexímenes corruptos y de crisis permanente que dexaron p’Asturies los sucesivos gobiernos del PSOE podemos dicir que nestos 6 meses el nuevu presidente asturianu echó per tierra toles sos posibilidaes. He de reconocer qu’anque munchos y munches sabíemos mui bien de qué partíu (y partíos) venía Cascos y les polítiques rancies neocón que diba aplicar nun dexa de chocar la so torpeza a la hora d’executales. Con esi proceder torpe, improvisáu, el llíder de FAC “sacó la motosierra” con tantu rixu qu’acabó mancándose con ella. Y ye que xugar col tronzón tamién ye un deporte de riesgu.

Básicamente, el llabor de FAC y Cascos consistió nestos meses n’enguedeyase n’Asturies coles patates calientes de la xestión pública neglixente de la FSA pa dexales inda peor de lo que taben, n’apoyar tolos retayos brutales nos derechos sociales de Rajoy en Madrid -reforma llaboral xabaz incluyida- y en nun facer cásique nada más que buscar polémiques innecesaries y un revanchismu infantil que nin supieron nin quixeron xestionar.

Mención aparte merecen, nesti sen, les polémiques cola RTPA, el “Centru Cultural Niemeyer” d’Avilés, el “Festival Internacional de Cine de Xixón” (FICXixón), la “Semana Negra” etc. nes que lo mesmo Cascos que los demás cargos políticos implicaos entraron neto qu’un elefante nuna cacharrería saliendo mui afeutaos poles sos decisiones caprichoses, antipopulares (paez mentira pa un populista como elli) y “carcas”.

Asina, no que cinca a la RTPA, en cuenta d’iguar la situación vergoñosa d’esternalización y precariedá de los y les trabayadores y la potenciación de productores públiques y d’un texíu audiovisual pal país que respete la cultura asturiana, desanicióla dafechu dexando na cai a centenares de persones que nenguna responsabilidá teníen nel diseñu nefastu de tele asturiana de PSOE-IU y que yá taben nuna situación escandalosa. No tocante al Niemeyer, improvisó permanentemente’l futuru d’un equipamientu, seguramente sobrevaloráu pola población d’Avilés y con una xestión del  réxime anterior de xulgáu de guardia, pero que cola so incompetencia convirtió nun arma a la so escontra en cuenta de tolo contrario. Cola maniobra del FICXixón xenera un problema onde paez ser que Xixón nin FAC lu teníen, cola actuación estelar del conceyal de cultura qu’arrastra pa consigo una griesca mediática na que la cultura asturiana sal chiscada y humildada. Asemeyao, anque nesti casu sí hai un conflictu que vien de llargo, tamién regala a la oposición el partíu de Cascos una baza col casu de la Selmana Negra.

Poro, tolos ámbitos culturales y sociales que precisaben d’una reformulación en clave muncho más social y munchísimo más asturiana y controlada, non sólo nun vamos velos meyor, sinon que, nel más bonu de los casos, van quedar como taben, camudando puestos de mandu, privatizándolos, desaniciándolos o folclorizándolos inda más.

No que cinca a la llingua asturiana el bagaxe ye ridículu, inexistente, escosu. Redúzse a un par de xestos del conseyeru Vallaure por falar en comparecencies n’asturianu y gallego-asturiano y yá ta. Nin plan de normalización (nin perres pa la promoción), nin avances toponímicos, nin cambiu na imaxe corporativa del gobiernu, nin defensa de los derechos llingüísticos per nenyuri. Un mocáu nel focicu d’esa parte mínima del asturianismu que s’echó en manes de FAC esperando avances nesti sen que nin se dieron, nin s’intentaron, nin se plantegaron. ¡Y mientres, en Madrid, pautando con UPyD pa da-yos un grupu parllamentariu! El probe Xovellanos revuélvese na so tumba.

PPSOEIU: a nun-y dar aire a FAC y, de pasu, a xugar puerco cola cultura ya identidá asturiana
Y entós, mientres FAC s’enllamuergaba colos equipamientos desastrosos heredaos del arecismu o con reñer como guaḥes con LNE, el PSOE, PP ya IU, entamaron a actuar como si fueren los mayoronos nel patiu la escuela al ver qu’otru entruga por sitiu pa xugar. Enfurrúñáronse y ficiéron-y la cama a un FAC que queda desarboláu dende’l primer momentu, ensin opciones, ensin presupuestos y con una capacidá de gobiernu tan llimitada como’l discursu populista y ranciu del so llíder que fuere militante daquella d’Alianza Popular.

Lo que más llama l’atención ye que la mayoría de los ataques a Cascos per parte, sobremanera, de la “izquierda plural del PSOE-IU” nun inciden na so condición de neocón privatizador y “lliberal” (de los malos). Ye chocante la campaña de los xestores del réxime anterior por confrontar con una supuesta vocación asturianista de FAC que como yá se dixo nesti artículu y como queda amosao colos sos “llogros”, nin hai nin se ve per nengún llau. Si la polémica del día yera’l Niemeyer, la “izquierda plural” arremetía escontra l’Arte Asturianu. El nuestru prerrománicu, espresión artística única nel mundu y esclusiva d’Asturies que ta nel más total abandonu como munchu del patrimoniu hestóricu, sobremanera si esti ye “diferencial”, yera asina emplegáu como sacu de boxéu. Si’l tema del momentu yera’l FICXixón la consigna yera’l facer de menos lo asturiano emplegando pa ello “la madreña, la boina y la montera picona” como supuestos complementos “chic” de la tribu urbana de los FACkers. ¿Ye la posibilidá de qu’heba un asturianismu real na Xunta Xeneral de lo que tantu mieu tienen PSOE-IU y PP? ¿Pa eso solfaten el protorrexonalismu casposu de FAC? ¿Pa que nun surda y xorrezca un asturianismu o nacionalismu asturianu nel futuru?.

L’asturianismu, nacionalismu o soberanismu, quedaba asina ente la espada y la paré: cola necesidá de criticar mui duramente’l malgobiernu de FAC pero ensin cayer nel antiasturianismu radical del que PSOE-IU y PP ficieron gala p’atacar a Cascos. Dábase un escenariu desconocíu, nuevu, nel que nun se podía tar de nenguna manera con FAC nin tampoco colos cosmopaletos que llamaben “aldeanos” a FAC poles sos polítiques, too ello ensin un movimientu con autonomía política plena pa desendolcar les sos propies movilizaciones más alló de les llingüístiques. Y nesti tarrén enllamuergáu hébolos que nun fueron quién a caltener esa equidistancia ideolóxica necesaria na crítica, averándose peligrosamente al discursu FAC o faciendo’l caldu gordo a la “izquierda plural” a costa de la dignidá de la nuesa cultura, hestoria y llingua. Eso sí, tamién hai que dicir qu’afortunadamente, artículos como los de Faustino Zapico o Pablo Rodríguez Alonso dexaben mui a les clares cuálu yera’l puntu de vista necesariu dende esta redolada ideolóxica del nacionalismu d’esquierda asturianu. Y menos mal.

La coordinación del nacionalismu asturianu, cada vegada más necesaria pero tamién cada vegada más cerca

“Cuenta la lleenda qu’hebo una vegada unes eleiciones que vinieron bien al nacionalismu asturianu”. Gracies aparte, lo cierto ye qu’onde otres ideoloxíes y movimientos ven otru frente de llucha más, nel que se reivindicar y col qu’avanzar, al asturianismu siempre lu garren col pasu cambiáu. Nun valen les escuses, estes son unes eleiciones qu’entraben dientro de los escenarios posibles y probables dempués del resultáu que dexó a FAC como partíu parllamentariu con más escaños pero ensin mayoría absoluta. Sabíemoslo.

Anque suene ventaxista’l facelo agora, l’actividá del nacionalismu / asturianismu / soberanismu d’esquierda asturianu lleva n’estáu d’hibernación, sacante nel conceyu de Noreña, dende les últimes eleiciones. Y asina nun vamos a nenyuri. Nun ye normal, nin presentable, nin aceptable qu’ente comiciu y comiciu nun se caltenga un trabayu de cara a la sociedá qu’asegure unos meyores resultaos nes próximes cites y años, porque’l trabayu d’avance internu ye necesariu y básicu, pero ensin movese de puertes p’afuera nun hai futuru nengún.

A la fin, nesta cita, tenemos dos candidatures otra vegada bien asemeyaes na ideoloxía de les sos militancies y del so eleutoráu. Nel mes de febreru, tres de la convocatoria d’eleiciones pal 25 de marzu, un grupu de persones vinculaes al nacionalismu y asturianismu cultural y políticu asoleyó una carta abierta al asturianismu, nacionalismu, movimientos sociales y a tola sociedá asturiana.  Nesta carta apaecía xente, ente otros, visiblemente vinculao anguaño y antaño a organizaciones como Unidá Nacionalista Asturiana, Izquierda Asturiana y a Andecha Astur, asina como persones d’altor simbólicu pa nós como Ambás y Xune Elipe. Nel manifiestu afalábase a la construcción d’una coalición eleutoral d’urxencia ente Bloque por Asturies, UNA y Andecha Astur. Estos movimientos, xunto a otros más en clave interna, paecíen abrir más que nunca les posibilidaes pa una candidatura conxunta que munchos afalábemos, afalamos y vamos siguir afalando y alendando.

Ye mui significativo qu’esta vegada, un llamáu del calter d’esti, nun seya unidireicional o venga patrocináu namás por una de les families del nacionalismu asturianu. Anque a la fin nun s’algamare una coalición, paez que cada vegada ta más claro que la presión esterna ya interna de militantes y simpatizantes ha de finar por poné-y igua a esta situación inmovilista y llaceriosa.

Nun ye normal nin xustificable qu’en cada procesu en favor de la unidá heba un piñu de militantes qu’énte la desilusión abandonen la so militancia activa. Nun ye razonable que nesti momentu, nel que nun se presenta’l PAS, por exemplu, y nel qu’hai abiertos procesos de xuntura, la militancia del nacionalismu asturianu seya sensiblemente más baxa y menos visible socialmente que cuando les organizaciones taben un poco más atomizaes. Si’l procesu de converxencia ensin plizcu d’autocrítica o reflexón que tamos viendo y viviendo casi yá na última década ta mandando a más xente p’afuera de les organizaciones que pa dientro dalgo tamos faciendo mal. Si la suma de votos y militantes, per separtao y dempués de delles xuntures parciales, nun fai más visible’l nacionalismu d’esquierda asturianu ye que dalgo tamos faciendo, insisto, mal.

A munchos y munches danos yá igual de qué candidatu o qué candidata hemos d’apegar cartelos, falar bien y repartir panfletos. Namás demandamos un marcu, un espaciu abiertu, nel que trabayar, conocenos, aldericar, charrar, collaborar, coordinanos, discutir. Esborriar del nuestru vocabulariu políticu conceutos como’l de “talibanes” o “vendíos”. Reconocer a toles partes, da-yos capacidá d’espresase, de participar- A les puertes d’un nuevu sapiazu eleutoral hai que facer un últimu llamáu a files pa caltener la dignidá mesmo güei que na nueche del 25 de marzu. Nun necesitamos otru domingu eleutoral d’autoflaxelación pa siguir faciendo lo mesmo los meses vinientes.

D’otra banda, hai esperanza. Hai una xeneración, la más moza del nacionalismu d’esquierda, que sí, quiciabes tea más inactivo que n’otres dómines, pero ta más comunicao qu’enantes; que yá nun precisa pa saber de los d’al llau de sentir batalles que vienen de vieyo. Xente que nun conoció como militante los momentos de más griesca nos últimos años; que tamién se sofita nel bagaxe políticu que-yos dexen los que tuvieron y siguen tando. Rapazos y rapaces que xunto a la xente que vien calteniendo’l pesu de les organizaciones na última década tien muncho que dicir.

Teo collacios y collacies y xente a la qu’almiro personal y políticamente en Compromisu (Bloque-UNA-LV/GV) y Andecha Astur. Los/es primeros/es preséntense col envís de caltener los mesmos votos que nes últimes, lo que-yos permita siguir alantre cola dinámica interna, dando por sentao, na mio opinión enquivocadamente, que yá tienen ganáu’l votu del asturianismu más convencíu y apostando por garrar votos acuyá’l nacionalismu. Inclúin nesta ocasión a un partíu-franquicia como colchón p’amarrar al máximu anque esti fechu faiga rescamplar inda más l’ausencia d’alcuerdu con Andecha Astur. Estos, precisamente, preséntense buscando un votu muncho más ideoloxizáu y cercanu que-yos permita siguir cuntando como interllocutor a partir del 25 de marzu, eso sí, emplegando d’una manera poco entendible’l manifiestu pola coalición unitaria del que falábemos enantes como argumentu pa facelo. ¿Nun sedría meyor nun se tener presentao y siguir defendiéndolu como fueya de ruta?

Agora bien, a Andecha Astur hai que-y pidir que’l 26 de marzu tea la mesma xenerosidá, como poco, qu’en febreru cuando soscribió aquella carta abierta pola unidá. Cualesquier pasu atrás nun ye almisible nesti momentu y debilitaría la so posición dafechu. La militancia d’Andecha, anque quedare desilusionao como tantos y tantes otros y otres pola non apaición d’una coalición, nun puede enrocase enxamás.

Al Bloque por Asturies y a Unidá Nacionalista Asturiana hai que-yos demandar flexibilidá pa tar al altor. Nun val escondese tres d’un procesu internu-matrioska que se diz tan aparatosu como pa impedir la unidá del nacionalismu asturianu d’esquierda nuna situación d’urxencia con unes eleiciones como estes delantre. Han de reconocer ensin reserves la existencia d’una organización que se llama Andecha Astur qu’anque tamién se tien enquivocao, como otros ficimos munches vegaes, ta ehí, y ta formada por xente que puede aportar muncho si lo fai en comuña.

A la xente independiente, a los y les que colaron pero siguen sollertes a l’actualidá política d’Asturies y del asturianismu, hai que nos ufrir un espaciu nel que participar y desixinos que deamos un pasu alantre pa ponenos tres y al serviciu de les organizaciones polítiques. Nun val de nada’l tar glayando en castañéu si dempués, cuando se dan movimientos d’avance mínimos, nun respondemos en positivo, sofitando económica y militantemente lo que se fai bien, que ye muncho anque siempre aneciemos más nes crítiques que nos aplausos.

Con esti panorama, la bola extra que nos regala la non aprobación de los presupuestos de Cascos, con tola prensa del estáu mirando p’Asturies, con eleiciones namás a la Xunta Xeneral dexando a un llau los conceyos -esi puntu feble del nacionalismu asturianu-, ta perdida enantes de que soltemos el disparador y entame’l xuegu del pinball. Eso sí, la xuntura esta vegada nun cayó por bien poco. Que les persones que tean por ella sigan trabayándola dientro de les organizaciones y fuera d’elles. Y que, por fin, del 25 de marzu p’alló, entamemos a falar menos de xuntances y más de programes, d’estratexa, d’entregar el timón del movimientu a los y les militantes del nacionalismu d’esquierda ¡y a da-y otra traza a Asturies!

Compártilu

Dempués d’una bona tirada de meses ensin anovar esti blogue -pero non por ello ensin dexar d’aldericar con muncha xente en persona y, sobremanera, al traviés de redes sociales y microblogging- vamos echar una güeyada, dende una óptica d’esquierda soberanista, al panorama que se presenta n’Asturies y redolada ideolóxica y xeográfica énte les eleiciones estatales del 20 de payares.

Esta ye la so “democracia”

Nos últimos años, y especialmente dende que nel añu 2008 españare -tamién- nos países del primer mundu una crisis económica que llevaba décades afogando a los más probes del planeta, venimos viendo cómo cada vegada hai más sectores de la población que se decaten de los déficits democráticos que carecemos viviendo nuna dictadura del capital, na que les instituciones pretendidamente democrátiques non sólo nun lo son sinon que siguen  cada vegada más -y cada vegada más evidentemente- secuestraes polos mercaos, grandes empreses tresnacionales y la banca internacional. Asina, los estaos y los sos gobiernos turnistes, vienen garantizando’l caltenimientu del statu quo que beneficia a unos pocos, al poder económicu, al traviés de la puesta en práutica de métodos d’escluxón participativa del pueblu no cincante a la toma de decisiones, de lo cual son exemplu perfeutu unes eleiciones como les del 20 de payares, nes que yá ta too vendío y empaquetao.

Nesti estáu nel qu’inda naide refrendó la monarquía, nel que les eleiciones pasen por ser un llaváu de cara de la parademocracia regalada y nel que la participación redúzse a introducir una papeleta nuna caxa tresparente cada X años, tampoco podemos enfotanos. Unes eleiciones nes qu’unos xueguen coles cartes marcaes (prensa, publicidá, medios, inyeiciones económiques de grupos empresariales, usu partidista de les alministraciones…) déxennos nes manes del bipartidismu más cruel y sangrín, que nun dulda en facer piñu si siente amenazáu’l so chiringu. Concretamente, esta vegada nun podemos dexar de llau que nestes eleiciones y per primer vegada, fízose obligatoria la presentación d’avales (un 0.1% de los censaos/es) pa poder tener derechu a participar nunos comicios, lo que supón un retrocesu democráticu evidente pa les opciones non mayoritaries que foi una torga pa la participación de delles opciones polítiques que quedaron arrequexaes, lo que supón un avisu mui seriu nesta dómina na que nos tocó vivir y lluchar: “a los que molesten, pilancos”.

8 escaños ¿asturianos?

Respírase nel aire políticu asturianu un golor a revenío que tien nomes y apellíos. Les llistes de los partíos con representación na Xunta Xeneral arrecienden a vieyo. Nomes como Antonio Trevín, Vicente Álvarez Areces, Isidro Rozada, Cherines, Carcedo, Morán, Ovidio Sánchez o’l mesmu Gaspar Llamazares, toos ellos nos cartelos eleutorales xunto a la bisarma d’Álvarez Cascos, espeyen mui bien qué ye Asturies pa ellos: poco más qu’un caladeru de votos ensin qu’heba siquiera una mínima voluntá de representar los intereses d’esti país de manera autónoma o non dependiente de lo que-yos dicten nes sos sedes dende la capital del reinu. Esos nomes, que podríen tar guapamente nel hall of fame (lléase n’inglés o n’asturianu)  de los responsables políticos de la situación na que ta Asturies dende l’entamu del postfranquismu, son l’apueste de los partíos mayoritarios n’Asturies. Los mesmos perros col mesmu collar, que si cuadra, voten escontra los sos propios intereses n’Asturies porque lo manda l’aparatu.

Nesti sen, nes eleiciones de la vergoñosa efemérides, vamos topanos cola mareona neolliberal de la gavilueta de la que’l mayor responsable ye’l PSOE y les sos polítiques neocón. Nel estáu español, nun momentu tan complicáu pa la sobrevivencia física de munches persones, vamos pasar de tener un gobiernu de la derecha neolliberal gobernáu por Rodríguez Zapatero a un gobiernu de la extrema derecha más católica y fascista sofitáu por millones de votos de la clas trabayadora, desemplegada y precaria. Van ser tiempos de retayos, de privatizaciones pero tamién de movilizaciones y de llamaos a reorganizar les files de la esquierda real n’Asturies. Al tiempu, los medios de comunicación afines al PSOE tornarán a facer d’altavoz pa les movilizaciones que facíen por acallar demientres el gobiernu de ZP y esta coxuntura, xunto cola propia dinámica del movimientu 15M, van retrotraenos a una dómina asemeyada a la de la segunda llexislatura del Aznaratu na que va ser perinteresante participar y facer por ganar llexitimidá ente la población.

La esquierda soberanista/nacionalista/asturianista: incapaz de coordinase

Per otru llau, si’l contestu llegal que nos apurre la llegalidá constitucional monárquica española yá yera llaceriosu, nesta ocasión, na mio opinión, dánse desgraciadamente dellos condicionantes que faen fondamente previsibles y desmotivantes pal conxuntu del asturianismu políticu y cultural estes eleiciones, al tar precisamente la esquierda nacionalista/soberanista/asturianista probablemente nel momentu de mayor crisis d’idées, proyeutos y militancia activo que se viere dende’l so aniciu embrionariu de los setenta p’acó.

D’una banda, acoyíemos con interés una serie d’artículos asoleyaos en setiembre en dos medios dixitales asturianistes de Mariu Arbesú (Andecha Astur, candidatu por Conceyu Abiertu) y Rafa Palacios (Bloque por Asturies, candidatu de Bloque-UNA Compromisu por Asturies),  onde s’afalaba a la constitución d’una mesa de negociación y a la unidá, respeutivamente, pa facer frente común nestes eleiciones del 20P. Dambes intenciones quedaron pa prau y, primero, UNA y dempués el Bloque por Asturies anunciaben que nun se diben presentar. Conceyu Abiertu, la plataforma impulsada dende los seutores más averaos a Andecha Astur pa trabayar a nivel de conceyos -a pesar de presentase a la Xunta Xeneral- tampoco lo diba facer. Un PAS que quedó práuticamente fundíu tres del últimu revés eleutoral, nin siquiera facía l’amagu y, de dalguna manera, dellos vimos nesta situación un momentu perafayadizu pa que se ficiere un altu na dinámica de les organizaciones d’esti ámbetu, que dende 2003 siguen la llei de poner el carru delantre los gües. Una pausa pa reflexonar, ver ónde tamos y qué queremos, con quién cuntamos y qué plazos y espeutatives vamos xenerar. Un bon momentu pa entamar una reconstrucción de la esquierda nacional con pegoyos fuertes, como se taba faciendo n’otros países cercanos xeográficamente pero que, tamién ye verdá, tán a años lluz de la nuesa dinámica inda embrionaria.

Asina, los que naguábemos por que per una vegada se garrare una de les dos opciones bones (o presentáse toos xuntos o, toos xuntos, nun se presentar y entamar a trabayar mesmamente na propia campaña eleutoral nesa unidá d’aición tan cacarexada en toles families d’esti movimimientu) víemos como s’abría pa la segunda d’elles, de xuru la más fácil acordies cola situación d’incomunicación y desarticulación de la esquierda soberanista, una rayadina de sol qu’a más d’ún ilusionó delles hores.

Ensin embargo, díes dempués Andecha Astur, nun movimientu que por mor de la situación llegal na que s’atopaba la siegla munchos nun esperábemos, fai anuncia de que se presenta a les eleiciones y asina lo desplica’l propiu Mariu Arbesú n’otru artículu na prensa dixital n’asturianu con Arturu Xosé Bermeyu como candidatu al Congresu. Dexando claro enantes de nada’l derechu innegable (por nun falar “d’obligación”) de cualisquier partíu a acudir a unes eleiciones y tamién, por qué nun dicilo, deseá-y lo meyor a la candidatura, paecía evidente qu’esi escenariu imaxináu nel qu’entamar a trabayar en comuña esmucíase per momentos. Como reaición, apaecía un artículu de Roberto Holgado (anguaño na UNA) espresándose en nome d’un grupu de militantes que taben n’Andecha Astur demientres les negociaciones con IAS que finaron col proyeutu d’Unidá y UNA falando d’esi mesmu conflictu poles siegles y, de dalguna manera, apagando fueos con gasolina.

Una vegada más, una de les mancadures más traumátiques que venía careciendo la esquierda nacionalista/soberanista/ asturianista non sólo nun cicatrizaba sinon que la pantasma del desalcuentru paez que puede finar por cortar les poques pontes que quedaben perende y dientro d’un movimientu tan precariu. Andecha Astur, a la fin, va tar presente nestes eleiciones nes que, na mio opinión, nun tocaba tanto’l gatuñar esos votos patriotes y concenciaos que van llega-yos dende Asturies y mui especialmente dende los que tamos lloñe d’Asturies, sinon facer por iguar con tola xenerosidá del mundu los nuesos problemes internos pa presentanos con muncha más seriedá énte la sociedá asturiana nun futuru próximu.

D’equí p’alantre: reconocer el problema, apautar unos calces pa igualu y trabayar pola unidá popular

Como dicíemos enantes, estes eleiciones van dexar un panorama desolador pal nuestru país, pal conxuntu de los trabayadores, cola mayoría absoluta del PP tres d’una xestión llaceriosa del PSOE en materia económica y social, resultante d’entregar a les grandes corporaciones empresariales les instituciones como si esten fueren poca cosa más que xuguetes nes manes del capitalismu.

D’otra banda, ye chocante’l cómo una parte del asturianismu cultural, pequeña pero representativa, pudo cayer nel xuegu macabru d’Álvarez Cascos y el so “Más Asturias, mejor España” (qu’en Madrid ye “Más Foro, mejor España” pa frenar “a los nacionalismos y reforzar a España” y que tuvo a piques de ser de la mano de la mesmísima María San Gil). Quiciabes tengamos que pensar nes propies dinámiques de fracasu tres deceición d’esto que llamamos esquierda nacionalista/soberanista/asturianista y nesi enclín psicolóxicu -cuasi psiquiátricu- que desplique la necesidá de xubir al carru d’un proyeutu que diba garrar poder, cayendo otra vuelta na nuesa dependencia endémica d’un énte superior nel que ser el “lobby asturianista qu’influya dende dientro” en cuenta de construyir les nueses propies estructures polítiques autónomes.

Nesta situación tan prieta, cada vegada se fai más urxente l’ufrir un espaciu d’alcuentru unitariu pa la esquierda soberanista asturiana. Un espaciu que nun ponga más rixu que’l necesariu pal propiu alcuentru, alderique, contraposición de postures y conocencia de toles opiniones y persones. Un llugar nel que se pueda dar la voz al/la militante y al/la simpatizante ensin más consignes que’l topar puntos d’alcuentru ente les estremaes espresiones pa ver qué posibilidaes y qué torgues hai pa desendolcar un trabayu políticu conxuntu. Un sitiu, a la fin, pa debatir y afitar unos pegoyos ideolóxicos comunes, un marcu nacional afayadizu y unos símbolos básicos apautaos que nos faigan paecer como dalgo organizao al tiempu que plural nun plazu mediu énte la sociedá asturiana. Dalgo que nun se fai dende hai décades y que valdría pa saber a qué tamos xugando. El problema, como cásique siempre, ye’l topar quién o quiénes tengan llexitimidá y credibilidá interna dientro de la esquierda soberanista pa plantegar un espaciu como esti ensin que sía otru esperimentu fracasáu enantes de nacer.

Nun quiero tampoco dexar de llau la importancia que tien pa les lluches nacionales nel contestu estatal la fin de la violencia d’ETA.  Per una parte, y anque yá toparán otres escuses, paez qu’habría finar el tiempu de la criminalización a toos y caún de los movimientos y persones que reclamen un marcu pa que los pueblos s’espresen en llibertá. Esa criminalización carecida dende la década de los 70 pa engochar a cualquier coleutivu social, llingüísticu, políticu que custionare la soberanía española queda ensin argumentos p’aneciar neses postures. Pasín ente pasu presta ver tamién cómo n’otros sitios el bon facer y el diálogu ente mesmos actores del movimientu pudo xenerar esta situación de fuercia na qu’agora s’atopen. Ehí hai muncho de lo que deprender.

Pa finar, paezme que ye’l momentu de que la xente más mozo y que vien con puxu garre posiciones y responsabilidá, y xunto colos seutores más implicaos y maduros d’esti movimientu qu’entá tienen muncho qu’aportar, faigan por da-y otra traza a Asturies. Ensin priesa pero con ambición y pasu ente pasu. Si lo facemos bien, si emplegamos una pedagoxía política afayadiza, si espardemos la idea texendo redes dende abaxo con coherencia, de xuru que vamos consiguir la implicación de muncha más xente y, pali que pali, afitanos como una referencia alternativa n’Asturies. ¡Falta fai!

Compártilu

Llegaron les eleiciones, llegaron ensin sorpreses -polo menos pa esti qu’escribe-, y una ventolera ximielgó la política asturiana. Llamentablemente, -anque taba anunciao- esi airón nun vien emburriáu pol contraste barométricu na presión de la esquierda soberanista. Entama agora un escenariu inéditu na política asturiana cola irrupción de nuevos axentes políticos de vieya trayeutoria partidista que vamos dir peñerando pasu ente pasu:

Cascos o l’asaltu al tren del dineru

Anque a una parte mayoritaria de la sociedá-y choque muncho la irrupción de FAC como primer fuercia parllamentaria, dende la configuración del proyeutu “nuevu” de Cascos y viendo les alternatives, taba bien claro qu’a poco que trabayare intelixentemente la posibilidá de dominar la política asturiana taba al algame de les sos manes. Y vaya si lo fizo.

Francisco Álvarez Cascos, antaño conocíu como’l Dóberman d’Ánsar, supo enfocar tola so campaña énte l’eleutoráu asturianu a custiones de tipu emocional que trescalaren na xente. Exemplu d’esto ye l’emplegu d’una imaxe onde la dicotomía “paisanu” y “xestor” foron una constante, remanando mui hábilmente un idioma políticu mui próximu al asturianu mediu del tipu “mientres Espinosa ta nel Ritz yo na Feria de la Xata Roxa en Salas” o “un fuerte apretón de manes asturianes” pa roblar la carta a los eleutores. D’antemano, Cascos cuntaba con una popularidá y conocencia munchos puntos penriba del restu de candidatos/es y foi enllenando auditorios per tolos requexos d’Asturies en díes llaborables, lo que yá adelantaba’l sofitu col que diba cuntar esti 22m.

En cuantes al so programa políticu, amás d’arrodiase d’una bona parte de militancia expepera, tiró en toles sos intervenciones d’una retórica asturiana de “benefactor”, notable/ilustráu qu’apaez n’ayuda d’un pueblu en desaniciu. La recuperación del “arguyu de ser y sintise asturianos”, el votu pseudorrebelde escontra los corruptos de PPSOE y el mitu -qu’esite dende hai munchu tiempu- de ser “la figura que más fexo por Asturies dende Xovellanos” ficieron lo demás. Si a esto-y sumamos l’emplegu indistintu del términu “país” al estilu del ilustráu xixonés -el de verdá, el del sieglu XVIII- y la presencia -más simbólica que de pesu- d’asturianistes como Carlos Rubiera (conceyal inesperáu en Xixón) y Inaciu Iglesias (conceyal en Noreña) tenemos un cóctel tan nuevu como raru na especifidá política asturiana.

El tiempu dirá si fai por presentase a les eleiciones estatales, y formar un grupu parllamentariu en Madrid, y si’l so populismu va tirar pela sienda de la privatización y recortes sociales al estilu de la so amiga y confidente Esperanza Aguirre o, pel contrariu, por un apueste más paternalista -anque tamién ultraneolliberal, por supuesto-, de “presuntu padre de la patria asturiana” que quier que-y faigamos una estatua cuando fine, d’intercesor ente’l gobiernu estatal y Asturies, más averáu a esa supuesta vocación xovellanista que tanto paez gastar.  De mano, habrá que recordar la so trayeutoria franquista y qué partíu-y va dar la presidencia d’Asturies. Acéutense apuestes, y paez que Xandru Fernández tamién anda a la gueta de rempuestes.

PPSOE, l’establishment corruptu asturianu, “on sale”

Nun paga la pena analizar muncho más de lo que yá venimos faciendo perequí la situación de los dos partíos corruptos estatales n’Asturies. El PSOE y les polítiques ultraneolliberales coles que sigue faciendo más ricos a los ricos y más probes a los probes vien de recibir una mocada d’órdagu per parte d’esi eleutoráu que tien muncho más d’esquierda qu’ellos y que -tamién yá-yos val- ye traicionáu per enésima vegada dende que Franco morriera y el monarca nos empresta un día d’eleiciones cada 2-3 años aproximadamente.

Como consecuencia de la hecatombe del neolliberalismu sociata, el PP -exerciendo de partíu turnista a más nun poder- recibe’l mayor de los sofitos na so hestoria nel estáu mientres que n’Asturies, colos colores sacaos por un Cascos que nun tará faciendo otro qu’afilar la cadena de la motosierra pa gobernar, nun saben entá ónde se meter y qué facer: si cellebrar la victoria de la derecha que los dexa en ropa interior na Xunta Xeneral y nos ayuntamientos (Gabino, Pardo tremái) o si dir reasitiándose nun panorama políticu nuevu onde hasta LNE yá rinde honor al nuevu llíder.

Sicasí, el futuru pal PSOE ye inda más prietu, como apunta Faustino Zapico. Con un Javier Fernández medio lloramingando y una élite política investigao por corrupción qu’agora tará pasando’l polvu nos muebles de la conseyería, namás-yos queda’l recursu d’esperar a los recortes del nuevu gobiernu asturianu y estatal pa engordar les dignes pero probes movilizaciones que la esquierda real vien desendolcando toos estos años. Les cais van tar interesantes y habrá que tener munchu procuru pa evitar al máximu que PRISA-PSOE-UXT-CCOO tornen a rentabilizar tol trabayu nes cais, reorientándolu dende elles nós a posiciones de tresformación y non de reforma.

IU, la gran beneficiada, ensin merecelo n’Asturies

A pesar de cargar col muertu (xustu) de gobernar hasta les últimes consecuencies con un PSOE n’aplicación masiva de toles midíes escontra los y les trabayadores, IU sálvase de la quema y llogra resultaos históricos en sitios como Mieres, Ḷḷena y otros conceyos, amás de nun acusar na Xunta Xeneral nin les ruptures internes pel llau asturianista (Bloque por Asturies) nin pel llau del PCE (Frente de la Izquierda, que namás salva los muebles en Llangréu).

A una IU con un discursu muncho más descafeináu no asturiano de lo que nos tinía avezao -que nun yera muncho-  beneficióla abondo’l clima de cierta conflictividá internáutica encarnáu nel movimientu #democraciarealyá nel conxuntu del estáu, onde puede tar faciendo un llabor menos patéticu que nesti país. Tamién-yos favorez el ser l’alternativa más próxima haza la esquierda de los votantes desencantaos/es cola llaceria del PSOE, nun penalizando como sí venía pasando, los sos pautos-alcuerdos políticos en conceyos y Xunta Xeneral onde sí se taben y tán desendolcando polítiques de retrocesu nos derechos sociales.

Amás, agora, fortalecida y ensin posibilidá de cayer en más incoherencies énte la non posibilidá de reeditar el pautu a nivel nacional, ye’l momentu nel qu’IU va tornar a pescar nel caladeru de la esquierda de la cai que queda ensin referentes nidios al fracasar les otres opciones pela esquierda y pel asturianismu que pudieren dar abellugu a eses reivindicaciones.

Los nuesos, en tierra de naide, pasando la cuerda ensin rede

Nun son unes bones eleiciones pa la esquierda asturianista/soberanista. Nun lo son, principalmente, poles propies aspiraciones irreales xeneraes que faen qu’agora unos resultaos esperaos seyan una llábana muncho más pesada pa xestionar de lo que debiere anque tengamos munches notes positives que poner. Esta vegada, como cásique siempre nesti mundín, la xornada de reflexón ha facese agora.

- BA-UNA, gol en propia, xugando en casa

En primer llugar, la coalición Bloque por Asturies – Unidá Nacionalista Asturiana algama unos resultaos insuficientes y non presentables como positivos atendiendo a la campaña desendolcada, les esperances puestes, la imaxe proyeutada y el futuru que se-y esperaba a esi Tercer Espaciu Políticu Asturianu (qu’agora ¿habría ser el Cuartu?).

Tres d’una campaña bona, mui bona, quiciabis la meyor de la historia del nacionalismu en cuantes a imaxe corporativa, diseñu, atención de los medios y repercusión social, qu’a la fin sí tuvo un programa eleutoral completu -anque tarde y quiciabis demasiao de mínimos-  Bloque-UNA nun algamó l’oxetivu imposible col que diba a tumba abierta. Compromisu por Asturies quixo xugar al funambulismu ensin rede nin experiencia y apostalo too a vida o muerte ensin probabilidá nenguna d’éxitu. Per un llau, pa xugar a esto hai que cuntar con una persona mui conocida, carismática, que nun foi’l casu, recordamos agora a un Valledor amortizáu, que tampoco diba ser la solución a los problemes de los qu’adolecemos (falta de compromisu militante, precisamente, ente otres).

Dos conceyales (más los trés de Nava que nos lleven emprestando a la esquierda soberanista la xente del conceyu sidreru años y años) nun son un resultáu dignu pa lo que se pretendía y vendía. 6800 votos nes meyores condiciones que vamos tener en munchos años (la visibilidá obligatoria del Bloque na TPA y medios privaos acaba d’expirar) saben a mui poco, y más teniendo en cuenta qu’estratéxicamente de xuru que se ficieron concesiones ideolóxiques pa da-y esa supuesta “seriedá” o rebaxa na “radicalidá del discursu” que lu faiga más abiertu y qu’obliguen a que’l votante convencíu arrenuncie a una parte de la so ideoloxía pero que tampoco valen pa convencer masivamente al votante non “soberanista”. Amás, da la sensación de que se xugó con militancia y simpatizantes nún experimentu sociolóxicu peligrosu: facer por convencer a la xente de que se diba a “consolidar un diputáu” y “sacar una diputada”, amás de reforciar la rede nos conceyos. Resúltame hasta cruel agora’l recordar el famosu sondéu internu que-y daba un diputáu pela circunscripción central al BA-UNA, onde se dicía que’l 80% de la xente conocía a Rafa Palacios.

Resúltame mui cruel pensar que se mandó a muncha xente un mensaxe que, más alló de l’ambición -que facía falta y muncho nesti espaciu políticu de la esquierda soberanista- foi más bien condergar a un golpe durísimu a una militancia y públicu necesitaos de llogros que güei, miércoles, inda nun dieron col cuerpu en suelu d’esa cayida llibre.

D’esta miente, rescampla la verdadera capacidá d’una marca que coyunturalmente tinía un diputáu que supo exprimir bien y tolo que se pudo, que tien una militancia imaxinativo, mozo, preparao y con ganes y capacidá pa facer coses prestoses, pero que nun tien un respaldu suficiente como pa marcase sigún qué oxetivos o permitise’l lluxu de prescindir d’una parte del movimientu organizáu na esquierda soberanista.

Habrá que reflexonar mui muncho, apuntar mui bien los aciertos -que los hebo y abondos, de los qu’habrá que deprender pa siempre (esi actu central en Xixón)- y marcar a en colorao los errores y atayos ensin xida crónicos, y más teniendo en cuenta qu’esi procesu qu’intenta la unidá dende’l 2003 va dexando p’atrás en cada comiciu a una parte importante de la militancia y corrientes internes.

- Conceyu Abiertu, salvando los muebles en Noreña

El proyeutu de Conceyu Abiertu surdía con unos oxetivos dafechu diverxentes a los que proyeutaba Bloque-UNA: el trabayu a nivel llocal, dende la base, con unos finxos ideolóxicos mui claros, de corte nuevu nel furrulamientu, dando voz a la xente de los pueblos pa que se representare a si mesmo. Al tiempu, tamién se tuvo presente pa les eleiciones al parllamentu, con un resultáu anecdóticu pero que taba tamién no esperable.

El trabayu políticu desendolcáu foi exemplar en Noreña, cola presentación de firmes previes pa respaldar y afitar la candidatura, col diseñu pasu a pasu en conceyos abiertos de los programes políticos, cola implicación total de l’asamblea pa decidir candidatu, con un trabayu a nivel de cai mui bonu…que dio los resultaos que merecía hai yá munchos años. Otru exemplu bonu taba en Grau o en SMRA -nun digo que nel restu tampoco-, onde se siguieron dinámiques menos espectaculares qu’en Noreña pero tamién d’afalagar.

Con too y con ello, hai que dexar claro que Conceyu Abiertu, una fuercia creada mui poco enantes de que se cumpliere’l plazu d’inscripción como consecuencia de la non posibilidá d’apautar nada en claro Andecha Astur con Bloque-UNA -fechu que yá foi criticáu nesti espaciu- salva los muebles col llogru de Noreña, que non por esperáu ha ser menos cellebráu.

Sicasí, tamién hai que facer equí delles considerances crítiques: la decisión de presentáse a les eleiciones nacionales nun-y reporta nengún beneficiu a la siegla nin al proyeutu, porque Conceyu Abiertu nun ta a lo mesmo que los partíos tradicionales, o polo menos, nun lo debiere facer na mio opinión. Presentáse nestes eleiciones nacionales nun perxudicó a naide -toles opciones tienen derechu a facelo, tamién ye verdá- pero ye evidente que nun cuayaba nada bien dientro d’un modelu de participación dende la base de los conceyos y foi una oportunidá perdida p’amosar a los simpatizantes y al públicu en xeneral que nun se ta pola confrontación sinon por una estratexa estremada que tien que tener confluencia enantes o dempués col restu de persones y organizaciones.

En cuantes al modelu de CUPX, fracasó estrepitosamente. Ye cierto que cuntó col silenciu mediáticu, pero sistemáticamente tuvo en griesca cibernética y nes cais con otra xente de la esquierda de Xixón (el seutor del PCPE, la CSI…) que llevó al sapiazu eleutoral y a deprender una llección pa próximes entregues. Asina, habrá que replantegase les formes y los actores políticos colos que se trabaya pa evitar una llaceria asina en futures ocasiones.

Tampoco podemos dexar de comentar lo vergoñoso que ye pa tola esquierda soberanista lo asocedío en Villaviciosa, onde la xuntura de les candidatures a nivel municipal de Compromisu por Villaviciosa y Conceyu Abiertu supondría un conceyal seguru. Anque tengo datos d’una parte, nun m’arriesgo a dicir qué pasó pa qu’eses dos candidatures se pisaren la una a la otra y dexaren pa prau la representación asturianista d’esquierda nel conceyu maliayu. Esti tipu d’actitúes han ser erradicaes d’agora n’alantre en tolos conceyos onde heba duplicidá de llistes y ye responsabilidá de toles partes ¡toes! que nun torne a pasar ¡facéi’l favor, ho!

Con too y con ello, munchos ánimos tamién pa Conceyu Abiertu. Agora toca entamar a trabayar en milenta conceyos más con agrupaciones asamblearies y horizontales y facer de Noreña exemplu d’un modelu de democracia direuta que tea basada na voz del pueblu. Ye la hora d’amosar qu’otra manera de facer política ye posible pa entamar a dar otra traza a los conceyos asturianos. Pasu ente pasu, ensin priesa, onde heba xente abondo, y a por ellos, ensin dexar de pensar en tender les manes a lo que pueda venir, poniendo tolos firewall posibles a cualesquier actitú de ghettu, autodestructiva o sectaria que yá nun cabe nel futuru d’equí p’alantre. Ye la vía seliquina, pero ye la vía meyor, la que más s’avera a lo que queremos pa una Asturies del futuru.

- Unión Asturianista (URAS-PAS), adiós mui bones

Anque esta seya una formación non inxerta na esquierda soberanista, nun podemos dexar de constatar el notable baxón eleutoral que lleva a la fin de la carrera política de Xuan Xosé S.Vicente, una de les figures más conocíes (pa bien y pa mal) del asturianismu políticu nos últimos 30 años. Dexa tres de si una organización que lleva a rastres la siegla y que’l tsunami Cascos afogó dafechu. Esperamos noticies de los militantes qu’inda queden nesi perdesgastáu Partíu Asturianista, que se dicen progresistes y asturianistes sigún los sos estatutos. L’asturianismu post-Xuan Xosé, anque yá fuere una realidá práutica, merez que la siegla nun quede arrequexada nel caxón de la Lliga Asturiana o la Coalición Asturiana, quiciabis tenga entá dalgo qu’aportar al escenariu políticu asturianu a nivel nominal.

Un abrazu tamién pa la xente mozo del PAS, qu’agora puede tener un papel simbólicu nes dinámiques que se xeneren inmediatamente dempués d’estos comicios nefastos pal soberanismu y la esquierda en xeneral. Ser quienes a reasitiase nun panorama desfechu dafechu dientro d’esti movimientu de la esquierda asturianista o soberanista diba ser una virtú d’agradecer.

25 de mayu, día de la Nación Asturiana. Y agora…¿qué?

La esquierda soberanista/asturianista/nacionalista ta, anguaño, nel puntu de mayor indefensión de los últimos años. Desplícome: nun existe una rede física, nin militante, nin política, nin social qu’articule nada que de lo que tar arguyosos. Vamos per partes.

Nel tarrén puramente partidista nun hai nengún tipu de referente afitáu. Nin Unidá Nacionalista Asturiana, con ciertes tensiones internes evidentes ente y dientro de les propies families d’Izquierda Asturiana y Andecha Nacionaliega, nin el Bloque por Asturies, nin muncho menos Andecha Astur (sensu stricto) son formaciones merecedores anguaño de tener un papel dominante na articulación del proyeutu de la propia esquierda soberanista. Nenguna de les formaciones lleva voz cantante dalguna, nin tienen lideralgu o autoridá ideolóxica sobre’l restu del movimientu. Escocia nun tien rei.

Na estaya de mocedá, la situación ye dalgo menos enguedeyada pero nin muncho menos más esperanzadora. Darréu, Fai!, UNA-Mocedá/Bloque de la Mocedá Asturianista son les organizaciones que podríen merecer nesti espaciu. Ente estes, namás les dos primeres tienen desendolcao una actividá constante y militante y dambes tán en situación de stand by afogaes pola dinámica eleutoral, más entendible nes mocedaes vinculaes a Andecha Astur que nel segundu de los casos, qu’habrá qu’analizar más posao col tiempu. En cualisquier casu, nenguna de les citaes tán en condiciones anguaño de tornar a dinámiques de trabayu sistemáticu y con ilusión pa construyir dende la mocedá referentes válidos y una rede asociativa digna. Ye evidente,

Ente les organizaciones sociales y plataformes la cosa nun ta meyor:  l’Ensame República Asturiana muerre énte la indiferencia d’una parte de la esquierda soberanista qu’enxamás-y dio un migayín d’opciones de trunfar o de ser lo qu’estes organizaciones quixeren, la Xunta pola Defensa de la Llingua, anque independiente políticamente, vive ún de los piores momentos de la última década, tranquen les llibreríes asturianistes Paraxuga, Trabe y Alborá, pieslla’l Chigre La Casa Posafuelles y quedamos ensin frentes de llucha nin abellugos físicos pa la esquierda soberanista qu’habrá que construyir lladriyu a lladriyu.

Podemos dicir a les clares que l’atomización del soberanismu/nacionalismu asturianu yá llegó a les partícules indivisibles: l’individuu. Les organizaciones amosaron la so incapacidá p’articular un puntu común nel que participar toos y toes xuntos/es. Yá nun ye’l momentu de sentar a cabezaleros/es a falar porque nun hai nada qu’encabezar. Ye hora de dar la palabra al y a la militante, ensin siegles, ensin chapes nin banderes, la hora d’echar mano de ferramientes de participación asamblearies que nos permitan debatir, charrar, conocese, discutir y tomar decisiones conxuntes. Ye la hora de que se xunte la xente y non les organizaciones, de la converxencia de persones d’ideoloxía próxima y marcu territorial idénticu ensin consignes nin llamaes al orde penriba del individuu. Ye la hora, tamién, de dexar de tar incómodos/es nesti espaciu, d’amosar arguyosos/es una formación política que xustifique los posicionamientos ideolóxicos , de mirar pa los convencíos/es y non tanto pal eternu trabayu de “convencer” a esa xente d’afuera que refuga cualquier visión nacional de los nuestros fechos culturales o del conflictu de clas n’Asturies. Hai qu’afitar una base militante qu’eche 5 hores selmanales a militar por y pal país y la so xente.

Pero pa ello hai que caltener un autocontrol total na manera d’amosar les diferencies ente comilitantes, emplegar los mecanismos asamblearios col escrúpulu y respetu absolutu que los compañeros/es y los ideales merecen y presentáse énte la sociedá como un grupu que seya quién a facer frente a los ataques culturales, nacionales y de clas que vamos sufrir nesti nuevu contestu políticu.

Nin que dicir tien qu’esti contestu ye mui difícil que se dea anguaño n’Asturies (superar les rocées, aceutar les crítiques, arrenunciar al francotiradorismu -y equí’l primeru-), pero munchos nun nos damos y naguamos por que se xeneren les dinámiques afayadices. Nos exemplos d’aplicación de la democracia direuta qu’en munches acampaes d’Asturies y la península se tán dando tenemos bonos exemplos pal debate y l’autoorganización.

¿Sedremos quién a ello? ¿Dexarán les organizaciones vía llibre pa que la xente s’esprese -cada militante una opinión-?

Nin nos afogamos nin vamos desapaecer. Agora ye’l tiempu de que la xente llevante la so voz penriba de les cadarmes – calabres organizativos. Cola palabra per delantre. ¿Vémonos embaxo’l texu a les **:**?

Güei ye 25 de mayu. 203 años dempués de la declaración de soberanía, la creación de la bandera asturiana y l’Exércitu Defensivu Asturianu. ¡Puxa’l Día de la Nación Asturiana!

Compártilu

Cada vegada tán más averaes les eleiciones del 22 de mayu y nun dexen d’apaecer novedaes cásique a diario no que cinca a la presentación de candidatures, modelos de precampaña, sondeos y programes eleutorales.  Prestaríame sorrayar, enantes de siguir,  l’aquel máxico que tienen los comicios, siendo capaces de poner en “llímites Fukuxima” la concentración d’hormones de la población militante o concenciao políticamente (y más nesti requexu ideolóxicu común a nós).

Ye un momentu onde facemos batalla de cada comentariu expresáu y de cada artículu na prensa  y dexámonos engañar, como siempre, con unes eleiciones regalaes pol réxime parademocráticu que carecemos. Escaecemos demientres pasen estos trés meses que poco o mui poco podemos algamar dempués del  recuentu de los cachinos de papel reciclao mal impreso que Rubalcaba y el poder indie-pedante xudicial del PPSOE dexen poner nes escueles eleutorales; que lo importante vien dempués, el 23 de mayu y el 24, y el 25…que, como diría’l Subcomandante Marcos, “Nada nos va ser dao; nada que nun seya lluchao por nós; nada va ser pa nós regalao; nada que nun arrinquemos vendrá a ser de la nuestra casa; nada que nun lluchemos va vivir ente nós”, esto ye: a trabayar, a trabayar, a trabayar, a trabayar, a trabayar, a trabayar y a considerar que les eleiciones son un momentu clave como cualquier otru nel llabor a desendolcar por un coleutivu políticu, pero de xuru que non el más importante. ¡Que nun nos entre a naide la galbana’l llunes posteleutoral dempués salga too bien, mui bien o mal! ¡pa les aguyetes…más trabayu!

La coalición Bloque-UNA: una bona precampaña ensin munchu compangu ideolóxicu

La xente de Compromisu por Asturies vien dando anuncia, dende la rueda de prensa onde se presentaba la candidatura a la Xunta Xeneral, de delles candidatures llocales como les de Nava, Gozón, Siero, Carreño, Llaviana, Ḷḷena, Casu, Samartín, Uviéu y Xixón onde hai -igual ye una impresión personal- más representación de llau del Bloque por Asturies que del restu d’organizaciones de la coalición. Tamién ye de sorrayar qu’hai sitios nos que se tán presentando llistes que Palacios acertadamente nomare hai tiempu “de paracaidistes”, ye dicir, onde nun hebo trabayu previu de la coalición nin presencia dala. Sí ye verdá qu’en toes elles hai una perbona escenografía, colos candidatos a nacionales y plotter de fondu y con más o menos cobertoria mediática. La estratexa de la coalición ye la repetición al máximu en toes elles per parte de los candidatos/es presentes de los sos puntos fuertes o pallabres tótem, siempre nesti orde: “Una alternativa dende la izquierda, l’asturianismu, l’ecoloxismu y los movimientos sociales”.

Les candidatures preséntense arropaes pola xente de la candidatura dando sensación de bona organización ya implicación, anque n’ocasiones échase mano d’una “titulitis” mal entendida pa endolcar la llista o a les persones, de tal manera que paez que la militancia n’otros espacios anguaño o antaño ye o fai pedigrí personal de cada individiuu, lo que ye mui poco xeneroso pa colos movimientos sociales nos que se diz tar sofitaos/es y un erru endémicu de les organizaciones que se presenten a les eleiciones. Pa finar, échase en falta la existencia de programes y midíes concretes a desendolcar polos futuribles cargos políticos. Nesti sen, lo único sorrayable ye una campaña de tipu pop afalando a la llimpieza nes alministraciones dientro de la precampaña del “O2″ asoleyada nos últimos díes y onde s’esbocen delles propuestes más o menos desplicaes ensin sofitase en custiones identitaries -más alló d’emplegar una fórmula billingüe-.

A too esto, Bloque-UNA vien d’asoleyar un sondéu internu que-yos otorgaba un 3.3% de los votos y un diputáu, amás d’una “victoria de la esquierda” (citando a Europapress, entiendo). Abúltame más una bona manera d’intentar animar al votu y a la redolada ideolóxica a sumase al proyeutu qu’una encuesta a tener mui en serio. Nél apaecen datos inverosímiles, como qu’al candidatu d’UPyD lu conoza un 70%, a Palacios un 80% o que Cascos seya menos conocíu qu’Espinosa o Javier Fernández. Namás espero que si los resultaos nun son los esperaos pola encuesta -¡oxalá lo seyan!- o son mui estremaos nun seya un güelpe demasiao fuerte nin un motivu pa facer la gracia interna o esternamente. Que’l bon intentu d’asomar el focicu na prensa y énte la sociedá nun valga pa que-y dean a ún un mocazu de baldre.

Con too y con ello, habrá que dicir que probablemente teamos ente la campaña más del estilu/ asemeyada a la de los partíos tradicionales que se fizo nunca dende’l nacionalismu/soberanismu. Si esi yera l’oxetivu ta cumpliéndose d’una manera mui notable, anque, por supuesto y per descontao, esperamos y confiamos en que’l resultáu nel proceder dende’l 22 de mayu n’alantre nun siga esos mesmos calces, claro ta.

Les candidatures de Conceyu Abiertu: delles lluces rellumantes na nueche

Conceyu Abiertu, pol propiu modelu del proyeutu horizontal y asambleariu que bien prestosu resulta enriba la mesa, tien una manera menos espectacular d’apaecer n’escena pero non por ello menos efectiva a mediu y llargu plazu. Ye verdá qu’engrasar la maquinaria d’unos coleutivos que furrulen d’una manera mui estremada al de la mayoría de les organizaciones tradicionales ye bien abegoso, pero hai delles custiones que tán prestando o que, polo menos, resulten nueves dientro’l panorama. Yá hai presentaes candidatures en Noreña -sitiu aparentemente onde hai mayor posibilidá de sacar representación-, Grau -onde guaña un conceyu que nun existía hasta estes eleiciones con unos primeros testos que me dexaron clisáu pa bien-, Xixón, Villaviciosa -ú sedríen d’agradecer bones nueves d’equí pa poco-, Llangréu y Samartín -con bon trabayu históricu del soberanismu-, pel momentu.

Ye de sorrayar lo llamativo del trabayu que se ta desendolcando, siguiendo siempres un proceder qu’entama pol llamáu a “conceyu abiertu”, el diseñu d’unes exes básiques pa, dempués, tornar a aconceyar pa escoyer una llista de candidatos y candidates -por imperativu llegal- pa ponelos/es, sigún los programes, al serviciu del propiu conceyu abiertu a la participación de tolos y toles vecinos/es; un modelu qu’anque supuestu nes organizaciones de la esquierda (y na asturiana neto que nes demás) nun se suel cumplir cásique nunca, polo que Conceyu Abiertu afonda nun modelu de democracia direuta ensin radicalismos estéticos faltos de conteníu, sinón tolo contrario: efectividá, participación y honestidá.

El casu concretu del conceyu de Xixón merez comentariu aparte. Per un llau, en Xixón C.A. da un pasu alantre que de primeres paez mui interesante: igua una candidatura conxunta col nome de Candidatura d’Unidá Popular de Xixón (CUPX) onde se participa xunto a xente de la vieya guardia’l PCA (Frente de la Izquierda), Izquierda Anticapitalista (IZAN) y con sofitos sindicales perconocíos en Xixón y n’Asturies. Los primeros puntos programáticos asoleyaos son mui asemeyaos a los que Conceyu Abiertu vien defendiendo, incluyendo un separtáu nel que s’esplicita la defensa de la “llingua y cultura nacionales d’Asturies”, cosa que constitúi una mui bona noticia cuando ye asumío con normalidá nel ambetu llocal por xente d’una parte de la esquierda mui refractario históricamente a esti discursu, lo que yá ye un trunfu en sigo mesmu. Siendo como ye Xixón el conceyu con mayor población del país y onde nun hai posibilidá nenguna de qu’organizaciones pequeñes al marxe de PPSOEIU algamen resultaos dignos, ye bona pena que Bloque-UNA nun aprovechare la posibilidá d’axuntar fuercies a nivel llocal. Tamién diba ser mui interesante que la xente del PCPE-Asturies participare nesti procesu, anque paez imposible por razones que nun soi a atalantar ensin más datos. Pa finar, ¡oxalá se reproduza esta dinámica n’Uviéu! Que la esquierda soberanista consiga que delles reivindicaciones históriques, anque seyan toponimia, cultura y llingua seyan asumíes por una parte de la esquierda ye un gran pasu alantre pa la normalización de los nuestros derechos como pueblu y un motivu de gayola pa la propia esquierda seya estatalista o asturiana.

Dicía nel últimu artículu d’esti blogue que “na mio opinión, sedría mui intelixente per parte de Conceyu Abiertu’l nun se presentar más que nos conceyos onde heba capacidá y dexar estes eleiciones onde nun hai nenguna posibilidá de facer nada granible. Si son 5 conceyos namás nos que se pue que lo seyan: lo importante ye’l trabayu de cara al futuru. Al tiempu, el nun presentáse a la Xunta Xeneral sedría toa una declaración d’intenciones y d’arrogancia  pa nun dexar tierra quemao con otres organizaciones de cara al futuru.”

Sigo calteniendo pallabra por pallabra lo mesmo. Que Conceyu Abiertu trabaye poniendo la mirada nel futuru sabiendo, qu’anque agora tea muncha xente mozo detrás, el proyeutu ta maureciendo y les idées bones resulten innovadores y fresques nuna Asturies onde les maquinaries pseudopolítiques de los partíos tradicionales tan a piques d’acabar aferruñaes. Precisamos más que nunca l’organizar a una masa social descontento coles dinámiques neolliberales y etnicides de los partíos españoles n’Asturies.

Paraxuga, pieslla.

N’otru orde d’asuntos, nun se puede pasar per alto una permala noticia pal soberanismu asturianu y pa la cultura en xeneral: l’artículu que lleo nel blogue de David M. Rivas onde s’anuncia que tranca la llibrería Paraxuga d’Uviéu. Desapaez ún de los pocos requexos nos que mercar llibros n’asturianu con ambiente propiu. Ye verdá que’l sitiu que tinía agora nun yera especialmente bonu, ye verdá qu’esta puta crisis capitalista nun dexa a naide con cabeza, pero tamién ye cierto que dende’l soberanismu/asturianismu ficimos mui poco por promocionar esi espaciu de llibertá llingüística onde s’axuntaba música, ropa, arte y otres caxigalines cola lliteratura asturiano. Quedamos resignaos/es, d’equí p’alantre, a la puxarra de seiciones onde les grandes llibreríes tresnacionales arrequexen a la lliteratura de nueso. Otros proyeutos “lliterarios”, por llamalos de dalguna manera, siguirán alantre vivos, faciendo un trabayu de plegamientu al poder que mande, seya’l PSOE-IU-LV-etc o los futuribles FAC-PP.  La mio última vegada en Paraxuga foi esti fin d’añu, enantes de tornar a 867 km del mio Llar, pa mercar un llibru, un repegu de l’asturina y una asturina y paez que-y garro inda más ciñu al cachín de tela qu’anda escolingáu agora mesmo a la mio espalda, como si fuere un recuerdu de guerra. Si tenéis ocasión, nun dexéis de pasar una última vegada per Paraxuga pa mercar daqué y esperar a que vengan tiempos meyores onde l’asturianu torne a tener un abellugu dignu n’El Paraísu.

Agora, apiertar el dentame ensin arrenunciar a nada

Quedando como queden estos 50 y picu díes enantes de les eleiciones, unes últimes pallabres d’aliendu pa la xente de la esquierda soberanista qu’anda dende hai meses preparando proyeutos nuevos y axuntando fuercies nos estremaos ámbetos sociales: de muncha de la vuestra xera n’aquella nación arrequexada más alló del altiplanu dependerá’l futuru próximu del país. Que naide se queme con caxigalines: avancemos ensin torgues y de memoria p’haza una Asturies d’asturianos y asturianes viviendo llibres nel cachín más guapu de la Tierra.

Y, dempués de les eleiciones, a blindar les organizaciones y a reforciar los finxos ideolóxicos de la esquierda soberanista pa qu’enxamás tornemos pela sienda del vivir de rodieyes, del poner la mano al que manda, o del arrampuñar migayes de pan duro. Que’l movimientu d’emancipación social y nacional asturianu seya exemplu de compromisu y de coherencia pa cola militancia y les y los votantes. Qu’entame un tiempu nuevu nes rellaciones ente persones y organizaciones y, toos a comuña, trabayemos por una Asturies arguyosa nun mundu xustu.

Compártilu

Sigo col rixu de siempre les noticies que van apaeciendo nos medios dixitales no que cinca al procesu eleutoral del conxuntu d’organizaciones que podríemos asitiar na esquierda soberanista. El capítulu postreru ye’l comunicáu asoleyáu pol Bloque por Asturies y Unidá Nacionalista Asturiana nel selmanariu Les Noticies.

Creo qu’hemos d’analizar esta anuncia como una manera de ganar tiempu per parte de dambes organizaciones que lleven mui retrasáu’l procesu de cara a presentar una alternativa amañosa pa les eleiciones d’esti añu nel que yá tamos. Si facemos apreciu d’anteriores comunicaos, yá va pa un mes que la sociedá asturiana, o a lo menos los que tamos un poco más averaos a esti espectru políticu, debiéremos conocer qué vamos a topar nel mes de mayu. Y paez que va pa llargo y, nun sé, si pa tolo bien que munchos/es esperábemos.

Dexando un poco de llau les posibles causes que tean aseleciendo’l desendolcu de los acontecimientos -diben ser suposiciones más o menos acertaes y de difícil desplicación- y que’l procesu de converxencia nun va ser -paez ser-, y yá me cafia, realmente unitariu, sí que me prestaba analizar un puquiñín qué tipu de furrulamientu/comunicación se da ente organizaciones y persones de la esquierda soberanista (siempre falando de partíos, organizaciones, independientes, etc).

La non existencia d’espacios comunes físicos y estables de trabayu en comuña: el pogu de militantes y organizaciones

Cenciellamente, nun hai: nun tenemos sitios dalos onde coincidir la xente de la esquierda soberanista. Nun falo d’ociu nin de los pogos del próximu conciertu de Dixebra. Por ciertu, bien guapa ye la metáfora del pogu pa falar de la interaición ente persones y organizaciones de la esquierda soberanista. L’asuntu ye esti:

Toos y toes (militantes, independientes, concenciaos/es, averaos/es, permeables…) vamos a los conciertos de Dixebra polo que representen: compromisu políticu + tresmisión d’un mensaxe social y nacional bien curiosu + folixa con mocedá que comparte unos mínimos ideolóxicos. Toos y toes ximielgamos el cadril -d’aquella manera- al mesmu son y glayando lo mesmo, baillamos abrazaos/es a los/es nuesos/es collacios/es.

De sópitu chocamos col d’al llau: conocémonos d’otros conciertos, sabemos que vamos coincidir nel siguiente, cruzamos miraes, sabemos que sabe les lletres y que tamién les comparte.  Si nel choque soltare un puquiñín el coldu devolvémos-y l’emburrión enfadaos y multiplicáu x5 en puxu pa quitalu d’en mediu. Y poco más.

D’esta miente, a la fin, nin siquiera-yos ponemos voz a esos y eses que davezu salen tres de les pancartes d’Andecha Astur, Darréu, Unidá Nacionalista Asturiana, Fai!, Sofitu…Nin siquiera sabemos más que de lloñe d’au son y a qué se dediquen. Nun nos axuntamos pa desendolcar nengún tipu d’actividá política, nin personal, nin pa charrar nin pa contraponer opiniones. Vivimos en burbuxes de xabón efímeres que cuando s’averen españen. Confiamos en que, embaxo de la so militancia, escuéndese’l mal encarnáu y facemos estensibles los errores que pudieren tener les sos organizaciones al tratu personal.

Más interaición política con xente menos averao ideolóxicamente

La mio esperiencia personal dizme qu’en dellos años de militancia nuna o n’otra organización política fino coincidiendo más con xente d’organizaciones como’l PCPE/CMC, PCA/JCA o IZAN que con xente d’organizaciones de la esquierda soberanista. Nin nel ámbetu universitariu, nin nel antibelicista, nin nel antirracista, nin nel feminista, nin nel ecoloxista, nin del propiu de mocedá…

Cuando falo de coincidir, por supuesto, hai que lo dicir: refiérome a BREGAR, vivir a la griesca pa que les actividaes salgan n’asturianu, pa qu’Asturies seya’l marcu estratéxicu d’actuación,  pa dexar albintestate incoherencies nos sos discursos supuestamente izquierdistes que munches vegaes chocaben no nacional etc.

Nun soi a imaxinar un escenariu más murniu qu’esti, onde trabayar con xente que pon más torgues ideolóxiques se fai, increyiblemente, más cenciello que facelo coles organizaciones más próximes. Asina, tenemos que nes “cites” añales más importantes la esquierda soberanista como movimientu queda descordinada dafechu. 1u de mayu: FALLU, 25 de mayu: FALLU, Día les Lletres: FALLU, 8 setiembre: FALLU, ochobre: FALLU, 8 de marzu: FALLU, 28 de xunu: FALLU, Mani Antitaurina: FALLU…y caro, día de les eleiciones…EPIC FAIL.

¿Cómo ye posible que nun seyamos a reblagar penriba d’estes fricciones? ¿Ye sectarismu? ¿Por qué ye esta desconfianza ente organizaciones ya ideoloxíes enforma asemeyaes en condiciones tan precaries?

La necesidá de construcción d’espacios físicos y de debate propios y horizontales nel soberanismu d’esquierda

Una de les torgues más grandes que topamos cuando falamos de la esquierda soberanista ye la imposibilidá de caltener debates de calter internu. Evidentemente, con organizaciones de puxu tan llimitáu y nes que prima más l’aición-posturéu que’l propiu debate y l’asoleyamientu d’enfoques propios, la cosa nun pinta nada fácil. Sicasí, ¿cuálu ye’l motivu de nun tener nengún muérganu oficiosu de debate horizontal ente organizaciones y persones? ¿por qué nun existe nengún foru -por favor, nun falo del ciberespaciu- nel que discutir sobro la bandera asturiana, sobre si 8 de setiembre o 25 de mayu, al rodiu de la territorialidá nacional etc?.

Nun falo d’una tertulia -que tampoco taría mal y yá hai esperiencies nesti sen-, sinón d’una mínima coordinación ente organizaciones tan próximes p’aldericar y dir faciendo un paxu de finxos ideolóxicos básicos y aceptaos colos que trabayar de secute, por nun falar de locales, chigres, centros sociales etc. onde atopar información y material propiu como yá comentábemos nesta otra actualización.

Esto llévanos direutamente a analizar el tipu de participación que se da na propia esquierda en reconstrucción nacional, que garra de los partíos mayoritarios les peores zunes como’l dirixismu, el verticalismu y el despreciu, en munches ocasiones, del/de la militante de base y dexa pa prau el debate, la rexeneración d’idées y praxis polítiques énte la inmediatez de les eleiciones o de la próxima manifestación na qu’hai que “marcar paquete” (sic). Otra manera, nun creo que la reproducción d’estes actitúes correspuendan a que nestes organizaciones heba falta de democracia intencionada per se, sinón más bien a un déficit d’atención, formación y organización interna que nun convida a la militancia a participar activamente, a considerar les organizaciones como daqué propio y a querer ver el so pensamientu espeyáu nelles.

Por un soberanismu d’esquierda participativu y pola recuperación de les ferramientes democrátiques populares: el Conceyu Abiertu frente a la militancia pinza-despinza.

Nun ye ético, nin moralmente aceptable, nin muncho menos práutico que queramos aspirar a rexenerar democráticamente Asturies si nós mesmos nun furrulamos participativa y democráticamente. Eso ye una realidá como un castillete de mina.

Hai que replantegáse claramente qué tipu d’organizaciones queremos y cuáles hemos refugar, lo mesmo que falamos de “tresnar esti réxime pa convertilu nuna Asturies rexenerada”.

Hai que sacar tarxeta encarnada a les actitúes que desmovilicen y que xeneren militantes pasivos pinza-pancarta-qu’entama-la-mani / despinza-que-recoyemos-y-colamos pa tener la capacidá de que non sólo afiliaos/es, sinon tolos/es simpatizantes, seyan a reproducir de manera clara y convencida un mesmu discursu social, ambiental, identitariu, d’igualdá…fuxendo d’actitúes doctrinaries pero tamién de la desideoloxización de los individuos.

Y yá ta bien d’amagüestos previos que valen pa qu’unos pocos pauten y decidan demientres otros poquitinos más queden a la espectativa de qué va ser del so destín militante y ónde van tener que ponese de moñecu pa garrar bandera y/o pancarta na próxima ocasión, xenerando un desfase ente militantes y perdiendo maletes nel viaxe.

Y yá valió, tamién, de plantegamientos del tipu “esto vamos falalo enantes los mayores y dempués yá-yos lo presentamos a los nenos del partíu y, quiciabis a 24 hores del gran actu o de les eleiciones, a los movimientos sociales y/o independientes pa que, a les carreres, firmen manifiestos d’autoflaxelación”.

Faigamos un llamáu a Conceyu Abiertu. Que naide s’engañe, ye posible si naide fai por colgar del pescuezu la medayina de la “iniciativa”, anque esto nun quita pa qu’estos seyan formales, organizaos o operativos, onde tolos/es que quieran puean espresase. Faigámoslo entamando estos espacios d’alderique, por ciertu, con bien d’años per delantre, non a tou trapu 15 díes enantes de meter les llistes, y empobinémoslo más qu’al ermu electoral, al trabayu de concenciación previu y militante del día a día.

¿Cómo -si nun lo facemos asina, en casa-, vamos falar de caxigalines d’ultramegamínimos/valenos de conceutos como “presupuestos participativos”, “democracia participativa”, “ilusión”, “anovamientu”, “rexeneración” o “nuevo”?

Construyir la democracia entama per nós mesmos. Tamos a tiempu d’iguar munchísimes coses trabayando n’andecha, hasta pa estes eleiciones si se quier. Pasín ente pasu, con bona lletra y ensin precipitase, conociéndonos toos de verdá -non de lo que me cuntaron que-y dixeron l’otru día-…

Asturianes/os xuntes/os, organizaes/os, allegres, con ganes de da-y otra traza al nuesu requexu del planeta…y p’alantre!

Compártilu

Les coses avanzaron bien poco dende qu’escribiere un articulín perequí nel qu’opinaba so l’espectru políticu de la esquierda soberanista/independentista/nacionalista asturiana anguaño. Básicamente, les novedaes cuéntense colos deos d’una mano de Tortugu Ninja:

Ún) Cásique nun tornó a orpinar na capital del reinu Zirí. (ver entamu del artículu citáu)

Dos) Valledor faló nos medios y dexó nidio que si quier que lu escueyan los/es afiliaos/es como candidatu y dempués ganar la confianza del movimientín ha tener que depurar muncho les sos apreciaciones al rodiu de lo que ye Asturies, la dimensión y definición nacional del proyeutu políticu, los sos oxetivos a curtiu, mediu y llargu plazu y la so rellación colos sos antiguos compañeros/es de partíu. Quedé un poco asustáu coles sos rempuestes.

Trés) Tamién tenemos nueves dende Andecha Astur, que yá yera hora. Nelles -de manera más bien poco trabayada- Mariu Arbesú amuesa la so disponibilidá (y entiendo que lo fai arriendes de resoluciones internes de los muérganos democráticos del so partíu) p’algamar alcuerdos inmediatos y vinculantes con Bloque por Asturies y Unidá Nacionalista Asturiana que, yá d’aquella, paecía que podíen tener bien amarráu’l so alcuerdu.

Namás dende la humildá pa col restu d’actores políticos sedremos quién a construyir y tresformar esti país

D’unos meses p’acó les rellaciones ente organizaciones del ámbetu nacionalista/soberanista/independentista d’esquierda pegaron un valtu. Les maquinaries d’intercomunicación ente les estremaes sensibilidaes d’esti espaciu a lo menos, llubricáronse y suavizáronse. Hebo hasta la posibilidá de facer un actu precariu -ye verdá- pero que, coles sos matizaciones, tuvo una componente unitaria.

A mi abúltame de caxón l’atalantar esti como’l momentu de dexar atrás les rocées históriques y ponese a la xera. Atención, falo de rocées personales, vieyes zunes y percepciones -de xuru más consecuencia de la falta de contautu que d’otro- qu’unos/es tuvimos pa colos/es otros/es y al revés, non de diferencies polítiques imposibles de reblagar/consensuar nun programa y una llínia estratéxica si queremos da-y otra traza a Asturies y facelo cola remanando’l cazu cola manzorga.

Lo mesmo qu’hai unos años -y voi dicilo de mou crudu y sinceru- consideraba (y sigo analizándolo de la mesma manera) como una verdadera sumisión al lliberalismu españolista del PSOE la postura de Valledor y del Bloque por Asturies, anguaño nun pueo otro qu’albidrar que coles sos trayeutories últimes xeneren la posibilidá de que güei munchos/es suañemos cola oportunidá d’articular un movimientu d’emancipación nacional y social de puxu y alternativu.

Al tiempu, siempre me paeció difícil d’entender l’estilu o la traza qu’Andecha Astur tuvo siempre pa trabayar a comuña con otros coleutivos, persones y partíos, con actitúes suicides/autodestructives que quiciabis namás se podíen entender tando dientro de la organización, cosa qu’agora nun m’impide creyer de manera firme que la so presencia nun proyeutu unitariu non sólo ye importante sinón imprescindible pol so bagaxe ideolóxicu y pol so trabayu militante, dambes al mesmu altor.

D’otra banda, anque m’abultaren munchos los errores de precipitación, improvisación, fuxida haza alantre y falta de valentía de la xente d’Izquierda Asturiana y/o Unidá Nacionalista Asturiana pondría la mano nel fueu pol so altor políticu y pola so voluntá pa sumar y aidar a construyir un abellugu escontra la que ta cayendo nesta dictadura del capital que desanicia la nuesa cultura y sangra a los asturianos y asturianes.

Sicasí, y anque toos tenemos los nuesos errores y enquivocaciones polítiques y personales cróniques, tamos nun tiempu nuevu. Un tiempu nel que se siente un pálpitu -pero non del de Gallardón- qu’afala a animase a quien lu nota.

Tarxeta encarnada pa les actitúes destructives, pal posturéu, pa la esclusión d’actores políticos válidos y pa facer que tornen les griesques avezaes

Si de verdá se quier apostar por un movimientu de futuru, que llanque bien fondo los sos pegoyos, nun valen les torgues. Dende Andecha Astur nun se puede denomar como “maniobra de re-entrismu n’IU” los supuestos principios d’alcuerdu ente UNA-Bloque cola presencia de Valledor y menos dende afuera del procesu. Nun me valen les maniobres más bien primitives onde con artículos espublizaos nel micromundu virtual nacionalista/soberanista/independentista se pretende “aparentar” que se ta por una xuntura -esperemos que non- a la que yá quiciabis arrenunciaren. Ye esencial qu’Andecha Astur nun marée la comida y faiga un apueste sinceru pola negociación. Y cuando falo de negociación falo de nun imponer un modelu propiu, sinón de saber cuálu ye’l so papel y tar al altor de les circunstancies.

Otra manera, dende’l Bloque y UNA tán obligaos a ufrir un marcu dignu pa qu’Andecha Astur tea representada razonablemente nesi nuevu espaciu, onde pueda influyir y falar de tu a tu coles otres dos organizaciones. Nun valen “pre-alcuerdos” si se quier integrar a toles partes, custión básica pa qu’esti nun seya otru proyeutu qu’entame col pie malu. Dende estes dos formaciones han confiar per una vegada na voluntá d’Andecha Astur. Intentalo nun cuesta nada y el saltu cuantitativu y cualitativu sedría ablucante.

Pa finar, ye imprescindible que tolos partíos, una vegada afitaos los alcuerdos, qu’a mi paécenme entá posibles, nun dexen de llau a los movimientos sociales nesa construcción plural. Nesi intre han presentar el proyeutu políticu, han contrastar postures no que cinca a los programes d’acción política estratéxicos ya ideolóxicos y han pidir la collaboración a otres entidaes non electoralistes ensin mieu dalu, que neses condiciones van sofitar ensin resquiebres y sumar anque seya una migayina más.

Nun soi a imaxinar un momentu meyor, metanes d’esta crisis capitalista onde la UE va finar sacando tayada “rescatando” la economía estatal, cuando se ta falando de recortar los subsidios, pensiones y los sueldos mínimos, pa lluchar por una solución de clas pal pueblu asturianu. Defender los nuesos derechos sociales y la nuesa identidá ye too uno si queremos entamar a ser realmente llibres.

Tiempu al tiempu y colos güeyos nos actores políticos implicaos.

Siguimos tresmitiendo dende 866.9 km ≈ 867 km del mio Llar.

Compártilu